Ətefɨ̂aʼ 27

Pɔ̂l ə ndò se ndù ə Lûm

1Ə̀ tè nyi kə sayne nə ghàs nji ə ngwùʼ ə ndu ə Italì, ə fo tsɛsə̀ Pɔ̂l è ghɨə ndɛ ə̀chaʼə mɔ̀ʼɔghe sê tu ə sesokə̀ʼ eghaʼâkè, zə vəynze e nyi Njolòs. Njolòs tè nyi atu se nɔ̂yn ə sesokə̀ʼ kɛ ə tè tɔŋtə nə, “Anɔ̂yn ə sesokə̀ʼ ə Kaysàkè” 2Ghàs ə ndùə ə njiə ə ngwùʼ èghaʼâ kwəynə endaʼ ə Andɨ̀làmityumzè. Ngwùʼ èghaʼâ kwəynə nə zɨ̂yn tè kàyne nyi èpɨaʼtêzè se ndo ndù etipì ə sòlə̀ wàta apàs endaʼ ə Esiyàkè. Ghàs tè piə ə ndô, ə njìə Àlistakùs. Àlistakùs tè nyi wùə àpàs èndaʼ ə Màsèndonyàkè, mə è ndò pə̂yn endaʼ ə Tèsàlonikàzè.

3Tuʼfe komtəfe, ghàs ə ndùə fɨə ə Sindɔ̀n. Njolòs tè nyîə kyi ə̀təm əchûŋ ghè sê Pɔ̂l, ə zà vəyn nə è ndu fe sèsoyn sə vəynse, nə ghənə fo vəyn è fɨa kɛ ə è tè làʼà. 4Ghàs ə ke ndò fu, pîza kə fof etɛke tè tsɛ ə ghàs əshi, ghàs ə ndò ə pàmtə̀ tsɛ endomve apàs kɛ ə fofa tè tsɛ̀ va ətəyn etipì apàs endaʼ ə Sàypulòskè. Sàypulòs tè nyi eluʼ mə ə̀ kyìŋ kâ ke m̀mo. 5Fumə, ghàs ə zà etipì ə tso apàs endaʼ ə Sìlisyàkè è kɨsè apàs endaʼ ə Pàmfilyàkè ə tsɛ tɔynə̂ enjwì ə fengwaŋve, ə tyàŋə̀ nji endaʼ ə Milà apàs endaʼ ə Lisiyàkè. 6Tuə sesôkə̀ʼ nə kɛ ə fe ngwùʼ èghaʼâ kwəynə mə è ndò endaʼ ə Àlèksandilyà sè ndùə ə Italì ə ndə̀mə̀ ghàs ətəyn.

7Se ndò famə, ngwùʼ èghaʼâ kwəynə ə kwìə kə è ghàs sechə sechə sə mtuʼ me tsɨ̀əmè tsɔ̀fə kə ghàs ndu fɨ ə tɔ̂ŋ ə Sìnindùs. Kə fo ə tɛke tè tsɛ endomve ə ghàs əshi, ghàs ə tàʼa ndù eshike. Nyiəmə ghàs ə pàmtə̀ tsɛ̂ kə etipì ə tso ndûə endomve elùʼ vɛ ə fofke tè tsɛ̂ va sə ŋaŋ. Ghàs ə tsɛ̀ tɔynə̂ èndomve ə Kɛ̀p Saymòn ə ndùə fɨ apàs endaʼ ə Klîtkè mə ə kyìŋ nga ke m̀mo. 8Ghàs tè kwiə kə ə tetitepìte tsɛ̂ tɔynə̂ əghɛ tɛ, ə kwìə ə pə̀ tânə̀ elùʼ e tɔŋtə nə, “Sɛf Ambòs.” Luʼ nə vɨnə mə tè va sə tyà sê tɔ̂ŋ ə̀ Lasiyà.

9Ghàs ə tə ndam fumə sə ashìŋə̀ etyâkè, ze ə tyə̀ nə ə ndô ndûke èshike, ghɛ epize kaʼa ə ze kyayn sè ghàs kûmə̀ nə Tuʼ fɛ ə tè zhisə̂ shyə̂ zɛ ə fo kûmə̀ Elɛsè ə sepize ə kwùʼ tsɛ. Pɔ̂l ə ke fo etəftê zɨnə̀ sê ghənə pîə nə, 10“Ghɔnyì ghɨmə, m fe nə se ndò zôyn se ndù əshi, ghɛ epize kaʼa ə ze kyayn sê ghâsènì. Fɨa vɛ e ve nyi ə ngwùʼ èghaʼâ kwəynə nə̀ pofə, ə ngwùʼ saʼte, ə ghɨə kwute.” 11Pîza tuə sesôkə̀ʼ nə kɛ ə tàʼa zɨ eghɛ zɛ ə Pɔ̂l tè pîə, ndə̀mə̀ kə àtuə vəynke eghɛ zɛ ə pɛ̀ ngwùʼ èghaʼâ kwəynə yî wùə vɛ ə è tè shɨ̀nə ngwùʼ tè pìə. 12Luʼ vɛ ə ngwùʼ èghaʼâ kwəynə tè tyə̂m ətəyn tè vachi eluʼ echûŋvè se ndam ətəyn, kûmə̀ nə fofke tè nyîə nyi tsɛ̂sè. Ghɨ tsɨəghe e kɔ̂ŋɔ̀ nə ə ndùə kə shi əfètəyn ènjwì ə fengwaŋve, kə ndû tayn ə Fonìs ə tyəmte fu. Fonìs tè nyi eluʼ vɛ ə ngwùʼse ghaʼa kwəynəse tè ndùə tyəmə ətəyn apàs endaʼ ə Klitkè, ve kyaʼà kɔʼsə̂, kyaʼà tsosə̂. Ə nyì fumə kə ghənə tè nyi se zaʼâ kə shîŋə̀ kɛ ə fofke tè nyì tsɛsè ətəyn mi.

Fof ə tɛke ə kotê ghə̀ Pɔ̂l ə enjwì ə fengwaŋve

13Foffə̀ fe pɔfe ə nyaʼâ se tsɛ̀ mə fe ndo kɔʼ pə̂yn apàs etyə̀ke. Ghɨ ətəynghe ə fe za ə njiə kə nə kwâʼtè ə ghənə̂zè kàʼa ə ze kwəyn. Ghənə ə shìnə̀ kɔʼsə̂ afɨa kɛ ə ke kyiə tyəmsə ngwùʼ luʼve mɔ̀ʼ, ə pàmtə̀ tsɛ etipì ə tso apàs endaʼ ə Klitkè. 14Ə tàʼa mòtè, fof etɛke mə ə tɔŋtə̂ nə, “Fof apàs Ekwùkè” ə ndò pə̂ ə Klît ə nyaʼâ se tsɛ̀ sə atyaʼ sə atyaʼ. 15Fof ətəynke ə tə chiyn ngwùʼ èghaʼâ kwəynə. Ndome tè va se ndù èshike apàs kɛ ə fof ətəynke tè pə̂. Ghàs ə zàmaʼà ngwùʼ ətəyn sê fof ətəynke nə ke ndu nâʼàpî ghayn è zə̂ynzè. 16Ghàs ə pàmtə̀ tsɛ̂ apàs etyə̀ke ə fendaʼlə̀ fîfe əfètəyn ə tsò, mə tɔŋtə nə Kondà, ə kyîə àzhəm se tsɛ̀ elùʼ vɛ ə fofke tè ngəsə va. Famə ghàs ə mɔ̀msə̀ nâʼà è tyaʼke se fɛtê ə ngwùʼ èghaʼâ zɛ ə tè shìnə pə̀ epàm nə kə è saʼte. Zɨnə mə tè pɔynə̂ va sè ghàs. 17Ə shìnə̀ ndzɨsə zə̂yn za ə fɛte kolə ngwùʼ èghaʼâ è kwɨ̀lse. Ghɨ ghɛ ə ghe tè kwâŋə ngwùʼ ə̀təyn e sè fânə̀ kə nə è kàʼa ə è ndu pfɨyn àtuŋ ashəshə ə etipì ə tso endaʼ ə Lipyàzè, ə fàfə tsosə̂ àpâŋ ə sendzɨs kɛ ə tè nyi mə ə kɔʼsê etûə ngwùʼ èghaʼâ kwəynə se nə̀yn nə kə ngwùʼ nə kwi sə ŋaŋ, ə zà nə ə chiynə kə àfof. 18Fof nə kɛ ə faŋa tsɛ kə ndò sə atyaʼ sə atyaʼ. Kə tuʼve zo, ghənə ə komtə̂ fɨsə èfɨa əmɔ̀ʼɔ vɛ ə ve tè nyi ə ngwùʼ èghaʼâ kwəynə, maʼà tsosə̂ ə tsô. 19Tuʼve ə pîə ve fɨnə zo ndò etuʼ ekomtəve, ghənə e sè chɔʼtə̂ èfɨa ə ngwùʼ èghaʼâ kwəynə maʼà ə tsosə̂ ə tsô. Ə̀ tè lote mâʼlè tsose ke nâʼà ghənə è fɨa ətəynve sə ghənə ngɨŋ. 20Tûʼ mɨ̀yn ə tsɛ̀ ndɔ̀ʼɔ wùə sê ghàs fe cho ezhwi kɨ̀sə mlɨ̂, ə tsɛ̂ ndûŋtə̀ nduə kə àfof. Kə ke faŋ sè tsɛ̂ kə sə atyaʼ zâ, ghàs ə fe kə nə ghàs nə̀ zhiə va fɨave.

21Ə nə̀ nə̂ ə̀ nyi epàm kə ghɨ ətəynghe fɨ̂aʼ nâʼà sə aghaf ndɔ̀ʼɔ ghənə zhi fɨake, Pɔ̂l ə ndwìə tyəmə̂ ə ghənə əshi ə pìə nə, “Ghɔnyì ghɨmə, ə fə nyi nə ghàyn zɨ ghɛ zɛ ə m pî, ə ghâsènì tàʼa ndò se ndù ə Klît mə ghâsènì pâʼà pofse fɨave ə tàʼa kyi ekyì ə anjìsè kɨ̂nə̀. 22M chyatə̂ piə sê ghàyn zôyn nə, ghàyn kol təm ghaynghe kûmə̀ wùə vîvè nə̀ kwuə va, ə̀ nə̀ saʼtə̀ kə ngwùʼ èghaʼâ kwəynə. 23M piə nyi kûmə̀ nə ə̀ va nyi ètuʼve ndâyn, tsì ə̀ Fèzhə̀ Fɛ ə Fe kyi mi, m ngɨmnə̂ Fəynfe ə vâ pə̀yn sê mi. 24Tsɨ̀ ə̀təyn ə pìə sê mi nə, ‘Pɔ̂l, kə ò fayn. Ò kyi se tyə̂m ə Kaysà əshi. Fe ə ndə̀m kèpi nə nâʼà wùə nə̀ kwu va əfètəyn ə̀ghɨ ghɨ̀yn ə ghâynghə̀ ghənə kwîə əmɔʼ nyi, kûmə̀ ətəm əchûŋ ghɛ ə fe kyi sê ghò.’ 25M piə sê ghàyn, ə ghɔnyì ghɨmə nə, ghàyn kol təm ghaynghe kûmə̀ nə m pomə̂ sê Zhə̀fè, ke nə nâʼà pîghè kyànə̀ kə kə è pì sê mi. 26Fofke kyi se tə chiynə fɨsə ghâsènì se ndə̀m etipì ə tsô endaʼ zhîze mə ə̀ kyìŋ nga ke m̀mo.”

27Epàmə m̀tuʼ mghɨm njò sekyàʼ è etuʼve, kə ghàs tè pa nyi ə enjwì ə fengwaŋve ə Andɨ̀lyà, ə fètəyn tuʼ, ghɨ ghɛ ə ghe shìnə ngwùʼ èghaʼâ kwəynə, e kwaʼtə̀ kə nə ə nyaʼâ se paʼsê etipì ə tsô. 28Ghənə ə màʼa ndzɨsə̂ tsosə̂ kwɨ̀l ə tsô mə ə kolə̂ fɨa etɨləke ətəyn se fe nə tsò ə̀təyn lɔŋɔ̂ tânə̀ zàyn zə. Ke ə sâŋà tso, ghənə fɨ̀aʼnə̀ fe nə tsò ə̀təyn è ze lɔŋɔ̂ sə semetà m̀ghɨm m̀kyàʼ. Ə mòtə̀ tso kə nyi, ghənə ə màʼà kwəynsə̂, ə fe è ze lɔŋɔ̂ sə semetà m̀ghɨm m̀ta. 29Ghənə ə zhə̀tə̀ se fayn nə ngwùʼ èghaʼâ kwəynə nə̀ nduə tsɔsə̀ enyɔyn, ə njìə efɨa etɨleve ekwàʼ mə ə kolə ətə sèkwɨl ə maʼà ndzɨsə tsosə epàmə ngwùʼ èghaʼâ kwəynə ve ə kyîə tyəmsə ngwùʼ ətəyn, ghənə ə nyaʼâ se tsə̀m nə tuʼve zaŋse zo. 30Ghɨə ghɛ ə ghənə tè shìnə ngwùʼ èghaʼâ kwəynə ə̀təyn e kyiŋə se tə ndò. Ghənə ə tsosə̂ ngwùʼ èghaʼâ zɛ ə tsô, kaŋkaŋə̂ nə̂ nə ndûə se tsosê afɨa kɛ ə ke kyiə ngwùʼ èghaʼâ kwəynə ashi ə ngwùʼke. 31Pɔ̂l ə fe èghɛ ətəyn ə pìə sê tuə sesôkə̀ʼke è sokə̀ʼ sə mɔ̀ʼɔse nə, “Ə ghɨ ghɨ̀nə̀ ə ghe shînə̀ ngwùʼ zɨnə̀ va fa ə fètə̂ ngwùʼ èghaʼâ kwəynə, kə ghàyn ə kwaʼtə̀ nə ghàyn nə̀ zhiə ndò fɨave.” 32Sokə̀ʼ səteynse ə zɨə za ə se təyntə sèkwɨ̀l sə ngwùʼ èghaʼâ nə sɛ̂, ə zà nə è ndo.

33Tuʼve tè zo pə̂ nyi, Pɔ̂l ə chyatə̂ ghənə əkɨ̂m nə ə zhi fɨake. È tè pì sê ghənə nə, “Ghàyn ə ndam zôyn sə mtuʼ mghɨm njòse kyàʼ ndɔ̀ʼɔ zhi fɨake. 34M chyatə̂ nə ghàyn mɔmse zhi àfɨa. Wùə m̀sɔ̀ŋ kyi se zhi kə è və nyi ètwɔ. Kè nâʼà nyuŋ èmɔ̀ʼ ə ghàyn atu nə̀ njisə̀ va.” 35Kə Pɔ̂l wàmnè zâ ə njiə àpayn ə kwaŋke ə fo àzɔ̀ŋnè sê Zhə̀fè kè ə ghənə əshi ə pɨaʼtə ə zhə̀tə̀ se zhi. 36Zɨnə mə ə nə̀ ghənə, ghənə ə kyiə ə̀təm, nâʼàpî ndè ə ghənə ə fètəyn ə zhiə àfɨa. 37Ghàs tè tsɨ̂ynte nyi ə̀ghɨ ghɨ tepɛ̀ è ghɨ m̀ghɨm m̀sɛ̀mbɛ njòse tufə fu ə ngwùʼ èghaʼâ kwəynə. 38Ə tè nyi kə nâʼà pîndè zhi kwəyn kə è kyiŋə, ghənə ə fɨsə sèsɔ̀f sɛ ə se tè nyi ə ngwùʼ èghaʼâ kwəynə ə màʼà enjwì ə fengwaŋve kə ngwùʼ zaŋse.

Fofke ə nə̀yn ngwùʼ èghaʼâ kwəynə zɛ ə è sàʼtè

39Kə tuʼve zo pə̂yn, ghɨ shinə nə ngwùʼ èghaʼâ kwəynə tè keva nə ə nyi etipì ə tso èkè zə. Pîza ə fe eluʼ fumə etipì ə tso mə ngwùʼ kàʼa è tyəme ətəyn. Ghənə ə saynə̂ nə ə ngwùʼ èghaʼâ kwəynə nyi se nduə fɨ fumə, ə ndu tsɔs zàmaʼà ndu zə̂ynzè fumə. 40Ghənə ə təynte sèkwɨ̀l sə efɨa etɨlə vɛ ə ve tè kyi ngwùʼ èghaʼâ kwəynə, ə maʼà ndzɨsə̂ enjwì ə fengwaŋve. Kèpî fumə ashìŋə̀, ghənə ə zhə̀tə̀ sèkwɨ̀l ə tə èpɨ̂aŋ ə ngwùʼ vɛ ə nə̂ chisə̂ ngwùʼ ətəyn nə è ndu elùʼ vɛ ə kyiŋə. Ghənə ə zhə̀nə̀ èkɔyn ə sendzɨs eghaʼâvè ashi ə ngwùʼke ekwùtwəyn kə fofke nji chiyn ndo ndu è ngwùʼ ə̀təyn əshi sə atyaʼ. Ə̀ nyì fumə ə ghàs tè zhə̀te se ndù etipì ə tsô. 41Pîza kə ghàs ndùə, ngwùʼ èghaʼâ kwəynə ə̀təyn ə ndùə pfɨ̂nə̀ etûə àtuŋ ashəshə kyîke etyə̂ m̀mò, shi ə ngwùʼke ə tsuʼə faŋə ə chi, ə tàʼa fɨnə ndù, tsò e nyiŋə pə kyìnə̀ èpam ə ngwùʼ èghaʼâ kwəynə ətəyn sə atyaʼ, sə atyaʼ, ze ə zhə̀tə̀ se sàʼtè.

42Sokə̀ʼ sɛ ə fe zâ sè pɨaʼtə se zhwitə əghɨ ndɛ̂ chaʼ ghɛ nâʼà ə̀kɨ̂m se nə̀yn nə kə nâʼà vîvè nə tàʼa samə ndù etipì ə tsò se tə ndò. 43Pîza tuə sesôkə̀ʼke e kyiŋə se fiə zà ə Pɔ̂l nə kə zhwi, ə pìə nə kə sokə̀ʼ sətəynse mom ghɛ ətəynze. Ə pɨlə pîə nə nâʼàpî ndè vɛ ə è kàʼa ə è samə tayn fɨ sə shi, è və samə̀ ndûə etipì ə tsô. 44Ə ghɛ ə ghe faŋ fɛte kyî ètim ə mkàʼvè kɨ̀sə èpɨ̂aŋ ə ngwùʼ èghaʼâ kwəynə, ə chùmtə̀ ghənə. Ə̀ nyi zamə kə ghàs əkɨ̂m tè nəyn kə pəyn fɨ etipì ə tso mə ghɛ zhîze paʼà kyàyn se ghàs.

Currently Selected:

Ətefɨ̂aʼ 27: bfm

Highlight

Compare

Copy