Lûm Etu əghɛ vɛ ə ve nyi fâ ŋwàʼlè
Etu əghɛ vɛ ə ve nyi fâ ŋwàʼlè
Pɔ̂l tè nyaʼ ŋwàʼlè zɨnə sê ghɨə Lûmghè se pɨaʼtê ə ghənə emòtè zɛ ə è te kyi se mòtè ə sendɛ sə Fezhə̀ sɛ ə se nyi ə Lûm. Kwâʼtè ə vəynze tè nyi nə ə zhi ndû fɨ fu, ə zhi fɨ̂a yîghə̀ ghənə sə fendîŋə̀ fə ashìŋə̀fè, ə ghənə tsamte zhi kə zhi tsɛ ndo ndu ə Sɨ̀pên. Ghɛ zɛ ə ze nyi famə ə ŋwàʼlè nyi tom ə̀ Pɔ̂l zɛ è ngəse tsàyn paynse sê ghɨə Fezhə̀ tsɨə tsɛ̂ ghə mɔ̀ʼɔghe.
È zhə̀te ŋwàʼlè nə zɨ̀yn è tɔŋtêzè sê ghɨə ndɛ ə̀ Fèzhə̀ghè ə Lûm tsà se ghənə kə zhi tsə̂mə̀ sê ghənə. Pɔ̂l ndəm atu eghɛ ə ŋwàʼlè nə zɨ̂yn nə, Tom èchùŋ tyə̀ynə kə Zhə̀fè nə ghɨghe e nyi chichi ə və shi, ə̀ nyi tɔynə̂ ekyî epomə̂zè ə zɨnə mə kyânə̀ ə zhə̀te se nduə fɨ ə mɨ̀se (Mbaŋə 1.17).
Pɔ̂l ə ke zhə̀tè se sàytè atu əghɛ nə ghɨnə̀ mə nə ghɨghe əkɨ̂m kɨ̀sə ə̀ nyi əghɨ ə Njûsghè kɨ̀sə ə va ə ghɨ ə Njûsghè, Zhə̀fè nə nâʼà pîndè e nyi chichi ə və shi kûmə̀ nə ghɨ ghəkɨ̂m nyi əghɨ ə pighe. Ə nə̂ nə ghɨghe ə nyi chichi ə Zhə̀fè əshi tɔynə̂ ekyî epomə̂ zɛ ə ghənə kyi sê Njisə̀s Klâys. Epàm ə zɨnə mə, Pɔ̂l fɛtə̂ tsâ endam efe zɛ ə ghɨ ə Fezhə̀ghè kyi sə eghɛ èmɔ̀ʼ yighə̀ Klâys. Zɨnə mə e nyi kûmə̀ endom efe vɛ ə ghənə nyi ətəyn yîghə̀ Zhə̀fè (mbaŋəse 5-8). Pɔ̂l wàmnə̀ kûmə̀ èghɛ zɛ ə lâŋ ə Fezhə̀kè nyi kûmə̀ kəynke è kɨsè tyaʼ kɛ ə Zuʼsə Fezhə̀sè kyi ə wùə èpomə endam. Epàm ə zɨnə mə, Pɔ̂l mɔ̀msə̀ se tsa paynsê epɨaʼtê zɛ ə Zhə̀fè kyi sê ghɨghe əkɨ̂m paʼsə̂ è ghɨə Njûsghè è ghɛ ə̀ va əghɨ ə Njûsghè. È kwùŋse mə è pìə nə tə zɛ ə ghɨə Njûsghè tə Njisə̀s nyi epɨaʼtê ə Fezhə̀zè se njiə pə̀yn e ghɨghe əkɨ̂m afùʼ ə Fezhə̀ kɛ ə ke nyi ə Njisə̀s Klâys, è pomə̂ nə ghɨə Njûsghè tə tə faŋsə̂ va Njisə̀s. Se kwùŋsè ə kwəynsê Pɔ̂l ə nyàʼ kə ghɨ ə Fezhə̀ghè kyi sə̂ ndamə tèndam tə ghənə̂tè mə nyì sə̂ kɔ̂ŋə̀ sèngɨŋ sə ghənə̂sè, nə̂ èghɛ zɛ ə ghənə kyi sə̂ nə̂ sê ngômnàyn, è kɨsè sə kyi ə̀təm ə saʼaghe. È mɨ̀se mə è pìə èghɛ zɛ ə è kwàʼtə̀, è kɨsè mə è fo ètsîtè sê Zhə̀fè.
Etu əghɛ vɛ ə ve nyi fâ ŋwàʼlè
Ezhə̂tè è tu ə ghɛke (andiŋ 1.1-17)
Ghɨghe mbi èkɨ̂m kyi se kyì esɔzaze (andiŋ 1.18–3.20)
Zhə̀fè ə tyə̀yn ndom esɔza ə vəynve sê ghâsènì (endiŋ 3.21–4.25)
Ndam efeze sê ghɨ ghɛ ə ghe pomə Klâys (endiŋ 5.1–8.39)
Ghɛ zɛ ə Zhə̀fè pɨaʼte kûmə̀ ə̀ghɨ Isìlâyghè (endiŋ 9.1–11.36)
Ndom vɛ əghɨ ə poməghe kyi sə̂ ndamə ətəyn. (Endiŋ 12.1–15.13)
Ghɛze se kwùŋsè è tɔŋtê zɛ ə ze ndô sè Pɔ̂l (endiŋ 15.14–16.27)
Currently Selected:
Lûm Etu əghɛ vɛ ə ve nyi fâ ŋwàʼlè: bfm
Highlight
Share
Compare
Copy
Want to have your highlights saved across all your devices? Sign up or sign in
©2022 CABTAL