Zakariya 6
6
Ichilota chamagereta yisumo yani
1Nanyosile ndota ichilota chinji. Pampindinye yoo yeni naweni amagereta yani yatunka ukufuma pakasi-kasi pamyamba yiwili iyamukuwa. 2Igereta lyakutalika lyakwemwanga nawakavwalo wawenzu, nigereta lyachitiwili lyakwemwanga nawakavwalo watifi, 3ilyachititatu nawakavwalo watiswe, nga ilyachitini lyakwemwanga nawakavwalo wamawala matoneke. 4Nalanga pano nawuzichisya umungeli, nati. Mulali, nga amageretanye yaa yakusula chani?
5Atolelela ati, Amageretanye yaa amiza yini; iyza kanonzinye kaa yafuma ku Mfumu e Leza wansi yonsi nuwukulu.
6Igereta line lyakwemwanga nawakavwalo watifi Iyayanga lwakambazwa kaku Babeloni, wakavwalo watiswe walungamanga lwakasika, nawakavwalo wamawalamatoneke walungamanga kunsi yakambazwa kanji. 7Walanga vino wakavwalo wamawala matoneke watunka, walwilichizile kukuya nengula insi. Umungeli anena wakavwalo ati, Yanji mukanengule insi. Ngapano awaya. 8Ngapano umungeli alila inkuta kwenene ati, Wakavwalo wano walungime lwakambazwa kakwe Babeloni watalalika ukuvitwa kwa Mfumu e Leza.
Joshua azwikwa akamba
9Imfumu e Leza ampa amazwi yaa. 10Ati, Senda ivyawila vino wano wasenzilwe kuchinyonga wafimile, e Helidai, Tobiya nu Jedaia, upite ilelonye kumwawo kwakwe Josia umwanakwe Zefaniya. Awantunye wonsi waa wanyosile kuno wasenzilwe uwuzya mu Babeloni, 11Usende silivara nu golide vino wafimile chite akamba, ukazwike esimapepo mukulu e Joshua umwanakwe Jehozadaki kumutwe. 12Ukamunene uti Imfumu e Leza wamaka yonsi akuti, Wee awilimuntu wino izina lyakwe we Lusamba. Alilandila mumasyo yano wikala, ayize alimbuzye ing’anda ya Mfumu e Leza. 13Alizenga, ayize apochelele ukuchindamikwa kuno kwazipila imfumu, ayize awapanzya awantu wakwe. Pawufumu wakwe paliwa simapepo, wize wawombela apaliponga umutende nukwivwana. 14Akamba kaliwa achizusyo chamung’anda ya Mfumu e Leza kukwizuka Helidai, Tobiya, Jedaia, nu Josia.
15Awantu wane wikala ukutali waliyiza mukwavwilizya ukulimbuzya ing’anda ya Mfumu e Leza. Ndiyiza yazengwa yasila, apano rmrlimanya kuno Imfumu e Leza wamaka yonsi wantumile kwemwemwe! Vyonye-vyoo vilichitwa ndi mwatontela amasundo ya Mfumu e Leza, e Leza winu nimyezo yinu yonsi.
Currently Selected:
Zakariya 6: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
