Romans 16
16
Umulamu wakwe Pauli
1Nkuwasontela e Fibi inkazi yitu, wino akapyunjila Iklezia mwe Kenkeria. 2Mupochelelani mwizina lya Mfumu, ndivino chazipila awantu wakwe Leza ukupochelelana, muwamwavwa mwakwe vyonsi vino wasowelwa; amuno nawenye akwavwanga awavule naninye.
3Ndamuchilani Prisila nu Akwila, awawomvi wanji mwakwe Klistu Yesu, 4wane wayipile uwumi wawo muno anene. Insi anene nenga nkusalifya—ukuwa na ma Klezia yamakandi yonsi yakusalifya apaliponga nani. 5Swinya mundamuchile ni Klezia lino lili mung'anda yawo.
Ndamuchilani e Epaneto umukundwe wane, umuntu wakutalika ukusuwila Klistu muchipya chansi ya Asia. 6Ndamuchilani Mariya, wino wawawombezile imilimo mivule imikulu. 7Ndamuchilani Andronika nu Junia, awa Yuda wanji wane walinji muvingololo apaliponga nani; wane walumbililwa kuwapositile, wane wantanjilizile ukusuwila Klistu.
8Ndamuchilani Ampliato, umukundwe wane mu Mfumu. 9Ndamuchilani Arubanasi, umuwomvi wunji witu mumulimo wakwe Klistu, mundamuchile nu Stakisi, umukundwe wane. 10Ndamuchilani Apelesi, umu Klistu wansimpo. Ndamuchilani awamung'anda yakwe Aristabulo. 11Ndamuchilani Herodioni, umu Yuda wunji, mundamuchile nawa Klistu wanji, awachiwanza chakwe Narikisasi.
12Ndamuchilani Tarufena nu Tarufosa, wane wakawombesya umulimo wa Mfumu, swinya mundamuchile Persisi umukundwe, wino wawombesya umulimo wa Mfumu kutaluvile. 13Natuma umulamu wane kwe Rufasi, umuwomvi wamaka mumulimo wa Mfumu, mulamuke nunyina, wino wantempanga ngati nemwenakwe. 14Mundamuchile Asenikritasi, Filegoni, Herimesi, Patrobasi, Herimasi, nawa Klistu wanji wonsi wane wali nawo. 15Ndamuchilani Filologasi nu Julia, nu Nereusi ninkazi yakwe, mundamuchile nu Olimpasi nawantu wakwe Leza wonsi wane walinawo.
16Muwalamukana mbali nukukukulana. Ama Klezia yakwe Klistu yonsi yakuwalamuka.
Ukuchinchizya kwakupelelechezya
17Mwewanawitu, nkuwalambilizya, lolechesyanji wane wakuleka ukupawunkana nu kupunuzya awantu mwisuwilo lyawo, wane wakuvulungania isambilizyo lino mwasambilizile; walewukani. 18Amuno wane wakachita wowonye wasi awapyunzi wakwe Klistu Imfumu yitu, ukuwa awazya wakulonda kuwipe kwawo. Amazwi yawo amanonelele ayapamulomo yakachenjezya wane wasi nachimwi. 19Mwenji, awantu wonsi wivwa ukulumbililwa kwakutontela kwinu kwi Landwe, Zima, achaleka nkuzewela muno muli wonye-woo. Nkulonda ukuti muwe namano kuvizima, ukuwa nanti kupechela ukumanya chimwi ichiwipe. 20Nga Leza, wino akatupa umutende wakwe wandi asyonongolele Satana mumanama yinu.
Imfumu yitu e Yesu Klistu awawalanguluka mwensi.
21E Timoti, umuwomvi wunji, nu Lukiya, nu Jasoni, nu Sosipatela, awa Yuda wanji wakuwalamuka.
22Nani, ne Teretiyo, nemuntu nkuwalichila Pauli e kalatanye wee nikasa lyane nawalamuchila mwakwe Klistu.
23E Gayi wino tukawungana mung'anda yakwe, akuwalamuka: nu Erastasi, ekasunga wandalama zyakaya nga numwanawitu e Kwaratisi, wakuwalamuka.
[ 24Inkumbu-nkumbu zya Mfumu yitu e Yesu Klistu ziwawa namwe mwensi. Amen.]
Ipepo lyakupelelechezya ilyakutumvya Leza
25Tuvyanji Leza! Wino ali namaka ayakuwasimpisya mwisuwilo, ndimuno nawawililila Ilandwe Zima ilyambila yakwe Yesu Klistu. Wowonye avino inkama yino yafisilwe kali ikawumbulika. 26Ukuwa kanonzi amawaliko yawatumwa yaleka ukusimichilanye koo kwasokoloka palwenze; nawe e Leza wamuyayaya wakomelezya imyiko yonsi ukuti imanye ukusimichilanye koo, alyakuti wonsinye-pyu wasuwile watontele nukutontela.
27E Leza-nye wino ali wenganye-nsu, wino awamano wenganye-nsu achindamikwe mwakwe Yesu Klistu umuyayaya! Amen.
Currently Selected:
Romans 16: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
