Romans 15

Chazipa ukusechelesya wanji, wemwenecho pole

1Swewantu tuli namaka mwisuwile twazipila ukwavwilizya wano watonta ukuti wasenda ivisendo vyawo. Tutize tuwayisechelesya swewenecho swenga. 2Ukuwa, ndiwilamuntu awasechelesya umwinisi, alyakuti amusimpisya mwisuwilo. 3Amuno nu Klistu-nye atayisechelesizye umwenecho wenga. Ukuwa ndivino chawalikwa mu Mawaliko Matele ukuti, Tntusi zino wakukwelenguzile zyamponela nene. 4Vyonsinye vino vyawalisilwe mu Mawaliko Matele vyawalisilwe kukutusambilizya sweswe, alyakuti tuwalolela nuwuchimyamya mbali ninsimpo zino Amawaliko Matele yatupa. 5Achino ndi e Leza wino akapa uwuchimyamya mbali ninsimpo, awino aleke avino muwe muwawikana kusingo ndivino Klistu Yesu ali, 6alyakuti mwensi apaliponga, nizwi lyonga, muwachindamika Leza Umukwasi wa Mfumu yitu e Yesu Klistu.

Amakandi ayawililwa Amazwi Matele

7Pochelelananji ndivino namwe Klistu wawapochelezile, muno akuchindamikwa kwakwe Leza. 8Amuno nkuwanena kuno Klistu walinji amupyunzi wawa Yuda ukuyilanjizya kuno Leza amusuwilwa, alyakuti afisye amalayilizyo yakwe Leza yano walayilizizye watatakulu, 9swinya alyakuti amakandi yawachindamika Leza muno ankumbu zyakwe, Ndivino Amawaliko Matele yavwanga yati,

Achaleka ndiwakusalifya wewe mumakandi,

ndiwakwimbila amalumbo yizina lyako.

10Swinya wavwanga wati,

Mwemakandi, zevyanji apaliponga nawantu wane Leza wasola!

11Swinya wati,

Lumbulanji Imfumu, mwemakandi mwensi;

namwenye mwemyiko yonsi, mulumbulanji!

12Swinya Ayizeya wavwanga wati,

Kuliyiza ikwata lyakwe Jese;

alikatuka kukwiza panzya amakandi;

yize yawike insingo kwakwe weliwe.

13Sivyo e Leza wino akaleka atuwalolela nisuwilo, awizuzye mwensi nichimwemwe chonsi numutende ukuti muwamusuwila, alyakuti ukulolela kwinu kulandalile kuwakula nukukula muno amaka yakwe Muzimu Mwimichile.

Chino Pauli wawalichizile ekalata nukusinga kwamwatanye ndi-woo

14Wanawitu, nawamanyichisya nkaninye kuno mwizula nuwuzima, swinya muli namano yano mungasambilizyania nukusambilizyania. 15Ukuwa mwekalatanye wee nawawalichila nukusinga konsi ukuti mbizusye vimwi. Ukusinga kuno indi nako kwafuma kwe Leza. 16Wampile ulongo lwakuwa nemupyunzi wakwe Klistu Yesu kukuwombela amakandi. Nkapyunga ngati nesimapepo ndanga nkuwizya Ilandwe Zima lino lyafuma kwe Leza, alyakuti amakandi wawe anzuwi zyakupochelelwa nu Leza, wimichilwe kweweliwe nu Muzimu Mwimichile. 17Mwakwe Klistu Yesu amuno nkuyitumvizya kumilimo yane yino nkawombela Leza. 18Nalandalila nukusinga ukuvwanga vino Klistu wachitila mwakwe nene ukuti ntungulule amakandi yatontele Leza, mumazwi namumilimo, 19mumaka yavimanyilo nivyakuzungusya, ukufumilila kwe Yerusalemu ukuyafika kwe Ilurikamu, nawizya Ilandwe Zima lyakwe Klistu. 20Ukulonda kwane konsi akwakuwizya Ilandwe Zima mumasyo yano Klistu atatela atakwe, alyakuti ntize ndazenga palufula lwakwe winji. 21Ndivino Amawaliko Matele yavwanga yati,

Wano watatela wanenwe ivyakwe walilola,

nawano watatela wivwe waliyivwichisya.

Pauli awapanzya ukuya ku Roma

22Muno achonye-choo chandesyanga impindi mvule ukwiza kwemwemwe. 23Ukuwa kanonzi vino namala ukuwomba umulimo muvipya vyansi yoo, muno naluchilanga imyaka nuwinji yonsi ukwiza kwemwemwe, 24kanonzi peni nandi njize. Nkulonda njize mbalole pano nkuya ku Speni, mwize munsuchilile nukunsuchilila ukuya kweneko, pano mwatela mwansankania. 25Kanonzinye kaa nandi inje kwe Yerusalemu kukupyunjila awantu wakwe Leza kweneko. 26Amuno ama Klezia yamwe Makedonia nayamunsi ya wa Griki wazumilizinie awasangula ivyakupa awasaluke awantu wakwe Leza wane wali mwe Yerusalemu. 27Woliwonye nalwawo wapanzinie ukuchita wowonye. Ukuwa kweni, wazipizile ukwavwa awasaluke; awa Yuda wane wapochelezile ukupepwa kwa Muzimu, nawo awachitila amakandi wowonye, achaleka amakandinye nayo wazipila ukupyunjila awa Yuda nivintu vino wali navyo. 28Achaleka nala pano namalizya umulimo woo, nalemeka nukulemeka kwakwe woliwo isangwe lyonsi lino wawasangulizile ilyandalama, apano ndisya nawasyungula pano nkuya ku Speni. 29Manyile, kuno ndila ndiniza kwakwe mwemwe, ndileta ukupepwa kwakwe Klistu kutaluvile.

30Wanawitu, nkuwalambilizya, Mumfumu yitu e Yesu Klistu namulukundo luno Muzimu Mwimichile akupanga, alyakuti mulemasye ukumpepela kwe Leza nanti kulechelezya. 31Muwampepela alyakuti mfyuke kumintawela yino ili mwe Yudeya, swinya alyakuti umulimo wane uwa mwe Yerusalemu wukapochelelwe nawantu wakwe Leza wane wali kweneko. 32Ngapano njize-njize kwemwemwe nichimwemwe chisi chakutaka, ndi akulonda kwakwe Leza, tukukulane nukusechelana, swinya njize mpuze nukupuza kumwi kwemwemwe. 33Sivyo ndi Leza wamutende awe namwe mwensi. Amen.

Currently Selected:

Romans 15: WWN82

Highlight

Copy