Marko 4
4
Umulumbe wakwe katanda
(Mateyu 13:1-9; Luka 8:4-8)
1Swinyanye Yesu atalika ukusambilizya lwamumbali yakwe sumbi wakwe Galileya. Iwumba lino lyawungine alimuliwilizya lyakuzile nkaninye achino ayinjila muwato amuno ayikala. Uwato walinji muminzi, awantu weni wimilile pachituntu, mumbali yaminzi.
2Awawasambilizya ivintu vivule mumilumbe, namumisambilizizye yakwe awanena ati,
3Yivwani! Kwalinji umuntu wino wayile mukutanda. 4Ala pano akutanda imbeyu muchalo, yimwi iponela munzila, inyunyi aziya aziyisola. 5Yimwi iponela pemfuzi, pano patalinji umusili wuvule, imela nanti kuzimba, amuno kutalinji umusili wuvule. 6Alila ilanzi lyakwela alyocha imbeyu yino yamezile, muno imisisi itinjizile mumusili nkani ikala nanti kuzimba. 7Imbeyu yimwi yaponezile mumyunga, nimyunga imela ititichizya imbeyu, nanti kuti iche. 8Ukuwa yinji iponela pamuvundo, imela, ikula, icha nukucha yimwi amakumi yatatu, yinji amakumi mutanda, nayinji umwanda.
9Yesu apelelechezya namazwi yakuti, Aleni yivwani, ndimuli namakutwi!
Chino Yesu wumilanga umulumbe
(Mateyu 13:10-17; Luka 8:9-10)
10Walile pano Yesu aliwenga, wamwi wano wamwivwile awaya kweweliwe nawasambilizi wakwe ikumi nawawili awamulambilizya ukuti awanene chino wumilanga imilumbe. 11Yesu awatolelela ati, Chapwa kwemwemwe ukumanya ivifisame vyawufumu wakwe Leza. Ukuwa wano wali kulonde, wakwivwanga vyonsi mumilumbe, 12alyakuti,
Walange wakulola watumbuzile aminso, nanti kulola,
walange wakwivwa nukuteyelezya, ukuwa nanti kwiluka;
amuno ndi wangawa wowonye, wangaya kwe Leza awatetele.
Yesu alondolola umulumbe wakwe katanda
(Mateyu 13:18-23; Luka 8:11-15)
13Ngapano Yesu awawuzya ati, Wuzye mutamanyile umulumbenye woo? Ngafwandi ye mulimanya imilumbe wuli? 14Ekatanda akatanda amazwi yakwe Leza. 15Mpindi zimwi amazwi yakaponela munzila; awantunye waa awivwa mazwi, ukuwa nanti kuzimbanye pano wivwa Satana afika asenda amazwi yano yatanzilwe mwakwe woliwo. 16Awantu wamwi wakolana nimbeyu yino ikaponela pemfuzi. Wakula vino wivwa amazwi awayapochelela nichimwemwe, 17ukuwa nanti kwinjila mwakwe woliwo nkani, achino yasilandila. Achaleka ndikwapona ukuyimba namatamyo muno amazwi, awalechelezya nanti kuzimba. 18Awantu wamwi wakolana nimbeyu yino ikatandwa mumyunga. Wanye-waa awantu wano wakwivwanga amazwi, 19ukuwa ukusaya kwampindinye yoyo, iyakukunda insawo, nukulonda kuwipe ukwavintu vinji akutitichizya amazwi, ayakana ukucha. 20Ukuwa awantu wamwi wakolana nimbeyu yino ikatandwa mumuvundo. Awivwa amazwi, awayapochelela, awacha nukucha: wamwi amakumi yatatu, wamwi amakumi mutanda, nawamwi umwanda.
Inyale nkupikwe
(Luka 8:16-18)
21Yesu alandalila awanena ati, Wuzye wumwi akasenda inyale ayikupita mulweso pamwi ayiwika mwivungululu lyachitala? Wuzye asiyiwika pachilemelo chanyale? 22Ichifisame chonsinye chiliwa palwenze, nachonsinye chino chavwimbwa chilivwimbulwa. 23Aleni yivwani, ndimuli namakutwi!
24Anyoka awanena ati, Muwateyelezya ichete chino mukwivwa! Amasundo yano mukapanzizya wanji, yayonye ayano namwenye Leza aliwapanzizyaukuwa awapanzye alutilizye napapo. 25Amuno wino ali nachimwi aliyonjelezwa ivivule; nawino asi nachimwi nachino alinachonye chilipokwa.
Umulumbe wambeyu yino ikukula
26Yesu alandalila ukuvwanga ati, Uwufumu wakwe Leza wakolana numuntu wino akatanda imbeyu yakwe muchalo. 27Uwusiku akalala, akaziwuka umusanya, namanda yonsi imbeyu ikatunzya imela. Ukuwa naponye nanti kumanya muno ikamelela. 28Ansinye iyenecho ayino ikamezya nga icha nukucha: pakutalika ikatunzya umwenze, apakonka umutwe, nga ikamba iwika impumba, 29Ndiyacha umuntu aya mukusinza nulukala, muno amasika yiza.
Umulumbe wambeyu yamuti
(Mateyu 13:31-32, 34; Luka 13:18-19)
30Yesu awuzya ati, Nga tungakolania Uwufumu wakwe Leza nachani? Nga tunguma mulumbe-chi pakulondolola ivyawufumu wakwe Leza? 31Wakolana nimbeyu yamuti, wuno imbeyu yakwe yachepesya yalusya imbeyu zyonsi munsi. Umuntu akasenda imbeyu akomela mumusili; 32pansizi umuti awukula awulusya imiti yonsi. Awuwa ninsamba nkulu ninyunyi azizenga ivisalanzo mwenemo.
33Yesu wawizyanga amazwi kuwantu, alanga akuwumila imilumbe yinji imivule ndi yoo; wawanenelanga ndimuno wangivwila, 34Atatela awanene chimwi nanti kuma umulumbe; ukuwa pano wawanga wenga nawasambilizi wakwe wawalondololanga vyonsi.
Yesu amyalalika ichipunga
(Mateyu 8:23-27; Luka 8:22-25)
35Uwandanye wowo akamanguzi Yesu anena awasambilizi wakwe ati, Tuyani tulambe sumbi tuye kumbalama. 36Achaleka awasya iwumba; nawasambilizi awinjila muwato wuno Yesu walinji mwenemo, apita nawo. Kwalinji namato yanji. 37Akuwa ichipunga chamuza wukalambane nga namang'wimbi ayatalika ukusampuchila muwato, naminzi ayalonda ukwizula mwenemo. 38Yesu walinji muwato kunsyalichilo, waponechile pamusawo. Awasambilizi awamuziwula awati, Musambilizya, si utapechezile kuno twati tuwafwa?
39Yesu aziwuka akalipila umuza ati, Tekana! anyoka anena amang'wimbi ati, Tekana! Umuza awutekana, akuwa mya. 40Ngapano Yesu anena awasambilizi wakwe ati, Ngachani chino mukutina? Wuzye mutani muwe nisuwilo?
41Ukuwa awatina nkaninye, awatalika ukuwuzyania wakuti, Nga wenyewee amuntu-chi? Wino nanti amuzanye namang'wimbi vikumutontela!
Currently Selected:
Marko 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
