Marko 3
3
Umuntu wikasa kwinyane
(Mateyu 12:9-14; Luka 6:6-11)
1Yesu anyochela kung'anda yakupepela, kuno kwalinji umuntu wikasa kwinyane. 2Awantu wamwi wano walondanga ukusumbichila Yesu walinji kokonye; achaleka awalolechesya nkaninye kwevino Yesu wachitanga, ukuti walole ndi angapozya wumwi pawanda wakusolezya, 3Yesu anena uwikasa kwinyane ati, Zanga pankolelo. 4Ngapano awuzya awantu ati, Wuzye isundo litu lyatuzumilizya ukuchita chani pawanda wakusolezya? Wuzye lyatuzumilizya ukwavwa, pamwi ukonona? Ukupususya uwumi wamuntu, pamwi ukuwulovya?
Ukuwa awasowa nichakuvwanga. 5Ala Yesu wawachecheta awavitilwa, ukuwa pampindinye yoyo anyoka awalolela inkumbu ichilanda achimulema, amuno walinji awantu watumbe awawipe. Achaleka anena umukwinyane ikasa ati, Tambalika ikasa lyako. Atambalika ikasa lyakwe aliwa ichete. 6Awa Falisi awafuma kung'anda yakupepela nanti kuzinguluka awaya awasunkana nawantu wakwe Herodi wamwi; awakwamba ukuti wakome Yesu.
Iwumba lwamumbali yakwe sumbi
7E Yesu nawasambilizi wakwe awaya kwesumbi wakwe Galileya, niwumba kulu alimukonka. Wafumile ku Galileya, namwe Yudeya, 8namwe Yerusalemu, namunsi ya Idumeya, namunsi yinji iyamumbalama mwe Yordani, namutwaya tuno twapalamine nu Ture nu Sidoni. Iwumba kulunye lyoo lyayile kwe Yesu amuno wivwile vino wachitanga, 9Iwumba lyakuzile kutaluvile achaleka Yesu anena awasambilizi wakwe ukuti wamusenganizizye uwato, alyakuti awantu watize wamutitichizye. 10Wapozizye awantu wavule, nawalwale wonsi awalanga wakusenjelela wakuya kweweliwe ukuti wakamukumvye. 11Napano wano walwile imizimu miwipe wamuweni awapona pankolelo pakwe weliwe awaunda awati, We Mwanakwe Leza!
12Yesu akomelezya imizimu miwipe nkaninye ukuti itamuwumbula.
Yesu asola awasambilizi ikumi nawawili
(Mateyu 10:1-4; Luka 6:12-16)
13Ngapano Yesu akwela umwamba ayita wano walondanga. Awaya kweneko 14asola awantu ikumi nawawili, awita ati awasambilizi. Ati, Nawasola ukuti muwawa nani; nandi mbatume mukuwizya, 15swinya mwandi muwe namaka yakuwinjila imizimu miwipe.
16Waa awano wasozile ikumi nawawili: e Simoni (wino swinya Yesu wamwisile ilyakwe Peter); 17ayita Jemusi nu Yohani umunyina, awanakwe Zebediya Yesu awita ilyakwe Boanerge, lino likusula ukuti, awankuwa; 18ayita nu Andreya, nu Filipu, e Bartolomeyo, Mateyu, nu Tomasi, Jemusi, umwanakwe Alifeyu, ayita nu Tadeyu, nu Simoni umukaya 19ayita nu Yuda Iskarioti, wino wamukutilizile.
E Yesu nu Belizabuli
(Mateyu 12:22-32; Luka 11:14-23; 12:10)
20Yesu aya kumwawo. Swinyanye iwumba kulu alimuwunganila asowa nimpindi yakulila ichakulya nawasambilizi wakwenye, 21Azila inko zyakwe zyivwa wowonye aziya mukumusenda, amuno awantu wavwanganga wakuti, Siwati awapena!
22Awasambilizi wamasundo wamwi wano wafumile kwe Yerusalemu watanji, Ali nu Belizabuli!
Wanji watanji, Amfumu yamizimu miwipe ayino ikumupa maka yakuwinjila imizimu.
23Achaleka Yesu ayita awantu awaya kweweliwe aya awanena imilumbe yimwi ati, Nga Satana angayiwinga wuli? 24Ndi uwufumu wayipawunkania, walwisyania, uwufumunye wowo wungalowa. 25Ndi ichiwanza chawantu chapawunkana, chalwisyania, ichiwanzanye chocho achitela chalowa. 26Achaleka ndi uwufumu wakwe Satana wapawunkana, wutanga wulandile, ukuwa wungalowa.
27Pasi wumwi wino angafotola mung'anda ya muntu mukazawane asende insawo yakwe suka ndi watela wanyepa umukazawane; peni apano angasampa ing'anda yakwe.
28Yizukanji choo! Awantu wangatetelwa amawembuko yawo yonsi niviwipe vyonsi vino wavwanga nanti vivule viti wuli. 29Ukuwa wensi wino wiza wavwanjila Umuzimu Mwimichile uluwi atanga atetelwe, amuno yewatala uluwembu lwamuyayayaya. 30(Yesu wavwanjizile choo muno wamwi wavwanzile awati, Ali numuzimu wuwipe.)
Enyina wakwe Yesu nawanyina
(Mateyu 12:46-50; Luka 8:19-21)
31Enyina wakwe Yesu nawanyina awafika. Awimilila palonde awatumilizya, awamulonda. 32Iwumba Iyisile aliliwilizya Yesu, awamunena awati, Lola, enyoko nawanyonko wimilile palonde, wakukulonda.
33Yesu atolelela ati, Nga mayo weweni? Nga awanawitu awaweni? 34Atalangania pakwe wano wisile wamuliwilizizye ati, Lolani! Waa awali wemayo nawanawitu! 35Amuno wensi wino akachita ukulonda kwakwe Leza awili mwanawitu, awili nkazi yane, awili mayo.
Currently Selected:
Marko 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
