Mika 6
6
Imfumu e Leza asumbichila awa Israeli
1Teyelezyani umulandu wuno Imfumu e Leza wasumbichila awa Israeli.
Ale we Mfumu Leza katuka, uvwange umulandu wako, wuno imyamba ayili wakalola wako. Leka imyamba iyivwe chino ukuvwanga.
2Mwe myamba, mwe mfula zyape izyansi, yivwani umulandu wa Mfumu e Leza, ali numulandu wuno wasumbichila awantu wakwe. Wandi alete umulandu wuno wasumbichila awa Israeli.
3Imfumu e Leza akuti, Mwe wantu wane, nga nawachita chani? Nga nawa nechisendo kwemwemwe muno achani? Ntolelelani. 4Nawafumizye mu Ijeputi. Nawatuzile kuwuzya. Natumile Musa nu Eroni nu Miriamu ukuti wawakolelele. 5Mwe wantu wane yizukani chino imfumu e Balaki uwa mu Moabu wakasi awachite, mwizuke navino Balamu, umwanakwe Beori, wamutolelezile. Yizukani ivintu vino vyaponile panzila yino yafuma kunkambi kwe Akakiya yaya ku Giligali, alyakuti mulole chino nachisile pakuwatula mwemwe.
Chino Imfumu e Leza akalonda ku wantu
6Wuzye ngatwalila Imfumu e Leza wa mwiyulu chani, pano nkuya mukumupepa? Wuzye nazipila ukumutwalila awana wang’ombe awazima nkani ukuwa nzuwi? 7Wuzye Imfumu e Leza angasechela ndi namutwalila ing’onzi imyanda-na-myanda, pamwi ndi namutwalila ukumiminika kwamafuta yano yakatantala? Wuzye nazipila ukumutwalila umwanane ekatote kukulipa kuluwembu lwane? 8Mwe wantu mwensi-mwe, Imfumu e Leza wawanena chino chazipila ukuchita. Chino weni akalonda achoo: Panzyanji chete, muwalandalila nulukundo, muwayichefya mbali nukutontela Leza.
9Chazipa ukutina Imfumu e Leza, Akupunda kukaya akuti, Teyelezyani, mwe wamukaya, mwe wantu mwawungana mwenemo. 10Mung’anda zyawantu wawipe muli nsawo zyakwiwa. Wali nawanamwezyo wawufi awakupimila wane napata. 11Wuzye ngatetela awantu wane wakawombela wanamwezyo wawuti? 12Awantu wachindame awamukaya, wakalundichila awasaluke ivyakuwavuna. Awachawufi. 13Achaleka kanonzi natalika uwononi wakulovya, muno aluwembu lwinu. 14Mwandi muwalya ukuwa nanti kwikuta. Mwandi muwawa ninzala. Ndi mwasenda vimwi ukuti mukavisunge, chitanga chiwele. Chonsinye chino mwiza mwasunga, ndichonona mwisumo. 15Muliwatanda amalezi ukuwa nanti kwizasinza. Muliwakwenga amafuta, ukuwa nanti kuyawombela. Muliwasuta ivyakung’wa, ukuwa nanti kung’wa. 16Mwakonchelela imichitile miwipe iyamfumu Omori numwanakwe Ahabu imfumu. Mwalandalila ukukonka imiwele yawo, achaleka ndiwalovya, ndeke awantu winu wonsi wakwelenguke. Konsinye kuno mwiza mwaya, waliwakwelengula.
Currently Selected:
Mika 6: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
