Mika 4
4
Umutende wa Mfumu e Leza wakwila konsi-konsi
(Ayizeya 2:1-4)
1Mumanda yano yakwiza
umwamba wuno ing’anda yakupepela Leza yazengwa penepo,
wuliwa amwamba wutali ukulusye imyamba yinji yonsi.
Imyiko mivule iyawantu iliwaya kweneko.
2Na wantu wawo waliwavwanga wakuti,
Tuyani tukwele umwamba wa Mfumu e Leza,
tuye kung’anda yakupepela Leza wawa Israeli.
Twandi tukasambilile chino akalonda ukuti tuwachita;
tuwapita munzila zino wakunda.
Imfumu e Leza akasambilizya mwe Yerusalemu
akwakavwanga awantu wakwe mwe Zioni.
3Alimyalalika impokoto zyamyiko,
awe wekapanzya wamawufumu makulu,
yano yalimupipi na yano yali ukutali
Walisula impanga zyawo ziwe ankundi,
namasumo yawo ziwe ankala zyakusanzulila.
Imyiko italitela ilwe swinya,
nanti akuyisengania kwi sumo.
4Wila muntu aliwakwikala umutende
mupipi-pipi nimiti yavikomwa vyakwe nimikunyu yakwe,
kutaliwa wumwi uwakumutinia.
Imfumu e Leza wamaka yonsi walayilizya wonye-woo,
5Wila mwiko wukapakata nukutontela twaleza twawo, ukuwa swenji tuliwapakata nukutontela Leza witu penye.
Awa Israeli walinyoka kuno wasenzilwe uwuzya
6Imfumu e Leza akuti, Impindi ikwiza, pano ndiwunganika awantu wonsi wane wayimvile pano wachinsizwe kuchinyonga walyanye wane nasunzile. 7Walemala swinya wali ukutali nakumwawo, ukuwa nditalika nawo uwupya, wize wawe amwiko wukulu. Nd iwapanzya pamwamba Zioni penye.
8Achaleka wewenye Yerusalemu, pano Leza akalolela awantu wakwe, ulinyoka uwe wekaya kakulu akawufumu wuno walinji awako kali. 9Ngamuno chani chino ukulila inkuta ukupongomoka? Ngamuno chani chino walemenchezwa nuwulumila ngati amwanachi wino akulonda ukupapa? Wuzye amuno usi nimfumu, nawakukupa ilango wafwa? 10Nyongolokananji muwalweta, mwe wantu wa mwe Yerusalemu, muwe ngati amwanachi wino akupapa. Kanonzi mwandi mufume mukaya kaa, muye mukikalange mulonde, Muliya ku Babeloni. Ukuwa kulyanye akuno muliya mukatulwe, Imfumu e Leza aliwatula kuwalwani winu. 11Imyiko mivulenye yawungana apaliponga ukuti iwalwisye. Ikuti, Ndi Yerusalemu ale ayononwe! Tulilola akaya kaa kuno kasyala avitalang’anda! 12Ukuwa imyikonye yoo itamanya chino chili kunsingo ya Mfumu e Leza. Watamanyile kuno akulonda ukuwawunganika apaliponga awasunde, awawunganike ndivino amalezi yakawunganikwa ayapulwa. 13Imfumu e Leza akuti, Mwe wa mwe Yerusalemu-mwe, yanji mukasunde awalwani winu! Nandi mbape amaka ndivino inkambaku yino ili nimpembe zyavyela, yino ili ninkando zyamukuwa. Mulivongonyola imyiko mivule, ninsawo yawo yino wasampa kumaka ilisyala ayane, iwe ansawo ya Mfumu e Leza wansi yonsi.
Currently Selected:
Mika 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
