Mateyu 7

Ukupanzya wanji

(Luka 6:37-38, 41-42)

1Mutize muwapanzya wanji, alyakuti namwe Leza atize yize awapanzye— 2amuno ipanzyo lino mukupanzizya wanji alino namwenye Leza aliwapanzizya, namasundo yano mukunyepela wanji ayano namwenye mulinyepelwa. 3Ngafwandi amuno chani chino ukulola akaswaswa mwilinso lyamunyonko, ukuwa nanti kupechela ichintu chino chili mwilinso lyako? 4Ngafwandi unganena umunyoko wuli uti Leka nkufule akaswaswa kano kali mwilinso lyako, pano nawe ichimuti chili mwilinso lyako? 5Wekachenjezyawe! Pakutalika tela ufumye ichimuti chino chili mwilinso lyako, ngapano uwalola ichete pakufula umunyonko akaswaswa kano kali mwilinso lyakwe,

6Kusikwezya ukusumbila wasimbwa ichimichile chimwi—amuno wangakunyochela wakulume; kusikwezya ukusumba uwukasi wako pakwe wakapoli—amuno wangawulyatanjila ninkando.

Lenganji, vwambanji, kong'onsyanji

(Luka 11:9-13)

7Lenganji mulipochelela; vyambanji mulizana; kong'onsyanji, muliyiyulilwa. 8Amuno wensi wino akulenga akapochelela nawensinye wino akukong'onsya a'kakwiyulilwa, 9Wuzye wumwi uwapakwe mwemwe wino amukwasi angapa umwanakwe iwe, 10pano umwana akulenga ichakulya? Pamwi wuzye ungapa umwanako inzoka, pano akulenga inswi? 11Ukuwa ndimwemwe mwewawipe, mwamanya ukupa awana winu ivintu vizima, fwandi ye Umonsi winu wino ali mwiyulu alilutilizya ukupa wano wakamulenga ivintu vizima!

12Achaleka ivintu vino mukalonda wanji wawachitila avino namwenye muwawachitila: amuno lyonye-lyoo alisundo lyakwe Musa nimisambilizizye yawatumwa.

Impongolo mfyenenkane

(Luka 13:24)

13Yinjilanji pampongolo mfyenenkane, amuno impongolo wemwasa ninzila yino yalungama kwilowelwe yapepuka, munzilanye yoo ayino awavule wakapita. 14Ukuwa impongolo mfyenenkane ninzila yino yalungama kuwumi antale, yeni wano wakayizana wali watichi.

Umuti nivikomwa vyakwe

(Luka 6:43-44)

15Muwachenjela nawatumwa wawufi: wano wakwizanga kwemwemwe awalanga kulonde wakuloleka ngati ang'onzi, ukuwa mukasi ampumpi nkangu. 16Mwandi muwawamanyila kumilimo yawo. Imiti yamyunga isikoma ivikomwa, nkololwe asikoma amaku. 17Umuti wuvunde wukakoma ivikomwa vizima, ukuwa umuti wutuze, wukakoma ivikomwa viwipe. 18Umuti wuvunde wutanga wukome ivikomwa viwipe, numuti wutuze wutanga wukome ivikomwa vizima. 19Umuti wonsi wuno wusikoma ivikomwa vizima wukaputulwa awusumbilwa mumulilo. 20Achaleka fwandi, mwandi muwamanyila awatumwa wawufi kumilimo yawo.

Ntawamanyile

(Luka 13:25-27)

21Asi amuntu wensinye wino akanjita akuti, We Mfumu, Mfumu Leza awino aliyinjila mu Wufumu wamwiyulu, ukuwa nkandi wano wakachita ukulonda kwa Monsi wane wino ali mwiyulu. 22Pawandanye wowo, awavule waliwati, We Mfumu, Mfumu Leza! Twavwanjilanga mwizina lyako amazwi yakwe Leza, mwizina lyakonye amuno twawinjilanga imizimu miwipe nukuchita ivizungusyo vivule! 23Apano ndiwanena inti, Ntawamanyile. Mfumilani pano, mwewawembu-mwe!

Wakazenga wang'anda wawili

(Luka 6:47-49)

24Achaleka wensi wino akwivwa amazwi yane yanye-yaa nukuyatontela wakolana numuntu wamano wazenzile ing'anda yakwe pemfuzi. 25Imvula iwatonya, nimilamba iwatantala, numuza awuwapupa nkaninye wukuma inga'anda yoyonye. Ukuwa nanti kupona, amuno yazenzilwe pe mfuzi.

26Ukuwa wensi wino akwivwa amazwi yane yanye-yaa nanti kuyatontela wakolana numuntu mutumpe wino wazenzile ing'anda yakwe paluselesenga. 27Imvula iwatonya, nimilamba iwatantala, numuza awuwapupa nkaninye wukuma pang'andanye yoyo, ipona. Ye vino yaponile uwuwi!

Amaka yakwe Yesu

28Walile pano Yesu wamala ukuvwanga vyonye-vyoo, iwumba lyawantu alizunguka kumisambilizizye yakwe. 29Atalingine nawasambilizya wawo awamasundo, ukuwa weni wasambilizyanga namaka.

Currently Selected:

Mateyu 7: WWN82

Highlight

Copy