Mateyu 19

Yesu asambilizya ivyakutayana kwawung'anda

(Marko 10:1-12)

1Ng'ukuti pano Yesu wamala ukuvwanga vyonye-vyoo, afuma mu Galileya aya munsi yakwe Yudeya, mumbalama yaluzi lwakwe Yordani. 2Amawumba makulu ayamukonka, awapozya kokonye.

3Awa Falisi wamwi awaya kweweliwe awamwelezya awati, Wuzye chayana mwisundo litu umuntu ukuwinga umuchi nano akulondela?

4Yesu atolelela ati, Wuzye mutawazya amawaliko matele? Pakutalika-talika Umwelewuzi welewuzile umonsi numwanachi. 5ati, Muno achonye-choo umonsi alisya yisi nunyina awe apaliponga numuchi, wowili wawe amuwili wonga. 6Achino ye watachiwanga wawili, ukuwa wenga. Achaleka, kusikwezya umuntu ukupawunkania, chino Leza wasanzya,

7Awa Falisi awamuwuzya awati, Ngamuno chani chino fwandi Musa watusunzile ukuti umonsi angapa umwanachi ekalata wakumuwinga?

8Yesu awatolelela ati, Musa wawazumilizizye ukuwinga wawakwinu muno akukalala kwamyezo yinu, Ukuwa ukufumilila kuwutalichilo chitalinji awoo. 9Nkuwanena nkuti, wensi wino wiza wawinga umuchi wino asi numulandu, ngandi waya watwala winji atela akuzeleluka.

10Awasambilizi wakwe awamunena awati, Ndi umulandu wuli awonyewoo kumonsi numwanachi, fwandi chisi achizima ukutwala.

11Yesu awatolelela ati, Ukuwa amazwinye yaa yasi ayawantu wonsi, nkandi kwakwe wano chapwa nu Leza. 12Amuno kuli ivintu vilekane-lekane vino vikalesya awonsi ukutwala: amuno wamwi wakwasilwe awowonye; nawo wanji wachisilwe wowonye; nawanji watanga watwale muno a Wufumu wamwiyulu. Ukuwa wino angapochelela choo ndi achipochelele.

Yesu apepa utwana

(Marko 10:13-16; Luka 18:15-17)

13Awantu wamwi awatwala utwana kwe Yesu alyakuti akawike amakasa yakwe petolito, atupepe, ukuwa awasambilizi wakwe awawakalipila. 14Ukuwa Yesu ati, Lekani utwana twize kwenene, mutize mutulesye ukwiza amuno Uwufumu wamwiyiyulu awatwamwata wonye-woo.

15Awika amakasa yakwe petolito afuma nukufuma.

Umulumendo muchindame

(Marko 10:17-31; Luka 18:18-30)

16Umuntu wumwi aya kwe Yesu ati, Musambilizya, nga ingachita chizimachi ukuti njize mpochelele uwumi wamuyayaya?

17Yesu amutolelela ati, Nga ukumbuzizya chani kuvyakwe chino achizima? Umuzima aliwenganye-nsu. Ndi ukalonda ukwinjila muwumi tontelanga amasundo.

18Awuzichisya ati, Nga amasundochi?

Yesu ati, ayakuti, Utakoma; utazeleluka; utakwiwa; utawipizya; 19uwachindika eso nunyoko; swinya uwakunda umuwuyo ndivino wayikunda.

20Umulumendo amunena ati, Vyonsinye vyoo nasunga. Nga nchili nasowelwa chani?

21Yesu ati, Ndi ukulonda ufike pakafiko, yanga ukakazye vino uli navyo upe awasaluke indalama, uliwa nimboto yamwiyulu; ngapano uyize unkonke.

22Ukuwa ala umulumendo wivwa amazwinye yayo awapita afwilimine, amuno walinji ninsawo mvule.

23Yesu anena awasambilizi wakwe ati, Nkuwanena nkuti, Chatala wuli kuwachindame ukwinjila mu Wufumu wamwiyulu. 24Swinya nkuwanena nkuti, Chapepuchila ingamila ukupulunkana mwilinso lyansindano, ukulusye umuchindame ukwinjila muwufumu wakwe Leza.

25Awala awasambilizi wivwa wowonye awazunguka. Awati, Ngafwandi weweni angatulwa?

26Yesu awalolesya awanena ati, Kuwantu choo chitanga chichitwe; ukuwa kwe Leza kweni chingachitwa.

27Ngapano Peter atolelela ati, Lola, twasya vyonsi, twakukonka. Ngafwandi tuliwa nachani?

28Yesu awanena ati, Nachawuzimanye nkuwanena nkuti, Ndi Umwanamuntu wiza wapungama pandulu yakwe iyakuchindamikwa munkulo-mpya, namwenye ikumi nawawili mwewantu mukankonka muliyikala pazyandulu, mwize muwapanzya imyiko yakwe Israeli ikumi nayiwili. 29Nawonsi wano wiza wasya ing'anda zyawo pamwi awanyina nanti ankazi zyawo nanti awayisi pamwi wanyina nanti alikwata lyawo pamwi ivyalo vyawo muno alizina lyane, walipochelela walutilizye, wapyane nuwumi wamuyayaya. 30Ukuwa awavule wano kanonzi awanankolelo walisyalichila, nawavule wano kanonzi awansizi walikolela.

Currently Selected:

Mateyu 19: WWN82

Highlight

Copy

Compare