Mateyu 18
18
Ngaweni wakula walusya?
(Marko 9:33-37; Luka 9:46-48)
1Pampindinye yoyo awasambilizi awaya kwe Yesu, awamuwuzya awati, Ngafwandi weweni wino wakula walusya muwufumu wamwiyulu?
2Yesu ayita akana, akawika pakasi pakwe woliwo, ati, 3Yizukani choo! Ndimutanga mupiluke ndivino utunya, mutalitela mwinjile muwufumu wamwiyulu nawanda. 4Wino wakula walusya muwufumu wamwiyulu awino wayichefya ndivino akanyanye kaa. 5Nawensi wino wiza wapochelela akana kamwi ndivino kanye-kaa mwizina lyane alitela wampochelela nenenye.
Amelezyo yakuwembusya
(Marko 9:42-48; Luka 17:1-2)
6Ukuwa wino wiza wapunuzya wumwi uwawatichinye ndi wee wino akansuwila nene, chingazipa ndinyina wiwe mukulu ayize asayikwe munsingo yakwe, ang'wezwe mwesumbi muzike. 7Owe kalanda-we kunsi yino ili nivintu vino vikapunuzya awantu awapiluka! ivintu vyamwatanye ndi woo vililanga vikupona-ukuwa akalanda kasikolo kwewino akaleka vyovyonye avipona!
8Ndi ikasa lyako nanti achinama chikukupunuzya, chiputulanie uchisumbe! Chazipila uyinjila muwumi wechilema, pamwi wechikonta, ukulusye ukuwa namakasa yawili nanti amanama yawili usumbilwa mumulilo wamuyayaya. 9Ndi ilinso lyako likukupunuzya, ulifolowola ulisumba! Chazipila uyinjila muwumi wechintongo, ukulusye ukuwa naminso yawili usumbilwa mwilungu lyamulilo.
Umulumbe wang'onzi nsowe
(Luka 15:3-7)
10Muwalola mutize muwasula wumwi uwawatichinye waa. Nkuwanena nkuti, Penye awangeli wawo awamwiyulu wakuwanga pankolelo pa Monsi wane uwamwiyulu. [ 11Amuno Umwanamuntu wizizile kukutula awasowe.]
12Ngamwenji mukwelengania mukuti wuli? Wuzye mukuti umuntu wino ali ning'onzi umwanda, angachita wuli ndiyonga yasowa? Akasya amakumi mufundikambali ning'onzi mufundikambali zikulya mumbali yamyamba aya kukuvwamba-vwamba yino yasowa. 13Ngandi wayizana, nawuzyenye akazewela nayo ukulusye ing'onzi zino zitasovile amakumi mufundikambali nimfumila mufundikambali. 14Awowonye avino nu Monsi winu uwamwiyulu asilonda wumwi uwawatichinye ndi waa asowa.
Ndi umunyonko akuwembuka
15Ndi umwinaso akuluvyania, yanga ukamulanjizye ukuwifya kwakwe. Amuwendama, mwenganye. 16Nd'achino waya wakwivwa, utela wanyosyaumwinaso. Ukuwa ndiwaya wakana ukukwivwa, uya usenda wumwi pamwi wawili amuya nawo, alyakuti umulandu wonsi wukapanichiswe nawakalola wawili pamwi watatu, ndimuno amawaliko matele yavwanjila. 17Ndiwaya wakana ukwivwa, uya ulongola umulandu wonsi kwi Kleziya, Ngandi na kwi Kleziyanye waya wakana ukwivwa, umuleke awe ngati alikandi swinya ngati amusanguzi.
Ukulesya nukuzumilizya
18Nachawuzimanye nkuwanena mwensi nkuti, Chonsi chino mwiza mwalesya munsi moo ye chilileswa namwiyulunye; nachino mwiza mwazumilizya munsi chilizumilizwa namwiyulunye.
19Swinya nkonjelezya nkuwanena nkuti, Ndiwawili awakwe mwemwe wiza wazumilizyania munsi moo kukantu konsi kano mwalenga, kalichitwa nu Monsi wane uwamwiyulu. 20Amuno kuno wawili nanti watatu wawungine mwizina lyane, ndilanga indi nawo kokonye,
Umulumbe wamuntu mukalale
21Ngapano Peter aya amunena ati, Tatakulu, Wuzye impindi zinga zino uwunji angalanga akumbifya nga ndange nkumutetela? Wuzye ampindi munenulambali?
22Yesu amutolelela ati, Awe, nsinakuti, zisuke impindi ziwe munenulambali, ukuwa amakumi munenulambali impindi munenulambali, 23amuno uwufumu wamwiyulu wakolana nimfumu yino yalondanga ukuwazya impa zyawawomvi wakwe. 24Ala vino watalika ukuwazya, wumwi wino wapavile indalama imyanda namyanda imintapendwa atwalwa kweneko. 25Ukuwa umuntunye weyo atalinji nindalama zyonsi izyakulipa impa yakwe, achaleka yisikulu akomelezya ukuti akazwe awe amuzya, apaliponga numuchi nawanakwe navyonsi vino walinji navyo, ngatele walipa impa. 26Umuntunye weyo afukama pankolelo pakwe yisikulu, alambilizya ati, Ntechelela, nazina, ndikulipa vyonsi! 27Yisikulu amulolela ichilanda, amutetela impa amutaya apita.
28Ala vino wapita, aya asunkania wino wawombanga nawe, wino nawe wamupavile indalama ntichi. Amuvumbatila amutitila kunsingo. Ati, Ndipa vino wampawa. 29Umuwuye apona pansi amulambilizya ati, Ntechelela ndikulipa! 30Ukuwa weni akana; aya amusumbila mung'anda yavingololo ukuti asuke ayize alipe impa yoyo, 31Achaleka awawomvi wawuye walanga walola vino vyachisilwe, awavitwa, awaya awalongola vyonsi kweyisikulu. 32Ngapano yisikulu anyoka ayita umuwomvinye weyo. Ati, Wechiwelewele chamuzya-we! Nakutetezile impa yonsi nuwukulu, muno wandambilizizye. 33Wuzye wenji utanga ufwile umuwuyo inkumbu? 34Yisikulu amuvitilwa nkaninye, amutuma kung'anda yavingololo ukuti akasundwe asuke ayize alipe impa yonsi.
35Yesu apelelechezya namazwi yakuti, Avino nu Monsi wane uwamwiyulu aliwachita ndi mukukana ukutetela awinaso, mwensinye, nimyezo yinu yonsi.
Currently Selected:
Mateyu 18: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
