James 5
5
Uwusoche kuwachindame
1Achaleka aleni, mwewachindame, teyelezyani! Lilanji muwasinsimuchila muno awuyimvi wuno wandi wuwaponele! 2Insawo yinu yawola, nivizwalo vinu vyalika nakawunguzi. 3E golide winu nu silivara vyalika nimiloso, nimilosonyeyoo iliwa achimanyilo chakuwasinila, iyize ilye imiwili yinu ngati amulilo. Mwalundika insawo yinu imifuli mumandanye yaa ayakupelelechezya. 4Mwakana ukulipila awantu wano wawawombela muvyalo vinu ichilambu chawo. Siyivwani vino wakukwinuluka! Inkuta yakwe wane wakasinza muvyalo vinu yivwika mumakutwi yakwe Leza, Imfumu yamakayonsi! 5Uwumi winu uwamunsi moo walinji awakuyilosya nukusechela konsi. Mwayinia nivyamafuta ukulindilila uwanda wakukomwa kwinu. 6Mwapanzya nukukoma wano wasi numulandu, nawo wasinakukana.
Ukutechelela mbali namapepo
7Achaleka fwandi, wanawitu, muwawa mwewachimyamya, isuke Imfumu iyize-iyize. Mutele mulolele kumulimi vino akalindilila chimyamya ukuti alole vino umusili wakwe wulimulambula ivizawalo. Akalindilila kumilundo nimvula yaminjililo. 8Namwenye mwazipila ukulindilila chimyamya. Mulemasye chikale chiti-ndi, amuno uwanda wakwiza kwa Mfumu wapalamila.
9Mutakwinana, wanawitu, alyakuti Leza atize ayize awapanzye, Kapanzya wapalamila ukwiza. 10Wanawitu, yizukanji awatumwa wano wavwanjilanga mwizina lya Mfumu. Awano wawe avilolelo vinu kukulindilila chimyamya mukuyimba. 11Muno akuzizimichizya kwawo tukutanji awalongo. Mwayivwila ivyakuzizimichizya kwakwe Job, mwamanya nachino Imfumu yamuchitizile pakupelelechezya. Amuno Imfumu awili wankumbu-nkumbu nuluse.
12Ukulusye pakwe vyonsi, wanawitu, ponsi pano mukulayilizya chimwi mutize muwalapa; nanti akulapa iyulu, nanti amusili, nanti achintu chimwi. Ukuwa muwati, Eta ndimukuzumila, pamwi Awe, ndi mukukana, alyakuti mutize muponele mwipanzyo lyakwe Leza.
13Wuzye pali wumwi mwakwe mwemwe wino akuyimba? Wazipila ukupepa. Wuzye wumwi ali nichimwemwe? Wazipila awakwimbila indwimbo zyamalumbo. 14Wuzye pali umulwale wumwi? Wazipila ukwita wasongo wi Klezia, wize wamupepele wamupake namafuta mwizina lya Mfumu. 15Ipeponye lyoo, ilyisuwilo lingapozya umulwale; Imfumu ingamupulumula awe nuwumi, nuluwembunye luno wachita lungatetelwa. 16Achaleka aleni, fwandi kanonzi, zumilanji amawembuko yinu pawawuyo, muwapepelana nukupepelana, alyakuti mungapola. Ipepo lyamuntu muzima likachita ivikalambane. 17Eliya walinji amuntu ndivino sweswenye. Wapefile nkaninye nimvula ileka ukutonya, akuwa ichilala chamyaka yitatu nimyezi mutanda. 18Anyoka apepa swinya, mumawingo amutonya imvula namunsi amuwa ivyakulya.
19Wanawitu! Ndi wumwi akuvungula afuma mukusimichila, nga ndi wumwi waya wamunyosya swinya, 20mwazipila ukwizuka choo: wensi wino wiza wanyosezya umuwembu wamufumya kuwuwipe wakwe alitela wapususya umuwembu weyo kumfwa, alileka amawembuko mavule yatetelwe.
Currently Selected:
James 5: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
