Profet Sekaraea 10
10
Lord nhaꞌa cheke mala tei snagla nogna naiknore
1Ghotilo toreni Lord mala kuru mei nakhete ka thofno narane gna na.
Naugna Lord kolho teke eni khoveo na te mala nakhete na.
Eghuteuna mana ginauna snakre mei nakhete biꞌo nei nakhete ikoi mala soru mala karha gano ka nagare naiknore.
2Nu naiknore toreni mumuju god mala toghodi,
eghuteuna mare toreni mae khaekae mala chekeni unha nate thoke mei na.
Nu cheke tughu te eni mana na khogla chaghi kolho.
Mare rurutha gaoghathodi mifi re, nu mare khogla chaghidi kolho mare.
Mare edi igre ka naiknore mala fatutuanidi glepo te theome tangomana nate toghodi naiknore.
Naugna igne, naikno igre tei tafri jateula sipu te snivi mata ra eghu.
Uve, mae igre papara jateula sipu te theo kaisei naikno te reireghidi ra eghu.
3Lord ne cheke eghu,
“Iara diꞌatagu fara ka mae mala baubatu igre naugna mare ne theome reireghidi nogu naikno iara gre,
eghuteuna iara ginauna paradi mae mala baubatu igre.
Naikno igre jateula nogu sipu eghu iara,
eghuteuna iara thegu ginauna reireghidi mare.
Iara Lord mae ihei te au nolaghi fateote'o igne ginauna toghodi mare mala nheta jateula hose mala magra eghu.
4Iara ginauna vavahi keha mae ka vikegna Juda mala baubatu ka nogu naikno iara gre.
Mare ginauna maku jateula thina te togho hagheni suga na,
ba jateula gaju te haru te maku tagna phukrigna suga tapuale ia eghu,
ba jateula phaloho mala magra ra eghu.
5Mae igre ginauna na jateula mae nheta ka magra te tapla sorudi mae naoka re ke lamna chopu ra eghu.
Eghuteuna naugna iara Lord na toghodi mare,
mare ginauna uludi mae naoka re eghuteuna famamajadi iheire te chari ka hose.
6“Iara ginauna thofno farerheta naiknodi Juda,
eghuteuna iara ginauna fakarhidi naiknodi Israel.
Iara ginauna kokhoni nogudi fara mare mala ke kafe hata fapulodi ka nodi thofno vido re.
Mare ginauna au fakeli ka vido igne,
jateula teke theome thododi iara tifa ra eghu, naugna iara nodi Lord God mare,
eghuteuna iara ginauna fanomho ka nodi tharai re.
7Naiknodi Israel gre ginauna jateula mae te nheta ka magra ra eghu,
eghuteuna mare ginauna glealeꞌa fabrahu,
jateula mae te koꞌu waen ra eghu.
Thudi nate karha mei ke leghudi re ginauna ghathodi na glealeꞌa fabrahu,
naugna iara Lord eni igne ka mare.
8Iara ginauna kilo meidi nogu naiknore mala salo fodu mei.
Iara ginauna fakarhidi,
eghuteuna mare te gnafa na mala kmana fara jateula tifa ra eghu.
9Neuba iara ne lisa laodi ne tei au tafri ka keha kantri delei,
nu mare ginauna ghatho ghau iara kolho.
Eghuteuna mare baludi thudi re,
mare ginauna tangomana te karha teu na teke pulo mei ka thofno nodi namono re.
10Iheire te au Ijep nei Asiria,
iara ginauna nake atha fapulo ka nodi glose re.
Iara ginauna kafe atha meidi gnafa mala au ka nohi Gilead nei ka kantri Lebanon.
Eghuteuna vido te gnafa te au mare tagna na ginauna fodu fara ghilei theo vido maladi mare te gnafa na.
11Kate thoke mei puhi biꞌo ka mare na,
iara ginauna fanograni puhi biꞌo tuana jateula iara tangomana te fanograni goighovi biꞌo,
nei te thofno moja Khoꞌu biꞌo Nael ia eghu.
Naikno di Asiria teke fahaehaghedi thedi igre iara ginauna tapla faparidi gnafa.
Eghuteuna nogna nolaghi king gna Ijep ginauna blalho theo nafugna.
12Iara ginauna toghodi nogu naiknore mala rheta ka nogna nolaghi Lord,
mala kilo fnakno ghau iara nei leghu ghau iara fabrahu.
Iara Lord, te chekeni igne!”
Currently Selected:
Profet Sekaraea 10: mrn
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
