Profet Sekaraea 11
11
King te diꞌa re theo nodi nolaghi te mala king na
1Ghotilo naiknomi Lebanon!
Tothora nomi suga re mala tangomana khaꞌaghi te mei gnubra fahui nomi gaju sida ghotilo are.
2Ghotilo gaju paen ra!
Ghotilo mala tanhi fabiꞌo eigna gaju sida ra la grofohi.
Famane gaju igre, khaꞌaghi la kafe nhako fahuihi.
Gaju ok te au ka rijon Basan!
Ghotilo jaola tanhi fabiꞌo,
naugna gaju biꞌo mata ra la mei kato soruhi naikno.
3Mae mala reireghi sipu ra diꞌanagnafa nei tanhi fara,
naugna vido te au famane buburu tadi ra la dofidihi.
Lion ra jaola tanhi,
naugna namhata biꞌo rhegna Khoꞌu biꞌo Jordan aheva te mala au dire la diꞌahi.
Phia mae mala reireghi sipu
4Lord, nogu God iara, ne cheke eghu ka iara, “Iagho mei mala reireghidi naikno te jateula mae ihei te reireghi sipu ra eghu. 5Naikno te foli nei aknu falehe teu sipu igre ginauna theome tangomana te papara na. Eghuteuna mae te sabiri sipu igre, mare cheke eghu, ‘Tegio ka Lord! Gognarona iara kaisei mae dedei!’ Eghuteuna mae mala reireghi sipu igre jaola theome kokhonidi mare. 6Iara magnahaghei nigho iagho te eni glepo igne, naugna iara ginauna theome ke kokhonidi naikno gna vido igne. Iara ginauna tusu lao gaoghatho te diꞌa ka mare mala goigonidi kheradire, eghuteuna iara liliseidi mae igre ke paridi nodi nolaghi nodi mae lida re. Mare ginauna goigoni glose igne, eghuteuna iara ginauna na theome fakarhini kaisei ka mare eigna puhi biꞌo igne.”
7Eghume iara eni unha te chekeni Lord ka iara na. Iheire te foli sipu nei mae te sabiri teu igre, mare foli ghau iara mala reireghidi sipu tela vavahi hila naiknore nate ghamu igre. Aonu iara atha phei khodo mala reireghi sipu. Kaisei na iara kiloni “Namha” eghuteuna keha na “Loku fodu” eghuteuna iara na reireghidi fabrahu. 8Keha thilo mae sipu mala reireghi sipu te loku fodu ghehati igre theome magnahaghei ghau iara, thilo mare theome keli ranghi ghau iara ghilei babaꞌo iara ka thilo mare.
Naugna igne, ke lamnagna kaisei nhigra iara ngholhi fajifladi thilo mare. 9Aonu iara ne cheke eghu ka sipu igre, “Iara ginauna tirogu reireghi ghami ghotilo. Ghotilo mala lehe, lisa ghami mala lehe. Ghotilo te mala snivi ra, lisa ghami mala snivi. Eghuteuna ghotilo te karha teura, snakre ghami mala goigoni ghami themi ghilei kafe lehe ghotilo.”
10Eghuteuna iara atha khodo te kiloni iara “Namha” igne lolhopa igne fagaglana eigna nhaꞌa cheke teke eni iara baludi naiknodi Israel, gognarona gnafahi. 11Eghuteuna ka kaisei narane tuana la, nhaꞌa cheke igne gnafahi. Kate edi iara glepo igre, mae te foli nei sabiri sipu teu igre filoni nei laseni eghu chekegna Lord igne.
12Eghuteuna iara cheke eghu ka mare, “Jame ghotilo magnahaghei te foli nomi taba ka iara, ghotilo foli. Nu jame te theo na, keliu kolho.” Eghuteuna mare skel tolufulu silva ne famei ka iara mala foli ghau iara.
13Lord ne cheke eghu ka iara, “Iagho koko tei sileni igne ka mae te mala horo suspen ka glose ana.” Aonu iara hata tolufulu silva te taba ikoi kolho, eghuteuna koko tei sileni igne ka ihei te loku lamna ka nogna Sugablahi Lord.
14Aonu iara ne atha keha khodo te kiloni “Loku fodu” igne ne lopa pea mala laseni naiknore loku fodu fari hoteidi Juda ghe Israel igne la gnafahi la theome loku fodu gognaro na.
15Aonu Lord ne cheke eghu ka iara, “Gognarona magnahaghei nigho iagho mala jateula te kaisei mae fameomekro te mala reireghi sipu ra eghu. 16Glepo igne kaisei fagaglana eigna iara ginauna lilisei kaisei mae te diꞌa mala reireghi sipu mala funei frunini glose igne. Mae tuana ginauna theome reireghidi kolho sipu te tei ka vido te mala lehe tagna na, ba hirodi sipu te tei tafri. Mana ginauna theome toghodi sipu te thubu, ba tufa gano ka sipu majaghani. Nu mana ginauna aknu falehe sipu te famane mala ghamu, nei jaola atha koko tathabla dire.
17“Kokhoni ni fara mae ihei te tirogna reireghidi sipu re tuana!
Uve, nabagna na mae tuana mei armi mala goigoni ni mana!
Nabagna na mei naflahi mala kusu khamegna na!
Nabagna na bilo koko tathagna fei nheta na mala dofu mana!”
Currently Selected:
Profet Sekaraea 11: mrn
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
