Galesia 5

Mae Kraes neke fasnagla ghita

1Mae Kraes neke fasnagla ghita mala au snagla fabrahu tahati. Eghume ghotilo kegra heta. Thosei snakreni kaisei naikno me mala hata fapulo ghami jateula naikno sneka eghu.

2Fanomho ka iara. Jame kaisei mae cheke eghu, “Te leghuni iara u puhi te mala vahe na, iara ginauna doglo ke ulugna God.” Mae Kraes ginauna theome toghoni mae tuana. 3Eghuteuna iara gne nake chekei ngala ka ghotilo, iheire fateo te snakredi thedi te vahe are, mare mala thofno leghudi vetula fateore. 4Ghotilo iheire te mala doglo nomi balugna God teu te fariuriu leghuni vetula na, Kraes na la theo nafugnahi ka gaoghathomire. Ghotilo la tei kokonihi nogna khokofakasai God na. 5Nu ka nogna thotogho mae Tharunga te Blahi na, ghehati ronuni fara God mala fadoglo ghami ke ulugna mana ginauna. 6Naugna kate salo fodu tahati te kaisei balugna mae Jisas Kraes na, tahati theome mala nangani jame te mala vahe ba theo. Naugna glepo tuare theo nafudi. Nu glepo te ulu na u fatutuani ngala, u nafnata fatutuani te thakle mei kau puhi namha kolho.

7Tifa na ghotilo neke kotu haghe neke biꞌo ka nomi fatutuani na. Mae ihei si teke farore ghami ghotilo teke theome leghuni u nabrou te doglo gnea? 8Unha puhi te edi mana te mala batu ghami ghotilo re theome mei funu ka God, mae ihei teke vahi ghami ghotilo na. 9Ghathoni si ghotilo igne, “Katha isi ngala ka flaoa na te mala fabiꞌodi u bret te gnafare.” 10Neuba, iara fatutuani ni God mala togho ghami mala theome leghudi farirhiu te theome tutuani re. Eghuteuna mae ihei te fariuriu goigoni ghami ghotilo na, God ginauna parani mana. 11Kheraguro, jame tutuani te toutonu fabrahuni teu iara eigna vahe na, naugna unha si naiknore te para ghau iara gne? Jame toutonuni teu iara eigna vahe na mae Jiu gre ginauna theome diꞌa tadi ka iara kate toutonu iara eigna glehegna Kraes ke kligna gaju fafatha ia. 12Ghaoghathogu iara na, naikno te goigoni nagnafami ghotilo re ginauna dalhadi thedi!

13Uve kheraguro, God neke kilo ghami ghotilo mala au snagla! Theome snagla mala eni ghotilo kaisei najafra, nu snagla mala namha nei fari totoghoi eghu. 14Eigna nogna vetula te gnafa mae Moses re khaputu ka cheke igne kolho, “Namhani kheramu fofodu na jateula iagho te namha nigho themu eghu.”#5:14 Lev 19:18. 15Nu jame diꞌatami fabrahu nei magra teu ghotilo fari themi na, fiofilo ghami, na eghunu roꞌe fahui ghami themi ghotilo ginauna eghu.

Tharunga te Blahi nei puhigna naikno

16Eghume te chekeni iara ka ghotilo na, snakreni mae Tharunga te Blahi mala batuni nakarhami na. Eghuteuna ghotilo ginauna na theome tangomana te eni unha te magnahagheni thinimi na. 17Eigna unha puhi diꞌa te magnahagheni naikno na, thofno jafra fara ka unha te magnahagheni Tharunga te Blahi na. Eghuteuna unha te magnahagheni Tharunga te Blahi na, thofno jafra fara ka puhi diꞌa te magnahagheni naikno na. Repa theome tangomana te loku fodu na, gaoghathogna igne iagho theome tangomana te eni unha te magnahaghei eni iagho themu na. 18Nu jame snakreni ghotilo Tharunga te Blahi na te mala batu ghami fabrahu na, u vetula na ginauna theome tangomana te funei fruni ghami ghotilo na.

19Naugna unha te thofno magnahagheni naiknogna nauthoglu na, glepo igre na thakle mei ka unha te edi mana re: mhala, nakarha thona, gnognoro, 20tufru soru ka mumuju, neilehe, majora, fapholai, goghotu, faheaheta, fabiꞌobiꞌo, famamagra, fafoafota, 21mamagna, koꞌu, ei gaghamu malagna puhi diꞌa nei keha nafnata puhi diꞌa jateula igre eghu. Iara gognaro na cheke faheta ka ghotilo jateula teke eni thegu ka ghotilo tifa ia eghu. Naikno te edi fabrahu puhi igre ginauna theome tangomana te au baludi naikno te funei frunidi God re.

22Nu kate snakreni tahati nakarhada na te mala baubatu mae Tharunga te Blahi na, mana ginauna tusu ranghi ghita namha, gleale'a, pharikeli, au kmu, lolokeli, au keli, u gaoghatho nheta te mala eni unha te chekeni, 23amama nei thosei leghuni unha te magnahagheni thini kolho. Theo kaisei vetula te cheke faparidi naikno te edi glepo te keli igre na. 24Naikno te leghuni mae Jisas Kraes re mare neke tupijuruni hi puhi te diꞌa fateo te magnahagheni naiknogna nauthoglu gne baludi gaoghatho te diꞌa fateo te magnahaghei eni unha te diꞌa. 25Tharunga te Blahi na tusu mei karha ka tahati. Eghume tahati mala jaola leghuni nogna puhi mae Tharunga te Blahi na. 26Thosei fahaehaghe ghita theda, thosei eꞌei puhi ranghini ihei nei thosei goghotu fari theda.

Currently Selected:

Galesia 5: mrn

Highlight

Copy

Compare