Galesia 4

Tahati thugna God

1Iara magnahaghei te chekeni ka ghotilo igne: Jame kaisei sua ikoi fara, mana theome tangomana te funei frunidi gobigna lepo mala nogna mana teku mae kmagna na. Ulu lahu na, mana kaisei nanaba ngala baludi mae glokure. 2Keha naiknoi nate reireghini mana nei reireghidi nogna glepo mana re, ghilei thokeni thofno narane teke lilisei mae kmagna na. 3Tifa na, tahati jateula tuana neku. U vetula nei gobi nafnata glepo ka nauthoglu igne neke reireghi ghita, naugna tahati neke theome laseni God. 4Nu kate mei thofno narane na, God neke kuru mei Thugna. Mana neke karha mei ka kaisei gaꞌase, eghuteuna mana neke au leghuni nogna vetula mae Moses. 5Ka puhi igne mana neke tangomana te foli fajifla ghita gnafa teke au leghuni u vetula igne, mala tangomana tahati gnafa te goro thugna God. 6Eghuteuna te mala laseni tahati te goro thugna God na, mana neke kuru mei Tharunga gna Thugna na mala au ke lamnada. Eghuteuna Tharunga na ne eha eghu, “Mama, Mama.” 7Eghume, iagho gognaro na theome jateula kaisei mae sneka eghu, nu iagho thofno thugna God. Eghuteuna naugna iagho thugna God, mana ginauna na tusu ranghi nigho unha teke nhaꞌa chekenihi mana na.

Nogna namha mae Pol ranghidi naikno khiloau ka namono Galesia

8Tifa, kani teke theome raꞌe lase fakelini teku God na, ghotilo neke sneka ka mumuju kolho. 9Nu gognaro na ghotilo la lase fakelinihi God. Tulao, gognaro na God lase fakeli ghamihi ghotilo. Eghume, eigna unha si ghotilo teke figri fapulo ka gobi nafnata glepo gna nauthoglu igne te theome heta nei thofno theo nafudi teu gnea? Tifa na, ghotilo neke fatutuanidi glepo tuare. Ba, ghotilo magnahaghei teke sneka fapulo ka glepo tuare sia? 10Leghu fata na ghotilo tathaji u narane tuthuana, khafa majaghani nei keha nafnata narane ulu ka finogha. 11Iara thofno nanga nogu ghami ghotilo, na eghunu fiti fagloku biꞌo ghau thegu kolho iara ka ghotilo eghu.

12Kheraguro, iara neke jateula ghotilo neku. Eghume iara tore ghami fara mala leghuni puhigu iara gne. Ghotilo neke theome eni kaisei najafra ranghi ghau iara tifa na. 13Ghotilo laseni eigna thinigu iara gne neke fogra fara, naugna igne iara neke kulu toutonuni u Nonomho te Keli na ka ghotilo. 14Neubane fapuhi biꞌo ghami nogu fogra iara gne, ghotilo neke theome filo fadiꞌa ghau ba khi ghau iara. Theo. Ghotilo neke taji fakeli ghau iara jateula kaisei engel nogna God neku. Uve, ghotilo neke taji ghau iara jateula iara te mae Jisas Kraes thegna neku. 15Ghotilo neke gleale'a fara ka narane tuia. Gognaro na ba? Aheva si gleale'a tuia? Tutuani fara, ka narane tuia ghotilo neke magnahaghei edi glepo te kelire. Jame te keli na ghotilo bilo fajifla tathamire mala tusu mei ka iara mala togho ghau iara. 16Ba, gognaro na ghotilo nogu naikno naoka iara naugna te chekeni iara glepo te tutuani na?

17Keha naiknore fariuriu fara mala sagu ghami ghotilo, nu gaoghathodire mare theome mala eni kaisei glepo te keli kolho. Mare magnahaghe ghami ghotilo te fnota ka iara mala tangomana mare te fofodu fakeli ka ghotilo. 18Glepo keli fara naiknore te magnahaghei fofodu ka ghotilo na, eghu jame te ghathoni mare glepo te keli na. Eghuteuna te keli na mare jame jateula tuana eghu fabrahu, thosei eni kolho kate au teu iara balumi ghotilo na. 19Thuguro, iara haimini fabrahu eigna iara jateula gaꞌase te namo fakarha sua ia eghu. Naugna iara kabru ghegu fara, eigna iara ofoni narane te mala thofno leghuni ghotilo puhigna mae Jisas Kraes. 20Iara gognaro na magnahagheni fara te au balumi ghotilo, mala tangomana te tughu katha vido nogu cheke na, naugna iara nanga ghami fara ghotilo.

Hega ghe Sera

21Ba, ghotilo iheire te magnahaghei leghuni vetula na, ghotilo theome laseni unha te thofno chekeni ka vetula na? 22-23Te chekeni grioriso te blahi na mae Ebraham neke au phei thugna nalhaꞌu. Thugna thau te sneka na, mana karha mei jateula sua te gnafa eghu kolho. Eghuteuna thugna thau te snagla na, mana karha mei leghuni u nogna nhaꞌa cheke God na.

24Glepo igre tahati filodi jateula thotoghale eghu, eigna phei gaꞌase igre repa falalase phei nafnata nhaꞌa cheke. Kaisei nhaꞌa cheke na neke fufunu mei ka Thogele Sanai, igne Hega ihei teke fakarhani sua te mala sneka kolho na. 25Hega gne gaoghathogna na Sanai eghu, kaisei thogele Arebia, nu jaola kaisei thotoghale gna namono biꞌo Jerusalem. Naugna Jerusalem gne jateula kaisei mae sneka eghu, eghuteuna naikno Jiu teke au ka namono Jerusalem igre mare jateula mae sneka eghu. Naugna mare mala leghuni nogna vetula mae Moses na. 26Nu Jerusalem te au kligna na jateula gaꞌase te snagla eghu, eghuteuna naꞌa idoda tahati. Naugna tahati theome neke karha mei jateula mae sneka eghu. 27Te risoi ka grioriso te blahi na,

“Iagho gaꞌase te theome karha sua na,

iagho gleale'a kolho.

Iagho gaꞌase te theome kabru nga teu kate karha sua na,

iagho eha balu gleale'a.

Naugna gaꞌase te au thegna na ginauna au kmana thugna,

mare ginauna kmana uludi thugna gaꞌase te au khetogna na.”#4:27 Isa 54:1.

28Nu ghotilo kheraguro, ghotilo jateula mae Isak eghu. Eigna ghotilo jateula thugna God eghu naugna ka nogna nhaꞌa cheke mana igne. 29Ka narane tuana, sua teke karha mei jateula sua te gnafa teu igne, mana neke parani mae Isak mae ihei teke karha mei leghuni Tharunga te Blahi na. Eghuteuna jaola nanaba gognaro. 30Nu unha te chekeni grioriso te blahi na? U grioriso te blahi na ne cheke eghu, “Khi teini gaꞌase sneka na balugna thugna. Naugna thugna na theome tangomana te hata ginauna kaisei glepo ka mae kmagna na. Thugna thau te snagla na kolho nate hata na.”#4:30 Jen 21:10. 31Eghume kheraguro, tahati theome thugna thau te sneka, nu tahati thugna thau te snagla kolho.

Currently Selected:

Galesia 4: mrn

Highlight

Copy

Compare