Jị'cavacdye' 5
5
Mọꞌ comoꞌnacsiꞌ sánacdyeꞌ judyeyaꞌ muꞌ Oveca buꞌyity
1Chat qui tacves un muꞌ bäꞌyaquischetysiꞌ, cạveꞌ yụ yiris comoꞌnacsiꞌ sánacdyeꞌ päräꞌcheꞌ sánacsiꞌ, mọꞌ cac̣htac yävätidyeꞌyaꞌ. 2Chat qui cạvete yụ yirity anjer ferdyeꞌtumtyiꞌ, muꞌ fer p̂eyaqui, yi:
—¿Jụꞌñity a ĉa yụꞌtac paj qui muꞌ jäctyeꞌ cac̣htacdyeꞌ mọꞌ judyeyaꞌ dajtyetyeꞌ mọꞌ sánacdyeꞌ? —yi muꞌ.
3Mijam jụꞌñity yụꞌtac paj qui muꞌ dajtyetyeꞌ mọꞌ sánacdyeꞌ, mijam jụꞌñity mạyedyeꞌchety mijam jacchety mijam jacĉantyiꞌ chimeꞌ, mijam yirity meꞌ yụꞌtac in paj qui muꞌ dajtyetyeꞌ in mọꞌ sánacdyeꞌ paj qui p̂eyeꞌ in. 4Mọꞌdyes där tári yụ ĉaĉaij na jam jụꞌñity muꞌyaꞌ meꞌ yụꞌtac in paj qui muꞌin dajtyeꞌ in paj qui p̂eyeꞌ in mọꞌ sánacdyeꞌ jätäjyiꞌ chuc mọꞌ. 5Yirity tashcheꞌ buꞌyity jin yụ:
—Jam raꞌ tári mi, jeshaꞌ muꞌ Pupujriꞌ buꞌyity, muꞌ Judáĉantyiꞌ ñuruꞌtyity, muꞌ nash ayoꞌbuꞌyity Davidtyiꞌ vóshiꞌ muꞌ, muꞌ nash jiꞌpeñeꞌtyiꞌ Sọyoꞌ, mọꞌdyes qui muꞌ tupuj jäctyeꞌ cac̣htacdyeꞌ mọꞌ judyeyaꞌ dajtyetyeꞌ mọꞌ sánacdyeꞌ —yi jin yụ.
6Chat qui tashcheꞌ mọꞌ bäꞌyaquis muꞌcheꞌ cạvete yụ muꞌ Oveca buꞌyity, muꞌyaꞌ rụiꞌcujcuij muꞌ chidyiꞌĉanyaꞌ mọꞌin vạjpedyeꞌyis tsạꞌ buꞌyis in judyeyaꞌ muꞌin muntyiꞌ in tashcheꞌ buꞌyity in. Muꞌ Oveca buꞌyity jorojĉan ijac jiquej muꞌ, yävätidyeꞌ dáshu muꞌ judyeyaꞌ chiyävätidyeꞌdye vej muꞌ, mọꞌ cạiꞌ yävätidyeꞌ buꞌyiꞌ shupquis Jenꞌsiꞌ Ạꞌedyeꞌ muꞌ, mọꞌ Jenꞌ juteꞌ paj qui räj buꞌyiꞌ ọijcheꞌ jac. 7Muꞌ Oveca buꞌyity ĉọcte muꞌ bäꞌyaquischety jäctyete mọꞌ sánacdyeꞌ tacvesve un muꞌ. 8Aty jäctyeteyaꞌ mọꞌ sánacdyeꞌ, mọꞌin vạjpedyeꞌ tsạꞌ buꞌyis in judyeyaꞌ muꞌin päräꞌ quiꞌtac vạjpedyeꞌ jiyity muntyiꞌ tashcheꞌ buꞌyity in, räj muꞌin vaj cäts dyụtsyi in muꞌsiꞌyaꞌ vej in Oveca buꞌyitysiꞌyaꞌ. Cäts jịjcaij meꞌchuiꞌ in vịcdyes muꞌin judyeyaꞌ pijiꞌ oro jẹrejrestumsiꞌ muꞌin. Mọꞌ jẹrejres jeñej buꞌyiꞌ cọdacdyeꞌ muꞌinsiꞌ anicjetetysiꞌ Jenꞌ in. 9Muꞌin jimeyete in muꞌ Oveca buꞌyity, mụiꞌsis jimacdyeꞌ jimeyete in, yi in:
"Mi mọmoꞌ yirity yụꞌtactyiꞌ,
mi mọmoꞌ tupuj jäctyeꞌ cac̣htacdyeꞌ judyeyaꞌ dajtyeꞌ sánacdyeꞌ mi,
ĉaĉaij na mi ijac muntyidyes jiquej,
ĉụiꞌsiꞌyaꞌ chäsh mi yaꞌitacsebi muꞌinsiꞌ juchaj in,
judyeyaꞌ yụꞌtacsi mi paj qui Jenꞌdyety räj in,
yịjyi muntyiꞌ jacchety in,
yoc yoc p̂eyacdyeꞌ p̂eyaquity in.
10Mi yụꞌtacsi paj qui ayoꞌbuꞌyi in,
judyeyaꞌ yụꞌtacsi chimeꞌ mi paj qui cudyitity buꞌyi Jenꞌcheꞌ in,
jaccheꞌ raꞌ ayoꞌbuꞌyi muꞌin in", yi in.
11Cuvij cạvi yụ, seꞌvacsebi yụ jimacdyeꞌ muꞌin shachtyitysiꞌ anjer in, junꞌtum raꞌ muꞌin in, anic jiyi daiꞌ millones in. Cọij buꞌyi in yóyaꞌdyemꞌ mọꞌ bäꞌyaquis o, judyeyaꞌ mọꞌin tsạꞌ buꞌyis in judyeyaꞌ muꞌin muntyiꞌ in tashcheꞌ buꞌyity chimeꞌ in. 12Chat qui muꞌin anjer daiꞌtyiꞌ in fer p̂eyaqui in yi in:
"Tupuj tsun timaꞌqueja muꞌ ujactyiꞌ Oveca buꞌyity,
tupuj jiꞌjäcbija därsiꞌ ferdyeꞌ muꞌ,
ĉaĉaij na muꞌ räj meꞌchuiꞌ jedyeꞌ,
ĉaĉaij na muꞌ anic dyijyedyeꞌtumtyiꞌ.
Där jämꞌyity muꞌ,
anic fer buꞌyity muꞌ,
judyeyaꞌ mạijquedyeꞌtumtyiꞌ,
mọꞌdyes qui muꞌdyemꞌ timaꞌqueja q̂uinꞌ", yi in.
13Meꞌĉandye yụ seꞌvacsebi timaꞌcacdyeꞌ räj jämꞌtacdyeꞌ Jenꞌsiꞌ muꞌ, mạyedyeꞌchety in judyeyaꞌ jacchety in judyeyaꞌ jacĉan bäꞌyity in, judyeyaꞌ marĉansiꞌ chimeꞌ in, meꞌ meꞌ seꞌvacsi yụ. Yi in:
"Tsun timaꞌqueja muꞌ bäꞌyaquischety
judyeyaꞌ muꞌ Oveca buꞌyity chimeꞌ,
yoshoropaij jéyacsejaꞌ,
ĉaĉaij na ferdyeꞌtumtyiꞌ in,
judyeyaꞌ mạijquedyeꞌtumtyiꞌ in,
paj jam jụꞌñisĉan mạyedyeꞌ mọtsiꞌ timaꞌcacdyeꞌ muꞌin", yi in.
14Mọꞌin vạjpedyeꞌ tsạꞌ buꞌyis in voryiꞌ vatyquej in: "Paj meꞌ", yi in.
Muꞌin na päräꞌ quiꞌtac vạjpedyeꞌ jiyity muntyiꞌ in tashcheꞌ buꞌyity in dyụtsyi in, muꞌyaꞌ timaꞌquete in muꞌ Jenꞌ.
Currently Selected:
Jị'cavacdye' 5: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
