Jị'cavacdye' 4
4
Timaꞌcacdyeꞌ Jenꞌsiꞌ muꞌ mạyedyeꞌcheꞌ
1Aty meꞌsiꞌ quivij jịꞌcavacdyeꞌyaꞌ cạveꞌ yụ yiris chụiꞌdyeꞌ vancaiꞌ mạyedyeꞌches. Vatyquej seꞌvete yụ yirity p̂eyaquity, muꞌ tashcheꞌ seꞌvetety jiquej yụ, mọꞌ jeñej yiꞌsiꞌ boñedyeꞌ, chịmoꞌdye seꞌvebanꞌ quivij yụ. Yi muꞌ jin yụ:
—Úcheꞌ jijtuvaꞌ, chat qui raꞌ yụ jịꞌcaveyeye junꞌ chuc raꞌ jiyiꞌ yocsiꞌĉan mạyedyeꞌ —yi muꞌ jin yụ.
2Meꞌĉandye Jenꞌsiꞌ Ạꞌedyeꞌ muꞌ tŝútyin yụ, mọꞌcheꞌdye nạijbite yụ ayos bäꞌyaquis muꞌ mọꞌ mạyedyeꞌches, muꞌcheꞌ cạveteij bäꞌvaꞌjoij. 3Muꞌ bäꞌvaꞌjoijtyiꞌ bäꞌyaquischeꞌ anic där jämꞌsiꞌ pashquedyeꞌ muꞌ, jeꞌñeiꞌ yaꞌijtyis mij in, tịj muꞌ jaspe judyeyaꞌ cornalina, judyeyaꞌ jeꞌñes oꞌpitoꞌ joꞌmes cọtoij buꞌyi bäꞌyaquisyaꞌ muꞌ, muꞌsiꞌ pashquedyemꞌ shandyes muꞌ, jeñej buꞌyi yaꞌijtyiꞌ mij, tịj muꞌ esmeralda. 4Chimeꞌdye cạvacsi yụ yocsiꞌ bäꞌyaquis in, ovemun tyeiꞌ in ayosyaꞌ bäꞌyaquis muꞌ, päräꞌ quiꞌtac vạjpedyeꞌ jiyiꞌ in chichimesdye muꞌcheꞌ bäꞌyi in päräꞌ quiꞌtac vạjpedyeꞌ jiyiꞌ rụiꞌcuꞌ in tashcheꞌ buꞌyity in. Cäts juiꞌbubutyĉantyiꞌ quịꞌsiꞌ in judyeyaꞌ ĉässis muꞌin oro. 5Chimeꞌdye ayosyaꞌ bäꞌyaquis shupquiꞌ venaiꞌquedyeꞌ pururus muꞌ, judyeyaꞌ täräjnacdyeꞌ fersiꞌ. Mọꞌyaꞌ chimeꞌ yävätidyeꞌ furquevaꞌjoiꞌsiꞌ in, tashcheꞌ buꞌyiꞌ bäꞌyaquisyaꞌ ayos muꞌ, mọꞌ cạiꞌ jeñej yävätidyeꞌ buꞌyiꞌ shupquis Jenꞌsiꞌ Ạꞌedyeꞌ muꞌ.
6Chimeꞌdye mọꞌyaꞌ tashcheꞌ buꞌyiꞌ bäꞌyaquis ayosyaꞌ muꞌ yiris jedyeꞌ choñemsiꞌ, jeñej därsiꞌ ojñiꞌ, meꞌ pashquiꞌ. C̣hẹiꞌyaꞌ buꞌyiꞌ mọꞌ bäꞌyaquis muꞌ, mọꞌyaꞌ vạjpedyeꞌ tsạꞌsiꞌ jämꞌtacdyeꞌ Jenꞌsiꞌ muꞌ, daiꞌmun vej mọꞌin tashchemꞌ judyeyaꞌ jäquiꞌvemꞌ. 7Mọꞌ tashcheꞌ tsạꞌ buꞌyis jeꞌñes mọꞌ pupujriꞌ. Mọꞌ päräꞌyis tsạꞌ buꞌyis jeꞌñes mọꞌ vaca, mọꞌ chibinyis tsạꞌ buꞌyis jeꞌñes mọꞌ muntyiꞌ, joꞌmes mọꞌ vejyaꞌ mọꞌ na vạjpedyeꞌyis tsạꞌ buꞌyis jeꞌñes mọꞌ nạijtyiꞌ boñij. 8Mọꞌin tsạꞌ buꞌyis in cäts jäbän pavaj meꞌchuiꞌ in, judyeyaꞌ räj buꞌyiꞌ meꞌchuiꞌ vej mọꞌin. Räjĉan timaꞌquete Jenꞌ in, jam damꞌ jịꞌjutyitiꞌ in, mạij judyeyaꞌ tsedyedyeꞌ meꞌ timaꞌquete in. Yiꞌ in:
"Anic rụijtyity muꞌ,
där tsäquiꞌ buꞌyity judyeyaꞌ jämꞌyity muꞌ mujuꞌchaꞌ ferdyeꞌtumtyiꞌ Jenꞌ Ayoꞌ tsun,
mijam jụꞌñiij muꞌ,
muꞌ tạꞌcaty,
muꞌ muꞌyaty q̂uinꞌ,
muꞌdye ramꞌ yejĉoijtyiꞌ", yi in.
9Meꞌ mọꞌin tsạꞌ buꞌyis in timaꞌquete in judyeyaꞌ yoshoropaij jéte in muꞌ bäꞌyaquischety, muꞌ jam junꞌ mọtsity. Timaꞌcacdyeꞌĉan mọꞌin jiꞌjäcbite in ferdyeꞌ muꞌ judyeyaꞌ irijyedyeꞌ muꞌ chimeꞌ. 10Jämꞌdyeyaꞌ timaꞌqueteyaꞌ in, muꞌin päräꞌ quiꞌtac vạjpedyeꞌ jiyity muntyiꞌ in tashcheꞌ buꞌyity in, dyụtsyi in muꞌsiꞌyaꞌ vej muꞌ bäꞌyaquischetyyaꞌ, muꞌ räjĉan buꞌyity, muꞌ timaꞌquete in judyeyaꞌ ĉụiꞌsiꞌ ĉästacdyeꞌ soꞌmete in. Timaꞌcacdyeꞌtum yi jéte in:
11"Tsuntyiꞌ Jenꞌ, mi nash Ayoꞌ tsun,
tupuj tsun mimꞌ timaꞌqueyac,
judyeyaꞌ yoshoropaij jéyac tsun,
judyeyaꞌ jiꞌjäcbiyac därsiꞌ ferdyeꞌ mi,
mọꞌmun timaꞌquebiyac tsun,
ĉaĉaij na mi jämꞌtyety ọij jac,
räjtumdye jedyeꞌ mọꞌ,
ĉụiꞌsiꞌyaꞌ dyijyedyeꞌ mi jämꞌtyeꞌ mi
judyeyaꞌ räj tsạꞌchucsi chimeꞌ mi", yi in.
Currently Selected:
Jị'cavacdye' 4: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
