Jị'cavacdye' 17
17
Därsiꞌ bäꞌyedyeꞌ jeñej buꞌyiꞌ p̂en meꞌtaquis
1Yirity muꞌ yävätidyeꞌyity anjer, muꞌin cạiꞌtyiꞌ pijiꞌ in, yi muꞌ jin yụ:
—Atsiva, yụ raꞌ jịꞌcaveyeye vaꞌtacdyeꞌ, mọꞌ jịꞌĉojtyeꞌsiꞌ raꞌ mọꞌ chị́yacsi bäꞌyedyeꞌ, mọꞌ meꞌtaquis p̂en buꞌyis, mọꞌ c̣hẹiꞌyaꞌ buꞌyis daiꞌ cojiro in. 2Jacchety ayoꞌ in juchaij mọꞌtum in, jeñej buꞌyiꞌ voꞌvodyeꞌ, meꞌ buꞌyiꞌ mọꞌ shupquiꞌ juchaj muꞌin, meꞌdye mọꞌ chimeꞌ seꞌ jaꞌyacsiꞌ jacchety muntyiꞌ paiꞌ bäꞌyity in judyeyaꞌ jeñej buꞌyi jiꞌshuꞌcacsis paj qui cäc̣häꞌchutyeꞌ in aꞌc̣his dyijyedyeꞌ mọꞌ —yi muꞌ anjer jin yụ.
3Chat qui Jenꞌsiꞌ Ạꞌedyeꞌ muꞌ tŝútyin yụ, muꞌ qui anjer cäjyasĉan jac can yụ. Mọꞌĉan cạveꞌ yụ yiris p̂en, vajedyedyeꞌcheꞌ bäꞌyiꞌ jäijnätycheꞌ. Muꞌ vajedyedyes mọꞌyaꞌ yävätidyeꞌ joꞌnoꞌ muꞌ judyeyaꞌ yiriꞌtac dáshu muꞌ. Aꞌyaꞌ muꞌ yedyej aꞌc̣his sánacdyemꞌ, ñinacdyedyes Jenꞌdyes. 4Mọꞌ na p̂en mọꞌcheꞌ bäꞌyis, jäijnäty mọty quịꞌsiꞌ judyeyaꞌ cạꞌijdyeijtyimꞌ. Muꞌ na oro sháshadyety mọꞌ judyeyaꞌ mujuꞌchaꞌ yaꞌijtyiꞌ mij in. Yiris unĉan tyéquis oro mọꞌ, bänꞌ mọꞌĉan där aꞌc̣his jedyeꞌ mọꞌĉan tyéquisĉan, jeñej buꞌyiꞌ aꞌc̣his dyijyedyeꞌ judyeyaꞌ shapudyeꞌ voꞌvodyeꞌ mọꞌ. 5Jáficheꞌ na mọꞌ caminsis tịj sánacdyeꞌ mọꞌ yiꞌ: "Ọij därsiꞌ bäꞌyedyeꞌ Babilonia, ọijĉan shupquiꞌ räj aꞌc̣his dyijyedyeꞌ meꞌtaquiꞌsiꞌ p̂en in judyeyaꞌ jụꞌñis chuc aꞌc̣his dyijyedyeꞌ jacchetysiꞌ in." 6Yụ cạveꞌ mọꞌ jeñej buꞌyiꞌ shuꞌquis p̂en, ĉaĉaij na jeñej buꞌyiꞌ mọꞌ maj tyecsebiꞌ chäsh muꞌinsiꞌ in anicjetetysiꞌ Jenꞌ in ĉaĉaij na muꞌĉan ijacsi jiquej in, judyeyaꞌ muꞌinsiꞌ chäsh chimeꞌ muꞌin ijactyiꞌ in cäc̣häꞌchucdyeꞌyaꞌ Jesús.
Aty cạveꞌyaꞌ yụ anic tsanꞌ yụ där äjjeꞌ. 7Muꞌ anjer jin yụ:
—¿Junꞌ dash meꞌ äjjeꞌ mi? Yụ raꞌ jịꞌchiqueyeye jedyeꞌ buty cạiꞌ mọꞌ cạves q̂uinꞌ mi mọꞌ p̂en, judyeyaꞌ muꞌ vajedyedyeꞌ mọꞌcheꞌ bäꞌyis, mọꞌ yävätidyeꞌtyity joꞌnoꞌ judyeyaꞌ yiriꞌtactyity dáshu, ĉaĉaij na caminves p̂eyacdyeꞌ cạiꞌ mọꞌ cạves mụiꞌ mi. 8Jeshaꞌ muꞌ vajedyedyeꞌ muꞌ cạvetety mi, muꞌ nash tsạꞌtyiꞌ jiquej, q̂uinꞌ qui namꞌ aty itŝij muꞌ. Jábiyaꞌ qui na ramꞌ cuvij shuban mochĉansiꞌĉantyiꞌ toꞌ jijtuban, chat qui raꞌ jịꞌmotsac. Jacchety muntyiꞌ in jam sánactyiꞌ tịj in Jenꞌsiꞌcheꞌ quirca muꞌ, ĉaĉaij na jambiꞌdyemꞌ jämꞌtacyaꞌ ọij jac jiquej, muꞌ tạꞌcaty sánacsebi tịj muntyis muꞌin, räj muꞌin meꞌ jam sánactyiꞌ in anic raꞌ där äjyi in cạveteyaꞌ in muꞌ vajedyedyeꞌ tsạꞌtyiꞌ, q̂uinꞌ qui namꞌ aty itŝij muꞌ, jábiyaꞌ qui na ramꞌ quivij jiꞌnaijbun.
9Tyi chuc dyijyedyeꞌtumtyiꞌ in tupuj chiqueꞌ in ọij p̂eyacdyeꞌ jedyeꞌ chuc cạiꞌ mọꞌ: mọꞌin yävätidyeꞌyis joꞌnoꞌ in mọꞌin cạiꞌ in jeñej yävätidyeꞌ mụcuꞌ in, yócheꞌdyemꞌ bäꞌyedyeꞌ o. Chimeꞌdye mọꞌin yävätidyeꞌyis joꞌnoꞌ in mọꞌin cạiꞌ in jeñej yävätidyeꞌ ayoꞌ in. 10Aty ĉanamꞌ shuban in, yirity qui namꞌ tacaꞌ ayoꞌbuꞌyi, yoctyiꞌ na jambiꞌ tiyacchuiꞌ ayoꞌbuꞌyi. Aty raꞌ tiyacchutiyaꞌ muꞌ jäquiꞌvety ayoꞌ, damꞌtuqui ramꞌ ayoꞌbuꞌyi muꞌ. 11Muꞌ vajedyedyeꞌ tsạꞌtyiꞌ jiquej, q̂uinꞌ qui namꞌ aty itŝij muꞌ, muꞌ nash q̂uenꞌĉanyity ayoꞌ, meꞌ tsanꞌ q̂uenꞌĉanyity muꞌ, ñuruꞌtyity qui namꞌ muꞌ muꞌdye in yävätidyeꞌyity in, quivij raꞌ ayoꞌbuꞌyi muꞌ, chat qui raꞌ jäquiꞌve jịꞌmotsac.
12Mọꞌin yiriꞌtacyis dáshu in cạvacsis mi, mọꞌin cạiꞌ in yiriꞌtac ayoꞌ in, jambiꞌ qui namꞌ soꞌmac ayoꞌbuꞌyedyeꞌ muꞌin. Aty raꞌ soꞌmacyaꞌ ayoꞌbuꞌyedyeꞌ muꞌin vajedyedyeꞌtum raꞌ ayoꞌbuꞌyi in, damꞌtuqui ramꞌ ayoꞌbuꞌyi in. 13Muꞌin yiriꞌtactyity ayoꞌ in anic vaj cäts dyijyedyeꞌ meꞌchuiꞌ in, muꞌin raꞌ soꞌmete in muꞌ vajedyedyeꞌ muꞌinsiꞌ ferdyeꞌ muꞌin judyeyaꞌ yụꞌtacdyeꞌ muꞌin. 14Chat qui raꞌ muꞌtum chuti in Oveca buꞌyitytum in penꞌdyeꞌtumdye muꞌ, muꞌ raꞌ jiꞌpente muꞌ vajedyedyeꞌ räjtumdye ayoꞌ in, ĉaĉaij na muꞌ Oveca buꞌyity muꞌ nash mujuꞌchaty Ayoꞌ, muꞌ ayoꞌ muꞌin ayoty in. Muꞌin penꞌdyeꞌ muꞌ muꞌin nash fayactyiꞌ muꞌyaꞌ in judyeyaꞌ tsimꞌtactyiꞌ muꞌ, judyeyaꞌ rụij cäc̣häꞌchutety in —yi muꞌ anjer jin yụ.
15Chimeꞌdye muꞌ jin yụ:
—Muꞌin cojiro cạvacsity jiquej mi, yóvedyemꞌ mọꞌ meꞌtaquis p̂en jiquej o, mọꞌ cạiꞌ jeñej jacchety muntyiꞌ in, paiꞌ buꞌyity in, yoc yoc p̂eyaquity in. 16Mọꞌin yiriꞌtacyis dáshu in muꞌsiꞌ vajedyedyes, mọꞌ cạiꞌ jeñej yiriꞌtac ayoꞌ in, muꞌin raꞌ fạ́queꞌ in mọꞌ meꞌtaquis p̂en. Muꞌin raꞌ räj meijjetyeꞌ jedyeꞌ in, cädäj raꞌ yụꞌtyeꞌ in, jebebiꞌ raꞌ shush in judyeyaꞌ raꞌ jiꞌcoꞌshayeꞌ in, 17ĉaĉaij na Jenꞌ yụꞌtyeyeyacsi dyijyedyeꞌ ĉojtyiꞌĉandyes muꞌin, muꞌin yiriꞌtacyity ayoꞌ in, paj qui muꞌin cäc̣häꞌchupte dyijyedyeꞌ in, mọꞌdyes qui raꞌ muꞌin soꞌmete in ĉụiꞌsiꞌ yụꞌtacdyeꞌ muꞌin muꞌ vajedyedyeꞌ, paj qui muꞌ mujuꞌchaꞌ ayoꞌbuꞌyi, junꞌ quiꞌ chuc cạ̈tsiꞌ Jenꞌsiꞌ p̂eyacdyeꞌ muꞌ. 18Mọꞌ na meꞌtaquis p̂en cạves jiquej mi, mọꞌ cạiꞌ jeñej därsiꞌ bäꞌyedyeꞌ, mọꞌtyiꞌ ayoꞌ ayoꞌbuꞌyi räj jacchetydyes ayoꞌ in —yi muꞌ anjer.
Currently Selected:
Jị'cavacdye' 17: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
