Jị'cavacdye' 16
16
Pijiꞌ Jenꞌsiꞌtumsiꞌ Fạ́codyeꞌ
1Seꞌveꞌ yụ yiris fersiꞌ p̂eyacdyeꞌ shupquis Jenꞌsiꞌĉan acaꞌ muꞌ, yiꞌ mọꞌ jéyacsiꞌ muꞌin yävätidyeꞌyity anjer in:
—Tạij miꞌin vaꞌquecac jaccheꞌ mọꞌ pijiꞌĉansiꞌ, mọꞌ därsiꞌ Jenꞌsiꞌ fạ́codyeꞌ muꞌ.
2Meꞌdye muꞌin in, muꞌ tashchety anjer sacyi, chat muꞌ shachjequeꞌ mọꞌ pijiꞌĉansiꞌ jedyeꞌ jaccheꞌ jịꞌtŝoiꞌ. Vatyquej shupquiꞌ chóminꞌdyeꞌ muntyiꞌcheꞌ in, tyi chuc cac̣htacdyeꞌtumtyiꞌ in vajedyedyeꞌ buꞌyitysiꞌ muꞌ judyeyaꞌ jenꞌtuptety jämꞌtacdyeꞌ in yódyesdyemꞌ muꞌ u, räj vatyquej muꞌin chómiñi tyeij in, anic där aꞌc̣his chóminꞌdyeꞌ játŝuti in, fersiꞌ areꞌredyeꞌ jịꞌĉojtyeꞌ in. #16:2 Exodo 9:10
3Päräꞌyity anjer shachjeꞌ muꞌ marĉan jịꞌĉoiꞌ pijiꞌĉansiꞌ. Chäsh vatyquej tyeiꞌ muñiꞌ ojñiꞌ, jeñej chäsh muꞌ ijactyis muntyiꞌ joꞌmeiꞌ tyeiꞌ ojñiꞌ, räj marĉansiꞌ jedyeꞌ tsạꞌ buꞌyis in räj säñiꞌ in.
4Chibinyity anjer shachjeꞌ muꞌ cojiroĉan jịꞌtŝoiꞌ judyeyaꞌ chanamꞌches ojñiꞌ chimeꞌ in, mọꞌcheꞌ jịꞌtŝoiꞌ pijiꞌĉansiꞌ muꞌ. Chäsh vatyquej tyeiꞌ muñiꞌ ojñiꞌ. #16:4 Exodo 7:17-20 5Seꞌveꞌ qui yụ p̂eyacdyeꞌ muꞌ anjersiꞌ muꞌ ĉọjcaiꞌtyiꞌ ojñiꞌ, yi:
"Tsuntyiꞌ Ayoꞌ mi nash tạꞌcaty,
mi mọmoꞌ muꞌyaꞌ q̂uinꞌ,
mimꞌ yirity rụijtyity.
Meꞌ tsanꞌ soꞌmacsi mi vaꞌtacdyeꞌ jacchety muntyiꞌ in,
rụijsisyaꞌ qui namꞌ dyijyedyeꞌ meꞌjeyacsi mi,
6ĉaĉaij na jacchety muntyiꞌ in jiꞌchäshacsi in ijacsiyaꞌ jiquej in muꞌin anicjintyiꞌ in,
judyeyaꞌ muꞌin soꞌmacsity p̂eyacdyeꞌ mi,
muꞌindye q̂uinꞌ jiꞌtyecsi chäsh mi,
mọꞌ anic rụijsis vaꞌtacdyeꞌ muꞌindyes in", yi muꞌ.
7Chat qui seꞌveꞌ p̂eyacdyeꞌ yụ jiꞌcoꞌshayacdyeꞌches yiꞌ:
—Anic meꞌ mi nash mujuꞌchaꞌ ferdyeꞌtumtyiꞌ Jenꞌ, Ayoꞌ tsun, anic rụijsisyaꞌ dyijyedyeꞌ jịꞌcayacsim, jam méquiꞌ cäj cạqui dyijyedyeꞌ mi.
8Vạjpedyeꞌyity anjer shachjeꞌ muꞌ pijiꞌĉansiꞌ, tsuncheꞌ jịꞌtŝoiꞌ. Mọꞌdyes qui muꞌ tsun coshyedyes soꞌmac paj qui jịꞌmucsi muntyiꞌ in, jeñej qui tŝij, meꞌ qui jịꞌmucsi. 9Meꞌdye qui muꞌ tsun coshyedyeꞌyaꞌ jịꞌmucsi muntyiꞌ in, meꞌ tsanꞌ meꞌ muꞌin qui namꞌ tacaꞌ yejĉoij jam anicjete muntyiꞌ in, memꞌ ñiñete Jenꞌ in, muꞌ meꞌchuiꞌtyiꞌ vaꞌtacdyeꞌ. Meꞌ tsanꞌ meꞌ jịꞌĉojtyeꞌ vaꞌtacdyeꞌ in, mijam qui namꞌ dyijyeban juchajcheꞌ in mijam p̂ucush timaꞌquebajte Jenꞌ in.
10Ĉanamꞌyity anjer shachjeꞌ pijiꞌĉansiꞌ muꞌ yóĉandyemꞌ ayoꞌbuꞌyi vajedyedyeꞌ buꞌyity u, tomaj vatyquej tyeiꞌ, juñum tŝọiꞌ ayoꞌbuꞌyedyeꞌĉan muꞌ.#16:10 Exodo 10:21 Muꞌĉan bäꞌyity in anic där ñịbeꞌ cạveꞌ räj in, caraꞌvaqui nem in areꞌredyeꞌyaꞌ muꞌin. 11Ñiñete qui Jenꞌ in muꞌ mạyedyeꞌchety areꞌredyeꞌyaꞌ muꞌin judyeyaꞌ chóminꞌdyeꞌyaꞌ muꞌin, jam qui namꞌ damꞌ dyijyeban juchajcheꞌ in mijam farajjeyaqui aꞌc̣his dyijyedyeꞌ muꞌin.
12Jäbänyity anjer shachjeꞌ pijiꞌĉansiꞌ muꞌ därtyiꞌĉan cojiro Eufratesĉan, muꞌĉan muꞌ jịꞌtŝoiꞌ. Chañej vatyquej tyeij muꞌ cojiro, paj qui tupuj jiyi nobi in muꞌin väc̣häꞌtyity in ayoꞌtumdye muꞌin, muꞌin pamꞌve bäꞌyity in.
13Cạvacsi yụ chibin sọyoꞌ in anic aꞌc̣hic̣his in, muꞌinsiꞌĉan chụꞌ shupquiꞌ in, vajedyedyeꞌ buꞌyitysiꞌĉan, judyeyaꞌ c̣hovaj buꞌyitysiꞌĉan judyeyaꞌ muꞌsiꞌĉan chimeꞌ muꞌ väñädyeꞌyaꞌ p̂eyaquitysiꞌ, muꞌ p̂eyaqui vajedyedyeꞌ buꞌyitydyes, cäts yirityĉan jịjcaiꞌ shupquiꞌ sọyoꞌ in. Mọꞌin sọyoꞌ in jeꞌñeñeiꞌ ococo in, joꞌmemeiꞌ jiꞌcavitiꞌ in. 14Mọꞌin sọyoꞌ in, ferdyeꞌ meꞌchuiꞌsiꞌ in, mọꞌin jịꞌcaveyacsiꞌ muntyiꞌ in ferdyeꞌ mọꞌin. Ayidyeꞌ mọꞌin chibin sọyoꞌ in tuyacsiꞌ in jacchety ayoꞌ in, väc̣häꞌtyitytum muꞌin, muꞌin paiꞌ buꞌyity in, mọꞌin vajmuꞌyaꞌjeyacsiꞌ in paj qui vajmuꞌyaij in chutiꞌ muꞌtum in muꞌ mujuꞌchaꞌ ferdyeꞌtumtyiꞌ Jenꞌ. Ayij raꞌ jụijyaꞌ tsäquiꞌsissiꞌ tupudyeꞌ Jenꞌsiꞌ muꞌ, muꞌtum raꞌ chuti in.
15Yi muꞌ Cristo: "Seꞌvaĉamꞌ, caminve raꞌ atsij yụ yojdyemꞌ shushuꞌaty muntyiꞌ u, meꞌ raꞌ yụ, miꞌincheꞌ raꞌ tŝọij yụ, mijam raꞌ chị́vaꞌjoij miꞌin. Där raꞌ maꞌjoij in tyi chuc tsạꞌ buꞌvaꞌjoijtyiꞌ in, judyeyaꞌ jäꞌmiiꞌtyity quịꞌsiꞌĉan muꞌin paj qui jam cädäj shupqui in, paj qui jam tsị́caij in", yi muꞌ.
16Chat qui mọꞌin sọyoꞌ in vajmuꞌyaꞌjeyacsiꞌ in jacchety ayoꞌ in väc̣häꞌtyitytum muꞌin, paj qui muꞌĉan chuti in, Armagedónĉan, meꞌ tịj mọꞌ hebreosĉan p̂eyacdyeꞌ.
17Yävätidyeꞌyity anjer muꞌ qui shachjeꞌ pijiꞌĉansiꞌ muꞌ, tyiꞌmuĉan muꞌ jịꞌtŝoiꞌ. Chat qui seꞌveꞌ yụ fersiꞌ p̂eyacdyeꞌ Jenꞌsiꞌĉan acaꞌ mạyedyeꞌches, yóĉandyemꞌ ayoꞌbuꞌyi u, yiꞌ p̂eyacdyeꞌ:
—A toꞌ o tas cạ̈tsiꞌ.
18Meꞌĉandye pururu fạ́coij venaꞌyaqui vatyquej tyeij, judyeyaꞌ fer chimeꞌ bubaquiꞌ jac. Anic fersiꞌ bubacdyeꞌ, jam jämꞌdyeyaꞌ meꞌ bubacdyeꞌ jacsimꞌ, yoquiꞌdyemꞌ jämꞌtacyaꞌ muntyiꞌ jiquej in, jam meꞌ bubaquiꞌ jac jiquej, ọyaꞌyaꞌ mọmoꞌ. 19Bubacdyeꞌĉan mọꞌ därsiꞌ bäꞌyedyeꞌ chet tyeiꞌ mọꞌ jac, chibinĉan shupquiꞌ mọꞌ bäꞌyedyeꞌ. Chimeꞌdye yocves bäꞌyedyeꞌ in paiꞌsis in räj mọꞌin jọꞌchaiꞌ in. Meꞌ muꞌ Jenꞌ dyijtucsebi aꞌc̣his dyijyedyeꞌ muꞌin Babiloniaĉantyis in, mọꞌdyes muꞌsiꞌyaꞌ fạ́codyeꞌ därsiꞌ jịꞌcaveyacsi vaꞌtacdyeꞌ soꞌmacsi. 20Marĉansiꞌ poc̣hoꞌ in räj ọ́yaꞌ jịjcaiꞌ pechiꞌ in, muꞌin na mụcuꞌ in nạyenꞌ tyeij in. 21Muꞌ na tsafaꞌ, där muꞌ tsäquiꞌ jọꞌchaij, muntyiꞌcheꞌ tŝọij in, yedyej därmuntyiꞌ, pạrej vạjpedyeꞌ arova yacñity in, jämꞌ tyimyacñity in.#16:21 Exodo 9:23 Uts na muntyiꞌ in yejĉoij mọmoꞌ ñiñete Jenꞌ in mọꞌ vaꞌtacdyedyesyaꞌ muꞌ, anic jiyiꞌ därsiꞌ mọꞌ vaꞌtacdyeꞌ shupquiꞌ muntyidyes in.
Currently Selected:
Jị'cavacdye' 16: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
