Jị'cavacdye' 14
14
Yiriꞌ cien vạjpedyeꞌ quiꞌtac vạjpedyeꞌ jiyi mir in
1Cạvete yụ muꞌ Oveca buꞌyity mụcuꞌcheꞌ Sióncheꞌ, muꞌcheꞌ rụiꞌcujcuij jiꞌcaviti. Penꞌdyetucsi anic shachtyity muntyiꞌ in, yiriꞌ cien vạjpedyeꞌ quiꞌtac vạjpedyeꞌ jiyi mir in. Muꞌin jáficheꞌ sánactyiꞌ in muꞌsiꞌ tịj muꞌ Oveca buꞌyitysiꞌ judyeyaꞌ Jenꞌsiꞌ chimeꞌ tịj muꞌ. 2Seꞌveꞌ yụ yiris mạyedyeꞌches p̂eyacdyeꞌ fer mạꞌedyeꞌ mọꞌ, jeñej yiꞌ ojñiꞌ chabanꞌyaꞌ, judyeyaꞌ jeñej yi fạ́coijtyiꞌ pururu. Chimeꞌdye mọꞌ jeñej yiꞌ vịcdyes daiꞌtyiꞌ vịiꞌyaꞌ in. 3Muꞌin shachtyity muntyiꞌ in, yiriꞌ cien vạjpedyeꞌ quiꞌtac vạjpedyeꞌ jiyi mir in, muꞌin runꞌquenꞌĉan jimaqui in Jenꞌsiꞌyaꞌ vej muꞌ, tashcheꞌ bäꞌyaquisyaꞌ muꞌ, judyeyaꞌ mọꞌinsiꞌyaꞌ vej in mọꞌin vạjpedyeꞌ tsạꞌ buꞌyissiꞌ in judyeyaꞌ muntyiꞌ in tashcheꞌ buꞌyityyaꞌ chimeꞌ in, muꞌinsiꞌyaꞌ vej muꞌin jimeꞌ in mụiꞌsis jimacdyeꞌ. Muꞌin mọmoꞌ meꞌ tupuj jimeꞌ in mọꞌ jimacdyeꞌ ĉaĉaij na muꞌin mọmoꞌ c̣hoñity in, yoctyiꞌ na in jam muꞌin junꞌ tupuj chị́yeꞌ mọꞌ jimacdyeꞌ in. 4Uts shachtyity in jam p̂entuijtyiꞌ in, anic micdyi bäꞌyi Jenꞌdyes in, muꞌin rụij cäc̣häꞌchute in muꞌ Oveca buꞌyity, meꞌ tsanꞌ junaꞌ ĉụiꞌ in. Muꞌin nash tashcheꞌ jiꞌc̣honactyiꞌ muntyiꞌyaꞌ jiquej in, jeñej tashches vädacdyeꞌ soꞌmetes Jenꞌ jiquej in, meꞌ buꞌyi muꞌin in, muꞌin Jenꞌtyiꞌ judyeyaꞌ Oveca buꞌyitytyiꞌ in. 5Jam rébaĉan väñädyeꞌ in, ĉaĉaij na jam jụꞌñij yụꞌtac in Jenꞌsiꞌyaꞌ vej muꞌ.
P̂eyacdyeꞌ tuiꞌtyiꞌ in muꞌin chibinyity anjer in
6Yoctyiꞌ nạijte yụ anjer nạvaꞌjoij chidyiꞌĉanyaꞌ mạyedyeꞌ, cạiꞌ mọꞌ jämꞌsiꞌ p̂eyacdyeꞌ Jenꞌsiꞌ muꞌ jam mọtsis. Mọꞌ p̂eyacdyeꞌ räjdyes muntyiꞌ in, yịjyi muntyidyes, yoc yoc p̂eyaquity in judyeyaꞌ paiꞌ bäꞌyity in, räjdyes mọꞌ p̂eyacdyeꞌ. 7Fer muꞌ p̂eyaqui anjer yi:
—Irijyejamꞌ Jenꞌcheꞌ, timaꞌquemac muꞌ, ĉaĉaij nash aty ayij tupudyemꞌ, jịꞌcäts yụꞌtacsi raꞌ muntyiꞌ in. Timaꞌquemac muꞌ jämꞌtyety mạyedyeꞌ judyeyaꞌ ọij jac, judyeyaꞌ mar judyeyaꞌ jacches ojñiꞌ in.
8Yoctyiꞌ atsij anjer cäꞌc̣häijdye muꞌ tashchetyyaꞌ, yi muꞌ jäquity p̂eyaqui:
—Aty jiꞌpenac mọꞌ därsiꞌ bäꞌyedyeꞌ Babilonia, aty mụijyaꞌ jịꞌtŝoc mọꞌ, mọꞌ seꞌ jaꞌyacsis jiquej paiꞌ bäꞌyity in paj qui cäc̣häꞌchubiꞌ in aꞌc̣his dyijyedyeꞌ mọꞌ chimeꞌ juchaj mọꞌ. Jeñej buꞌyiꞌ jiꞌshuꞌcacsis jacchety muntyiꞌ in paj qui juchatute Jenꞌ in, meꞌ shupquiꞌ mọꞌ.
9Chibinyity atsij anjer cäꞌc̣häijdye muꞌin päräꞌyityyaꞌ in, fer p̂eyaqui yi muꞌ:
—Jụꞌñiñity chuc jenꞌtutety in muꞌ vajedyedyeꞌ buꞌyity judyeyaꞌ jämꞌtacdyeꞌ muꞌ joꞌmesdye yódyeijdyemꞌ muꞌ u, judyeyaꞌ jụꞌñiñity chuc jiꞌcachtity in cac̣htacdyeꞌyaꞌ muꞌ uncheꞌ judyeyaꞌ jáficheꞌ, 10jụꞌñity chuc joꞌmestumtyiꞌ in muꞌincheꞌ raꞌ tŝọiꞌ fersiꞌ Jenꞌsiꞌ vaꞌtacdyeꞌ muꞌ. Muꞌ raꞌ jam dyisactacsi, jämꞌsiꞌ raꞌ vaꞌtacdyeꞌ soꞌmacsi. Där raꞌ ñịbeꞌ cạveꞌ tŝijĉan in, mọꞌ azufretum cafonsis, mọꞌ raꞌ damꞌjeꞌ in, muꞌinsiꞌyaꞌ vej muꞌin Jenꞌtyiꞌyaꞌ anjer muꞌ judyeyaꞌ Oveca buꞌyitysiꞌyaꞌ. 11Räjĉan raꞌ naꞌiꞌ mọꞌĉan jịꞌsaꞌ, yóĉandyemꞌ raꞌ ñịbeꞌ cạveꞌĉan u in, jam raꞌ jụꞌñisĉan mạyedyeꞌ mọtsiꞌ. Meꞌ raꞌ cạveꞌ in muꞌin jenꞌtutety in muꞌ vajedyedyeꞌ buꞌyity judyeyaꞌ mọꞌ jämꞌtacdyeꞌ joꞌmesdye yódyeijdyemꞌ muꞌ u, jụꞌñity chuc jiꞌcachtity in uncheꞌ muꞌin judyeyaꞌ jáficheꞌ muꞌin. Muꞌĉan raꞌ jam jụꞌñisĉan mạyedyeꞌ jịꞌjutyiti in, yejĉoij raꞌ ñịbeꞌ cạveꞌ in —yi muꞌ.
12Ọij jiꞌchäquiyisinꞌ, jemoñeꞌ anicjetety Jenꞌ in tyumꞌchutidyeꞌtum bäꞌyi in, muꞌin chiqueptety Jenꞌsiꞌ p̂eyacdyeꞌ in judyeyaꞌ rụij cäc̣häꞌchutety Jesucristo in.
13Seꞌveꞌ yụ yocsiꞌ mạyedyeꞌches p̂eyacdyeꞌ yiꞌ jin yụ:
—Sáñevaꞌ ọij p̂eyacdyeꞌ yiꞌ: "Q̂uinꞌ raꞌ yacchutiꞌ tyi chuc anicjetety Jesucristo säñiyaꞌ in, muꞌin raꞌ anic maꞌjoij in."
Yiꞌ Jenꞌsiꞌ Ạꞌedyeꞌ muꞌ, "Rụijdye meꞌ muꞌin raꞌ jịꞌjutyiti in carijtacdyeꞌyaꞌ muꞌin, jam raꞌ fibis shupquiꞌ carijtacdyeꞌ jiquej muꞌin, bijodyeꞌ raꞌ soꞌmac in carijtaquity jiquej in."
Mọꞌ vädacdyeꞌ Jacches
14Cạvi yụ nạijtyeꞌ yụ yiris dyicbaꞌbadyeꞌ jaiꞌbas. Muꞌcheꞌ nạijte yụ c̣hac jeꞌñeij anictyity muntyiꞌ, ĉästacdyeꞌtumtyiꞌ joꞌnoꞌcheꞌ oro, unĉan namꞌ mọꞌyaꞌ yiris toꞌcacsis coc̣hino vädacdyes. 15Yoctyiꞌ atsij anjer, Jenꞌsiꞌĉantyiꞌ acaꞌ shupqui, fer p̂eyaqui jéte muꞌ dyicbaꞌbadyeꞌchety, yi:
—Tiyacchuva vädaca coc̣hinoyam, ĉaĉaij na aty ayij tsäquiꞌsis tupudyeꞌ vädacdyes, aty ị́jtsiiꞌ jacches sicdyeꞌ in.
16Meꞌdye qui muꞌ dyicbaꞌbadyeꞌchety tiyacchuti vädaqui, jeñejdye vädacyaꞌ jacches sicdyeꞌ in.
17Yoctyiꞌ atsij anjer chimuꞌĉandyemꞌ shupqui Jenꞌsiꞌĉantyiꞌ acaꞌ mạyedyeꞌches. Chimeꞌdye muꞌ mọꞌyaꞌ coc̣hino vädacdyes muꞌ, anic toꞌcacsis meꞌchuiꞌ. 18Chat qui yoctyiꞌ atsij anjer jiꞌcoꞌshayacdyeꞌchety shupqui, ĉọjcaiꞌtyiꞌ muꞌ tŝij. Fer muꞌ p̂eyaqui jéte muꞌ meꞌchuiꞌtyiꞌ coc̣hino toꞌcacsis, yi muꞌ jéte:
—Tiyacchuta vächvaꞌ jacches ova, a toꞌ o ị́jtsiiꞌ mọꞌ.
19Meꞌdye muꞌ anjer coc̣hinoyaꞌ tiyacchuti vächjanꞌ jacches ova, mọꞌĉan yụꞌtyeꞌ yóĉandyemꞌ muꞌ Jenꞌ fạ́codyeꞌtum quec̣heꞌtyeꞌ u, meꞌ buꞌyi mọꞌ shupquiꞌ vaꞌtacdyeꞌ. 20Jorojyaꞌ mọꞌ bäꞌyedyeꞌ Jenꞌ yútyevaꞌqueꞌ ova. Mọꞌĉan shupquiꞌ chäsh maj, jeñej därsiꞌ tsiqueꞌ, meꞌquiꞌ shupquiꞌ mọꞌ chäsh. Yoquiꞌdyemꞌ tuj cavayos omꞌ, meꞌquiꞌ tyeiꞌ mọꞌ chäsh muntyis muꞌin, chibin quiꞌ cien quirometro meꞌquiꞌve shupquiꞌ mọꞌ chäsh.
Currently Selected:
Jị'cavacdye' 14: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
