Números 14
14
Ñäñitidyeꞌ muꞌin Israeltyiꞌ vóshiꞌ in
1Mọꞌdyes muꞌin Israeltyiꞌ vóshiꞌ in tári in äshäꞌnaqui in, dyutsenꞌ tsedyedyeꞌ meꞌ tári in. 2Räj muꞌin ñiñete in muꞌ Moisés judyeyaꞌ muꞌ Aarón, yi jéyacsi in: "Faraj vuꞌ caꞌ muꞌĉandye säñi jiquej tsun Egiptoĉan, faraj vuꞌ caꞌ úĉan chimeꞌ tsun cäjyasĉan jac. 3¿Junꞌ buty meꞌ tun jiquej muꞌ Jenꞌ úĉan tsun, paj qui Canaánĉan jịjcaij tsun? Mạꞌjeꞌ aty jiꞌijan tsun u chutidyeꞌyaꞌ, mạꞌjeꞌ aty cabun p̂en u tsun judyeyaꞌ ạvaꞌ tsun. Damꞌdye jämꞌ caꞌñibujshaꞌ quivij Egiptoĉan jịjcabajshaꞌ." 4Yi jítidyeij in: "Jeshaꞌ, yirity tsimꞌtyeja yụꞌtyeja ayoꞌ ĉụiꞌdyety tsun, chat qui raꞌ caꞌñibujshaꞌ Egiptoĉan jịjcabajshaꞌ tsun."
5Moisés Aaróntum dyụtsyi in muntyisyaꞌ vej muꞌin, täjjequeꞌ jac jáfiyaꞌ muꞌin. 6Päräꞌ muꞌin cạvequety jac in, Josué judyeyaꞌ muꞌ Caleb seꞌvacsebi in muntyis p̂eyacdyeꞌ muꞌin, cavin shẹiꞌjeyaqui quịꞌsiꞌ in muꞌin táredyedyety muꞌin. 7Yi jéyacsi muꞌintyiꞌ in:
—Mọꞌ jac cạvequeꞌsiꞌ tsun anic där jämꞌsiꞌ. 8Ayoꞌ maꞌjotyisinꞌ jụijyaꞌ tsun, tupuj jiꞌpenacsejaꞌ in, muꞌ qui raꞌ soꞌmisinꞌ mọꞌ jac. Mọꞌ anic jämꞌsiꞌ sicdyedyes, jam jayej säcsedyeꞌ mọꞌĉan. 9Mọꞌdyes jam raꞌ junꞌ farajjeptinte Ayoꞌsiꞌ p̂eyacdyeꞌ muꞌ, mijam raꞌ quijnacsi miꞌin muꞌĉan bäꞌyity in. Jam raꞌ carij jiꞌpenacsejaꞌ tsun ĉaĉaij na muꞌ Ayoꞌ räjĉan ñutschusinꞌ tsun, muꞌin na jam tyi ñutschucsi, mọꞌdyes jam raꞌ noiꞌyi miꞌin —jéyacsi in muꞌ Josué judyeyaꞌ Caleb.
10Muꞌin na muntyiꞌ in mijam seꞌvacsebi p̂eyacdyeꞌ muꞌin, yejĉoij mọmoꞌ fạ́coij in, mạꞌjeꞌ ijacsi farajnacsi mijyaꞌ in. Vatyquej mọmoꞌ jiꞌcavitiꞌ Jenꞌsiꞌyaꞌ acaꞌ muꞌsiꞌ ferdyeꞌ Ayoꞌsiꞌ muꞌ, anic mạij tŝọiꞌ mọꞌyaꞌ muntyisyaꞌ vej muꞌin.
Moisés cọdyete Jenꞌ muntyidyes in
11Ayoꞌ jajiti muꞌ Moisés:
—¿Junꞌsiꞌ buty raꞌ farajjeꞌ in äcäijnacdyeꞌ yụ́cheꞌ in? ¿Junꞌsiꞌ buty raꞌ chimeꞌ anicjin yụ in? Meꞌ tsanꞌ daiꞌ quiꞌ jịꞌcaveyacsi ferdyeꞌ yụ, uts na jam anicjin yụ in. 12Yụ raꞌ juteyeyacsi fersiꞌ japacjodyeꞌ, mọꞌ raꞌ tasteyacsiꞌ uts q̂uinꞌ muntyiꞌ in. Mi qui na ramꞌ yụꞌtyeye yụ, yụ raꞌ jiꞌdaijbiye vóshiꞌ mi, anic raꞌ fer buꞌyi in mujuꞌchaꞌ buꞌyi raꞌ in, uyaꞌyaꞌ raꞌ uts q̂uinꞌ muntyiꞌ in —jajiti Jenꞌ muꞌ Moisés.
13Moisés vorjete Ayoꞌ:
—Jam raꞌ meꞌ mi, mi nash ĉụiꞌsiꞌyaꞌ ferdyeꞌ jiꞌshupcacsim uts muntyiꞌ in Egiptoĉantyiꞌ tsanꞌ jiquej in. Ñäpjeyacsi na raꞌ jụijyaꞌ mi, chị́qui raꞌ muꞌin Egiptoĉantyiꞌ in, 14muꞌin raꞌ jéyacseban in muꞌin Canaánĉan bäꞌyity in, chịj raꞌ in junꞌ chuc mi meꞌjeyacsi. Muꞌin aty seꞌvaqui in junꞌ chuc mi penꞌdyetucsi muntyiꞌ in judyeyaꞌ jiꞌcaviti mi muꞌinyaꞌ in, mạij dyicbaꞌbadyeꞌĉan jiꞌcaviti mi, tsedyedyeꞌ qui namꞌ mi tŝij buꞌyi mi, meꞌ chäyin in muꞌin Canaánĉantyiꞌ in. 15Mi na raꞌ yiristum jiꞌsänacsi jụijyam uts muntyiꞌ in, yoc yoc raꞌ muntyiꞌ chị́qui in ĉaĉaij na muꞌin aty seꞌvibuntyiꞌ ferdyeꞌ in. 16Yi raꞌ in: "Meꞌ tsanꞌ muꞌ Ayoꞌ ĉụiꞌsiꞌcheꞌ tịj yụꞌtyeyacsi p̂eyacdyeꞌ muꞌ jiquej, jéyacsi: Yụ raꞌ soꞌmeyac ọij jac, meꞌ jéyacsi tsanꞌ muꞌ, ọij na jayej ferdyeꞌ muꞌ jam tupuj jiꞌsitacsi, muꞌĉan mọmoꞌ cäjyasĉan jac räj jiꞌijacsi muntyiꞌ muꞌ", vatyquej raꞌ yi in. 17Mọꞌdyes yụ cọdyeye q̂uinꞌ, Ayoꞌ, paj qui därsiꞌyaꞌ ferdyeꞌ mi jịꞌcätseꞌ mi yiꞌsiꞌ jiquej mi: 18"Jam nash cavintum fạ́cacsi muntyiꞌ yụ, anic där ñịbeꞌ ĉọcsi yụ judyeyaꞌ yụ vayacjetacsi juchaj muꞌin, meꞌ tsanꞌ jam chäquibuntyiꞌ p̂eyacdyeꞌ yụ in. Uts raꞌ soꞌmacsi vaꞌtacdyeꞌ yụ muꞌin juchatuntyiꞌ yụ in, chimeꞌdye raꞌ ạvaꞌ muꞌin paj tsanꞌ vịyaꞌ muꞌin, paj tsanꞌ vóshiꞌ chimeꞌ muꞌin, muꞌin raꞌ soꞌmac vaꞌtacdyedyes jenꞌsidyes juchaj muꞌin", yi jiquej mi Jenꞌ. 19Mọꞌdyes yụ cọdyeye, Ayoꞌ, paj qui mi därsiꞌyaꞌ mạꞌjitidyes mi vayacjeyacsebi juchaj muꞌin, junꞌ chuc mi räjĉan dyich buꞌyi muꞌcheꞌ in Israeltyiꞌcheꞌ vóshiꞌ in, yoquiꞌdyemꞌ shupqui Egiptoĉan jiquej u in, meꞌdye q̂uinꞌ —yi muꞌ Moisés jéte Jenꞌ.
Jenꞌ p̂eyacsebi vaꞌtacdyeꞌ muntyis muꞌin
20Ayoꞌ vorjajiti:
—Jụdyej, yụ raꞌ vayacjeyacsebi juchaj utssiꞌ in, yojdyemꞌ cudyitiꞌ um, meꞌ raꞌ yụ. 21Meꞌ tsanꞌ meꞌ, ĉụiꞌsiꞌcheꞌ qui namꞌ tịj yụ yụꞌtyeyacsi yụ ọij p̂eyacdyeꞌ yụ. Yụ nash tsạꞌ buꞌyityiꞌ, räj buꞌyiꞌ ọij jac ferdyeꞌ yụ, 22-23yụ́dye mọmoꞌ yi mijam raꞌ yirity cạvequety Canaánĉan in, mijam raꞌ muꞌĉan jịjcaij in, ĉaĉaij na jam chäquibun p̂eyacdyeꞌ yụ in. Tiyacchuti Egiptoĉan jiquej in judyeyaꞌ cäjyasĉan chimeꞌ in, muꞌin aty cavibun ferdyeꞌ yụ in, judyeyaꞌ mạijquedyeꞌ jịꞌcaveyacsi yụ chimeꞌ. Muꞌin cäjyasĉan jac daiꞌ quiꞌ jiꞌĉujtyin yụ in juchaj soꞌmin yụ in, mijam méquiꞌ chäquibun p̂eyacdyeꞌ yụ in. Mọꞌdyes qui raꞌ q̂uinꞌ jam yirity tänꞌyequi muꞌĉan Canaánĉan in, mọꞌ jac soꞌmacsis yụ vóshiꞌ muꞌin jiquej, ĉaĉaij na ĉụiꞌ äcäijjin yụ in. 24-25Yirity mọmoꞌ muꞌ Caleb, úñity yụ, mumꞌ yirity yocve dyijyity muꞌ räj chäquibun p̂eyacdyeꞌ yụ. Mọꞌdyes yụ raꞌ yi paj qui mumꞌ muꞌĉan bäꞌyi, yódyesdyemꞌ cạvicse jiquej u, muꞌĉan mojijĉan raꞌ bäꞌyi muꞌ judyeyaꞌ raꞌ vóshiꞌ muꞌ chimeꞌ, yóĉandyemꞌ bäꞌyi q̂uinꞌ u muꞌin amalecita u in judyeyaꞌ muꞌin cananeo in. Miꞌin qui na ramꞌ nojno caꞌñibun muꞌĉandye, cäjyaꞌ raꞌ jịjcaban miꞌin, chụiꞌ raꞌ jịjcaban miꞌin Mar Jäijnäsve —jajiti muꞌ Jenꞌ Moisés.
Vaꞌtacdyeꞌ muntyis muꞌin
26Ayoꞌ jajiti muꞌ Moisés Aaróntum:
27—¿Junꞌsiꞌ buty raꞌ uts farajjeꞌ ñinacdyeꞌ yụ́cheꞌ in uts ac̣hiꞌyity Israeltyiꞌ vóshiꞌ in? Seꞌvacsebiij ñäñitidyeꞌ muꞌin. 28Jéyacseva mi: "Yi muꞌ Ayoꞌ jínac miꞌin: Ĉụiꞌsiꞌcheꞌ raꞌ tịj yụ jéyac miꞌin, yụ raꞌ jịꞌcätsebiyac ĉụiꞌsiꞌ p̂eyacdyeꞌ miꞌin yoj yidyemꞌ miꞌin jiquej u: Ijac raꞌ tsun Canaánĉan, yi miꞌin. 29Anicdye raꞌ meꞌ cäjyasĉan raꞌ jac jadyic miꞌin, räj raꞌ ishoꞌmuntyiꞌ säñi miꞌin, meꞌdye raꞌ päräꞌ quiꞌtac yómodyeꞌyity in, muꞌin sánactyiꞌ in, meꞌ buꞌyi raꞌ säñi miꞌin, ĉaĉaij na ñäñitiĉaꞌ yụ miꞌin jiquej, cäjyasĉan raꞌ jac vaꞌcac aꞌ miꞌin. 30Ĉụiꞌsiꞌyaꞌ tịj yụ yụꞌtyeyeyac p̂eyacdyeꞌ jiquej yụ, Canaánĉan raꞌ bäꞌyi miꞌin, jéyac tsanꞌ yụ jiquej, q̂uinꞌ qui namꞌ aty jam meꞌ miꞌin ĉaĉaij na jam chäquitiĉaꞌ yụ miꞌin. Muꞌindyety mọmoꞌ in Caleb judyeyaꞌ Josué, muꞌindyety raꞌ muꞌĉan bäꞌyi in. 31Muꞌin na ạvaꞌ miꞌin ạ̈räjjeyaquity jiquej miꞌin, yi miꞌin: Vatyquej chutyisinꞌ Canaánĉantyiꞌ in, yi jiquej miꞌin, muꞌindyety raꞌ jiꞌsitacsi yụ paj qui muꞌĉan bäꞌyi in, yódyesdyemꞌ äcäijjetiñes jiquej u miꞌin. 32Miꞌin raꞌ cäjyasĉan raꞌ jac sänjan miꞌin, mọꞌĉan raꞌ vaꞌcac aꞌ miꞌin. 33Vạjpedyeꞌ quiꞌtac raꞌ yómodyeꞌ cäjyasĉan raꞌ jac bäꞌyi ạvaꞌ miꞌin, paiꞌ paiꞌ raꞌ bäꞌyi in ĉọjcaiꞌtyiꞌ raꞌ oveca in. Muꞌin raꞌ ñịbeꞌ cạveꞌ muꞌĉan in miꞌinsidyes juchaj, ĉaĉaij na jam anicjitiĉaꞌ yụ miꞌin. Yejĉoij raꞌ muꞌĉan bäꞌyi miꞌin cäjyasĉan jac, junꞌ quiꞌ chuc räꞌeban miꞌin. 34Vạjpedyeꞌ quiꞌtac mạyedyeꞌ cạvequi jiquej miꞌin Canaánĉan, chichimesdye raꞌ jäqueꞌ vaꞌtacdyeꞌ juchadyes miꞌin, vạjpedyeꞌ quiꞌtac raꞌ yómodyeꞌ, meꞌquiꞌ raꞌ ñịbeꞌ cạvetiñeꞌ cäjyasĉan jac miꞌin, yiris mạyedyeꞌ raꞌ jịjcaiꞌ yiris yómodyeꞌ. Meꞌ raꞌ chịj miꞌin junꞌ buty meꞌjeyacsi yụ muꞌin fáquintyiꞌ yụ in", jéyacseva muntyiꞌ mi. 35Aty yi yụ, yụ anictyity Ayoꞌ, meꞌ raꞌ meꞌjeyacsi yụ uts Israeltyiꞌ vóshiꞌ in, ĉaĉaij na räjtumdye fáquin yụ in, tas raꞌ säñi in cäjyasĉan jac in —yi Jenꞌ jajiti muꞌ Moisés judyeyaꞌ Aarón.
Sänꞌdyeꞌ muꞌin cạvequety jac in
36-37Muꞌin yiriꞌtac cạvequety jac in väñädyeꞌyaꞌ jiꞌquijnacsity muntyiꞌ jiquej in, jéyacsi jam mọꞌ jämꞌsiꞌ jac, muꞌin qui muntyiꞌ in ñiñete Jenꞌ in. Mọꞌdyes qui muꞌ Ayoꞌ juteyacsi tsäquiꞌsis japacjodyeꞌ cạvequetydyes in, mọꞌ ñäpteyacsiꞌ. 38Päräꞌdyety c̣hoñi in, muꞌ Caleb judyeyaꞌ muꞌ Josué, muꞌindyety jam säñi in.
Currently Selected:
Números 14: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
