Números 13
13
Moisés jutacsi cạvequety jac in
1Ayoꞌ jajiti muꞌ Moisés:
2—Jutacseva muntyiꞌ paj qui jam chäteꞌ buꞌyi in cạvequety raꞌ in mọꞌ jac Canaán, mọꞌ soꞌmacsis yụ muꞌin Israeltyiꞌ vóshiꞌ in. Yiriꞌtac päräꞌ jiyi raꞌ jutacsim, yedyej raꞌ tashcheꞌ buꞌyity in, yirity raꞌ jịjcaij ñuruꞌ yirity muntyiꞌ —jajiti Jenꞌ.
3Anicdye meꞌ muꞌ Moisés chiquepte Ayoꞌsiꞌ p̂eyacdyeꞌ muꞌ, jutacsi cäts yiriꞌtac päräꞌ jiyi muntyiꞌ in, yedyej tashcheꞌ buꞌyity in. Muꞌĉan tiyacchuti in cäjyasĉan jac Parán, Canaánĉan jịjcaij in.
17Anicdye meꞌ jutacsi muꞌ Moisés jéyacsi:
—Tạij miꞌin, Canaánĉan jịjcajamꞌ. Muꞌve raꞌ tyeij miꞌin Neguevve, judyeyaꞌ mụcuꞌyaꞌ chimeꞌ, meꞌ meꞌ raꞌ sapaꞌjetiñeꞌ. 18Cạvacsebi raꞌ jac miꞌin, jụꞌñis chuc muꞌin, vatyquej raꞌ jämꞌsiꞌ vatyquej raꞌ jam. Cạvacsi raꞌ chimeꞌ miꞌin muꞌĉantyiꞌ muntyiꞌ in, jedac daiꞌ in, jedac jam, jedac fer buꞌyi in, jedac jam in. 19Chimeꞌdye cạvacsebijamꞌ bäꞌyedyeꞌ muꞌin, vatyquej raꞌ quịꞌsiꞌ acaꞌ muꞌin, vatyquej raꞌ mọjoꞌchaꞌ jäjämunsiꞌ acaꞌ muꞌin, vatyquej raꞌ naꞌrutum bäꞌyedyeꞌ muꞌin. Chimeꞌdye raꞌ jac cạvacsebi miꞌin, 20vatyquej raꞌ jämꞌ quịjodyeꞌ, vatyquej raꞌ jam, vatyquej raꞌ däräꞌ mọꞌyaꞌ, räj raꞌ joꞌmes joꞌmes cạvacsebi miꞌin. Jam raꞌ noiꞌyi miꞌin. Chimeꞌdye tutacseban raꞌ miꞌin sacacdyeꞌ muꞌinsiꞌ in —yi jéyacsi muꞌ Moisés.
Aty intsidyeꞌ ova jutacsi muꞌ. 21Chat qui muꞌin sacjeꞌ in, cạvacsebi jac muꞌin. Tiyacchuti in cäjyasĉan jac jätisves, Sin tịj mọs sapaꞌjeꞌ in mọꞌ jac. Ventyequeꞌ in tätscäiꞌches bäꞌyedyeꞌ Rehob c̣hẹiꞌyaꞌ Hamat. 22Mọꞌ jätisves jac tịj mọꞌ Neguev, muꞌve jịjcaij in, ventyequeꞌ in mọꞌ bäꞌyedyeꞌ Hebrón. Muꞌĉan bäꞌyi in vóshiꞌ muꞌ Ahimántyiꞌ judyeyaꞌ Sesaijtyiꞌ judyeyaꞌ Talmaijtyiꞌ chimeꞌ. Muꞌin na vóshiꞌ muꞌ Anactyiꞌ jiquej. Mọꞌ bäꞌyedyeꞌ Hebrón tashcheꞌ mọꞌ jämꞌtac, aty yävätidyeꞌ yómodyeꞌ tyitiꞌ, chat q̂uinꞌdyemꞌ jämꞌtac mọꞌ Egiptoĉansiꞌ bäꞌyedyeꞌ Zoán. 23-24Chat muꞌin cạvequety jac in dạquiqueꞌ in mọꞌ jinac Escol. Mọꞌyaꞌ jäqueꞌ in yiris p̂uc̣hiꞌ ova, därsiꞌ p̂uc̣hiꞌsis, vemacdyeꞌcheꞌ vébanꞌ in. Yocsiꞌ chimeꞌ sacacdyeꞌ tubanꞌ in, higo judyeyaꞌ granada. 25Chat qui atsijban in, sacacdyeꞌtum in. Vạjpedyeꞌ quiꞌtac mạyedyeꞌ Canaánĉan bäꞌyi in, räj socorꞌjeyacsebi jac muꞌin. 26A qui meꞌsiꞌ caꞌñibun in, shupqueshan in Cadesĉan in cäjyasĉan jac, Parán tịj mọꞌ, yóyaꞌdyemꞌ muꞌin u in Israeltyiꞌ vóshiꞌ u in judyeyaꞌ Moisés Aaróntum. Muꞌin cạvequety jac in räj muꞌin jéyacseban in junꞌ chuc sóbacdyeꞌ muꞌin, junꞌ chuc cạvacsi jiquej muꞌĉan in. Jịꞌcaveyacseban in mọꞌ tubanꞌsiꞌ sacacdyeꞌ in Canaánĉansiꞌ. 27Jéte in muꞌ Moisés:
—Tsun nash muꞌve jịjcaijtyiꞌ, cạvequeꞌtyiꞌ tsun mọꞌ jac, yoj jitiĉaꞌdyemꞌ tsun u miꞌin. Anic na jiquej jämꞌsiꞌ jac sicdyedyes, mijam jayej mọꞌĉan säcsedyeꞌ. Mosh tyuꞌ ọij q̂uinꞌ mọꞌĉansiꞌ tubanꞌ tsun. 28Meꞌ tsanꞌ meꞌ, fer buꞌyi qui namꞌ muꞌĉantyiꞌ muntyiꞌ in. Därsiꞌ na jiquej bäꞌyedyeꞌ muꞌin fer buꞌyiꞌ muꞌin judyeyaꞌ naꞌrutum muꞌin. Chimeꞌdye muꞌĉan cạvacsi tsun Anactyiꞌ vóshiꞌ muꞌ anic yedyej därmuntyiꞌ in. 29Neguevĉan bäꞌyi in muꞌin amalacita in, muꞌin na hitita in mụcuꞌcheꞌ muꞌin bäꞌyi in, judyeyaꞌ yoctyiꞌ in, jebuseo in judyeyaꞌ amorreo in. Sinve cojiro muꞌ Jordán chisinvedye mọꞌ mar, meꞌquiꞌyaꞌ jịjcaij bäꞌyi in muꞌin cananeo in. Anic daiꞌ muꞌĉan in, jam junꞌteyac tupuj jiꞌpenac in —yi muꞌin cạvequety jac in.
30Muꞌin qui muntyiꞌ in ñiñete in muꞌ Moisés, muꞌ na Caleb, cạvequety jac jiꞌc̣huꞌc̣huyacseban muntyiꞌ in, jéyacsi:
—Cabuꞌtyum, Canaánĉan jịjcabajshaꞌ tsun, tupuj nash jiꞌpenacsejaꞌ.
31Muꞌin na yoctyiꞌ penꞌdyeꞌ muꞌ yi in:
—Jam tupuj junꞌteyacsejaꞌ jiꞌpenacsejaꞌ muꞌĉantyiꞌ in ĉaĉaij na muꞌin mujuꞌchaꞌ fer in, jam jeñej tsun in.
32Muꞌin cạvequety jac in tiyacchuiꞌ väñätucseban muntyiꞌ in:
—Anic mọꞌ aꞌc̣his jac cạvequeꞌsiꞌ tsun, muꞌĉan bäꞌyity in anic pucmun säñi in judyeyaꞌ därmuntyiꞌ in, 33chimeꞌdye muꞌyaꞌ in muꞌin Anactyiꞌ vóshiꞌ muꞌ, anic jiyi därmuntyiꞌ in. Tsun qui na ñịꞌbebeij jiꞌĉuti tsun jeñej quiꞌmun shọ́coꞌ ĉúti tsun, muꞌin chimeꞌ meꞌ cun tsun in —yéban muꞌin in.
Currently Selected:
Números 13: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
