Marcos 4
4
Jịꞌĉocdyes p̂eyacdyeꞌ muꞌ cätity muntyiꞌ
(Mat 13:1-9; Luc 8:4-8)
1Jesús quivij tiyacchuiꞌ jịꞌchiyacsi muntyiꞌ in, sinve tsiqueꞌ jịꞌchiyacsi muꞌ. Anic shach muntyiꞌ ĉọcte in mọꞌdyes qui muꞌ covambacheꞌ buꞌyi, muꞌcheꞌ qui p̂utsquenꞌyi, muꞌin na jámancheꞌ muntyiꞌ in. 2Daiꞌ jedyeꞌ jịꞌchiyacsiꞌ, yụꞌtyeyacsi jịꞌĉocdyes p̂eyacdyeꞌ jiꞌchäyitidyeꞌĉan. Jéyacsi:
3—Seꞌvaĉamꞌ miꞌin. Yirisĉan mạyedyeꞌ muꞌyaꞌ yirity muntyiꞌ quịjodyeꞌĉan jịjcaij cätiyequi. 4Aty facajnaquiyaꞌ muꞌ, pạrej majmiĉan tŝọiꞌ vej in, mọꞌyaꞌdye jaijtyiꞌ sacyiꞌ in, mọꞌ vej jebeiꞌ in. 5Pạrej na mijcheꞌ tŝọiꞌ in, jam na mus tyes jac, cavin tsanꞌ mọꞌcheꞌ chịbiꞌ ĉaĉaij na jam tyes jac mijcheꞌ. 6Fibimꞌ meꞌ chịbiꞌ, a na areꞌyiyaꞌ muꞌ tsun q̂uinꞌdyemꞌ sacñenꞌ tyeiꞌ mọꞌ cätidyeꞌ ĉaĉaij na jam mochĉan ribin yiꞌ. 7Pạrej däräsyaꞌ ribin tŝọiꞌ, mọꞌtumdye chịbiꞌ däräꞌtum, mọꞌ qui jabustiꞌ mọꞌdyes qui jam mọꞌ väshiꞌ cätidyeꞌ. 8Pạrej na jämꞌyaꞌ jac tŝọiꞌ, q̂uinꞌdyemꞌ mọꞌyaꞌ jämꞌ p̂añiꞌ, jämꞌ väshiꞌ mọꞌ cätidyeꞌ, yiris vej quịcsiꞌ cien mọs vej jubanꞌ, pạrej na jäbän quiꞌtac vej jubanꞌ, judyeyaꞌ pạrej cien vej jubanꞌ, meꞌsiꞌ jubanꞌ mọꞌ jämꞌyas jac tŝọiꞌsiꞌ in.
9Dadamꞌ muꞌ jéyacsi:
—Tyi chuc chuntumtyiꞌ in paj jämꞌ seꞌveꞌ in ọij p̂eyacdyeꞌ.
Jedyedyes buty jịꞌĉocdyes p̂eyacdyeꞌ muꞌ
(Mat 13:10-17; Luc 8:9-10)
10Aty yiritydyety muꞌ Jesús, chat qui jịꞌchiyactyiꞌ muꞌ judyeyaꞌ yoctyiꞌ cäc̣häꞌchutety in ĉọcte in judyeyaꞌ jéte in, jedyeꞌ cạiꞌ o mọꞌ jịꞌĉocdyes p̂eyacdyeꞌ, yi jéte in. 11Jesús vorjeyacsi:
—Miꞌin mọmoꞌ soꞌminac Jenꞌ paj qui tupuj chị́yeptinte caminsis dyijyedyeꞌ muꞌ, junꞌ chuc ayoꞌbuꞌyedyeꞌ muꞌsiꞌ. Muꞌin na yoctyiꞌ muntyiꞌ in jam meꞌ muꞌin soꞌmac in, jịꞌĉocdyestumsiꞌ mọmoꞌ p̂eyacdyeꞌ jịꞌchiyacsi yụ, 12paj qui meꞌ shupqui in: meꞌ tsanꞌ seꞌvaqui in jam qui namꞌ chicacsi in jätäjyiꞌ chuc mọꞌ. Jam meꞌ jụijyaꞌ muꞌin in a vuty tupuj caꞌñibun Jenꞌyaꞌ u in paj qui muꞌ Jenꞌ vayacjetyetacseban juchaj muꞌin.
Jesús jịꞌchiqueyacsi p̂eyacdyeꞌ p̂eijte muꞌ cätity muntyiꞌ
(Mat 13:18-23; Luc 8:11-15)
13Jesús jéyacsi:
—¿Jam adac chiquetiñeꞌ ọij jedyeꞌ chuc cạiꞌ mọꞌ jịꞌĉocdyes p̂eyacdyeꞌ? ¿Junꞌ buty raꞌ chiquetiñeꞌ yocsiꞌ jịꞌĉocdyes p̂eyacdyeꞌ in? Meꞌ yiꞌ p̂eyacdyeꞌ p̂eijte cätity muntyiꞌ. 14Muꞌ cätity muntyiꞌ mọꞌ cạiꞌ jeñej muꞌ voroꞌtacsity Jenꞌsiꞌ p̂eyacdyeꞌ muꞌ. 15Vej majmiĉan tŝọiꞌsiꞌ, mọꞌ cạiꞌ jeñej muꞌin seꞌveꞌtyiꞌ tsanꞌ in mọꞌ p̂eyacdyeꞌ, muꞌyaꞌdye muꞌ shupqui Satanás meꞌĉandye jäctyetacsi p̂eyacdyeꞌ ĉojtyiꞌĉansiꞌ muꞌin. 16Chimeꞌdye vej mijcheꞌ tŝọiꞌsiꞌ mọꞌ cạiꞌ jeñej buꞌyiꞌ seꞌvety tsanꞌ in mọꞌ p̂eyacdyeꞌ maꞌjodyeꞌtum tsanꞌ tiĉuñeꞌ in. 17Mijam qui namꞌ ĉojtyiꞌĉan jiꞌsiteꞌ in, jeñej buꞌyiꞌ itŝis ribin meꞌ buꞌyiꞌ mọꞌ p̂eyacdyeꞌ, damꞌtuquimꞌ cäc̣häꞌchuiꞌ in. A na ñịbedyes jịꞌĉojtyeꞌyaꞌ in judyeyaꞌ jịꞌñibeꞌcac in p̂eyacdyedyes, chat qui farajjecajcaiꞌ in meꞌĉandye jiꞌcaꞌñibun in. 18Mọꞌ na vej däräsyaꞌ ribin tŝọiꞌsiꞌ, mọꞌ cạiꞌ jeñej muꞌin seꞌvety tsanꞌ in mọꞌ p̂eyacdyeꞌ in. 19Meꞌ tsanꞌ meꞌ muꞌin qui namꞌ yejĉoij dyijtuqui in ĉụiꞌsiꞌ dyijyedyeꞌ jacches muꞌin judyeyaꞌ fer mạꞌjete querec̣ha in judyeyaꞌ chimeꞌ mạꞌjeꞌ meꞌchuiꞌ jedyeꞌ in. Mọꞌdyes qui jam p̂añiꞌ mọꞌ p̂eyacdyeꞌ ĉojtyiꞌĉan muꞌin, mijam qui Jenꞌdyes bäꞌyi in. 20Mọꞌ na jämꞌyaꞌ jac tŝọiꞌsiꞌ vej, mọꞌ cạiꞌ jeñej muꞌin jämꞌ seꞌvety p̂eyacdyeꞌ in, judyeyaꞌ chiqueꞌ in, mọꞌdyes qui muꞌin Jenꞌdyes bäꞌyi in, jeñej jämꞌsiꞌ väsh, meꞌ buꞌyi muꞌin in, pạrej yiris vej quịcsiꞌ chibin quiꞌtac vej jubanꞌ mọꞌ, judyeyaꞌ pạrej jäbän quiꞌtac vej jubanꞌ mọꞌ, judyeyaꞌ pạrej cien vej jubanꞌ mọꞌ, meꞌ meꞌ raꞌ carijtaqui Jenꞌdyes in.
Jịꞌĉocdyes p̂eyacdyeꞌ fajcheꞌ yụꞌtacsiꞌ mạijyis
(Luc 8:16-18)
21Chimeꞌdye Jesús jéyacsi:
—Mọꞌ mạijyis jam junꞌ cạc paj qui cajónĉan yụꞌtac mijam ĉushaquisĉan, jemoñeꞌ cheꞌve yụꞌtac paj qui tupuj mạijchucsiꞌ yoctyiꞌ muꞌĉantyiꞌ in. 22Meꞌdye raꞌ chimeꞌdye mọꞌin jujmus q̂uinꞌ in, jäquiꞌve räj raꞌ mọꞌin chị́yac in, judyeyaꞌ mọꞌin caminves q̂uinꞌ in, räj raꞌ mọꞌin jorojĉanyiꞌ in. 23Tyi chuc chuntumtyiꞌ in paj jämꞌ seꞌveꞌ in ọij p̂eyacdyeꞌ.
24Chimeꞌdye muꞌ jéyacsi:
—Seꞌvevac jämꞌ mọꞌ p̂eyacdyeꞌ, chiquetiñeꞌ raꞌ miꞌin judyeyaꞌ qui raꞌ yoctyiꞌ jiꞌjiyeyacsi miꞌin. Meꞌ raꞌ jụijyaꞌ miꞌin, dadamꞌ raꞌ yocsiꞌ cäch soꞌmac miꞌin. 25Tyi chuc chiqueꞌtyiꞌ in dadamꞌ raꞌ mujuꞌchaꞌ soꞌmac in, jam na chiqueꞌtyiꞌ in, muꞌin raꞌ chutyetac raꞌ in damꞌsis dyijyedyeꞌ meꞌchuiꞌsiꞌ in.
Jịꞌĉocdyes p̂eyacdyeꞌ chịbiꞌsiꞌ vej
26Chimeꞌdye Jesús jéyacsi:
—Meꞌ buꞌyiꞌ nash ayoꞌbuꞌyedyeꞌ Jenꞌsiꞌ muꞌ, jeñej yiris vej muntyiꞌ quịꞌ jacĉan. 27Chat qui muꞌ muntyiꞌ tsedyedyeꞌ ĉọshi, mạij qui namꞌ tsạꞌ. Aty jiyiꞌ mạyedyeꞌ ĉụiꞌ mọmoꞌ chịbiꞌ tiyacchutiꞌ p̂añiꞌ, jam namꞌ chịj muꞌ junꞌ chuc mọꞌ. 28Ĉụiꞌ mọmoꞌ jacĉan shubanꞌ mọꞌ cätidyeꞌ, tashiꞌ chịpdyeꞌ mọꞌ, chat qui jäquiꞌve chaptiꞌ shan mọꞌ chat jäquiꞌve väshiꞌ. 29Aty ịjtsiꞌ väsh mọꞌ chat qui vädac ĉaĉaij na aty ayij tupudyeꞌ vädacdyedyes.
Jịꞌĉocdyes p̂eyacdyeꞌ miquis vej mostazas
(Mat 13:31-32; Luc 13:18-19)
30Jesús jéyacsi:
—¿Jedyeꞌ buty cätstyeꞌ ayoꞌbuꞌyedyeꞌ Jenꞌsiꞌ muꞌ? ¿Jedyeꞌ buty jịꞌĉocdyes p̂eyacdyeꞌ tupuj yụꞌtyeꞌ? 31Mọꞌ jeñej buꞌyiꞌ yiris vej mostazas. Mọꞌ anic miquis vej jam jeñej yocsiꞌ in. 32A na quịc jụijyaꞌ mọꞌ, jam tacac buꞌyiꞌ anic mọjoꞌchaꞌ där jịjcaiꞌ shupquiꞌ mọꞌ cätidyeꞌ jeñej därsiꞌ son, mọꞌsiꞌcheꞌ dacaꞌ daiꞌ tịꞌiꞌ jaijtyiꞌ in ĉaĉaij na mọꞌ onomꞌ buꞌyiꞌ.
33Jesús jịꞌchiyacsi Jenꞌsiꞌ p̂eyacdyeꞌ muꞌ daiꞌ joꞌmestum jịꞌĉocdyestum p̂eyacdyeꞌ jéyacsi, junꞌ chuc tupuj chicacsi in. 34Jịꞌĉocdyestum mọmoꞌ p̂eyacdyeꞌ jịꞌchiyacsi muꞌ, jam yocve jịꞌchiyacsi muꞌ. Aty itŝijyaꞌ yoctyiꞌ in, Jesús räj jịꞌchiqueyacseban jịꞌchiyactyiꞌ muꞌ jedyeꞌ buty cạiꞌ mọꞌ jiꞌchäyitidyeꞌ muꞌ.
Jesús jiꞌdyäqueĉunꞌte tyiꞌmu
(Mat 8:23-27; Luc 8:22-25)
35Aty shocamyejoiꞌ Jesús jéyaqui jịꞌchiyactyiꞌ muꞌ:
—Nopej tsiqueꞌ jịjcajaꞌ.
36Chat qui yạjquicseban muntyiꞌ in, muꞌdye covamba cạte in. Yoctyiꞌ muntyiꞌ in yoctyiꞌchechej covamba cäc̣häꞌchute in. 37Vatyquej atsij tyiꞌmu tsäquiꞌtyity, jiꞌsiteꞌ covambaĉan ojñiꞌ, aty raꞌ jiꞌpechte covamba. 38Jesús na pechve covamba ĉọshvaꞌjoij jubijcheꞌ. Jịꞌchiyactyiꞌ muꞌ jịꞌtsaꞌebajte in jéte in:
—¡Jịꞌchiyacsity! ¡Jam mọꞌ jedyeꞌ yiꞌ mi ĉọiꞌ u paj qui ĉụiꞌ pechjaꞌ tsun!
39Chat meꞌĉandye vañinyeban jiꞌdyäqueĉunꞌte tyiꞌmu, judyeyaꞌ jeꞌ ojñiꞌ:
—¡Dyäcyeva!
P̂eyacdyeꞌĉandye mọmoꞌ pärenꞌdye jiꞌdyäcacsi. 40Chat qui muꞌ Jesús jéyaqui jịꞌchiyactyiꞌ muꞌ:
—¿Junꞌ dash noiꞌyi miꞌin? ¿Tacaꞌ jayej anicjetinte Jenꞌ?
41Tacaꞌ noiꞌyi in, mọꞌdyes qui vaj meij jíti in, yi in:
—¿Tyi buty uts muntyiꞌ? Yoj na tupuj jiꞌdyäquete tyiꞌmu judyeyaꞌ ojñiꞌ, yoj na seꞌvete in.
Currently Selected:
Marcos 4: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
