Marcos 3

Muntyiꞌ putyuijtyiꞌ un

(Mat 12:9-14; Luc 6:6-11)

1Jesús cuvij ĉọ́queꞌ mọꞌ vajmuꞌyadyeꞌ judíos muꞌin. Muꞌĉan chimeꞌdye yirity muntyiꞌ putyuijtyiꞌ un. 2Fariseo na in cạvevaꞌte Jesús in junꞌ a ĉa jiꞌchäĉajte jịꞌjutyitidyesĉan mạyedyeꞌ yi in, ĉaĉaij na mạꞌjeꞌ jiꞌmeꞌte ayoꞌyaꞌ in. 3Jesús yi jéte muꞌ muntyiꞌ putyuijtyiꞌ un:

—Sacyeva tashcheꞌ buꞌva.

4Chat qui muꞌ Jesús jéyacsi muntyiꞌ in:

—¿Jụꞌñis buty tupuj yụꞌtyejaꞌ jịꞌjutyitidyesĉan mạyedyeꞌ? ¿Areꞌ jämꞌsiꞌ areꞌ aꞌc̣his? ¿Tupuj buty jiꞌchäĉajsha muntyiꞌ, areꞌ jiꞌmeꞌyeja mọmoꞌ? ¿Jätäjyiꞌ buty yụꞌtacdyeꞌ Jenꞌsiꞌ muꞌ? —jéyacsi Jesús.

Muꞌin na memꞌ c̣huꞌc̣huij in, mijam damꞌ voryi in. 5Jesús chijämꞌ jịꞌfajte in meꞌĉandye jiꞌtarete in, ĉaĉaij na anic yäcäj ĉojtyiꞌ muꞌin. Chat qui muꞌ Jesús jéte muꞌ muntyiꞌ putyuijtyiꞌ un:

—Chụiꞌjebadaꞌ un mi.

Meꞌdye muꞌ chụiꞌjeyaĉan un muꞌ, meꞌĉandye jämꞌjobanꞌ un muꞌ. 6Fariseo shuban in, chat qui ĉọcsequi in muꞌin cäc̣häꞌchutety Herodes in,#3:6 Uts Herodes Antipas, ạvaꞌ muꞌ jétety in Tashchety Herodes, muꞌ jiꞌijacsity miquiꞌmuntyiꞌ in. P̂eyevaꞌ Mateos 2:1 dyijyi in junꞌ buꞌyi chuc raꞌ jiꞌijate in Jesús.

Shach muntyiꞌ ĉọcte Jesús in tsiqueꞌve jịjcaij in

7Jesús räjtumdye jịꞌchiyactyiꞌ muꞌ tsiqueꞌve jịjcaij in. Chimeꞌdye Galileaĉantyiꞌ in shach muꞌin tyeij ĉọcte in. 8Muntyiꞌ in aty chị́qui in junꞌ chuc jịꞌcaveyacsi därsiꞌ ferdyeꞌ muꞌ, shach vatyquej tyeij ĉọcte in paiꞌ bäꞌyity in, Judeaĉantyiꞌ in judyeyaꞌ Jerusalénĉantyiꞌ in, Idumeaĉantyiꞌ in judyeyaꞌ nopety cojiro Jordán in judyeyaꞌ Tiroĉantyiꞌ in judyeyaꞌ Sidónĉantyiꞌ chimeꞌ in, meꞌ meꞌ ĉọcte in muꞌĉantyiꞌdye paiꞌtyity in. 9Jesús jéyaqui jịꞌchiyactyiꞌ muꞌ paj qui yụꞌtyeyete covamba in paj qui jam quec̣hete muntyiꞌ in. 10Muntyiꞌ fer mạꞌjeꞌ tocoꞌjete in ĉaĉaij na jiꞌchäcacseban japacjoijtyiꞌ in.

11Chimeꞌdye junꞌsiꞌ ĉụiꞌ cạveteyaꞌ in muꞌin sọyoꞌtumtyiꞌ muntyiꞌ in, dyụtsyi in Jesússiꞌyaꞌ vej muꞌ, äjyedyeꞌtum p̂eyaqui jéte in:

—Mi nash Jenꞌtyiꞌ Ạvaꞌ muꞌ.

12Jesús ferdyeꞌtum jéyacsi paj qui jam jịꞌchiqueyacsi muntyiꞌ in.

Jesús tsimꞌtacsi yiriꞌtac päräꞌ jiyi jutactyiꞌ muꞌ

(Mat 10:1-4; Luc 6:12-16)

13Jesús mụcuꞌcheꞌ jịjcaij, chat qui fayacsi muntyiꞌ in jụꞌñity chuc dyijtucsi, muꞌin ĉọcte in. 14Yụꞌtacsi yiriꞌtac päräꞌ jiyi in penꞌdyetutety raꞌ in, muꞌin raꞌ jutactyiꞌ muꞌ paj qui cạyacsity p̂eyacdyeꞌ in. 15Chimeꞌdye soꞌmacsi ferdyeꞌ muꞌ paj qui tupuj meijjetyetacsi sọyoꞌ in. 16Ọij nash tịj muꞌin: Simón, Pedro chimeꞌdye jịꞌtiꞌete, 17Santiago judyeyaꞌ vojity muꞌ Juan, Zebedeoty ạvaꞌ in. Yocsiꞌ tịj soꞌmacsi muꞌ Jesús: "Pururu Buꞌyity in", meꞌ jéyacsi. 18Chimeꞌdye muꞌ yụꞌtacsi muꞌ Andrés judyeyaꞌ Felipe judyeyaꞌ Bartolomé, judyeyaꞌ Mateo, judyeyaꞌ Tomás judyeyaꞌ Santiago, Alfeoty ạvaꞌ muꞌ, judyeyaꞌ Tadeo judyeyaꞌ Simón, muꞌ nash cäc̣häꞌchucsity muꞌin fạ́cacsity Romaĉantyiꞌ in, 19judyeyaꞌ muꞌ Judas Iscariote, muꞌ raꞌ jiꞌmincatety Jesús. Meꞌ meꞌ jutactyiꞌ jiquej muꞌ.

Ñäñitidyeꞌ muꞌin, "Sọyoꞌ soꞌmete ferdyeꞌ", yi in

(Mat 12:22-32; Luc 11:14-23; 12:10)

20Jesús siti acaꞌĉan. Cuvij shach ĉọcte muntyiꞌ in, sät tŝọij in, mọꞌdyes qui muꞌ Jesús jịꞌchiyactyiꞌtum muꞌ jam qui junꞌ tupuj säcsi in. 21Chị́qui in ĉụiꞌtyiꞌ chätidyeꞌ muꞌ, atsij muꞌin in mạꞌjeꞌ tsanꞌ jeshajte in, ĉaĉaij na pạrej dyijyi in aty shapuij ĉọ́te in.

22Muꞌyaꞌ chimeꞌ jịꞌchiyacsity yụꞌtacdyeꞌ in Jerusalénvety in. Chimeꞌdye muꞌin p̂eijte in yi in: "Muꞌ Beelzebú, sọyoty ayoꞌ mọꞌin, muꞌsiꞌyaꞌ ferdyeꞌ muꞌ Jesús meijjetyetacsi sọyoꞌ in", yi in.

23Jesús fayacsi muꞌin yity in, yụꞌtyeyeyacsi jịꞌĉocdyes p̂eyacdyeꞌ, jéyacsi:

—Satanás jam ĉụiꞌ tupuj meijjiti. 24Jeshaꞌ bäꞌyedyeꞌĉantyiꞌ chuti ayoꞌtum jụijyaꞌ muꞌin, mijam raꞌ men meꞌ buꞌyiꞌ mọꞌ bäꞌyedyeꞌ. 25Chimeꞌdye vaj chätidyeꞌ jụijyaꞌ in vaj meij chuvaꞌtidyeij in, cavin raꞌ mọtsi in. 26Meꞌdye raꞌ muꞌ chimeꞌ Satanás vaj meij chutidyeiꞌ bäꞌyiꞌyaꞌ sọyoꞌ in, jam raꞌ men meꞌ buꞌyiꞌ ayoꞌbuꞌyedyeꞌ Satanássiꞌ, cavin raꞌ mọtsimꞌ.

27Chimeꞌdye jam tyi tupuj sisbite acaꞌ muꞌsiꞌ ferdyeꞌtumtyis muntyiꞌ paj qui shiꞌatute jedyeꞌ muꞌ. Jemoñeꞌ tashcheꞌ chum saptac muꞌ ferdyeꞌtumtyiꞌ muntyiꞌ, chat q̂uinꞌdyemꞌ tupuj räj cạpte acaꞌĉansiꞌ jedyeꞌ in ĉaĉaij na aty jiꞌpente in.#3:27 Muꞌ jedyeꞌtumtyiꞌ saptactyiꞌ muntyiꞌ jeñej buꞌyi Satanás cạiꞌ, ĉaĉaij na muꞌ Jesucristo tashcheꞌ jajipentaque muꞌ paj qui tupuj meijjetyetacsi sọyoꞌ.

28Yụ jéyac, Jenꞌ tupuj jụꞌñis ĉụiꞌ mọmoꞌ vayacjetyetacsi juchaj muntyis muꞌin, judyeyaꞌ jụꞌñis ĉụiꞌ ñäñitidyeꞌ muꞌin, 29muꞌin na ac̣hiꞌ p̂eijbitety in Jenꞌsiꞌ Ạꞌedyeꞌ muꞌ,#3:29 Ferdyeꞌyaꞌ mọꞌ Jenꞌsiꞌ Ạꞌedyeꞌ muꞌ, muꞌ Jesús meijjetyetacsi sọyoꞌ, mijam na junꞌ Satanássiꞌyamꞌ. muꞌin jam raꞌ damꞌ muꞌ Jenꞌ vayacjetyetacsi juchaj muꞌin, tacyaꞌ buꞌyiꞌ ramꞌ mọꞌ juchadyeꞌ muꞌin.

30Meꞌ jéyacsi muꞌ Jesús ĉaĉaij na yi jiquej in: "Uts nash Jesús sọyoꞌtumtyiꞌ", yi jéte in.

Jesússiꞌ tseꞌ muꞌ judyeyaꞌ vojity muꞌ ĉọcte in

(Mat 12:46-50; Luc 8:19-21)

31Jesússiꞌ tseꞌ muꞌ judyeyaꞌ vojity muꞌ muꞌyaꞌ venjoij in. Jorojyaꞌ buꞌyi jiꞌvorvete in. 32Daiꞌ muꞌyaꞌ Jesúsyaꞌ bäꞌyi in. Muꞌin jéte in:

—Mosh tyuꞌ jorojyaꞌ tseꞌ mi, judyeyaꞌ vojity mi, mạꞌjeꞌ nash cavin in —yi jéte in.

33Jesús qui vorjeyacsi:

—¿Mọꞌyaꞌ adac ĉaĉaij tseꞌ yụ? ¿Muꞌyaꞌ adac ĉaĉaij vojity yụ in?

34Chat qui muꞌ paiꞌ cạvi cọtoij buꞌyityyaꞌ in, yi muꞌ jéyacsi:

—Uts q̂uinꞌ in muꞌin nash tseꞌtucsi yụ judyeyaꞌ vojitytucsi yụ. 35Tyi chuc chiqueꞌ in mọꞌ jiꞌchäyitidyeꞌ junꞌ chuc mạꞌjeꞌ muꞌ Jenꞌ, muꞌindyemꞌ vojitytucsi yụ judyeyaꞌ tseꞌtucsi yụ.

Currently Selected:

Marcos 3: CAS

Highlight

Copy