Mateos 25

Jịꞌĉocdyes p̂eyacdyeꞌ yiriꞌtacyis nanas in

1Aty raꞌ atsijbanyaꞌ yụ, meꞌ buꞌyiꞌ raꞌ ayoꞌbuꞌyedyeꞌ Jenꞌsiꞌ muꞌ, jeñej buꞌyiꞌ yiriꞌtacyis nanas in. Mọꞌin sactiꞌ in vämedyedyesĉan feshta feshtayequiꞌ in, paj qui tiĉunꞌte in muꞌ mụiꞌdye vämity muntyiꞌ, mạijyis cạquiꞌ in. 2Ĉanamꞌ dyijyedyeꞌtumsiꞌ nanas in, chiĉanamꞌdye itŝis dyijyedyeꞌ in. 3Mọꞌin itŝis dyijyedyeꞌ in, meꞌ tsanꞌ mạijyis cạquiꞌ in, itŝiꞌ qui namꞌ yocsiꞌ aseijte cạiꞌ in. 4Mọꞌin na dyijyedyeꞌtumsiꞌ in voteyaĉan cạquiꞌ in. 5Muꞌ na muntyiꞌ vämity jam muꞌ cavintum atsij, mọꞌin nanamunsiꞌ in chijämꞌdye ĉush játŝutiꞌ in ĉọshiꞌ in täcrenꞌyejoiꞌ in.

6Aty menyaꞌ, ĉụiꞌdye seꞌveꞌ in mọꞌ p̂eyacdyeꞌ yiꞌ: "¡Atyuꞌ meij jijtuij muꞌ vämity muntyiꞌ! ¡Tiĉunꞌmac miꞌin!" 7Mọꞌin yiriꞌtacyis nanas in sacyiꞌ in, jämꞌ yụꞌtaĉanꞌ mạijyis in. 8P̂eyaquiꞌ mọꞌin itŝis dyijyedyeꞌ in, cọdyetacsiꞌ dyijyedyeꞌtumsiꞌ in jéyacsiꞌ in: "Aty toꞌ o dạ̈räꞌ mạijyis tsun, mạꞌjeꞌ quivꞌjoiꞌ in, cumꞌjiyitiĉamꞌ aseijte miꞌin." 9Mọꞌin dyijyedyeꞌtumsiꞌ vorjeyacsiꞌ in: "Jam junꞌ, areꞌĉa jam tupuj tsundyes. Damꞌdye jämꞌ yaꞌiyequiꞌ miꞌin ĉụiꞌdyesiꞌ aseijte miꞌin." 10Chat qui mọꞌin itŝis dyijyedyeꞌ in sactiꞌ yaꞌiyequiꞌ in. Jambiꞌ shupqueshanꞌ in, jäꞌmijdye muꞌ shupqueti muꞌ vämity muntyiꞌ, muꞌ bisvaꞌtety in. Mọꞌin ĉanamꞌ nanas in jäꞌmiiꞌtyis in muꞌtum qui yiriꞌyaꞌ sitiꞌ in, judyeyaꞌ vanacjeyac chụiꞌdyeꞌ in. 11Jäquiꞌvedye shupqueshanꞌ in mọꞌin yaꞌiyequis in. Chataꞌ yiꞌ in: "¡Mi ayoꞌ tsun, jiꞌsäsdyiĉamꞌ tsun chimeꞌ!" 12Muꞌ muntyiꞌ vorjeyacsi: "Yụ jam damꞌ chị́yeyac miꞌin."

13Chat qui muꞌ Jesús jéyacsi:

—Ĉujcatac miꞌin bisdyiĉamꞌ yụ, ĉaĉaij na jam chịj miꞌin mọꞌ mạyedyeꞌ judyeyaꞌ hora ayijdyes yụ.

Jịꞌĉocdyes p̂eyacdyeꞌ chibin úñity in soꞌmac querec̣ha in

(Luc 19:11-27)

14Aty ayijyaꞌ tupudyeꞌ, meꞌ buꞌyiꞌ raꞌ ayoꞌbuꞌyedyeꞌ Jenꞌsiꞌ muꞌ, jeñej buꞌyi yirity muntyiꞌ yocsiꞌve raꞌ jac jịjcaijtyiꞌ. Tashcheꞌ muꞌ fayacsi úñity muꞌ judyeyaꞌ qui yụꞌtacsi paj qui räj jedyeꞌ ĉọjcapte in. 15Muꞌ räj soꞌmacsi querec̣ha muꞌ, cäj cäj soꞌmacsetaqui, junꞌ junꞌ chuc chịj carijtaquity in. Yirity úñity muꞌ soꞌmaqui ĉanamꞌ mir querec̣ha, yoctyiꞌ na soꞌmete päräꞌ mir querec̣ha judyeyaꞌ yoctyiꞌ soꞌmete yiriꞌ mir mọmoꞌ, meꞌ meꞌ tsanꞌ soꞌmac in paj qui jiꞌdaijbite in querec̣ha muꞌ, chat qui muꞌ muntyiꞌ sacti yạjquicsi. 16Muꞌ úñity soꞌmactyiꞌ ĉanamꞌ mir querec̣ha, cavintum muꞌ carijtaqui querec̣hadyes paj qui jiꞌdaijte. Jäquiꞌve dayi muꞌ querec̣ha yoctyiꞌ chichimeꞌsiꞌ ĉanamꞌ mir meꞌsiꞌ cächyi. 17Meꞌdye muꞌ chimeꞌ päräꞌ mir soꞌmactyiꞌ, muꞌ chimeꞌ carijtaqui querec̣hadyes paj qui jiꞌdaijte, yoctyiꞌ chichimeꞌsiꞌ päräꞌ mir meꞌsiꞌ cächyi. 18Muꞌ na yoctyiꞌ yiriꞌ mir soꞌmactyiꞌ, jam muꞌ meꞌ. Toꞌĉan mọmoꞌ rudyuꞌjepte querec̣ha ayoꞌtyiꞌ muꞌ.

19Men muꞌ tyäpi, ĉụiꞌdye shupqueshan ayoꞌ muꞌin. Fayaĉan úñity muꞌ judyeyaꞌ cọdyetacseban sanꞌquejĉodyeꞌ muꞌin. 20Tashcheꞌ atsij muꞌ soꞌmactyiꞌ jiquej ĉanamꞌ mir. Yi jéte ayoꞌ muꞌ: "Mi yajquiyitim ĉanamꞌ mir jiquej, q̂uinꞌ aty muꞌyaꞌ yoctyiꞌ yụ chiĉanamꞌ mirdye cächjete yụ." 21Ayoꞌ muꞌ voryi jajiti: "Där jämꞌ, mi nash jämꞌtyiꞌ úñity yụ jịꞌcätsety mi. Aty jịꞌcätseꞌ mi mọꞌ miquis p̂eyacdyeꞌ, mọꞌdyes qui yụ raꞌ soꞌmeye därsiꞌ yụꞌtacdyeꞌ. Sisva paj qui yụ́tum maꞌjoij mi." 22Yoctyiꞌ qui atsij úñity soꞌmactyiꞌ päräꞌ mir. Yi jéte ayoꞌ muꞌ: "Mi yajquiyitim päräꞌ mir jiquej, q̂uinꞌ aty yoctyiꞌtum yụ chipäräꞌ mirdye cächjete yụ." 23Ayoꞌ muꞌ voryi jajiti: "Där jämꞌ, mi nash jämꞌtyiꞌ úñity yụ jịꞌcätsety mi. Aty jịꞌcätseꞌ mi mọꞌ miquis p̂eyacdyeꞌ, mọꞌdyes yụ raꞌ soꞌmeye därsiꞌ yụꞌtacdyeꞌ. Sisva paj qui yụ́tum maꞌjoij mi."

24Jäquiꞌve yoctyiꞌ atsij úñity muꞌ, muꞌ yạjquiyetety yiriꞌ mir jiquej. Yi muꞌ jéte ayoꞌ: "Mi ayoꞌ yụ, yụ chị́yeye jam ñịbeꞌ ĉọcsity mi, mi nash ĉụiꞌsitucsebity yoctyis jedyeꞌ muꞌin judyeyaꞌ jäcacsebi mi yoctyis cätidyeꞌ muꞌin. 25Mọꞌdyes noiꞌyi yụ, toꞌĉan qui jijmuꞌsepye querec̣ha mi. Uts querec̣ha mi soꞌmitity bajaꞌ jiquej mi." 26Ayoꞌ muꞌ vorjajiti: "¡Där ac̣hiꞌtyity mi úñity, anic där toꞌoty mi! Yi mi yụ ca ĉụiꞌsitucsebity yoctyis jedyeꞌ muꞌin, judyeyaꞌ jäcacsebi caij yoctyis cätidyeꞌ muꞌin, meꞌ ĉútiꞌ yụ mi. 27Meꞌ dyijyi jụijyaꞌ mi, ¿junꞌ caꞌ jam soꞌmacsi mi querec̣ha yụ muꞌin mạꞌjeꞌ prestaijtyiꞌ in, paj qui damꞌ cächjete in? Meꞌdye jụijyaꞌ mi, aty shupqueshanyaꞌ yụ, tupuj qui jiꞌcaꞌñiyibunꞌ mi querec̣ha yụ, yojtumdyemꞌ cächjeyac u." 28Chat qui muꞌ ayoꞌ jéyacsi yoctyiꞌ úñity muꞌ: "Chutyebajmac uts muꞌ yiriꞌ miryity querec̣ha, soꞌmebajtinte raꞌ miꞌin muꞌ meꞌchutety yiriꞌtac mir." 29Tyi chuc jịꞌcätseꞌtyiꞌ, dadamꞌ raꞌ soꞌmac paj qui mujuꞌchaꞌ meꞌchuiꞌ muꞌ, tyi chuc jam jịꞌcätseꞌtyiꞌ, Jenꞌ raꞌ jachutyiti mọꞌ damꞌ meꞌchuiꞌsiꞌ muꞌ. 30Uts na fibity úñity jorojyaꞌ raꞌ vaꞌquectinte tojmadyeꞌĉan, muꞌĉan raꞌ där tári muꞌ judyeyaꞌ raꞌ querechjeyaqui modyin muꞌ.

Jịꞌcäts yụꞌtac raꞌ muntyiꞌ in

31Aty raꞌ atsijbanyaꞌ yụ Anictyity Muntyiꞌ yụ, ferdyeꞌtum raꞌ yụ, tucsi raꞌ yụ anjer in, chat qui raꞌ ayoꞌbuꞌyi yụ, ayoꞌsiꞌcheꞌ bäꞌyaquis bäꞌyi raꞌ yụ, räj raꞌ irijyi yụ́cheꞌ in. 32Chat qui raꞌ vajmuꞌyaꞌjeyac räj jacchety muntyiꞌ in, yụ́siꞌyaꞌ raꞌ vej yụꞌtac in. Yụ raꞌ pạrej buꞌyi yụꞌtacsi, päräꞌ raꞌ ñuruꞌ jiꞌshupcacsi yụ, jeñej yirity ĉọjcaiꞌtyiꞌ cuꞌdyeꞌ pạrej buꞌyiꞌ yụꞌtacsi cuꞌdyeꞌ muꞌ oveca in judyeyaꞌ chivo in. 33Muꞌin jeñej buꞌyity oveca in tacve buꞌyi raꞌ muꞌin in, muꞌin na jeñej buꞌyity chivo in q̂uimve raꞌ muꞌin in. 34Yụ nash raꞌ Ayoꞌ, chat qui raꞌ yụ jéyacsi muꞌin tacve buꞌyity raꞌ in: "Atsijamꞌ miꞌin, miꞌin nash ñịbeꞌjinac Jenꞌ, sisvac Jenꞌyaꞌ miꞌin, ayoꞌbuꞌyedyeꞌĉan muꞌ, miꞌindyes jämꞌtyiyinac Jenꞌ, jambiꞌdyemꞌ jämiꞌ jac, tạꞌcas aty mọꞌ mọꞌyaꞌ miꞌindyes. 35Meꞌ raꞌ chat siti miꞌin ĉaĉaij na dáqui yụ jiquej, miꞌindyety jiꞌsäcsitiĉaꞌ yụ miꞌin, jajri yụ jiquej, miꞌindyety jiꞌtyetiĉaꞌ yụ miꞌin. Jeñej buꞌyi yocve atsijtyiꞌ yụ itŝity chätidyeꞌ meꞌ buꞌyi yụ, miꞌindyety jiꞌdyäquitiĉaꞌ yụ miꞌin. 36Chimeꞌdye cädäj yụ jiquej, miꞌindyety jiꞌcätiĉaꞌ yụ miꞌin, judyeyaꞌ japacjoij jiquej yụ, miꞌindyety ĉujcatiĉaꞌ yụ miꞌin, ĉärꞌtaquisĉan ĉäꞌräij jiquej yụ, miꞌindyety tänꞌjijcatiĉaꞌ yụ miꞌin", jéyacsi raꞌ yụ. 37Muꞌin rụijtyity raꞌ in vorjin raꞌ yụ in: "Mi nash Ayoꞌ tsun, ¿junꞌdyeyaꞌ caꞌ dáquistum dạquicyac tsun judyeyaꞌ jiꞌsäcseyac? ¿Junꞌdyeyaꞌ caꞌ jajristum dạquicyac tsun judyeyaꞌ jiꞌtyeyac? 38Chimeꞌdye ¿junꞌdyeyaꞌ caꞌ jeñej yocve atsijtyiꞌ dạquicyac judyeyaꞌ jiꞌdyäqueyac? ¿Junꞌdyeyaꞌ caꞌ cädäj dạquicyac judyeyaꞌ jịꞌquiyac? 39¿Junꞌdyeyaꞌ caꞌ japacjoij mi, judyeyaꞌ ĉäꞌräij mi meꞌ dạquicyac tsun, judyeyaꞌ tänꞌjejcayac?" meꞌ raꞌ jin yụ. 40Chat qui raꞌ yụ Ayoꞌ muꞌin jéyacsi yụ: "Yụ jéyac junꞌsiꞌ chuc ñútyibutiĉaꞌ vojity buꞌyity yụty jiquej miꞌin, meꞌ tsanꞌ muꞌ uyaꞌyaꞌ buꞌyity, yụ́dye qui namꞌ ñútyitiĉaꞌ miꞌin, meꞌ shupqui mọꞌ."

41Chat qui raꞌ yụ Ayoꞌ muꞌin jéyacsi raꞌ muꞌin q̂uimve buꞌyity in: "Meijyevac miꞌin yụ́yaꞌ, tsäquiꞌsisĉandyety, tŝijĉan raꞌ vaꞌcac miꞌin, mọꞌ jam jedyeiꞌ quivꞌjoiꞌsiꞌ. Mọꞌ nash jämꞌtyeꞌ Jenꞌ Sọyodyes räjtumdye úñity muꞌ, muꞌĉan raꞌ vaꞌcac miꞌin chimeꞌ. 42Meꞌ raꞌ yuꞌnac Jenꞌ ĉaĉaij na meꞌ tsanꞌ dáquistum jiquej yụ, miꞌin qui namꞌ jam jiꞌsäcsitiĉaꞌ yụ miꞌin, meꞌ tsanꞌ jajristum jiquej yụ, miꞌin qui namꞌ jam jiꞌtyetiĉaꞌ yụ miꞌin. 43Chimeꞌdye meꞌ tsanꞌ jeñej buꞌyi yocve atsijtyiꞌ yụ jiquej, miꞌin qui namꞌ jam jiꞌdyäquitiĉaꞌ yụ miꞌin, meꞌ tsanꞌ cädäj jiquej yụ, miꞌin qui namꞌ jam jiꞌcätiĉaꞌ yụ miꞌin, chimeꞌdye japacjoij jiquej yụ judyeyaꞌ ĉäꞌräij jiquej yụ, miꞌin qui namꞌ jam tänꞌjiĉudyiĉaꞌ yụ miꞌin," meꞌ raꞌ jéyacsi yụ. 44Muꞌin raꞌ vorjin yụ in: "Mi nash Ayoꞌ tsun, ¿junꞌdyeyaꞌ caꞌ dáquistum dạquicyac tsun, judyeyaꞌ jajristum, judyeyaꞌ jeñej buꞌyi yocve atsijtyiꞌ, judyeyaꞌ cädäj, judyeyaꞌ japacjoijtyiꞌ judyeyaꞌ ĉäꞌräijtyiꞌ? ¿Junꞌdyeyaꞌ caꞌ tsun meꞌ dạquicyac mi, jam qui namꞌ nọ́tyeyac tsun?" meꞌ raꞌ jin yụ in. 45Chat qui yụ Ayoꞌ muꞌin jéyacsi raꞌ yụ: "Yụ jéyac, junꞌsiꞌ chuc jam ñútyibutiĉaꞌ vojity buꞌyity yụty jiquej miꞌin, meꞌ tsanꞌ uyaꞌyaꞌ buꞌyity muꞌ, yụ́dye qui namꞌ meꞌjitiĉaꞌ miꞌin, meꞌ shupquiꞌ mọꞌ." 46Anicdye meꞌ, muꞌin meꞌtyity in vaꞌcac raꞌ tsäquiꞌsisĉan in, mijam raꞌ jụꞌñisĉan mạyedyeꞌ shuban muꞌĉan in. Muꞌin na rụijtyity in Jenꞌyaꞌ raꞌ bäꞌban in, mijam raꞌ jụꞌñisĉan mạyedyeꞌ mọtsjan in.

Currently Selected:

Mateos 25: CAS

Highlight

Copy