Josué 7
7
Acánsiꞌ juchaj
1Muꞌin Israeltyiꞌ vóshiꞌ in jam jịꞌcätsepte Jenꞌsiꞌ dyijyedyeꞌ cạiꞌsiꞌ mọꞌin jedyeꞌ Jenꞌdyes pạrej yụꞌtac in. Muꞌ Acán, ạvaꞌ Carmityiꞌ, vịyaꞌ Zabdity, vóshiꞌ Zeraty, Judáty ñuruꞌtyity muꞌ, muꞌ Acán ĉụiꞌdyestucsi pạrej jedyeꞌ in Jenꞌdyes yụꞌtacsiꞌ. Ọij jịꞌfajqueyacsi muꞌ Jenꞌ Israeltyiꞌ vóshiꞌ in.
2Muꞌ Josué jutacsi pạrej muntyiꞌ in Jericóve paj qui Haiyaꞌ jịjcaij in. Mọꞌ bäꞌyedyeꞌ Hai c̣hẹiꞌyaꞌ buꞌyiꞌ mọꞌ bäꞌyedyeꞌ Bet-avén judyeyaꞌ shupquive buꞌyiꞌ tsun mọꞌ bäꞌyedyeꞌ Betel. Josué jéyacsi:
—Muꞌve jịjcavac miꞌin judyeyaꞌ cạvecac räj mọꞌches jac —yi muꞌ.
Chat qui muꞌin Haiyaꞌ jịjcaij in judyeyaꞌ räj cạveꞌ in. 3Aty caꞌñibunyaꞌ muꞌin Josuéyaꞌ muꞌin jébajte in:
—Jam jemoñeꞌ paj qui räj sondaro muꞌcheꞌ jịjcaij in. Jutacsi ram päräꞌ mir jam jụijyaꞌ chibin mir chucsity in meꞌsiꞌ ramꞌ tupuj jiꞌpenacsi in. Jam qui jiꞌnobacsi räj sondaro in ĉaĉaij na jam daiꞌ muꞌyaꞌ muntyiꞌ muꞌcheꞌ in —jéte in Josué.
4Chat qui chibin mir sondaro muꞌcheꞌ jịjcaij in, muꞌin na jiꞌpenac muꞌinyaꞌ in Haityiꞌyaꞌ sonꞌ in. 5Muꞌin ujacsi chibin quiꞌtac jäbän jiyi Israeltyiꞌ sonꞌ in. Muꞌin Haityiꞌ sonꞌ in jinchacacsi muꞌin Israeltyiꞌ vóshiꞌ in bäꞌyedyesyaꞌ chụiꞌdyeꞌ meꞌdye yóyaꞌdyemꞌ jaiꞌdyeteyaꞌ mij u in. Chạdyeꞌyaꞌ mụcus täjjacsi ujacsi in. Chat qui muꞌin Israeltyiꞌ vóshiꞌ in itŝiꞌ tyeiꞌ ferdyeꞌ ĉojtyiꞌĉansiꞌ poijjoij muꞌin jeñej ojñiꞌ muñi muꞌin.
6Josué judyeyaꞌ muꞌin tashcheꞌ buꞌyity Israeltyiꞌ vóshiꞌ in shẹiꞌjeyaqui quịꞌsiꞌ in judyeyaꞌ dyụtsyi in täjjequeꞌ jac jáfiyaꞌ muꞌin yóyaꞌdyemꞌ cajón Jenꞌsiꞌ u. Chimeꞌ joꞌnoꞌcheꞌ bucjiti p̂uijdasyaꞌ in. 7Yi muꞌ Josué:
—Mi Jenꞌ Ayoꞌ, ¿junꞌ buty mi jiꞌnobacsi uts muntyiꞌ in muꞌ cojiro Jordán paj qui yuꞌtiĉaꞌ tsun unĉan amorreosĉan in paj qui jiꞌmotsinꞌ tsun in? Faraj vuꞌ caꞌ tacvedye tsun jiquej nopej Jordán. 8Mi Ayoꞌ, ¿jätäjyi bu raꞌ yụ? Aty ĉaꞌjoij murujrutacsi muꞌin chucsity Israeltyiꞌ vóshiꞌ in. 9Muꞌin cananeo in judyeyaꞌ yocsiꞌĉantyiꞌ jac bäꞌyity in seꞌvaqui raꞌ in chat qui raꞌ atsij in cọtoij tŝútyin tsun in. Meꞌquiꞌ raꞌ jịꞌmotsac tịj tsun ọ́cheꞌ jaccheꞌ. Aty meꞌ jiyiꞌ, ¿jedyeꞌ bu raꞌ jämꞌtaqui mi ĉụiꞌsidyes tịj mi paj qui muntyiꞌ äräjjeyacsebi in tịj mi? —jéte Josué.
10Muꞌ Ayoꞌ jajiti muꞌ Josué:
—¡Runꞌquenꞌyeva! ¿Junꞌ buty täjjequeꞌ jac jáfiyaꞌ mi? 11Aty juchaij Israeltyiꞌ vóshiꞌ in. Muꞌin jam jịꞌcätsibun yụ́siꞌ yụꞌtacdyeꞌ mọꞌ soꞌmacsis jiquej yụ. Muꞌin aty ĉụiꞌdyestuiꞌ in pạrej jedyeꞌ in yụ́dyes yụꞌtacsiꞌ. Muꞌin aty shuꞌaij in judyeyaꞌ väñäij in judyeyaꞌ aty yụꞌtacsi in muꞌinsiꞌtum jedyeꞌ in. 12Meꞌdyes qui muꞌin jam tupuj sóñiꞌyi in runꞌquenꞌ chucsi muꞌin fạ́cacsity in. Muꞌin murujrutacsi in judyeyaꞌ ĉaꞌjoyacsi in ĉaĉaij na mọꞌ jịꞌmotsacdyes dyijyedyeꞌ aty muꞌincheꞌ tŝọiꞌ. Jam raꞌ yụ penꞌdyetuyac junꞌ quiꞌ chuc jịꞌmotstiñeꞌ miꞌin mọꞌ jịꞌmotsacdyes mọꞌyaꞌ miꞌinĉansiꞌ.
13Tạij mi, jämꞌyụꞌtacseva muꞌin Israeltyiꞌ vóshiꞌ in. Jéyacsi raꞌ mi: "Jämꞌyụꞌtac miꞌin nojnodyes ĉaĉaij na meꞌ yi muꞌ Jenꞌ Ayoꞌ Israelĉantyiꞌ. Mọꞌyaꞌ jedyeꞌ yụ́dyes yụꞌtac miꞌinsiꞌtum jedyeꞌ. Jam raꞌ junꞌ tupuj sóñiꞌyi miꞌin runꞌquenꞌ chucsi muꞌin fáquinactyiꞌ in junꞌ quiꞌ chuc jiꞌnaijbanꞌ in", jéyacsi raꞌ mi —jajiti Ayoꞌ.
14Nojno pamꞌ muꞌin Israeltyiꞌ vóshiꞌ in voshiꞌvuntyiꞌyaꞌ ñuruꞌ in jiꞌcaviti raꞌ Ayoꞌyaꞌ in cuts ñuruꞌ ñuruꞌ jịjcaij in. Muꞌ raꞌ Ayoꞌ dyimꞌte yirity ñuruꞌtyityĉan yiriꞌtac päräꞌ jiyi ñuruꞌtyity Israeltyiꞌ vóshiꞌ in chat qui muꞌin dyimꞌtactyiꞌĉantyiꞌ ñuruꞌ in jiꞌcaviti raꞌ räj vóshiꞌvuntyiꞌ ñuruꞌ in muꞌin vịyaꞌtyiꞌ jenꞌtyiꞌ ñuruꞌtyity in. Muꞌ Ayoꞌ raꞌ dyimꞌte yirity vịyaꞌtyiꞌ jenꞌtyiꞌ ñuruꞌtyity chat qui muꞌin muꞌĉantyiꞌ ñuruꞌ jiꞌcaviti raꞌ räj vịyaꞌtyiꞌ ñuruꞌtyity muꞌin. Muꞌ Ayoꞌ raꞌ dyimꞌte yirity vịyaꞌtyiꞌ ñuruꞌtyity jịjcaij chat qui muꞌin muꞌĉantyiꞌ ñuruꞌtyity jiꞌcaviti raꞌ räj muꞌĉantyiꞌ sonꞌ in. 15Muꞌ raꞌ dạctintety mọꞌtumdye jedyeꞌ Jenꞌdyes yụꞌtacsiꞌ in, muꞌ raꞌ jiꞌcoꞌshayac tŝijyaꞌ räjtumdye jedyeꞌ muꞌsimꞌ. Muꞌ jam jịꞌcätsepte Ayoꞌsiꞌ yụꞌtacdyeꞌ muꞌ, ac̣hiꞌ jämꞌtaqui muꞌ Israelĉan —jajiti Josué muꞌ Ayoꞌ.
16Nojno pamꞌ tsạꞌi Josué chat qui fayacsi muꞌin ñuruꞌtyityĉantyiꞌ Israeltyiꞌ vóshiꞌ in. Muꞌ qui Judáĉantyiꞌ ñuruꞌtyity vóshiꞌ dyimꞌtac. 17Judátyiꞌ vóshiꞌ jiꞌtashac in chat jiꞌcaviti räj vịyaꞌtyiꞌ jenꞌtyiꞌ ñuruꞌtyity in chat qui Zeratyiꞌ ñuruꞌtyity dyimꞌtac. Zeratyiꞌ ñuruꞌtyity jiꞌtashac in chat jiꞌcaviti räj vịyaꞌtyidyes ñuruꞌtyity in judyeyaꞌ Zabdity ñuruꞌtyity dyimꞌtac. 18Josué jiꞌtashte Zabdity ñuruꞌtyity chat qui cäts yirityityij sonꞌ in jiꞌcaviti in judyeyaꞌ dyimꞌte Acán in, ạvaꞌ Carmity, vịyaꞌ Zabdity, vóshiꞌ Zeraty, vóshiꞌ Judáty muꞌ.
19Josué jajiti Acán:
—Ạvaꞌ yụ, timaꞌqueme Jenꞌ muꞌ Ayoꞌ Israelĉantyiꞌ in judyeyaꞌ ạ̈räjjeme. Jítiꞌ ramꞌ junꞌ chuc jämꞌtaquis mi, jam raꞌ mọꞌ jijmuꞌsem —jéte Josué.
20Vorjete Acán:
—Anicdye meꞌ, yụ juchaj soꞌmete Jenꞌ, muꞌ Ayoꞌ Israelĉantyiꞌ. Meꞌ jämꞌtaqui yụ: 21Yụ cạvete yirity jämꞌtyiꞌ coftyity Babiloniavety, päräꞌ quiro choc plata judyeyaꞌ yirity oro, jeñej choc quiro javquedyeꞌ muꞌ, mọꞌinĉan yocsiꞌ bäꞌyedyeꞌĉansiꞌ jedyeꞌ in. Cạvacdyeꞌyaꞌ in yụ fer mạꞌjeyacsi chat jecacsi yụ. Mọꞌin aty jacĉan yụꞌtacsi yụ, mọꞌ vocoꞌnacdyesĉan acaꞌ yụ. Mọꞌ plata ọ́ĉan buꞌyiꞌ —jéte Acán.
22Chat Josué jutacsi muntyiꞌ in, muꞌin qui p̂iqui Acánsiꞌyaꞌ vocoꞌnacdyesyaꞌ acaꞌ muꞌ chat muꞌyaꞌ jịjcaij in dạcacsi in jijmuꞌsacsiꞌ in judyeyaꞌ mọꞌ plata ọ́ĉan buꞌyiꞌ. 23Muꞌin jecacsi mọꞌin jedyeꞌ in acaꞌĉansiꞌ vocoꞌnacdyes judyeyaꞌ tucsi yóyaꞌdyemꞌ Josué u judyeyaꞌ räj muꞌin Israeltyiꞌ vóshiꞌ in chat qui muꞌin chapjeyacsi in Ayosyaꞌ vej muꞌ.
24Chat qui Josué räjtumdye Israeltyiꞌtum vóshiꞌ in cạte in Acán, Zeratyiꞌ vóshiꞌ muꞌ, mọꞌintumdye jedyeꞌ in mọꞌ plata, muꞌ coftyity, muꞌ oro, muꞌin ạvaꞌ sonꞌ muꞌ judyeyaꞌ mọꞌin ạvaꞌ p̂en muꞌ, vaca muꞌ, bórico muꞌ, oveca muꞌ, muꞌsiꞌ vocoꞌnacdyes acaꞌ judyeyaꞌ räj muꞌsiꞌ, muꞌin räj cạcsi yóyaꞌdyemꞌ mọꞌ jac "mojij Acor" tịj mọꞌ.
25Josué jajiti:
—¿Junꞌ buty ọij carijsis tuyitiĉamꞌ tsun? Q̂uinꞌ muꞌ Ayoꞌ tuyin mi carijsis —jéte Josué. Chat qui muꞌin Israeltyiꞌ vóshiꞌ in ijate Acán in farajñete mijyaꞌ in. Jäquiꞌve qui ujacsi muꞌin yoctyiꞌ in chifarajnacsidye mijyaꞌ in muꞌin qui jiꞌcoꞌshayacsi in. 26Acáncheꞌ dụriꞌñete mij in. Yiris därsiꞌ dụriꞌ shupquiꞌ judyeyaꞌ q̂uinꞌ tacaꞌ mọꞌyaꞌ mọꞌ duiꞌris. Chat qui muꞌ Ayoꞌ camanꞌjeyaĉan dyijyedyeꞌ muꞌ, jam muꞌ yejĉoij fạ́cacsi muꞌin Israeltyiꞌ vóshiꞌ in. Meꞌdyes qui mọꞌ mojij tacaꞌ yejĉoiꞌ "Acor" tịj ọij jacsiꞌ q̂uinꞌ.
Currently Selected:
Josué 7: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
