Josué 6
6
1Mọꞌ bäꞌyedyeꞌ Jericó anic ĉäꞌräiꞌ. Räj ĉärꞌjeyac sisdyeꞌ bäꞌyedyes mọꞌ ĉaĉaij na muꞌyaꞌ jorojyaꞌ muꞌin Israeltyiꞌ vóshiꞌ in. Itŝij tyi siteꞌ Jericó judyeyaꞌ itŝij tyi shupqui. 2Chat qui muꞌ Ayoꞌ jajiti Josué:
—¡Cạvevamꞌ! Yụ aty soꞌmeye unĉan mi mọꞌ bäꞌyedyeꞌ Jericó judyeyaꞌ ayoꞌ mọꞌ judyeyaꞌ muꞌin ferdyeꞌtumtyiꞌ muꞌĉantyiꞌ in. 3Mi raꞌ sondarotum yiriꞌ quiꞌ raꞌ cọijti miꞌin mọꞌ bäꞌyedyeꞌ yirisĉan mạyedyeꞌ. Meꞌ raꞌ jịjcaij miꞌin jäbän mạyedyeꞌ. 4Yävätidyeꞌ cudyitity Jenꞌcheꞌ in cạiꞌ raꞌ tujtaquis in jämꞌtacsiꞌ chivos dáshu. Muꞌin raꞌ tashi miꞌi in chat jäquiꞌ raꞌ mọꞌ cajón yụꞌtacdyeꞌtumsiꞌ. Mọꞌĉan mọꞌ yävätidyeꞌyisĉan raꞌ mạyedyeꞌ, yävätidyeꞌ quiꞌ raꞌ cọijti miꞌin mọꞌ bäꞌyedyeꞌ. Muꞌin na cudyitity Jenꞌcheꞌ in cọijtiyaꞌ in tujyi tujyi raꞌ jịjcaij miꞌi in. 5Aty seꞌvacsiyamꞌ mọꞌ moc̣has tujquedyeꞌ chat qui raꞌ jéyacsi mi muntyiꞌ in paj qui fer äjyi in. Chat qui mọꞌ bäꞌyedyes naꞌru raꞌ ĉụiꞌ ọꞌchaiꞌ judyeyaꞌ cäts yirityityij sonꞌ in chụiꞌ raꞌ siteꞌ in mọꞌ bäꞌyedyeꞌ —Ayoꞌ jajiti Josué.
6Muꞌ Josué fayacsi muꞌin cudyitity Jenꞌcheꞌ jéyacsi:
—Cheꞌjevac mọꞌ cajón yụꞌtacdyeꞌtumsiꞌ Ayoꞌsiꞌ muꞌ judyeyaꞌ tashcheꞌ raꞌ jịjcaij muꞌin yävätidyeꞌ cudyitity Jenꞌcheꞌ in dáshutumtyiꞌ in —jéyacsi Josué. 7Chat qui muꞌ Josué jéyacsi muntyiꞌ in:
—Miꞌevac miꞌin, yiriꞌ quiꞌ raꞌ cọijti miꞌin mọꞌ bäꞌyedyeꞌ judyeyaꞌ muꞌin sondaro yụꞌtactyiꞌ in tashcheꞌ raꞌ miꞌi in, jäquiꞌve raꞌ mọꞌ cajón yụꞌtacdyeꞌtumsiꞌ Ayos muꞌ —jéyacsi Josué.
8Aty jéyacsiyaꞌ in muꞌ Josué, muꞌin yävätidyeꞌ cudyitity Jenꞌcheꞌ in cạiꞌtyiꞌ mọꞌin yävätidyeꞌ dáshu in Ayosyaꞌ vej muꞌin tiyacchuti miꞌi in. Tujyi tujyi jịjcaij in judyeyaꞌ mọꞌ cajón yụꞌtacdyeꞌtumsiꞌ Ayos mọꞌ jäꞌquiꞌ. 9Pạrej sondaro tashcheꞌ jịjcaij in muꞌin cudyitity Jenꞌcheꞌ in dáshu tujjety in judyeyaꞌ pạrej sondaro jäꞌquiꞌ cäc̣häꞌchuiꞌ in mọꞌ cajón yụꞌtacdyeꞌtumsiꞌ. Muꞌin cudyitity Jenꞌcheꞌ tujyi miꞌedyeꞌĉan in. 10Muꞌ Josué aty jéyacsi muntyiꞌ in:
—Jam raꞌ äjyi miꞌin jeñej chutity raꞌ in, mijam raꞌ p̂eyaqui miꞌin. Chuꞌchuij raꞌ miꞌi miꞌin junꞌ quiꞌ chuc yụ jéyac paj qui äjyi miꞌin. Chat q̂uinꞌdyemꞌ raꞌ fer äjyi miꞌin —jéyacsi Josué. 11Muꞌ jéyacsi paj qui yiriꞌ quiꞌ cọijti in mọꞌ bäꞌyedyeꞌ mọꞌtum cajón yụꞌtacdyeꞌtumsiꞌ Ayos muꞌ, chat qui räj muꞌin caꞌñibun dyäquedyeꞌyaꞌ jijtuban in, taĉan buꞌban in.
12Nojno mạyedyeꞌ pamꞌ vañinyi muꞌ Josué. Muꞌin na cudyitity Jenꞌcheꞌ cheꞌjeꞌ in mọꞌ cajón yụꞌtacdyeꞌtumsiꞌ. 13Muꞌin yävätidyeꞌ cudyitity Jenꞌcheꞌ in dáshutumtyiꞌ in miꞌi in tashcheꞌ mọꞌ cajón yụꞌtacdyeꞌtumsiꞌ. Tujyi tujyi jịjcaij in. Muꞌin sondaro in pạrej muꞌin tashcheꞌ jịjcaij mọꞌ cajón yụꞌtacdyeꞌtumsiꞌ judyeyaꞌ pạrej muꞌin jäꞌquiꞌ mọꞌ jịjcaiꞌ in. Muꞌin cudyitity Jenꞌcheꞌ in tujyi tujyi jịjcaij miꞌi in. 14Mọꞌĉan päräꞌyisĉan mạyedyeꞌ muꞌin yiriꞌ quiꞌ cọijti mọꞌ bäꞌyedyeꞌ. Chat qui cọijti in mọꞌ bäꞌyedyeꞌ yódyemꞌ cọijti jiquej u in mọꞌin jäbän mạyedyeꞌ meꞌdyij jịjcaij in.
15Mọꞌ yävätidyeꞌyis mạyedyeꞌ muꞌin pamꞌ nạijjoiꞌ in. Chat qui cọijti in mọꞌ bäꞌyedyeꞌ yódyemꞌ cọijti jiquej u in paj tsanꞌ meꞌ muꞌin yävätidyeꞌ quiꞌ cọijti in. 16Mọꞌĉan yävätidyeꞌyis cọijtidyeꞌ muꞌin cudyitity Jenꞌcheꞌ in moc̣haꞌ tujyi in judyeyaꞌ Josué jéyacsi:
—Ajyevac miꞌin, muꞌ Ayoꞌ aty soꞌminac ọij bäꞌyedyeꞌ. 17Mọꞌ bäꞌyedyeꞌ judyeyaꞌ räj mọꞌĉansiꞌ jedyeꞌ Ayodyes shupquiꞌ. Mọꞌ na Rahab, mọꞌ meꞌtaquis p̂en, judyeyaꞌ acaꞌĉantyiꞌ mọꞌ, muꞌin mọmoꞌ raꞌ c̣hoñiꞌ in ĉaĉaij na mọꞌ jijmuꞌsacsiꞌ muꞌin cạvequety jac jutactyiꞌ tsun.
18Ĉujcatac, jam raꞌ ĉụiꞌdyestutiñeꞌ mọꞌin yaꞌiꞌsiꞌ jedyeꞌ in bäꞌyedyeꞌĉansiꞌ in, mọꞌin aty Jenꞌdyes yụꞌtac in. Muꞌ Jenꞌ aty dyijyi paj qui jịꞌmotseꞌ mọꞌ bäꞌyedyeꞌ. Ĉụiꞌdyestutiñeꞌ jụijyaꞌ miꞌin, mọꞌ raꞌ jịꞌmotsacdyes dyijyedyeꞌ Jenꞌsiꞌ muꞌ miꞌincheꞌ raꞌ tŝọiꞌ judyeyaꞌ carijsisĉan raꞌ yụꞌtacsi miꞌin räj dyäquedyeꞌyaty Israeltyiꞌ vóshiꞌ in. 19Räj oro jedyeꞌ in, judyeyaꞌ plata, judyeyaꞌ bronce, judyeyaꞌ fiyero Jenꞌdyes in. Jemoñeꞌ pạrej yụꞌtacsi mọꞌin yóĉandyemꞌ Jenꞌsiꞌ jedyeꞌ yụꞌtacĉan o —jéyacsi Josué.
20Aty tujyiyaꞌ dáshu in, muꞌin muntyiꞌ äjyi in. Chat q̂uinꞌdyemꞌ tujyiyaꞌ dáshu judyeyaꞌ äjyiyaꞌ muntyiꞌ mọꞌ na bäꞌyedyes naꞌru mọꞌ jọꞌchaiꞌ chat qui cäts yirityityij chụiꞌ p̂iqui siteꞌ in mọꞌ bäꞌyedyeꞌ. 21Mọꞌ bäꞌyedyeꞌ aty yụꞌtac Jenꞌdyes. Chat qui muꞌin ujacsi chutidyesyaꞌ coc̣hino räj bäꞌyedyeꞌĉantyiꞌ in, sonꞌ in judyeyaꞌ p̂en in, miquiꞌmuntyiꞌ in judyeyaꞌ ishoꞌ muntyiꞌ in, vaca, oveca judyeyaꞌ bórico in.
22Muꞌ Josué jéyacsi muꞌin päräꞌ cạvequety jac jiquej in:
—Sisbivac acaꞌ mọꞌ meꞌtaquissiꞌ p̂en. Jecacsevac räj mọꞌtumtyiꞌ in paj qui jịꞌcätsac mọꞌ tsäquiꞌyis p̂eyacdyeꞌ soꞌmetiñes jiquej —jéyacsi Josué.
23Chat qui muꞌin päräꞌ rijtety, muꞌin cạvequety jac jiquej in, jequeꞌ Rahab in judyeyaꞌ jenꞌ mọꞌ, tseꞌ mọꞌ, vojity mọꞌ judyeyaꞌ räj mọꞌtyiꞌ chätidyeꞌ in. Muꞌin räj jiꞌdyäcacsi in jorojyaꞌ mọꞌ dyäquedyeꞌ muꞌinsiꞌ Israeltyiꞌ vóshiꞌ in.
24Chat qui muꞌin jiꞌcoꞌshayeꞌ mọꞌ bäꞌyedyeꞌ räj mọꞌĉansiꞌ jedyeꞌ. Muꞌ oro, plata, bronce judyeyaꞌ fiyero muꞌin pạrej yụꞌtacsi Jenꞌdyes. 25Muꞌ Josué jam ujaiꞌ mọꞌ Rahab, mọꞌ meꞌtaquis p̂en, judyeyaꞌ chätidyeꞌ mọꞌ räjtumdye in ĉaĉaij na mọꞌ jijmuꞌsacsiꞌ muꞌin jutactyiꞌ Josuéyaꞌ jiquej in, muꞌin cạvequety jac Jericó in. Meꞌdyes qui mọꞌ taĉan bäꞌyiꞌ muꞌintum Israeltyiꞌtum vóshiꞌ q̂uinꞌ.
26Ọijĉan tupudyeꞌ jiquej muꞌ Josué jéyacsi ọij tsäquiꞌyis p̂eyacdyeꞌ:
—Paj vaꞌtacdyeꞌĉan buꞌyi Ayosyaꞌ vej tyi chuc jämꞌbanꞌtyiꞌ ọij bäꞌyedyeꞌ paj qui mọꞌyaꞌ jubanꞌ. Yụꞌtacsi jụijyaꞌ yirity muntyiꞌ muꞌin mujuꞌchaty mij bäꞌyedyedyes, muꞌ raꞌ yaꞌiꞌtyeꞌ tashchetyyaꞌ ạvaꞌ muꞌ. Yụꞌtacsi jụijyaꞌ mọꞌin chụiꞌdyeꞌ bäꞌyedyes mọꞌ, muꞌ raꞌ yaꞌiꞌtyeꞌ jäquityyaꞌ ạvaꞌ muꞌ —jéyacsi Josué.
27Muꞌ Ayoꞌ Josuétum jiquej judyeyaꞌ muntyiꞌ in paiꞌ bäꞌyity in seꞌveꞌ in junꞌ chuc jämꞌtaqui äjyedyeꞌ muꞌ Josué.
Currently Selected:
Josué 6: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
