Josué 18
18
Jiꞌchetacdyeꞌ jac yoctyidyes in
1Räj muꞌin Israeltyiꞌ vóshiꞌ in vajmuꞌyaij in Siloyaꞌ. Mọꞌyaꞌdye muꞌin yụꞌtyeꞌ Jenꞌsiꞌ acaꞌ muꞌ tinates. Aty yụꞌtac mọꞌ jac muꞌinsiꞌĉan ĉọjcacdyeꞌ Israeltyidyes vóshiꞌ in. 2Muꞌyaꞌ tacaꞌ yävätidyeꞌ ñuruꞌtyity in jambiꞌ soꞌmac jac in.
3Meꞌdyes qui muꞌ Josué cọdacsi muꞌin Israeltyiꞌ vóshiꞌ in:
—¿Junꞌtum tupudyeꞌ bisaqui raꞌ miꞌin junꞌ quiꞌ chuc ĉụiꞌdyestutiñeꞌ mọꞌ jac soꞌminacsiꞌ Ayoꞌ, muꞌ Jenꞌ vóshiꞌvuntyiꞌ miꞌin? 4Cäts ñuruꞌtyity in yụꞌtacsi ram chibin muntyiꞌ ĉụiꞌtyiꞌĉan ñuruꞌtyity in. Yụ raꞌ jutacsi paj qui cạvequeꞌ jac in judyeyaꞌ raꞌ sáñeꞌ in junꞌ buꞌyiꞌ chuc mọꞌin jiꞌchetacdyeꞌ jacsiꞌ in chat qui muꞌin raꞌ caꞌñibun yụ́yaꞌ in. 5Miꞌin raꞌ jiꞌchetetiñeꞌ mọꞌ jac yävätidyeꞌĉan jiꞌchetacdyeꞌ in. Judá raꞌ taĉan ĉụiꞌsiꞌĉan jac jätisves muꞌin judyeyaꞌ Josétyiꞌ in taĉan raꞌ ĉụiꞌsiꞌĉan jac muꞌin rocves. 6Aty meꞌchutiñeꞌyaꞌ miꞌin mọꞌin sánacdyeꞌ in, mọꞌin p̂eyeꞌsiꞌ in junꞌ buꞌyiꞌ chuc mọꞌin yävätidyeꞌ jiꞌchetacdyeꞌ in, tuvac yụ́yaꞌ. Chat qui raꞌ yụ vaꞌquequeꞌ mọꞌ majmadyeꞌ chị́yacdyes Jenꞌsiꞌyaꞌ vej, Ayoꞌ tsun. Meꞌ raꞌ chịj miꞌin jụꞌñis chuc jiꞌchetacdyeꞌ ĉụiꞌdyes shupquiꞌ miꞌin.
7Muꞌin Levíty vóshiꞌ in jam raꞌ soꞌmac in yiris jiꞌchetacdyeꞌ jacsiꞌ ĉaĉaij na mọꞌ carijtacdyeꞌ Ayodyes shupquiꞌ muꞌinsiꞌ bijodyeꞌ. Muꞌin Gadtyiꞌ vóshiꞌ in, muꞌin Rubéntyiꞌ vóshiꞌ in judyeyaꞌ muꞌin choc ñuruꞌtyity Manaséstyiꞌ vóshiꞌ in aty soꞌmac in muꞌinsiꞌ jac shupquive tsun Jordánves. Muꞌ Moisés, Ayoꞌtyiꞌ úñity muꞌ, soꞌmacsi mọꞌ jac jiquej —jéyacsi Josué.
8Aty raꞌ shupqui muꞌin yụꞌtactyiꞌ muntyiꞌ in paj qui sáñeꞌ in junꞌ buꞌyiꞌ chuc mọꞌ jac, muꞌ Josué jéyacsi:
—Tạij miꞌin, cạvecvac mọꞌ jac judyeyaꞌ sáñevac junꞌ buꞌyiꞌ chuc mọꞌ. Aty caꞌñibunyaꞌ miꞌin yụ́yaꞌ chat qui raꞌ yụ vaꞌquequeꞌ mọꞌ majmadyeꞌ chị́yacdyes miꞌindyes Ayosyaꞌ vej, ọ́yaꞌ Siloyaꞌ —jéyacsi Josué. 9Sacti muꞌin muntyiꞌ in judyeyaꞌ jämꞌ cạveꞌ in mọꞌ jac. Sáñeꞌ in junꞌ buꞌyiꞌ chuc mọꞌ jac yirischeꞌ comoꞌnacsiꞌ sánacdyeꞌ. Räj mọꞌin bäꞌyedyeꞌ in yụꞌtacsi in yävätidyeꞌĉan jiꞌchetacdyeꞌ in. Chat qui muꞌin caꞌñibun Josuéyaꞌ yóyaꞌdyemꞌ dyäquedyeꞌ Siloyaꞌ. 10Chat qui Siloyaꞌ muꞌ Josué vaꞌquequeꞌ mọꞌ majmadyeꞌ chị́yacdyes muꞌindyes in Ayosyaꞌ vej muꞌ. Muꞌyaꞌ muꞌ Josué jiꞌcheteꞌ mọꞌ jac muꞌindyes ñuruꞌtyity in Israeltyiꞌ vóshiꞌ in.
11Mọꞌ tashches majmadyeꞌ chị́yacdyes tŝọcsiꞌ Benjamíntyiꞌ vóshiꞌ in. Chat meꞌsiꞌ soꞌmacsi in mọꞌ jiꞌchetacdyeꞌ jacsiꞌ ĉụiꞌdyes muꞌin. Muꞌinsiꞌ jac dyeteꞌĉan buꞌyiꞌ muꞌinsiꞌ jac in Judátyiꞌ vóshiꞌ in judyeyaꞌ Joséty vóshiꞌ in.
12Mọꞌ rocves feiꞌtacdyeꞌ jacsiꞌ tiyacchutiꞌ Jordányaꞌ chat jiyaꞌ mọꞌ rocves chạdyeꞌyaꞌ Jericó chat jịjcaijcheꞌ tsun jịjcaiꞌ mụcuꞌveyaꞌ shupquiꞌyaꞌ mọꞌ cäjyasĉan jac Bet-avén. 13Chat qui mọꞌ feiꞌtacdyeꞌ nopej jịjcaiꞌ jätisves chạdyeꞌ Luzyaꞌ (yocsiꞌ tịj mọꞌ Betel) chat meij jịjcaiꞌ chạiꞌ Atarot-adaryaꞌ meꞌdye muꞌ mụcuꞌ jätisvety mọꞌ Bet-horón Ọ́ĉansiꞌ.
14Muꞌyaꞌ mụcuꞌyaꞌ muꞌ jätisvety quic̣henꞌ buꞌyity Bet-horónyaꞌ mọꞌ feiꞌtacdyeꞌ jätisve jịjcaiꞌ yóyaꞌdyemꞌ jadyic muꞌinsiꞌ jac jịjcaijcheꞌ tsun o. Chat qui shupquiꞌ Quiriat-baalyaꞌ (yocsiꞌ tịj mọꞌ Quiriat-jearim) mọꞌ bäꞌyedyeꞌ muꞌinsiꞌ Judátyiꞌ vóshiꞌ in. Meꞌ buꞌyiꞌ mọꞌ feiꞌtacdyeꞌ jac jịjcaijcheꞌ buꞌyiꞌ tsun.
15Mọꞌ jätisves feiꞌtacdyeꞌ tiyacchutiꞌ fajve Quiriat-jearim jịjcaijcheꞌ tsun, chat jịjcaiꞌ muꞌve muꞌ jijmoꞌmoj Neftoayaꞌ. 16Chat chạiꞌ mọꞌ feiꞌtacdyeꞌ yóyaꞌdyemꞌ tiyacchutiꞌ muꞌ mụcuꞌ quic̣henꞌ buꞌyity mọꞌ mojij Ben-hinom judyeyaꞌ rocve buꞌyiꞌ mọꞌ mojij Refaim. Chat yejĉoiꞌ chạiꞌ mọꞌ mojij Hinom jätisve chạdyeꞌyaꞌ mọꞌ bäꞌyedyeꞌ jebuseos meꞌdye En-rogel. 17Chat mọꞌ feiꞌtacdyeꞌ cọijyequiꞌ En-semesyaꞌ jiyiꞌ meꞌdye Gelilot, mọꞌ quic̣henꞌ buꞌyis bäꞌyedyeꞌ mọꞌ mụcuꞌves baquitsmuñiꞌ Adumín. Chat mọꞌ feiꞌtacdyeꞌ chạiꞌ muꞌyaꞌ muꞌ mij Bohántyiꞌ, Rubéntyiꞌ ạvaꞌ muꞌ. 18Chat meij jịjcaiꞌ rocvesyaꞌ chạdyeꞌ Arabáyaꞌ yejĉoiꞌ chạiꞌ mọꞌ Arabáĉan. 19Chat jiyiꞌ mọꞌ feiꞌtacdyeꞌ rocvesyaꞌ chạdyeꞌ Bet-hogla meꞌdye mọꞌ rocves tsiqueꞌ mọꞌsiꞌ Mar Säñis jadyicve muꞌ cojiro Jordán. Meꞌ buꞌyiꞌ mọꞌ feiꞌtacdyeꞌ jätisves jacsiꞌ mọꞌ.
20Muꞌ cojiro Jordán shupqui mọꞌ feiꞌtacdyeꞌ jacsiꞌ shupquive buꞌyi tsun.
Mọꞌĉan mọꞌin feiꞌtacdyeꞌ in shupquiꞌ mọꞌ jac muꞌindyes ñuruꞌtyity in Benjamíntyiꞌ vóshiꞌ in.
21Muꞌin ñuruꞌtyity Benjamíntyiꞌ vóshiꞌ in meꞌchucsi ọij bäꞌyedyeꞌ in:
Jericó, Bet-hogla, mọꞌ mojij Casis, 22Bet-arabá, Zemaraim, Betel, 23Avim, Pará, Ofra, 24Queref-haamoni, Ofni judyeyaꞌ Geba. Yiriꞌtac päräꞌ jiyiꞌ bäꞌyedyeꞌ in judyeyaꞌ mọꞌĉansiꞌ jac in. 25Gabaón, Ramá, Beerot, 26Mizpa, Cafira, Mozah, 27Requem, Irpeel, Tarala, 28Zela, Elef, Jebús (yocsiꞌ tịj mọꞌ Jerusalén), Gabaa judyeyaꞌ Quiriat. Yiriꞌtac vạjpedyeꞌ jiyiꞌ bäꞌyedyeꞌ in judyeyaꞌ mọꞌĉan jac in.
Ọij mọꞌ jac soꞌmacsis muꞌin ñuruꞌtyity in Benjamíntyiꞌ vóshiꞌ in.
Currently Selected:
Josué 18: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
