Josué 17
17
1Chị́yacdyesyaꞌ majmadyeꞌ muꞌin soꞌmacsi ọij jiꞌchetacdyeꞌ jacsiꞌ muꞌindyes in ñuruꞌtyity Manaséstyiꞌ vóshiꞌ in, muꞌ Manasés Joséty tashchety ạvaꞌ, Manaséstyiꞌ tashchety ạvaꞌ Maquir judyeyaꞌ muꞌtyiꞌ ạvaꞌ Galaad. Muꞌin Galaadtyiꞌ vóshiꞌ in aty soꞌmac mọꞌ jac Galaad judyeyaꞌ Basán ĉaĉaij na muꞌin mujuꞌchaty sondaro in. 2Meꞌdyes qui ọij p̂eyeꞌ mọꞌ jac soꞌmacsis muꞌin yoctyiꞌ Manaséstyiꞌ vóshiꞌ in. Muꞌin ñuruꞌtyity in: Abiezertyiꞌ vóshiꞌ in, judyeyaꞌ Helectyiꞌ vóshiꞌ in, judyeyaꞌ Asrieltyiꞌ vóshiꞌ in, judyeyaꞌ Siquemtyiꞌ vóshiꞌ in. judyeyaꞌ Hefertyiꞌ vóshiꞌ in, judyeyaꞌ Semidaty vóshiꞌ in. Muꞌin shupqui muꞌin yoctyiꞌ ñuruꞌtyity Manaséstyiꞌ vóshiꞌ in, muꞌ Manasés Josétyiꞌ ạvaꞌ muꞌ.
3Muꞌ Zelofehad ạvaꞌ Hefertyiꞌ, muꞌ Hefer ạvaꞌ muꞌ Galaadtyiꞌ, muꞌ Galaad ạvaꞌ muꞌ Maquirtyiꞌ, muꞌ Maquir ạvaꞌ Manaséstyiꞌ. Muꞌ na Zelofehad itŝij muꞌyaꞌ sonꞌ ạvaꞌ muꞌ, p̂en mọmoꞌ in. Tịj mọꞌin in: Maala, Noa, Hogla, Milca judyeyaꞌ Tirsa. 4Chat qui mọꞌin ĉọcte in Eleazar muꞌ cudyitity Jenꞌcheꞌ, judyeyaꞌ Josué Nuntyiꞌ ạvaꞌ muꞌ judyeyaꞌ muꞌin tashcheꞌ buꞌyity in. Mọꞌin qui jéyacsi in:
—Muꞌ Ayoꞌ jajiti Moisés jiquej paj qui tsunmun soꞌmac jac chätidyeꞌtum tsun —jéyacsiꞌ in.
Chat qui muꞌ Josué soꞌmacsi jac jenꞌtyiꞌtum vojity mọꞌin, jịꞌcätsacdyeꞌyaꞌ Ayos yụꞌtacdyeꞌ jiquej. 5Meꞌdyes qui mọꞌ jac muꞌindyes in Manaséstyiꞌ vóshiꞌ in shupquiꞌ yiriꞌtac jiꞌchetacdyes in judyeyaꞌ mọꞌ jac Galaad judyeyaꞌ Basán nopej Jordán shupquive tsun. 6Meꞌ shupquiꞌ ĉaĉaij na mọꞌin p̂en Manaséssiꞌ vóshiꞌ in soꞌmac jac muꞌintum sonꞌ Manaséstyiꞌ vóshiꞌ in. Mọꞌ na jac Galaad muꞌindyes in yoctyiꞌ Manaséstyiꞌ vóshiꞌ in.
7Mọꞌ jac Manaséssiꞌ tiyacchutiꞌ Aseryaꞌ chat qui mọꞌ feiꞌtacdyeꞌ jịjcaiꞌ Micmetatyaꞌ, mọꞌ bäꞌyedyeꞌ quic̣henꞌ buꞌyis Siquem. Chat qui meij jịjcaiꞌ jätisve meꞌdye muꞌin Tapúayaꞌ bäꞌyity in. 8Mọꞌ jac Tapúasiꞌ shupquiꞌ Manaséssiꞌ mọꞌ. Mọꞌ bäꞌyedyeꞌ Tapúa shupquiꞌ muꞌinsiꞌ Efraíntyiꞌ vóshiꞌ in. 9Chat qui mọꞌ feiꞌtacdyeꞌ yejĉoiꞌ jätisve meꞌdye mọꞌ jinac Caná. Mọꞌyaꞌ pạrej bäꞌyedyeꞌ Efraínsiꞌ in mọꞌinĉan bäꞌyedyeꞌ Manaséssiꞌĉan in, paj tsanꞌ meꞌ mọꞌ feiꞌtacdyeꞌ Manaséssiꞌ rocve buꞌyiꞌ mọꞌ jinac meꞌdye mọꞌ Mar Mediterraneo. 10Mọꞌ jac jätisves mọꞌ jinac Efraínsiꞌ mọꞌ judyeyaꞌ mọꞌ jac rocves mọꞌ jinac Manaséssiꞌ mọꞌ. Mọꞌ jac Manaséssiꞌ yejĉoiꞌ Mar Mediterraneoyaꞌ buꞌyiꞌ, rocve mọꞌyaꞌ mọꞌ jac Asersiꞌ judyeyaꞌ shupquive tsun mọꞌyaꞌ mọꞌ jac Isacarsiꞌ.
11Manasés chimeꞌ meꞌchucsi bäꞌyedyeꞌ in muꞌinsiꞌĉan jac Asersiꞌĉan judyeyaꞌ Isacarsiꞌ: Bet-seán , Ibleam, Dor, Endor, Taanac judyeyaꞌ Meguido räj mọꞌin c̣hẹiꞌyas bäꞌyedyeꞌ in. Mọꞌin chibin mụcuꞌches in.
12Muꞌin Manaséstyiꞌ vóshiꞌ in jam tsanꞌ tupuj ĉụiꞌdyestucsi mọꞌin bäꞌyedyeꞌ in ĉaĉaij na muꞌin cananeo in taĉan muꞌĉan bäꞌyi in. 13Paj tsanꞌ meꞌ aty feryi muꞌin Israeltyiꞌ vóshiꞌ in, muꞌin jiꞌunacsi muꞌin cananeo in, jam qui namꞌ jiꞌshupcacsi in.
14Muꞌin Josétyiꞌ vóshiꞌ in cọdyete Josué in:
—¿Junꞌ buty mi yiris mọmoꞌ jiꞌchetacdyeꞌ jac soꞌmitiĉas tsun? Anic daiꞌ muꞌyaꞌ tsun ĉaĉaij na muꞌ Ayoꞌ aty meꞌ ñútyisinꞌ —jéte in.
15Josué jéyacsi:
—Meꞌ jụijyaꞌ daiꞌ muꞌyaꞌ miꞌin judyeyaꞌ mọꞌ mụcuꞌves jac Efraínsiꞌ miquis shupquiꞌ miꞌindyes, chat qui däräꞌve jịjcavac miꞌin, pavac son miꞌin judyeyaꞌ ĉụiꞌdyestuvac mọꞌ jac muꞌinsiꞌ ferezeos in judyeyaꞌ refaítas in —jéyacsi Josué.
16Muꞌin Joséty vóshiꞌ vorjete in:
—Mọꞌ mụcuꞌves jac jam tupuj tsundyes judyeyaꞌ muꞌin cananeo mojijĉan bäꞌyity in meꞌchucsi chutidyes careto fiyerotumsiꞌ in. Meꞌchucsi in, muꞌin Bet-seánĉan bäꞌyity in judyeyaꞌ mọꞌin c̣hẹiꞌyasĉan bäꞌyedyeꞌ bäꞌyity in judyeyaꞌ muꞌin bäꞌyity mọꞌĉan mojij Jezreel —jéte in.
17Muꞌ Josué vorjeyacsi muꞌin Joséty vóshiꞌ in, muꞌin Efraíntyiꞌ vóshiꞌ in judyeyaꞌ Manaséstyiꞌ vóshiꞌ in:
—Anic daiꞌ muꞌyaꞌ miꞌin judyeyaꞌ ferdyeꞌtumtyiꞌ miꞌin. Jam raꞌ yiris mọmoꞌ shupquiꞌ jac miꞌindyes. 18Räj raꞌ mọꞌ däräꞌves jac shupquiꞌ miꞌinsiꞌ chimeꞌ. Nayejjevac mọꞌ däräꞌ judyeyaꞌ miꞌin raꞌ mọꞌ ĉụiꞌdyestutiñeꞌ meꞌdye jadyicve mọꞌ däräꞌ. Paj tsanꞌ muꞌin cananeo in meꞌchucsi chutidyes careto fiyerotumsiꞌ in judyeyaꞌ paj tsanꞌ ferdyeꞌtumtyiꞌ in, miꞌin tupuj jiꞌshupcacsi —jéyacsi Josué.
Currently Selected:
Josué 17: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
