Josué 14
14
Jiꞌchetacdyeꞌ jacsiꞌ jịjcaijcheꞌ tsun Jordánve buꞌyiꞌ
1Ọij jiꞌjäqueꞌ mọꞌ jac Canaánĉansiꞌ soꞌmacsis muꞌin Israeltyidyes vóshiꞌ in. Muꞌin jiꞌcheteyacsity: muꞌ Eleazar (muꞌ cudyitity Jenꞌcheꞌ), muꞌ Josué Nuntyiꞌ ạvaꞌ judyeyaꞌ muꞌin tashcheꞌ buꞌyity Israeltyiꞌ vóshiꞌ in. 2Mọꞌ jac cäts yirityityijdyes in muꞌindyes arajtac choc ñuruꞌtyity in yụꞌtyeyacsi in mọꞌyaꞌdye mọꞌ majmadyeꞌ chị́yacdyes yoj jajitidyemꞌ Moisés Ayoꞌ jiquej u. 3Muꞌ Moisés aty soꞌmacsi jac muꞌin päräꞌ choc ñuruꞌtyity in mọꞌyaꞌ shupquive tsun Jordánves. Muꞌ jam soꞌmacsi jac muꞌin Levíty vóshiꞌ in muꞌinĉan in 4ĉaĉaij na muꞌin ạvaꞌ Joséty in aty päräꞌ ñuruꞌtyity shupqui in: Manasés judyeyaꞌ Efraín. Muꞌin na Levíty vóshiꞌ in jam soꞌmac jac in. Bäꞌyedyeꞌ mọmoꞌ soꞌmacsi in, damꞌ biruructumsiꞌ jac muꞌindyes in jiꞌsäcsacdyes oveca judyeyaꞌ vaca in. 5Meꞌsiꞌ muꞌin Israeltyiꞌ vóshiꞌ in jiꞌcheteꞌ mọꞌ jac, yoj jajitidyemꞌ Moisés Ayoꞌ jiquej u.
6Chat qui muꞌin Judátyiꞌ vóshiꞌ in Gilgalĉan c̣hẹiꞌyaꞌjete Josué in, judyeyaꞌ muꞌ Caleb, ạvaꞌ Jefonetyiꞌ judyeyaꞌ vóshiꞌ Ceneztyiꞌ, muꞌ jéte Josué:
—Mi chịj jätäjjajiti chuc yi muꞌ Ayoꞌ Moisés, Jenꞌtyiꞌ muntyiꞌ muꞌ, Cades-barneayaꞌ jiquej. Mọꞌ p̂eyacdyeꞌ jiꞌjäcsinꞌsiꞌ tsun, yụ judyeyaꞌ mi. 7Vạjpedyeꞌ quiꞌtacdyemꞌ yómodyeꞌ tyiti yụ jiquej yoquiꞌdyemꞌ muꞌ Moisés, Ayoꞌtyiꞌ úñity muꞌ, jutinyaꞌ yụ Cades-barneayaꞌ, cạvacdyeꞌyaꞌ mọꞌ jac. Judyeyaꞌ yụ jébajte anicsis p̂eyacdyeꞌ yojdyemꞌ rụij ĉúti u yụ. 8Paj tsanꞌ meꞌ muꞌin chätidyeꞌ penꞌdyetuntyiꞌ yụ in cạvacdyeꞌĉantyiꞌ in, muꞌin jäquijnacseban muntyiꞌ in paj qui ọyaꞌyaꞌjeꞌ ĉojtyiꞌĉansiꞌ ferdyeꞌ in. Yụ qui namꞌ jam meꞌ. Yụ cäc̣häꞌchute muꞌ Jenꞌ Ayoꞌ yụ räjtumdye ĉojtyiꞌ yụ. 9Meꞌdyes qui mọꞌĉandye mạyedyeꞌ muꞌ Moisés tsäquiꞌyis p̂eyacdyeꞌ soꞌmin yụ. Yi muꞌ: "Räj mọꞌ jac yútyes mi cạvacdyeꞌĉansiꞌ miꞌedyeꞌyam, mis raꞌ shupquiꞌ judyeyaꞌ ạvadyes mi räjĉandyes ĉaĉaij na mi aty cäc̣häꞌchute muꞌ Jenꞌ Ayoꞌ mi räjtumdye ĉojtyiꞌ mi", jin yụ Moisés jiquej.
10Q̂uinꞌ qui namꞌ yoj jindyemꞌ Ayoꞌ jiquej u yụ, muꞌ räjĉan ĉujcan yụ paj qui tsạꞌ buꞌyi q̂uinꞌ yụ. Aty vạjpedyeꞌ quiꞌtac ĉanamꞌ jiyi yómodyeꞌ jäquiꞌve qui Moisés meꞌ jin yụ, mọꞌ tupudyeꞌ yoquiꞌdyemꞌ muꞌin Israeltyiꞌ vóshiꞌ in cäjyasĉan jac miꞌeban in. Meꞌdyes qui muꞌyaꞌ yụ tacaꞌ q̂uinꞌ ọij mạyedyeꞌ q̂uenꞌĉan quiꞌtac ĉanamꞌ jiyi yómodyeꞌ tyitiꞌ yụ. 11Tacaꞌ ferdyeꞌtumtyiꞌ yụ yojdyemꞌ mọꞌ mạyedyeꞌ muꞌ Moisés jutinyaꞌ yụ jiquej. Mọꞌ ferdyeꞌ yụ paj qui chucsi muntyiꞌ in vaj cäts jeñejdye jiquej. 12Meꞌdyes qui soꞌmitim mọꞌ mụcuꞌves jac. Mọꞌdye jac soꞌminsiꞌ yụ Ayoꞌyaꞌ mọꞌĉandye mạyedyeꞌ jiquej. Mídye seꞌveꞌ jiquej mọꞌ p̂eyacdyeꞌ junꞌ chuc muꞌin anaceo muꞌyaꞌ bäꞌyi in judyeyaꞌ muꞌinsiꞌ bäꞌyedyeꞌ in anic därsiꞌ judyeyaꞌ naꞌrutumsiꞌ in. Paj tsanꞌ meꞌ muꞌ Ayoꞌ ñútyin yụ jụijyaꞌ, yụ raꞌ jiꞌshupcacsi yoj yidyemꞌ muꞌ jiquej u —Caleb jéte Josué.
13Chat qui Josué yụꞌtyeꞌ jämꞌsiꞌ p̂eyacdyeꞌ Calebdyes judyeyaꞌ soꞌmete Hebrón ĉụiꞌdyes jac muꞌ. 14Meꞌdyes qui mọꞌ jac Hebrón muꞌsiꞌ shupquiꞌ räjĉandyes, Caleb ạvaꞌ Jefonetyiꞌ judyeyaꞌ vóshiꞌ Ceneztyiꞌ. Meꞌ buꞌyiꞌ shupquiꞌ ĉaĉaij na muꞌ cäc̣häꞌchute muꞌ Jenꞌ Ayoꞌ Israelĉantyiꞌ räjtumdye ĉojtyiꞌ muꞌ. 15(Mọꞌ Hebrón yocsiꞌ mọꞌyaꞌ tịj bäꞌyedyes jiquej. Quiriat-arba tịj mọꞌ jiquej ĉaĉaij na muꞌ Arba muꞌ mujuꞌchaty jiquej muꞌinĉantyiꞌ anaceo in.)
Chat qui mọꞌyaꞌ jịꞌjutyitidyeꞌ jacsimꞌ, aty itŝiꞌ chutidyeꞌ mọꞌyaꞌ.
Currently Selected:
Josué 14: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
