Josué 11
11
Jiꞌpenac rocves bäꞌyedyeꞌ in
1Muꞌ Jabín ayoꞌ Hazorĉantyiꞌ seꞌveꞌ jedyeꞌ chuc aty jiyiꞌ, chat qui muꞌ juteyacsi p̂eyacdyeꞌ muꞌ Jobab ayoꞌ Madónĉantyiꞌ judyeyaꞌ muꞌ ayoꞌ Simrónĉantyiꞌ, judyeyaꞌ muꞌ ayoꞌ Acsafĉantyiꞌ, 2judyeyaꞌ muꞌinyaꞌ ayoꞌ rocvety in mụcuꞌve bäꞌyity in, judyeyaꞌ muꞌinyaꞌ ayoꞌ Arabáĉantyiꞌ in jätisve mọꞌ Galilea#11:2 Yocsiꞌ tịj mọꞌ Cineret, judyeyaꞌ muꞌinyaꞌ ayoꞌ jịjcaijcheꞌ tsun c̣hẹiꞌyaꞌ mụcuꞌ bäꞌyity in, judyeyaꞌ muꞌinyaꞌ ayoꞌ mọꞌcheꞌdye jac Dor in jịjcaijcheꞌ tsun buꞌyis in, 3judyeyaꞌ muꞌinyaꞌ cananeo in jịjcaijcheꞌ tsun bäꞌyity in judyeyaꞌ muꞌin shupquive tsun bäꞌyity in, judyeyaꞌ muꞌinyaꞌ amorreoyaꞌ in, judyeyaꞌ hititayaꞌ in, judyeyaꞌ fereseoyaꞌ in, judyeyaꞌ jebuseoyaꞌ mụcuꞌve bäꞌyity in, judyeyaꞌ heveoyaꞌ in muꞌin c̣hẹiꞌyaꞌ muꞌ mụcuꞌ Hermón bäꞌyity in Mizpayaꞌ.
4Chat qui shupqui muꞌin ayoꞌ in räj muꞌintumtyiꞌ sondaro in judyeyaꞌ daiꞌ mọꞌyaꞌ cavayo in judyeyaꞌ chutidyedyes careto in. Anic jiyiꞌ daiꞌ muꞌyaꞌ muꞌin jeñejti mọꞌ tsicdyeꞌ jámansiꞌ tsiquimꞌquedyeꞌve mar. 5Räj uts ayoꞌ muꞌve jịjcaij in ojñiꞌ Meromyaꞌ, muꞌyaꞌ dyäqui in judyeyaꞌ vajmuꞌyaij in paj qui chucsi muꞌin Israeltyiꞌ vóshiꞌ in.
6Muꞌ Jenꞌ jajiti Josué:
—Jam raꞌ quijnacsi mi. Ọijdye hora nojno yụ raꞌ soꞌmeyac miꞌin, muꞌinyaꞌ Israeltyiꞌyaꞌ vóshiꞌ in. Aty raꞌ ujac räj muꞌin. Chat qui mi raꞌ tätsjeyacsebi yujvety ñuctyiꞌ cavayoty muꞌin judyeyaꞌ raꞌ jiꞌcoꞌshayacsebi mi chutidyes careto muꞌinsiꞌ —jajiti Ayoꞌ.
7Chat qui Josué judyeyaꞌ räj muꞌin Israeltyiꞌ sondaro in yiristum tŝọ́tacsi in mọꞌyaꞌ ojñiꞌ Meromyaꞌ. Muꞌyaꞌdye chucsi in. 8Muꞌ Ayoꞌ soꞌmacsi unĉan muꞌin Israeltyiꞌyaꞌ sondaro in. Muꞌin Israeltyiꞌ in jiꞌpenacsi muꞌin in judyeyaꞌ junanaj ĉụiꞌ ĉaꞌjoij in jinchacacsi in: mọꞌve mọjoꞌchasyaꞌ Sidón, judyeyaꞌ yocve Misrefotmaimyaꞌ, judyeyaꞌ shupquive tsun Mizpayaꞌ. Yejĉoij cäc̣häꞌchucsi in junꞌ quiꞌ chuc räj ujacsi in. 9Muꞌ Josué meꞌjeyacsi in yoj jajitidyemꞌ muꞌ Ayoꞌ jiquej u. Muꞌ tätsjeyacsebi yujvety ñuctyiꞌ cavayoty in judyeyaꞌ jiꞌcoꞌshayacsebi chutidyes careto muꞌinsiꞌ.
10Chat qui muꞌ Josué caꞌñibun judyeyaꞌ jiꞌpeñeꞌ mọꞌ bäꞌyedyeꞌ Hazor judyeyaꞌ ujate muꞌ ayoꞌ muꞌĉantyiꞌ chutidyesyaꞌ coc̣hino. Mọꞌ bäꞌyedyeꞌ Hazor joꞌnoꞌ buꞌyiꞌ jiquej räjcheꞌ mọꞌin yocsiꞌ ayoꞌbuꞌyedyeꞌ in. 11Räj muꞌĉantyiꞌ ijacsi in chutidyesyaꞌ coc̣hino. Muꞌin tasjeyacsi in, mijam yirity jụ́tyestumtyiꞌ jiꞌc̣honte in. Judyeyaꞌ muꞌ Josué jiꞌcoꞌshayeꞌ mọꞌ bäꞌyedyeꞌ Hazor.
12Josué jiꞌpenacsebi räj ayos bäꞌyedyeꞌ in muꞌin ayoꞌtumdye in. Judyeyaꞌ muꞌ ujacsi räj muꞌĉantyiꞌ in chutidyesyaꞌ coc̣hino. Muꞌ tasjeyacsi. Muꞌ jịꞌcätsepte mọꞌ yụꞌtacdyeꞌ soꞌmacsis jiquej Moisésyaꞌ, muꞌ úñity Ayoꞌtyiꞌ muꞌ. 13Muꞌin Israeltyiꞌ vóshiꞌ in jam jiꞌcoꞌshayacsi bäꞌyedyeꞌ in miquityches mụcuꞌ jämꞌtacsiꞌ in. Yiris mụcuꞌches mọmoꞌ Hazor jiꞌcoꞌshayeꞌ muꞌ Josué. 14Muꞌin Israeltyiꞌ vóshiꞌ in ĉụiꞌdyes cạiꞌ in räj jämꞌsiꞌ jedyeꞌ mọꞌinĉansiꞌ bäꞌyedyeꞌĉansiꞌ in judyeyaꞌ räj cuꞌdyeꞌ muꞌin. Chutidyesyaꞌ coc̣hino ujacsi muꞌin muntyiꞌ in junꞌ quiꞌ chuc tasjeyacsi in. Mijam yirity jụ́tyestumtyiꞌ jiꞌc̣honte in. 15Yojdyemꞌ muꞌ Ayoꞌ jayuꞌti muꞌtyiꞌ úñity Moisés jiquej u, meꞌ muꞌ Moisés jayuꞌti muꞌ Josué, judyeyaꞌ Josué mọꞌ jịꞌcätseꞌ. Muꞌ Josué jịꞌcätsepte räj mọꞌ yụꞌtacdyeꞌ Ayos muꞌ, mọꞌ jasoꞌmitis Moisés jiquej.
16Josué jiꞌpeñeꞌ räj mọꞌ jac: mụcuꞌves, judyeyaꞌ räj mọꞌ Neguev, judyeyaꞌ räj mọꞌ jac Gosén, mọꞌ jịjcaijcheꞌ tsun c̣hẹiꞌyas mụcuꞌ in, mọꞌ jac Arabá, muꞌ mụcuꞌ Israel judyeyaꞌ mọꞌ jac c̣hẹiꞌyaꞌ mụcus mọꞌ. 17Tiyacchutiyaꞌ muꞌ mụcuꞌ Halac, muꞌ mochety Seirvety mụcuꞌ, meꞌdye Baal-gad mojijĉan Líbano, úĉanyaty muꞌ mụcuꞌ Hermón. Muꞌ Josué jiꞌpenacsi räj ayoꞌ in muꞌĉantyiꞌ jac in. Muꞌ jämꞌchucsi in, muꞌ päjjeyacsi in, ujacsi in. 18Muꞌ Josué men chucsi uts ayoꞌ in. 19Mijam yiris bäꞌyedyeꞌ mạꞌjeꞌ yuꞌtyiyiti p̂eyacdyeꞌ ĉụiꞌdyes jämꞌjitidyes mọꞌ muꞌintum in Israeltyiꞌtum vóshiꞌ in. Muꞌin mọmoꞌ heveo Gabaónĉantyiꞌ in meꞌjeꞌ in. Räj muꞌin yoctyiꞌ in muꞌin Israeltyiꞌ vóshiꞌ in jiꞌpenacsi chutidyeꞌĉan in 20ĉaĉaij na muꞌdye Ayoꞌ jiꞌyäjcacsebi ĉojtyiꞌ muꞌin paj qui chucsi in muꞌin Israeltyiꞌ vóshiꞌ in. Meꞌ yi paj qui muꞌ raꞌ tupuj jịꞌmotsacsi in, tas ujacsi in. Mijam damꞌ ñịbeꞌ ĉọcsi muꞌ yojdyemꞌ muꞌ Ayoꞌ jajiti Moisés jiquej u.
21Ọijĉandye tupudyeꞌ muꞌ Josué jịꞌmotsacsi muꞌin anaceo in mụcuꞌve bäꞌyity in, muꞌin Hebrónĉantyiꞌ in, judyeyaꞌ Debirĉantyiꞌ in, judyeyaꞌ Anabĉantyiꞌ in, judyeyaꞌ räj mụcuꞌvety in Judáĉansiꞌ jac, judyeyaꞌ räj mụcuꞌvety in Israelĉansiꞌ jac, muꞌ Josué tas ujacsi in judyeyaꞌ jịꞌmotsacsebi bäꞌyedyeꞌ in. 22Itŝij muꞌyaꞌ anaceo in mọꞌĉan jac muꞌinsiꞌ Israeltyiꞌ vóshiꞌ in. Muꞌyaꞌ tacaꞌ tsạꞌ anaceo in mọꞌinĉan bäꞌyedyeꞌ in: Gaza, Gat judyeyaꞌ Asdod.
23Meꞌdyes qui muꞌ Josué jiꞌpeñeꞌ räj mọꞌ jac yoj yidyemꞌ muꞌ Ayoꞌ jayuꞌti Moisés jiquej u. Muꞌ qui Josué soꞌmacsi mọꞌ jac muꞌin Israeltyiꞌ vóshiꞌ in. Vóshiꞌvunsiꞌyaꞌ ñuruꞌ jịjcaij in meꞌ shupquiꞌ muꞌinsiꞌ jiꞌchetacdyeꞌ jacsiꞌ in. Chat qui mọꞌyaꞌ jịꞌjutyitidyeꞌ jacsimꞌ, aty itŝiꞌ chutidyeꞌ.
Currently Selected:
Josué 11: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
