Josué 10
10
Dyäqui muꞌ tsun
1Muꞌ Adonisedec muꞌ ayoꞌ Jerusalénĉantyiꞌ seꞌveꞌ junꞌ chuc muꞌ Josué jiꞌpeñeꞌ Hai judyeyaꞌ jịꞌmotseꞌ mọꞌ bäꞌyedyeꞌ. Muꞌ Josué meꞌtyeꞌ Hai judyeyaꞌ ayoꞌ mọꞌ yojdyemꞌ muꞌ meꞌtyeꞌ Jericó judyeyaꞌ ayoꞌ mọꞌ. Judyeyaꞌ muꞌin Gabaónvety in aty yụꞌtyeyacsi p̂eyacdyeꞌ muꞌindyes Israeltyidyes vóshiꞌ in jämꞌjeyacdyes. Chat qui muꞌin yiriꞌyaꞌ bäꞌyi in. 2Muꞌ ayoꞌ Adonisedec judyeyaꞌ muntyiꞌ muꞌ där noiꞌyi in ĉaĉaij na mọꞌ Gabaón yiris jämꞌsiꞌ bäꞌyedyeꞌ jeñej buꞌyiꞌ yiris mọjoꞌchas bäꞌyedyeꞌ ayoꞌsimꞌ. Ọyaꞌyaꞌ buꞌyi mọꞌ bäꞌyedyeꞌ Hai jiquej judyeyaꞌ muꞌin sonꞌ Gabaónĉantyiꞌ in chịj chutity in.
3Chat qui muꞌ Adonisedec juteyacsi p̂eyacdyeꞌ in: Muꞌ Hoham ayoꞌ muꞌ Hebrónĉantyiꞌ, muꞌ Piream ayoꞌ muꞌ Jarmutĉantyiꞌ, muꞌ Jafía ayoꞌ muꞌ Laquisĉantyiꞌ judyeyaꞌ muꞌ Debir ayoꞌ muꞌ Eglónĉantyiꞌ. Muꞌ jéyacsi:
4—Atsivac miꞌin, ñútyitiĉamꞌ. Yụ raꞌ chucsi muꞌin Gabaónĉantyiꞌ in ĉaĉaij na muꞌin aty yụꞌtyeyacsi p̂eyacdyeꞌ Josué judyeyaꞌ muꞌin Israeltyiꞌ vóshiꞌ in jämꞌjitidyes mọꞌ —jéyacsi muꞌ Adonisedec. 5Chat qui muꞌin ĉanamꞌ ayoꞌ amorreo in: muꞌ ayoꞌ Jerusalénĉantyiꞌ, muꞌ ayoꞌ Hebrónĉantyiꞌ, muꞌ ayoꞌ Jarmutĉantyiꞌ, muꞌ ayoꞌ Laquisĉantyiꞌ judyeyaꞌ muꞌ ayoꞌ Eglónĉantyiꞌ, yiriꞌyaꞌtucsi sondaro in. Muꞌin bojvi Gabaónve jịjcaij in räjtumdye sondaro in chat chucsi muꞌin Gabaónĉantyiꞌ in.
6Chat qui muꞌin Gabaónĉantyiꞌ in juteꞌ p̂eyacdyeꞌ Josuéyaꞌ muꞌĉan mọꞌ dyäquedyeꞌ Gilgal jéte in:
—Jam raꞌ farajjitiĉamꞌ, tsun nash úñity mi. Atsivac miꞌin judyeyaꞌ jiꞌc̣hontiĉamꞌ. Ñútyitiĉamꞌ ĉaĉaij na räj muꞌin ayoꞌ amorreo mụcuꞌve bäꞌyity in aty yiriꞌyaꞌyi atsij chun tsun in —yi Gabaónĉantyiꞌ in.
7Chat qui Josué Gilgalyaty sacti judyeyaꞌ bojvi räjtumdye sondaro muꞌ, muꞌyaꞌ chimeꞌ muꞌin mujuꞌchaty sondaro muꞌ, anic chịj chucsity in. 8Muꞌ Ayoꞌ jajiti Josué:
—Jam raꞌ quijnacsim muꞌin. Yụ aty soꞌmeye unĉan mi. Mijam yirity muꞌinĉantyiꞌ in tupuj ñutsjin mi —jajiti Ayoꞌ.
9Josué sacti Gilgalyaty chat qui dyutsenꞌjeꞌ tsedyedyeꞌ miꞌi yiristum chucsi ayoꞌ in. Mijam damꞌ chị́vaꞌjoij muꞌin in atsique muꞌ Josué junꞌ chuc muꞌyaꞌ. 10Muꞌ Ayoꞌ yi paj qui itŝiꞌ jéyaqui dyijyedyeꞌ muꞌin chucsiꞌyaꞌ muꞌin Israeltyiꞌ vóshiꞌ in. Chat qui muꞌin Israeltyiꞌ vóshiꞌ in jiꞌpenacsi in, anic daiꞌ ujacsi Gabaónve. Muꞌin Israeltyiꞌ vóshiꞌ in jinchacacsi in majmiyaꞌ mọꞌ Bet-horónyaꞌ jịjcaiꞌsiꞌ, judyeyaꞌ meij jịjcaij ujacsi in meꞌdye chaꞌsheꞌ mọꞌin bäꞌyedyeꞌ Azeca judyeyaꞌ Maceda in. 11Muꞌĉan ĉaꞌjoyacsi muꞌin Israeltyiꞌ vóshiꞌ in. Mọꞌ majmi yocve Bet-horón, mọꞌ chabanꞌsiꞌ Azecayaꞌ, muꞌcheꞌ ĉaꞌjodyeꞌĉan jịjcaij in. Muꞌyaꞌdye muꞌ Ayoꞌ jịꞌtŝoyacsi tsafaꞌ därmuntyiꞌ in. Dadamꞌ daiꞌyaij säñi tsafaꞌyaꞌ in uyaꞌyaꞌdye säñi chutidyeꞌĉan ujac in Israeltyiꞌyaꞌ vóshiꞌ in chutidyesyaꞌ coc̣hino muꞌin.
12Ọijĉandye mạyedyeꞌ muꞌ Ayoꞌ soꞌmacsi muꞌin amorreo in muꞌinyaꞌ Israeltyiꞌyaꞌ vóshiꞌ in paj qui jiꞌpenacsi in. Josué jéte muꞌ Ayoꞌ muꞌinsiꞌyaꞌ vej Israeltyiꞌyaꞌ vóshiꞌ in yi muꞌ:
—Paj muꞌ tsun tacyaꞌ dyäqui Gabaóncheꞌ judyeyaꞌ mọꞌ ịvaj mojijcheꞌ Ajalóncheꞌ —Josué jéte Ayoꞌ. 13Chat qui muꞌ tsun tacyaꞌ dyäqui judyeyaꞌ mọꞌ ịvaj dyäquiꞌ junꞌ quiꞌ chuc muꞌin Israeltyiꞌ vóshiꞌ in räj jiꞌpenacsi muꞌin chucsity in. Yoj yiꞌdyemꞌ sánac mọꞌĉan ribro Jasersiꞌĉan:
Muꞌ tsun dyäqui quichĉan tsun judyeyaꞌ tacyaꞌ meꞌ buꞌyi arajdye yirismun mạyedyeꞌ —yiꞌ sánacdyeꞌ.
14Jam junꞌ yocsiꞌ mạyedyeꞌ joꞌmes jiyiꞌ. Itŝiꞌ mọꞌyaꞌ yocsiꞌ q̂uinꞌ joꞌmes mạyedyeꞌ, mijam jäquiꞌve mọꞌ mạyedyeꞌ. Yiris mạyedyeꞌ yóĉandyemꞌ muꞌ Ayoꞌ seꞌvete yirity muntyiꞌ u. Anicdye meꞌ, muꞌ Ayoꞌ chuti muꞌindyes Israeltyidyes vóshiꞌ in.
15Chat qui Josué judyeyaꞌ räj muꞌin Israeltyiꞌ sondaro in caꞌñibun dyäquedyeꞌyaꞌ jijtuban in Gilgalyaꞌ.
Ĉanamꞌ ayoꞌ amorreo in
16Muꞌin ĉanamꞌ ayoꞌ amorreo in aty ĉaꞌjoij in judyeyaꞌ jijmuꞌsiti in yirisĉan toꞌ Macedayaꞌ. 17Aty jéyacyaꞌ muꞌ Josué junꞌ chuc muꞌin ĉanamꞌ ayoꞌ in dạcacsi in muꞌĉan toꞌĉan in Macedayaꞌ, 18muꞌ Josué jéyacsi:
—Burꞌjeyacsevac chäbäjmuntyiꞌ mij in sisdyeꞌyaꞌ toꞌsiꞌ mọꞌ judyeyaꞌ yụꞌtacsevac pạrej sondaro in paj qui mọꞌ ĉọjcaiꞌtyiꞌ in. 19Jam raꞌ dyäqui miꞌin. Jinchacacsevac muꞌin chucsejaty in. Chucsevac muꞌin jäquity ĉaꞌjoijtyiꞌ in paj qui jam siti bäꞌyedyeꞌĉan in ĉaĉaij na muꞌ Ayoꞌ aty yụꞌtacsi unĉan miꞌin —jéyacsi Josué.
20Meꞌdyes qui Josué judyeyaꞌ muꞌin Israeltyiꞌ sondaro in ñäpjeyacsi in. Arajdye räj muntyiꞌ sonꞌ ujacsi in. Muꞌyaꞌ qui namꞌ juñucsiꞌdyety in tupuj siti muꞌinsiꞌĉan naꞌrutumsiꞌ bäꞌyedyeꞌ in. 21Chat qui räj muꞌin Israeltyiꞌ sondaro caꞌñibun Josuéyaꞌ jijtuban in dyäquedyeꞌ Macedayaꞌ. Aty jam tyi chucsi in, mijam tyi p̂eyacseban in.
22Josué jéyacsi:
—Vanacjevac mọꞌ toꞌ judyeyaꞌ tucsevac yụ́yaꞌ muꞌin ĉanamꞌ ayoꞌ in —jéyacsi muꞌ. 23Meꞌdyes qui jiꞌshupcacsi toꞌĉantyiꞌ in ĉanamꞌtyity ayoꞌ in: muꞌ ayoꞌ Jerusalénĉantyiꞌ, muꞌ ayoꞌ Hebrónĉantyiꞌ, muꞌ ayoꞌ Jarmutĉantyiꞌ, muꞌ ayoꞌ Laquisĉantyiꞌ judyeyaꞌ muꞌ ayoꞌ Eglónĉantyiꞌ. 24Aty tucsiyaꞌ ĉanamꞌtyity ayoꞌ in Josuéyaꞌ muꞌ qui fayacsi räj muꞌin Israeltyiꞌ sonꞌ in. Chat qui muꞌ jéyacsi muꞌin sondaro tashcheꞌ buꞌyity in, muꞌin penꞌdyetutety chutidyeꞌĉan in yi:
—Atsivac miꞌin judyeyaꞌ cac̣hjeyacsebivac tuj ayoꞌsiꞌ muꞌin —jéyacsi Josué. Chat qui atsij muꞌin judyeyaꞌ cachjeyacsebi tuj muꞌin.
25Jéyacsi Josué:
—Jam raꞌ noiꞌyi miꞌin, mijam raꞌ yoqui miꞌin. Fer buꞌvac miꞌin, sóñiꞌyevac. Meꞌquiꞌ raꞌ muꞌ Ayoꞌ meꞌtacsi muꞌin räj chunactyiꞌ in —yi muꞌ. 26Chat qui Josué päjjeyacsi muꞌin ayoꞌ in meꞌ buꞌyi ujacsi in. Muꞌ Josué sogayaꞌ titsoꞌjeyacsi ĉanamꞌcheꞌdye son in junꞌ quiꞌ chuc yómoꞌ.
27Aty shocam Josué jutacsi paj qui jecacsebiban aꞌvun muꞌin sonches judyeyaꞌ toꞌĉan qui yụꞌtacsebi yóĉandyemꞌ jijmuꞌsitiĉan jiquej u in. Chat qui sisdyeꞌyaꞌ mọꞌ toꞌ muꞌin yụꞌtacsi daiꞌ chäbäjmuntyiꞌ mij in. Muꞌyaꞌ muꞌin mij tacaꞌ q̂uinꞌ in.
Jiꞌpenac jätisves bäꞌyedyeꞌ in
28Mọꞌĉandye mạyedyeꞌ muꞌ Josué jiꞌpeñeꞌ mọꞌ bäꞌyedyeꞌ Maceda. Muꞌ ujate chutidyesyaꞌ coc̣hino muꞌ ayoꞌ judyeyaꞌ räj muꞌĉantyiꞌ in, muꞌ tasjeyacsi. Mijam yirity c̣hoñi in. Muꞌ meꞌjete muꞌ ayoꞌ Macedaĉantyiꞌ yoj jetedyemꞌ muꞌ ayoꞌ Jericóĉantyiꞌ jiquej u. 29Chat qui Josué judyeyaꞌ räj muꞌin Israeltyiꞌ vóshiꞌ in yacchuiꞌ in Maceda judyeyaꞌ Libnave qui jịjcaij in. Chat qui chuiꞌ in mọꞌ bäꞌyedyeꞌ. 30Chimeꞌ muꞌ Ayoꞌ soꞌmacsi unĉan muꞌin Israeltyiꞌ vóshiꞌ in mọꞌ bäꞌyedyeꞌ judyeyaꞌ ayoꞌ mọꞌ. Muꞌ Josué ujacsi chutidyesyaꞌ coc̣hino räj bäꞌyedyeꞌĉantyiꞌ in. Jam yirity c̣hoñi. Muꞌ meꞌjete muꞌ ayoꞌ Libnaĉantyiꞌ yoj jetedyemꞌ muꞌ ayoꞌ Jericóĉantyiꞌ jiquej u.
31Chat qui muꞌ Josué judyeyaꞌ räj muꞌin Israeltyiꞌ vóshiꞌ in yacchuiꞌ in Libna judyeyaꞌ Laquisve qui jịjcaij dyäqui in. Chat qui muꞌve chucsi in. 32Muꞌ Ayoꞌ soꞌmacsi mọꞌ bäꞌyedyeꞌ Laquis muꞌinyaꞌ Israeltyiꞌyaꞌ vóshiꞌ in. Muꞌ Josué jiꞌpenacsi päräꞌyisĉan mạyedyeꞌ. Mọꞌ bäꞌyedyeꞌ räjtumdye muntyiꞌ mọꞌ muꞌ Josué ujacsi chutidyesyaꞌ coc̣hino, yoj jeꞌdyemꞌ mọꞌ bäꞌyedyeꞌ Libna jiquej u. 33Mọꞌĉandye tupudyeꞌ muꞌ Horam ayoꞌ Gezerĉantyiꞌ atsij nọ́tacseti muꞌin Laquisĉantyiꞌ tsanꞌ muꞌ. Chat qui muꞌ Josué jiꞌpente judyeyaꞌ räj sondaro muꞌ junꞌ quiꞌ chuc jam yirity tsạꞌ muꞌyaꞌ jiꞌyajcati in.
34Chat qui muꞌ Josué judyeyaꞌ räj muꞌin Israeltyiꞌ vóshiꞌ in yacchuiꞌ qui in mọꞌ Laquis judyeyaꞌ Eglónve qui jịjcaij dyäqui in. Chat qui muꞌve chucsi in. 35Muꞌin jiꞌpeñeꞌ in mọꞌ bäꞌyedyeꞌ mọꞌdye mạyedyeꞌ judyeyaꞌ ujacsi chutidyesyaꞌ coc̣hino räj muꞌĉantyiꞌ in, tasjeyacsi in yoj jeꞌdyemꞌ Laquis jiquej u in. 36Chat qui muꞌ Josué judyeyaꞌ räj muꞌin Israeltyiꞌ vóshiꞌ in yacchuiꞌ Eglón in judyeyaꞌ Hebrónve jịjcaij in. Chat qui muꞌve chucsi in. 37Muꞌin jiꞌpeñeꞌ mọꞌ bäꞌyedyeꞌ judyeyaꞌ ujacsi chutidyesyaꞌ coc̣hino räj muꞌĉantyiꞌ in, muꞌ ayoꞌ judyeyaꞌ räj muꞌintumtyiꞌ c̣hẹiꞌyasĉan bäꞌyedyeꞌ. Räj ujacsi muꞌĉantyiꞌ muntyiꞌ in. Jam yirity c̣hoñi in. Yoj jeꞌdyemꞌ Eglón jiquej u jịꞌmotseꞌ in mọꞌ bäꞌyedyeꞌ judyeyaꞌ räj ujacsi muꞌĉantyiꞌ muntyiꞌ in.
38Chat qui muꞌ Josué judyeyaꞌ räj muꞌin Israeltyiꞌ vóshiꞌ in camanꞌ jịjcaban in judyeyaꞌ chuiꞌ bäꞌyedyeꞌ in mọꞌ Debir. 39Muꞌin jiꞌpeñeꞌ mọꞌ bäꞌyedyeꞌ, ayoꞌ mọꞌ judyeyaꞌ mọꞌin c̣hẹiꞌyas bäꞌyedyeꞌ muꞌĉantyiꞌ in. Muꞌin räj ujacsi in chutidyesyaꞌ coc̣hino. Jam jụꞌñity c̣hoñi in. Muꞌin meꞌtyeꞌ mọꞌ bäꞌyedyeꞌ Debir yoj jeꞌdyemꞌ mọꞌ bäꞌyedyeꞌ Hebrón judyeyaꞌ Libna ayoꞌtumdye mọꞌ.
40Meꞌdyes qui muꞌ Josué jiꞌpeñeꞌ räj mọꞌves jac: muꞌin mụcuꞌve bäꞌyity in, muꞌin Neguevve bäꞌyity in, judyeyaꞌ muꞌin jịjcaijcheꞌ tsun c̣hẹiꞌyaꞌ mụcuꞌ bäꞌyity in judyeyaꞌ muꞌin chạdyeꞌyaꞌ mụcuꞌ bäꞌyity in. Jam tyi c̣hoñi in. Muꞌ ijacsi räj jụtyestumtyiꞌ in. Yoj jajitidyemꞌ muꞌ Jenꞌ Ayoꞌ Israelĉantyiꞌ jiquej u. 41Josué jiꞌpenacsi muꞌin tiyacchutiyaꞌ Cadesbarnea meꞌdye Gaza, judyeyaꞌ räj mọꞌ jac Gosén meꞌdye chaꞌsheꞌ Gabaón. 42Josué jiꞌpenacsi räj uts ayoꞌ in muꞌinsiꞌĉan jac in. Yirisĉan chutidyes miꞌedyeꞌ jiꞌpenacsi räj in ĉaĉaij na muꞌ Jenꞌ Ayoꞌ Israelĉantyiꞌ chuti muꞌindyes Israeltyidyes vóshiꞌ in.
43Chat qui Josué räjtum muꞌin Israeltyiꞌ vóshiꞌ in caꞌñibun muꞌve dyäquedyeꞌyaꞌ Gilgalyaꞌ.
Currently Selected:
Josué 10: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
