Jueces 2
2
Sänꞌdyeꞌ muꞌ Josués
6Aty meꞌsiꞌ muꞌ Josué jutacseban muntyiꞌ in muꞌin qui aꞌtuiꞌ in mọꞌ bäꞌyedyeꞌ in, paiꞌ buꞌban in ĉụiꞌsiꞌĉaĉan jac muꞌin, mọꞌ soꞌmacsis in, ĉụiꞌ ĉụiꞌ qui bäꞌban in. 7Tacaꞌ tsạꞌ muꞌ Josué muꞌin Israeltyiꞌ vóshiꞌ in anic jämꞌ cäc̣häꞌchute Ayoꞌ in. Meꞌ qui tsanꞌ muꞌ säñi, muꞌin qui yejĉoij in cäc̣häꞌchute Jenꞌ in junꞌ quiꞌ chuc räj sänjan muꞌin ishoꞌmuntyiꞌ tashcheꞌ buꞌyity jiquej in, muꞌin cạveptety jiquej ferdyeꞌ Ayoꞌsiꞌ in, muꞌ jịꞌcaveyacsity yoquiꞌdyemꞌ nọ́tacsiyaꞌ jiquej u muꞌin Israeltyiꞌ vóshiꞌ jiquej in. 8Josué yiriꞌ cien yiriꞌtac jiyiꞌ yómodyeꞌ tyiti muꞌ, chat qui säñi muꞌ. 9Ĉụiꞌsiꞌĉan jac Timnat-sera jasoꞌmitis Jenꞌ jiquej, muꞌcheꞌ mụcuꞌcheꞌ nạ́te in muꞌin Israeltyiꞌ vóshiꞌ in. Efraíntyiꞌ mụcuꞌ in, muꞌcheꞌ nạ́te in, mujuꞌveyaꞌ muꞌ mụcuꞌ Gaas. 10Jäquiꞌve qui räj muꞌin sänjan in Josuévuntumtyiꞌ jiquej in. Chat muꞌin qui ạvaꞌ muꞌin aty jam meꞌ chị́yete Ayoꞌ in, jam jeñej muꞌin ishoꞌmuntyiꞌ jiquej u in, mijam chị́yepte ferdyeꞌ in, jịꞌcaveyacsis jiquej nọ́tacsiyaꞌ jenꞌvun muꞌin jiquej.
Israeltyiꞌ vóshimꞌ in yacchute in muꞌ Jenꞌ
11Mọꞌdyes muꞌin Israeltyiꞌ vóshiꞌ in ac̣hiꞌ qui muꞌin bäꞌban in Ayoꞌsiꞌyaꞌ vej muꞌ, jämꞌtacdyeꞌcheꞌ quimꞌ ĉúti in Baalcheꞌ. 12Yacchute in muꞌ Jenꞌ Ayoꞌ vóshityvun muꞌin, muꞌ jiꞌshupcacsity Egiptoĉantyiꞌ jiquej in, aty jam méquiꞌ ĉúbun muꞌcheꞌ in. Jämꞌtacdyeꞌcheꞌ quimꞌ ĉúti in, mọꞌ dyụꞌtseyeꞌ in, yóyaꞌdyemꞌ muꞌin u in c̣hẹiꞌyaꞌ buꞌyity in. Mọꞌ muꞌ jịꞌfajqueyacsi Ayoꞌ 13ĉaĉaij na yacchute in, jämꞌtacdyeꞌcheꞌ quimꞌ ĉúti in, Baalcheꞌ judyeyaꞌ Astarte chimeꞌ. 14Mọꞌjeyacsimꞌ fạ́cacsi muꞌ Ayoꞌ Israeltyiꞌtum vóshiꞌ in, chat qui muꞌ vaꞌtacdyeꞌ soꞌmacsi, aty jam ñutsjetyetacsi muꞌin fạ́cacsity in. Atsij yoctyiꞌdye muntyiꞌ in, räj coc̣h jiꞌtacsebi in jedyeꞌ muꞌin, mijam méquiꞌ ñutsjetyetacsi Ayoꞌ muꞌin chutity in, jiꞌpenacsi mọmoꞌ in muꞌin Israeltyiꞌ vóshiꞌ in. 15Jämꞌdyeyaꞌ chutidyeij in yoctyiꞌtum muntyiꞌ in, Ayoꞌ qui yi paj qui muꞌin Israeltyiꞌ vóshiꞌ in peñi in, där ñịbeꞌ cạveꞌ in, yoj yidyemꞌ muꞌ Jenꞌ jiquej u.
16Aty meꞌ bäꞌbanyaꞌ in, Ayoꞌ yụꞌtyeyacsi ĉọjcacsity muꞌindyety in, muꞌ qui jiꞌc̣honacseban judyeyaꞌ chimeꞌ ñutsjetyetacsi muꞌin fạ́cacsity in. 17Muꞌin na Israeltyiꞌ vóshiꞌ in aty tsanꞌ c̣hoñi in, quivijjeꞌ äcäijjeyacsi in muꞌin ĉọjcacsity in, mijam méquiꞌ chicacseban in. Quivij yacchubajte Ayoꞌ in, quivijjebanꞌ jämꞌtacdyeꞌcheꞌ ĉúbun in, jämꞌtacdyeꞌ dyụꞌtseyebanꞌ in, aty jam cäc̣häꞌchucsebiban in vóshiꞌvunsiꞌ dyijyedyeꞌ muꞌin, muꞌin chiqueptety Ayoꞌsiꞌ p̂eyacdyeꞌ jiquej in. 18Jämꞌdyeyaꞌ qui namꞌ peñi in ñịbeꞌ cạveꞌ in, quivij cọdyete Ayoꞌ in táristum in. Jämꞌ ñịbeꞌ ĉọcsi, chat quivij yụꞌtyeyacseban yoctyiꞌ ĉọjcacsity muꞌindyety in paj qui muꞌ jiꞌc̣honacsi. 19A qui namꞌ säñiyaꞌ muꞌ ĉọjcacsity cuvij caꞌñibun in, anic qui mujuꞌchaꞌ ĉụiꞌ ac̣hiꞌti in, quivijjebanꞌ in jämꞌtacdyeꞌ in dyụꞌtseyebanꞌ in mujuꞌchaꞌ muꞌin ac̣hiꞌti ĉụiꞌ in, uyaꞌyaꞌ jiquej jenꞌvun muꞌin. Mijam méquiꞌ farajjeꞌ aꞌc̣his dyijyedyeꞌ muꞌin. 20Mọꞌ där jịꞌfajqueyacsi Ayoꞌ, yi muꞌ: "Uts Israeltyiꞌ vóshimꞌ in mijam méquiꞌ chäquibun p̂eyacdyeꞌ yụ in, mọꞌ yụꞌtyeyeyacsebis yụ vóshiꞌ jiquej muꞌin. Jam junꞌ mạꞌjeꞌ chäquin yụ in. 21Mọꞌdyes qui raꞌ yụ jam junꞌ jiꞌshupcacsi úĉantyiꞌ yoctyiꞌdye muntyiꞌ in, muꞌin jiꞌshucacsity Josuévun jiquej, mijam jiꞌpenacsi chimeꞌ, tsạꞌdyemꞌ jiquej muꞌ. 22Muꞌinyaꞌdye raꞌ yụ jịꞌĉojtacsi uts Israeltyiꞌ vóshiꞌ in, vátyequej raꞌ chäquibun p̂eyacdyeꞌ yụ in muꞌindyes in, yojdyemꞌ muꞌin vóshiꞌvun u muꞌin chäquibun jiquej yụ in, vatyquej raꞌ meꞌ in, vatyquej raꞌ jam", yi muꞌ Jenꞌ. 23Mọꞌ na jiquej dyijyedyeꞌ Ayos muꞌ, jam yiristum jiꞌshupcacsi muꞌin yoctyiꞌdye muntyiꞌ in, yoquiꞌdyemꞌ chutaque jiquej u in muꞌ Josuévun, Jenꞌ jam yi paj qui tas jiꞌpenacsi muꞌĉantyiꞌ in.
Currently Selected:
Jueces 2: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
