Tashches Samuel 8
8
Israeltyiꞌ vóshiꞌ in cọdaqui in ĉụiꞌdyety ayoꞌ muꞌin #8:1 Muꞌyaꞌ jiquej yirity muntyiꞌ jasoꞌmitity p̂eyacdyeꞌ Jenꞌ jiquej, muꞌ rụij bäꞌyity Samuel.
1Aty ishoꞌ muꞌ Samuel, muꞌ qui yụꞌtyeyacsi ĉụiꞌtyiꞌ ạvaꞌ muꞌ paj qui ĉọjcacsity buꞌyi in Israeltyiꞌcheꞌ vóshiꞌ in. 2Muꞌ tashchety ạvaꞌ muꞌ, Joel tịj muꞌ, muꞌ na päräꞌyity Abías tịj muꞌ, muꞌĉan muꞌin ayoꞌbuꞌyi in Beersebaĉan. 3Muꞌtyiꞌ na ạvaꞌ muꞌ Samueltyiꞌ mijam méquiꞌ rụij bäꞌyi in, mijam meꞌquiꞌ cäc̣häꞌchupte dyijyedyeꞌ jenꞌsiꞌ muꞌin, anic fer dyijtute querec̣ha in. Mijam méquiꞌ rụij jịꞌcäts yụꞌtyeyacsi muntyiꞌ in, soꞌmac jụijyaꞌ querec̣ha in, mijam méquiꞌ rụij p̂eyaqui in. 4Chat qui muꞌin räj tashcheꞌ buꞌyity in Israelĉantyiꞌ in vajmuꞌyaij in, Ramáve jịjcaij in ĉọcte in muꞌ Samuel. 5Jéte in:
—Atyuꞌ ishoꞌ mi, uts na ạvaꞌ mi mijam méquiꞌ rụij bäꞌyi in, mijam cäc̣häꞌchubun dyijyedyeꞌ in. Mọꞌdyes tsun cọdyeyac paj qui yụꞌte mi yirity anictyity ayoꞌ jacchety paj qui muꞌ ayotute tsun, yojdyemꞌ yicdyeꞌ yoctyis u in —jéte in muꞌ Samuel.
6Jam muꞌ méquiꞌ maꞌjotacsebi cọdacdyeꞌ muꞌin ayodyety cọdaqui in, ĉaĉaij na jam muꞌ mạꞌjeꞌ meꞌ Ayoꞌ. Chat qui muꞌ cọdaqui Ayoꞌcheꞌ. 7Ayoꞌ jajiti Samuel:
—Jụjjeyacsebiva cọdacdyeꞌ muꞌin, junꞌ chuc cudyin in ĉaĉaij na meꞌ mạꞌjeꞌ muꞌin in. Jam nash mi farajjin in, yụ nash farajjin yụ in, aty jam mạꞌjeꞌ ayotun yụ in. 8Muꞌin q̂uinꞌ yejĉoij äcäijjin yụ in, yoquiꞌdyemꞌ yụ jiꞌshupcacsi Egiptoĉan jiquej u, meꞌdye q̂uinꞌ, meꞌ farajjin yụ in, jämꞌtacdyeꞌcheꞌ ĉúbun in, meꞌ muꞌin meꞌjin yụ in, chimeꞌjindye mi q̂uinꞌ in. 9Mọꞌdyes yụ jéye, jụjjeyacsebiva mọmoꞌ cọdacdyeꞌ muꞌin, tashcheꞌ chum raꞌ chap jéyacsim junꞌjeyacsi buty raꞌ ayoꞌ muꞌin, muꞌ raꞌ meꞌtacsi, jéyacseva —jajiti Jenꞌ.
10Anicdye meꞌ, muꞌ Samuel jéyacsi Ayoꞌsiꞌ p̂eyacdyeꞌ muꞌ, muꞌin cọdyetety ayoꞌ in.#8:10 Jéyacsi: "Meꞌjinac raꞌ muꞌ ayoꞌ, muꞌ raꞌ dyimꞌbunac ạvaꞌ miꞌin väc̣häꞌtyitydyety in, pạrej raꞌ úñitydyety in, chimeꞌdye raꞌ p̂en ạvaꞌ miꞌin chutyinac raꞌ in úñis buꞌyiꞌ raꞌ in. Chimeꞌdye raꞌ säcsedyeꞌ daiꞌ cudyinac judyeyaꞌ cuꞌdyeꞌ miꞌin, judyeyaꞌ sacacdyeꞌ miꞌin, joꞌmemes raꞌ cudyinac chutyinac", meꞌ jéyacsi muntyiꞌ in.
19Meꞌ tsanꞌ meꞌ jéyacsi, muꞌin na muntyiꞌ in jam méquiꞌ seꞌvete in, yi mọmoꞌ in:
—Tsun fer mạꞌjeꞌ paj qui muꞌyaꞌ ayoꞌ tsun, 20muꞌ qui raꞌ ayotute tsun, judyeyaꞌ tashcheꞌ buꞌyi tsundyes chutidyeꞌĉan, muꞌ qui raꞌ ñutsjin tsun chutidyeꞌĉan —yi in.#8:20 Anicdye meꞌ, yenꞌtyiꞌ muntyiꞌ in cọdyete in muꞌ Jenꞌ paj qui muꞌ yụꞌtyeyacsi ayodyety muꞌindyety in. Chijämꞌ muꞌ Ayoꞌ jụjtacsi, Saúl jatsimꞌti. Ọij sánacdyeꞌ yiꞌ junꞌ chuc Jenꞌsiꞌ Ạꞌedyeꞌ muꞌ jạtŝuti muꞌ Saúl jiquej, aty yụꞌtac ayoꞌbuꞌyi.
Currently Selected:
Tashches Samuel 8: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
