Hebreodyes 8
8
Jesús yuꞌtyiyisinꞌ mụiꞌsis p̂eyacdyeꞌ
1Ọij mọjoꞌchas p̂eyacdyeꞌ q̂uinꞌ tsun jéyacsiꞌ miꞌin: ĉaĉaij na muꞌ cudyitity Jenꞌcheꞌ tsundyes q̂uinꞌ, mạyedyeꞌcheꞌ bäꞌyi tacve buꞌyi mujuꞌchatyyaꞌ Jenꞌ, yócheꞌdyemꞌ ayoꞌbuꞌyi u. 2Muꞌcheꞌ q̂uinꞌ carijtaqui, Jenꞌsiꞌĉan acaꞌ muꞌ, Tsäquiꞌsisĉan vavdyeꞌ anicsisĉan, muꞌĉan räjĉan cudyiti Jenꞌcheꞌ tsundyes, mọꞌ Ayoꞌ jämꞌtyes mạyedyeꞌches, mijam muntyis mọꞌcheꞌ jämꞌtacdyeꞌ.
3Jacchety cudyitity Jenꞌcheꞌ in muꞌin yụꞌtac in paj qui muntyis tucdyeꞌ jiꞌjiyete Jenꞌ in, paj qui jiꞌcoꞌshayeꞌ muꞌdyes in. Meꞌdye muꞌ chimeꞌ Jesús, muꞌ cudyiti Jenꞌcheꞌ tsundyesiꞌ, jemoñeꞌ muꞌ chimeꞌ tuyete. 4Úcheꞌ jaccheꞌ bäꞌyi q̂uinꞌ jụijyaꞌ muꞌ, a vuty jam tupuj yụꞌtac u paj qui cudyiti Jenꞌcheꞌ, ĉaĉaij na muꞌyaꞌ yoctyiꞌ in aty meꞌ yụꞌtactyiꞌ in paj qui jiꞌjiyete Jenꞌ in, junꞌ chuc cọdaquiꞌ mọꞌ yụꞌtacdyeꞌ. 5Úñedyeꞌ muꞌin jeñej buꞌyiꞌ onomꞌsiꞌ, mọꞌ jiꞌyetyeꞌ anicsis carijtacdyeꞌ mạyedyeꞌches, meꞌ buꞌyiꞌ mọꞌ shupquiꞌ cudyitidyeꞌ muꞌin. Meꞌdye muꞌ chimeꞌ Moisés jiquej, aty raꞌ jämꞌtyeꞌyaꞌ mọꞌ acaꞌ Jenꞌsiꞌ muꞌ jiquej, mọꞌ tinates jiquej in, chat qui muꞌ Jenꞌ jajiti: "Anicdye raꞌ jämꞌtyem, jụꞌñiꞌ chuc jịꞌcaveyeye jiquej mụcuꞌcheꞌ, joꞌmeiꞌdye raꞌ jämꞌtyem judyeyaꞌ räj jedyeꞌ mọꞌsimꞌ", jajiti Jenꞌ. #8:5 Exodo 25:9 6Muꞌ na Jesucristo mọjoꞌchas mus carijtacdyeꞌ, uyaꞌyaꞌ muꞌinsiꞌ in cudyititysiꞌ Jenꞌcheꞌ in. Chimeꞌdye mọꞌ mụiꞌsis p̂eyacdyeꞌ yuꞌtyiyisinꞌsiꞌ Jesucristo, mọꞌ yiꞌ paj qui jämꞌjitiĉaꞌ Jenꞌtum tsun, mọꞌ anic mọjoꞌchaꞌ jämꞌsiꞌ ọyaꞌyaꞌ mọꞌ tashchesvun yụꞌtacdyeꞌ Jenꞌsiꞌ jiquej muꞌ. Mọꞌ na mụiꞌsis p̂eyacdyeꞌ Jenꞌsiꞌ muꞌ dadamꞌ mọjoꞌchas ñịbeꞌjitidyes soꞌmisinꞌ mọꞌ.
7Tupuj jụijyaꞌ rụij yuꞌsinꞌ mọꞌ tashches yụꞌtacdyeꞌ, a vuty tupuj mọꞌ jiꞌc̣honsinꞌ u tsun, jam a vuꞌ ĉa jemonac yụꞌtac mọꞌ mụiꞌsis p̂eyacdyeꞌ Jenꞌsiꞌ u muꞌ. 8Muꞌ na Jenꞌ chị́yacsi muntyiꞌ in jam rụijtyity in. Yiꞌ sánacdyeꞌ:
Yi Ayoꞌ tsun:
Yocsiꞌĉan raꞌ tupudyeꞌ yụ raꞌ mụiꞌsis p̂eyacdyeꞌ soꞌmacsi muꞌin Israeltyiꞌ vóshiꞌ in judyeyaꞌ muꞌin Judáĉantyiꞌ ñuruꞌtyity in.
9Mọꞌ raꞌ mụiꞌsis p̂eyacdyeꞌ soꞌmacsis yụ,
aty qui raꞌ jam mọꞌ jeñej tashches p̂eyacdyeꞌ soꞌmacsis yụ jiquej vóshiꞌvun muꞌin jiquej,
yoquiꞌdyemꞌ jiꞌshupcacsiyaꞌ Egiptoĉantyiꞌ jiquej u yụ,
jeñej yirity muntyiꞌ bubenꞌ jiꞌmiꞌaquity ạvaꞌ muꞌ,
meꞌ buꞌyi jiꞌshupcacsi yụ jiquej.
Meꞌ tsanꞌ yụ soꞌmacsi p̂eyacdyeꞌ yụ,
muꞌin qui namꞌ jam cäc̣häꞌchubun yụ in,
mọꞌdyes qui yụ murujrutacsi.
10Ayijyaꞌ raꞌ tupudyeꞌ,
yocsiꞌ qui raꞌ p̂eyacdyeꞌ soꞌmacsi yụ muꞌin Israeltyiꞌ vóshiꞌ in,
yi muꞌ Ayoꞌ tsun.
Meꞌ raꞌ mọꞌ p̂eyacdyeꞌ:
Yụ́siꞌ yụꞌtacdyeꞌ yụ raꞌ jiꞌsiteyacsi dyijyedyeꞌĉan muꞌin judyeyaꞌ yụ raꞌ sáñeꞌ ĉojtyiꞌĉan chimeꞌ muꞌin,
yụ raꞌ Jenꞌ buꞌyi muꞌin,
judyeyaꞌ muꞌin raꞌ muntyiꞌ yụ in.
11Aty qui raꞌ jam vaj meij jiꞌchäyitidyeij in,
mijam qui raꞌ jéyacsi chätidyeꞌ muꞌin:
"Chị́yemac Ayoꞌ tsun",
mijam qui raꞌ yi in,
ĉaĉaij na aty räj chäyin yụ in,
räj ishoꞌ in judyeyaꞌ miquity in.
12Chat qui raꞌ yụ vayacjeyacsebi juchaj muꞌin,
mijam qui raꞌ dyijtucsebiban yụ aꞌc̣his dyijyedyeꞌ muꞌin.
13Jenꞌ aty p̂eyeꞌ yocsiꞌ p̂eyacdyeꞌ, mọꞌ jorojĉanjisinꞌ aty ishoiꞌ mọꞌ tashches yụꞌtacdyeꞌ, aty raꞌ tastac mọꞌ. Jeshaꞌ, yiris jedyeꞌ ishoiꞌ jụijyaꞌ judyeyaꞌ jayiꞌ, aty jam raꞌ men mọtsiꞌ.
Currently Selected:
Hebreodyes 8: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
