Hebreodyes 7
7
Melquisedec cudyitity Jenꞌcheꞌ jiquej
1Uts Melquisedec Salemĉantyiꞌ ayoꞌ jiquej, judyeyaꞌ cudyitity Jenꞌcheꞌ jiquej, muꞌ mujuꞌchaꞌ buꞌyity Jenꞌ. Abraham jiꞌpenacsiyaꞌ yoctyiꞌ ayoꞌ jiquej in, aty caꞌñibunyaꞌ muꞌ, muꞌ qui Melquisedec jajiꞌrebiĉunꞌti judyeyaꞌ jasoꞌmiti jämꞌsiꞌ p̂eyacdyeꞌ. 2Chat qui muꞌ Abraham pạrej yụꞌtyeꞌ jedyeꞌ Melquisedecdyesiꞌ, mọꞌ chutacsis yoctyitysiꞌ ayoꞌ in, muꞌ soꞌmete yiriꞌtacĉansiꞌ yiris jedyeꞌ jịjcaiꞌ soꞌmete.#7:2 Gén 14:17-20 Yiriꞌtacĉansiꞌ yiris jedyeꞌ yiꞌ ca yiꞌ naposĉan "décima parte", mọꞌ yiꞌ mọꞌyaꞌ jụijyaꞌ yiriꞌtac jedyeꞌ in, yiris jedyeꞌ soꞌmac muꞌ Melquisedec. Mọꞌ tịj Melquisedec yiꞌ ca yiꞌ: "Rụij ayoꞌbuꞌyity," yiꞌ caꞌ. Muꞌ chimeꞌ ayoꞌ Salemĉantyiꞌ, Salem yiꞌ ca yiꞌ "Ĉojtyiꞌĉansiꞌ maꞌjodyeꞌ." Mọꞌ na ca yiꞌ Melquisedec Ayoꞌ soꞌmacsity ĉojtyiꞌĉan maꞌjodyeꞌ, yiꞌ ca mọꞌ yiꞌ. 3Mijam méquiꞌ chị́yac jenꞌ muꞌ tyi chuc, mijam tseꞌ muꞌ, mijam vóshiꞌ muꞌ chimeꞌ, mijam sánac tịj muꞌin, jam jeñej muꞌin cudyitity Jenꞌcheꞌ jiquej in. Yojdyemꞌ Jenꞌtyiꞌ Ạvaꞌ u muꞌ, meꞌdye chimeꞌ muꞌ Melquisedec, jam jụꞌñisĉan mạyedyeꞌ mọtstaqui cudyitidyeꞌ Jenꞌcheꞌ muꞌ.
4Jorojĉandye mujuꞌchaꞌ buꞌyi uts Melquisedec jiquej, muꞌ na Abraham uyaꞌyaꞌ muꞌ. Abraham vóshiꞌvun tsun jiquej, meꞌ tsanꞌ fer buꞌyity muꞌ, soꞌmete qui namꞌ Melquisedec yiriꞌtacĉansiꞌ yiris jedyeꞌ jịjcaiꞌ, mọꞌ chutyetacsis chutidyeꞌĉan jiquej. 5Yụꞌtacdyeꞌ jiquej Jenꞌsiꞌ yimꞌ junꞌ chuc muꞌin cudyitity Jenꞌcheꞌ in Levítyiꞌ vóshiꞌ muꞌ, muꞌin yụꞌtac in jäctyetacsity in ĉụiꞌtyiꞌ chätidyeꞌ muꞌin yiriꞌtacĉansiꞌ yiris jedyeꞌ muꞌin, meꞌ buꞌyi jäctacsi Jenꞌdyes in. Meꞌ tsanꞌ muꞌindye in Abrahamtyiꞌ vóshiꞌ in, muꞌin qui namꞌ Levítyiꞌ vóshiꞌ in, muꞌin jäctyetacsity in. 6Muꞌ na Melquisedec, meꞌ tsanꞌ jam Levítyiꞌ vóshiꞌ muꞌ, jäctyete qui namꞌ muꞌ Abraham yiriꞌtacĉansiꞌ yiris jedyeꞌ jịjcaiꞌ muꞌ, judyeyaꞌ jasoꞌmiti jämꞌsiꞌ p̂eyacdyeꞌ chimeꞌ. Meꞌ tsanꞌ muꞌ Abraham tsimꞌtactyiꞌ Jenꞌtyiꞌ muꞌ, judyeyaꞌ soꞌmactyiꞌ p̂eyacdyeꞌ Jenꞌ, mọꞌ p̂eyacsiꞌ raꞌ vóshiꞌ raꞌ muꞌ, muꞌ qui namꞌ Melquisedec soꞌmete jämꞌsiꞌ p̂eyacdyeꞌ. 7Jorojĉandye muꞌ Melquisedec mujuꞌchaꞌ buꞌyi, uyaꞌyaꞌ muꞌ Abraham, ĉaĉaij na muꞌ mujuꞌchaꞌ buꞌyity, muꞌ tupuj soꞌmete jämꞌsiꞌ p̂eyacdyeꞌ muꞌ uyaꞌyaꞌ buꞌyity, 8Q̂uinꞌ muꞌin cudyitity Jenꞌcheꞌ in jäctacsity yiriꞌtacĉansiꞌ yiris jedyeꞌ jịjcaiꞌ muntyis muꞌin, muꞌin meꞌ jäctacsity muntyiꞌ in sänꞌdyedyety mọmoꞌ muntyiꞌ in. Muꞌ na Melquisedec muꞌ jäctyetety Abraham jiquej, jam muꞌ meꞌ, sánacdyeꞌ p̂eijte yiꞌ: "Muꞌ nash tsạꞌ buꞌyity." 9-10Levítyiꞌ vóshiꞌ in, cudyitity Jenꞌcheꞌ muꞌin yụꞌtac in paj qui jäctyeyacsi muntyiꞌ in yiriꞌtacyis muꞌin. Tupuj yéjaꞌ tsun, meꞌ tsanꞌ itŝijdyemꞌ muꞌ Leví jiquej yoquiꞌdyemꞌ muꞌ Abraham soꞌmeteyaꞌ yiriꞌtacyis jedyeꞌ jiquej u muꞌ Melquisedec, jeñej buꞌyi qui namꞌ muꞌ Leví chimeꞌ soꞌmete muꞌ Melquisedec, meꞌ buꞌyiꞌ shupquiꞌ mọꞌ, ĉaĉaij na Abrahamtyiꞌ raꞌ vóshiꞌ muꞌ Leví jiquej, muꞌĉan raꞌ naꞌi muꞌ.
11Muꞌin cudyitity Jenꞌcheꞌ in vóshiꞌ muꞌ Levíty jiquej in, muꞌin jéyacsi muntyiꞌ in yụꞌtacdyeꞌ Jenꞌsiꞌ muꞌ. Muꞌindye Aaróntyiꞌ chimeꞌ vóshiꞌ muꞌ. Mọꞌ qui namꞌ yụꞌtacdyeꞌ jéyacsis muꞌin jiquej in, mijam mọꞌ rụij yụꞌtacsiꞌ muntyiꞌ in. Meꞌ tupuj jụijyaꞌ mọꞌ, a vuty jam muꞌ atsij Cristo u, a vuty jam cudyiti Jenꞌcheꞌ tsundyes u. Muꞌ Cristo yocsiꞌ cudyitidyeꞌ cäc̣häꞌchuiꞌ, Melquisedecsiꞌ jiquej, jam muꞌ Aarónsiꞌ cäc̣häꞌchupte cudyitidyeꞌ muꞌ. 12Q̂uinꞌ chat muꞌ Jenꞌ yi paj qui yoc buꞌyiꞌ yụꞌtac mọꞌ cudyitidyeꞌ muꞌcheꞌ, jemoñeꞌ qui mọꞌ chimeꞌ yoc yụꞌtac mọꞌ p̂eyacdyeꞌ. 13-14Ayoꞌ tsun p̂eijtety mọꞌ sánacdyeꞌ, jam muꞌ Levíty vóshiꞌ jiquej muꞌ, chị́jaꞌ qui namꞌ tsun Judátyiꞌ vóshiꞌ muꞌ. Judátyiꞌ vóshimꞌ mijam yirity yụꞌtac cudyitity Jenꞌcheꞌ in, ĉaĉaij na muꞌ Moisés jam meꞌ yi jiquej.
Cristo cudyitity Jenꞌcheꞌ yojdyemꞌ muꞌ Melquisedec jiquej u
15Mọꞌdyes q̂uinꞌ dadamꞌ jorojĉan aty yocve yụꞌtyeꞌ muꞌ Jenꞌ, yoctyiꞌ atsij cudyitity Jenꞌcheꞌ muntyidyes in, yojdyemꞌ Melquisedec jiquej u. 16Muꞌ yụꞌtacyaꞌ jiquej, mọꞌ jam cäc̣häꞌchuiꞌ yụꞌtacdyeꞌ yiꞌ Levítyiꞌ vóshiꞌ mọmoꞌ yụꞌtac in, muꞌ na Cristo jam meꞌ, muꞌ Cristo yụꞌtac ĉaĉaij na muꞌ ferdyeꞌtumtyiꞌ, muꞌ raꞌ jam jụꞌñisĉan mạyedyeꞌ säñi. 17Yi muꞌ Jenꞌ:
"Cudyitity Jenꞌcheꞌ yụꞌtac mi,
jam raꞌ jụꞌñisĉan mạyedyeꞌ mọtsiꞌ cudyitidyeꞌ yụ́cheꞌ mi,
yojdyemꞌ Melquisedecsiꞌ jiquej u", yiꞌ sánacdyeꞌ.
18Meꞌdye muꞌ Jenꞌ jịꞌmotseꞌ tashches yụꞌtacdyeꞌ muꞌ, ĉaĉaij na mọꞌsiꞌ jiquej itŝiꞌ ferdyemꞌ, fibis mọmoꞌ jiquej, 19mijam tupuj rụij yuꞌsinꞌ jiquej. Q̂uinꞌ chat muꞌ Jenꞌ yụꞌtyeꞌ yocsiꞌ p̂eyacdyeꞌ dadamꞌ mọjoꞌchaꞌ jämꞌsiꞌ, mọꞌyaꞌ q̂uinꞌ c̣hẹiꞌyaꞌjeja Jenꞌ.
20Chimeꞌdye muꞌ Jenꞌ fersiꞌ p̂eyacdyeꞌ jiꞌjäqueꞌ jayuꞌtiyaꞌ muꞌ Cristo jiquej, paj qui muꞌ anictyity cudyitity Jenꞌcheꞌ muntyidyes shupqui muꞌ. Muꞌin na yoctyiꞌ cudyitity Jenꞌcheꞌ in, jam muꞌin meꞌ yụꞌtac in, jam mọꞌ jiꞌjäqueꞌ. 21Muꞌ Jesús mumꞌ yirity fersiꞌyaꞌ p̂eyacdyeꞌ yụꞌtac jiquej, yiꞌ mọꞌ sánacdyeꞌ:
"Ayoꞌ tsun fersiꞌ p̂eyacdyeꞌ jiꞌjäqueꞌ,
mijam raꞌ junꞌ tupuj yocsiꞌ yébanꞌ dyijyedyeꞌ shupquiꞌ muꞌ.
Jam raꞌ jụꞌñisĉan mạyedyeꞌ mọtsiꞌ cudyitidyeꞌ yụ́cheꞌ mi", yiꞌ mọꞌ sánacdyeꞌ.
22Q̂uinꞌ chat muꞌ Jesús yụꞌtyeꞌ paj qui fer buꞌyiꞌ mọꞌ mụiꞌsis p̂eyacdyeꞌ Jenꞌsiꞌ muꞌ, mọꞌ anic mọjoꞌchas p̂eyacdyeꞌ, jam jeñej mọꞌ tashches jiquej. 23Muꞌin cudyitity Jenꞌcheꞌ in jam muꞌin päräꞌ jiquej in, meꞌ tsanꞌ säñi in yoctyiꞌ cächyi jiquej in. 24Muꞌ na Jesús jam muꞌ meꞌ yụꞌtac, mumꞌ yirity yejĉoij cudyiti Jenꞌcheꞌ muntyidyes in, ĉaĉaij na muꞌ jam jụꞌñisĉan mạyedyeꞌ säñi. 25Mọꞌdyes muꞌ Jesús ferdyeꞌtum, tupuj jiꞌc̣honacsi tyi chuc c̣hẹiꞌyaꞌjetety Jenꞌ in Jesússiꞌcheꞌ tịj muꞌ, räjĉan buꞌyi raꞌ Jenꞌyaꞌ in. Muꞌ tupuj jiꞌc̣honacsi ĉaĉaij na muꞌ räjĉan cọdaqui Jenꞌcheꞌ muꞌ muꞌindyes in, jam raꞌ jụꞌñisĉan mạyedyeꞌ säñi muꞌ.
26Där jämꞌ muꞌ cudyiti Jenꞌcheꞌ tsundyes, muꞌ jemonjaty tsun. Muꞌ jam jụꞌñity, mijam damꞌ juchaj meꞌchuiꞌtyiꞌ, pạrejtactyiꞌ juchajtumtyiꞌyaꞌ in, anic jiyi cheꞌve yụꞌtac muꞌ, ọyaꞌyaꞌdye mạyedyeꞌcheꞌ. 27Muꞌ jam jeñej cudyitity Jenꞌcheꞌ in, muꞌin räjĉan mạyedyeꞌ jiꞌcoꞌshayeꞌ Jenꞌdyes in, tashcheꞌ chum jiꞌcoꞌshayeꞌ in ĉụiꞌsidyes juchaj muꞌin judyeyaꞌ qui jäquiꞌve muntyisdyes juchaj in. Muꞌ na Jesús jam meꞌ, yiriꞌ quimꞌ jiꞌsäsdyi ijac jiquej tsundyes, jeñej buꞌyiꞌ jiꞌcoꞌshayacdyeꞌ Jenꞌdyes, meꞌ buꞌyiꞌ mus ijacdyeꞌ jiquej muꞌ. 28Mọꞌ yụꞌtacdyeꞌ jiquej yụꞌtacsiꞌ juchajtumtyiꞌ muntyiꞌ in paj qui muꞌin cudyiti Jenꞌcheꞌ in. Jäquiꞌve qui muꞌ Jenꞌ yụꞌtaqui ĉụiꞌtyiꞌ Ạvaꞌ muꞌ, fersiꞌ p̂eyacdyeꞌ jiꞌjäqueꞌ yụꞌtaqui muꞌ, muꞌ qui räjĉan buꞌyi cudyitity Jenꞌcheꞌ muntyidyes in, muꞌ räj jịꞌcätsepte Jenꞌsiꞌ dyijyedyeꞌ muꞌ. Jenꞌ fersiꞌ p̂eyacdyeꞌ jiꞌjäqueꞌ jayuꞌtiyaꞌ jiquej muꞌ Jesús.
Currently Selected:
Hebreodyes 7: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
