Hebreodyes 3
3
Jesús mujuꞌchaꞌ buꞌyi uyaꞌyaꞌ muꞌ Moisés
1Vojity yụ, vaj yiriꞌyaꞌ Jenꞌtyiꞌ miꞌin, judyeyaꞌ fayactyiꞌ Jenꞌyaꞌ miꞌin. Dyijtumac miꞌin muꞌ Cristo Jesús, muꞌ jutactyiꞌ Jenꞌtyiꞌ muꞌ paj qui muꞌ anictyity cudyitity Jenꞌcheꞌ tsundyes, muꞌcheꞌ ĉútiĉaꞌ q̂uinꞌ tsun. 2Muꞌ Jesús anic chiquetety Jenꞌ muꞌ jayuꞌtity, yojdyemꞌ muꞌ Moisés chiquete Jenꞌ jiquej u, ĉọjcapte Jenꞌtyiꞌ muntyiꞌ muꞌ. 3Jeshaꞌ muꞌ jämꞌtyety yiris acaꞌ mujuꞌchaꞌ raꞌ muꞌ timaꞌcac, ọyaꞌyamꞌ timaꞌcac mọꞌ acaꞌ jämꞌtyes. Meꞌdye muꞌ chimeꞌ Jesús dadamꞌ muꞌ mujuꞌchaꞌ timaꞌcac, uyaꞌyaꞌ muꞌ Moisés timaꞌcac. 4Räj acaꞌ in muꞌyaꞌ yirity jämꞌtyety in, muꞌ na Jenꞌ mumꞌ yirity räj jämꞌtyety jedyeꞌ. 5Moisés úñity Jenꞌtyiꞌ jiquej muꞌ, jämꞌ úñi muꞌdyes, muꞌsiꞌĉan acaꞌ rụij carijtaqui muꞌ jịꞌcätsepte p̂eyacdyeꞌ muꞌ. Muꞌ p̂eyepte räjĉan Jenꞌsiꞌ p̂eyacdyeꞌ muꞌ, mọꞌ yiꞌsimꞌ junꞌ chuc raꞌ muꞌ Jenꞌ yirisĉan mạyedyeꞌ. 6Muꞌ na Cristo jam úñity, muꞌ Ạvaꞌ muꞌ Jenꞌtyiꞌ, jämꞌ chicaqui Jenꞌ muꞌ, muꞌ rụij ayoꞌbuꞌyi Jenꞌtyidyes muntyiꞌ muꞌ. Meꞌ tsun chimeꞌ Jenꞌtyiꞌ muntyiꞌ shupquejaꞌ tsun, yejĉojaꞌ jụijyaꞌ sóñiꞌyedyeꞌtum bisaĉaꞌ Jenꞌdyes tsun.
Jịꞌjutyitidyes tsun Jenꞌtyidyes muntyiꞌ tsun
7Mọꞌdyes jemoñeꞌ jämꞌ seꞌvejaꞌ ọij p̂eyacdyeꞌ yiꞌsiꞌ Jenꞌsiꞌ Ạꞌedyeꞌ muꞌ:
"Seꞌvebitinte q̂uinꞌ Jenꞌsiꞌ p̂eyacdyeꞌ jụijyaꞌ,
8jam raꞌ damꞌ yäcäjjetyetiñeꞌ ĉojtyiꞌ miꞌin,
jam raꞌ jeñej muꞌin urucyaty vóshiꞌvun miꞌin,
muꞌin vaꞌquectety Jenꞌ jiquej in,
yoquiꞌdyemꞌ jịꞌĉojte jiquej u in cäjyasĉan jac.
9Muꞌĉan muꞌin in vóshiꞌvun jiquej miꞌin jiꞌĉujtyin yụ in,#3:9 Ọij sánacdyeꞌ yiꞌ junꞌ chuc jịꞌĉojte Jenꞌ jiquej in. Mọꞌ cạiꞌ junꞌ chuc jam anicjepte p̂eyacdyeꞌ in, jeñej raꞌ jam vaꞌtacdyeꞌ soꞌmacsiꞌ muꞌ ĉúti in.
meꞌ tsanꞌ daiꞌ quiꞌ jịꞌcaveyacsi ferdyeꞌ yụ,
vạjpedyeꞌ quiꞌtac yómodyeꞌ cavibun ferdyeꞌ yụ in,
uts na jam damꞌ anicjin yụ in memꞌ ñäñin yụ in.
10Mọꞌtum yụ jam damꞌ jämꞌyi, yi yụ:
Uts muntyiꞌ meꞌtyity in yejĉoij mọmoꞌ farajjin yụ in ĉojtyiꞌĉan muꞌin,
jam mạꞌjeꞌ chäquibun p̂eyacdyeꞌ yụ in.
11Mọꞌdyes jiꞌfajquin yụ in,
mọꞌdyes ferdyeꞌtum yụꞌtyeꞌ yụ p̂eyacdyeꞌ yụ, yi yụ:
Yụ raꞌ jam jiꞌsitacsi muꞌĉan in,
mijam raꞌ damꞌ jịꞌjutyiti muꞌĉan in", yi muꞌ Jenꞌ.
12Mọꞌdyes vojity, areꞌĉa muꞌyaꞌ pạrej aꞌc̣hity ĉojtyiꞌ miꞌin, jam anicjetintety Jenꞌ miꞌin, areꞌĉa meꞌĉandye peñi miꞌin farajjetinte muꞌ tsạꞌtyiꞌ Jenꞌ. 13Damꞌdye jämꞌ jam meꞌ miꞌin, jambiꞌdyemꞌ jiyiꞌ tupudyeꞌ q̂uinꞌ, mọꞌ p̂eyes ọij sánacdyeꞌ, jemoñeꞌ vaj cäts mạyedyeꞌ vaj meij jiĉun yuꞌbun miꞌin Jenꞌdyes paj qui jam seꞌ jaꞌyinac mọꞌ juchaj, paj qui jam yäcäjjeyaqui ĉojtyiꞌ miꞌin. 14Tsun nash penꞌdyeꞌ buꞌjaꞌ Cristotum, yejĉojaꞌ jụijyaꞌ ĉútiĉaꞌ muꞌcheꞌ, yojdyemꞌ tashcheꞌ jiquej ĉútiĉaꞌ u, jemoñeꞌ meꞌ q̂uinꞌ tsun yejĉojaꞌ meꞌ tsun, junꞌ quiꞌ chuc jadyic tupudyeꞌ.
15Yiꞌ mọꞌ sánacdyeꞌ:
"Seꞌvebitinte q̂uinꞌ Jenꞌsiꞌ p̂eyacdyeꞌ jụijyaꞌ,
jam raꞌ méquiꞌ yäcäjjetyetiñeꞌ ĉojtyiꞌ miꞌin,
jam raꞌ jeñej muꞌin urucyaty vóshiꞌvun miꞌin,
muꞌin vaꞌquectety Jenꞌ jiquej in", yiꞌ sánacdyeꞌ.
16¿Tyi buty meꞌ jiquej seꞌveptety p̂eyacdyeꞌ in ĉụiꞌsiꞌĉansiꞌ chụꞌ Jenꞌsiꞌ jiquej muꞌ judyeyaꞌ vaꞌquecbitety in? Muꞌin Egiptoĉan shubantyiꞌ jiquej in, jiꞌshupcactyiꞌ Moiséstyiꞌ jiquej in. 17¿Tyi buty muꞌin in jam maꞌjotacsi Jenꞌ jiquej, vạjpedyeꞌ quiꞌtac yómodyeꞌ jịꞌfajte in? Muꞌin juchatutety jiquej in judyeyaꞌ säñity in, cäjyasĉan jac muꞌĉan vaꞌcac aꞌ muꞌin. 18¿Tyi buty muꞌin jiquej in Jenꞌ yụꞌtyeyacsi fersiꞌ p̂eyacdyeꞌ muꞌ, jéyacsi: "Miꞌin raꞌ jam junꞌ yútyetiñeꞌ mọꞌ jac, mijam raꞌ jịꞌjutyiti muꞌĉan miꞌin?" Muꞌin jam chiqueptety p̂eyacdyeꞌ jiquej in.#3:18 Números 14:20-23 19Anic jorojĉan muꞌ Jenꞌ jam jiꞌsitacsi muꞌĉan in ĉaĉaij na jam anicjete in.
Currently Selected:
Hebreodyes 3: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
