Génesis 44

Josésiꞌ tyéquis muꞌ

1Aty meꞌsiꞌ muꞌ José jéte muꞌ ĉọjcaptety acaꞌ muꞌ:

—Bänänäjjeyacsebiva obota utstyiꞌ q̂uinꞌ in, junꞌ quiꞌ chuc mạꞌjeꞌ cạiꞌ in paj meꞌquiꞌ cạiꞌ in, judyeyaꞌ jịꞌcaꞌñeyeyacseban ram querec̣ha muꞌin, cäts obotaĉaĉan raꞌ yụꞌtyeyeyacseban mi querec̣ha muꞌin. 2Chimeꞌdye raꞌ yụ́smun tyéquis mọꞌ plata jäquitytyiꞌĉan obota muꞌ mọꞌĉan raꞌ yụꞌtyem querec̣hatum muꞌ trivoveijtyiꞌ tsanꞌ muꞌ —yi José jajiti.

Muꞌ ĉọjcaptety acaꞌ chiquepte p̂eyacdyeꞌ Josés muꞌ. 3Aty mạijyejoiꞌ, jutacseban vojity muꞌ, miꞌeban in cuꞌdyeꞌtum muꞌin. 4Jambiꞌ moch tyibun in, José jéte ĉọjcaptety acaꞌ:

—Tạij jịjchacacsebada muꞌin muntyiꞌ in. Chaꞌshacsiyam jéyacsi ram: "Tsun nash nọ́tyeyac, ¿junꞌ dash meꞌ ac̣hiꞌtiĉaꞌ tsun miꞌin? ¿Junꞌ dash shiꞌatutactinte mọꞌ tyéquis ayoꞌsiꞌ yụ? 5Jam chịj miꞌin mọꞌ nash ĉụiꞌsiꞌ tyéquis muꞌ, mọꞌĉan tyeijĉan judyeyaꞌ chimeꞌ mọꞌdye chị́dyeꞌ jasoꞌmiti. ¡Där ac̣hiꞌc̣hity miꞌin!", meꞌ raꞌ jéyacsim —jéte José ĉọjcaquity acaꞌ muꞌ.

6Anicdye meꞌ, muꞌ ĉọjcaptety acaꞌ chaꞌshacsi, mọꞌdyemꞌ p̂eyacdyeꞌ jéyacsi. 7Vorjete in:

—¿Junꞌ dash meꞌ jítiĉaꞌ tsun miꞌin? ¡Jam nash tsun ac̣hiꞌ dyijyi! 8Jeshaꞌ, muꞌ obotaĉantyiꞌ querec̣ha dạctety jiquej tsun, yoquiꞌdyemꞌ Canaánĉan jijtubanyaꞌ jiquej u tsun, muꞌdye tubajte quivij tsun paj qui miꞌin soꞌmebadyeyac. Jam nash tsun shiꞌatubiyac ayoꞌ mi, mijam plata mijam oro mijam joꞌmety chute tsun. 9Yụ raꞌ jéye, meꞌ shuꞌatute jụijyaꞌ tsun, muꞌ raꞌ ijac jụꞌñity chuc mọꞌ meꞌchuiꞌtyiꞌ tyéquis, tsun raꞌ úñity buꞌyi muꞌdyes.

10Vorjeyacsi muꞌ ĉọjcaptety acaꞌ:

—Meꞌ raꞌ yoj jitiĉaꞌdyemꞌ q̂uinꞌ u miꞌin, yirity qui na ramꞌ meꞌ yụꞌtac, muꞌ meꞌchuiꞌtyiꞌ mọꞌ tyéquis, muꞌ ramꞌ meꞌ yụꞌtac, miꞌin na raꞌ meꞌ mọmoꞌ faraj, jam raꞌ jedyeij miꞌin, jọban raꞌ mọmoꞌ miꞌin —yi jéyacsi.

11Cavintum jịꞌchaqui in obota muꞌin cuꞌdyeꞌchety muꞌin judyeyaꞌ dajtaqui in. 12Muꞌ ĉọjcaptety acaꞌ räj obotaĉan quevtyetacseban, tiyacchute muꞌ tashitytyiꞌ vojity muꞌ, junꞌ quiꞌ chuc chaꞌshepte obotamꞌ muꞌ jäquitytyiꞌ, meꞌ meꞌ quevtyetacseban obotaĉan. Mọꞌĉan dạcbibajte mọꞌ tyéquis Benjamíntyiꞌĉan obota. 13Aty cạveteyaꞌ muꞌin chat qui muꞌin räjdye shẹiꞌjeyaqui quịꞌsiꞌ táredyedyety muꞌin. Quivij yụꞌtaĉan in cuꞌdyeꞌcheꞌ obota muꞌin quivij camanꞌjebanꞌ in chimuꞌĉan jịjcaban in. 14Venjoban quivij in Josésĉan acaꞌ muꞌ, muꞌĉan dạquiĉajte quivij in. Dyụtsyi muꞌyaꞌ in täjjequeꞌ jac jáfiyaꞌ muꞌin. 15José jéyacsi:

—¿Junꞌ dash meꞌ miꞌin? ¿Jam adac chịj miꞌin tyi chuc meꞌtyity jụijyaꞌ, yụ tupuj chị́yete ĉaĉaij na chị́dyeꞌ soꞌmactyiꞌ yụ?

16Vorjete Judá:

—Jätäjjeyacdyemꞌ tsun. Jam tupuj ñutsjiti ĉụiꞌ tsun, Jenꞌ chäyibun juchaj tsun. Úyaꞌ u tsun, aty raꞌ úñedyeꞌĉan siti mídyes tsun, chimeꞌdye muꞌ meꞌchuiꞌtyiꞌ tyéquis mi.

17Vorjeyacsi José:

—Jam raꞌ junꞌ meꞌ, tyi chuc meꞌchuiꞌtyiꞌ mọꞌ tyéquis, muꞌ ramꞌ tacyaꞌ úñity yụ. Miꞌin raꞌ jọban tupuj, jenꞌsiꞌĉan acaꞌ jịjcaban miꞌin, jam raꞌ tyi ñúnac judyeyaꞌ jam raꞌ jedyeij miꞌin.

Judá ñutsjete Benjamín

18Chat qui muꞌ Judá ĉọcte José jéte:

—Damꞌ yụ mạꞌjeꞌ p̂eyeye, yụ cọdyeye jam raꞌ fáquitim ĉaĉaij na mi nash ayoꞌbuꞌyi, jeñej mujuꞌchaty ayoꞌ Faraón, meꞌ buꞌyi mi. 19Yoquiꞌdyemꞌ atsijyaꞌ tsun jiquej u, mi bishaꞌ jítiĉaꞌ miꞌin: "¿Muꞌyaꞌ caꞌ jenꞌ miꞌin? ¿Muꞌyaꞌ caꞌ yoctyiꞌ vojity miꞌin?" jítiĉaꞌ bishaꞌ tsun miꞌin. 20Tsun qui bajaꞌ vorjeyac: "Muꞌyaꞌ jenꞌ tsun, aty ishoꞌ muꞌ judyeyaꞌ muꞌyaꞌ chimeꞌ jäquity vojity tsun ishodyeꞌĉan naꞌity. Muꞌ nash ạꞌyaty ạvaꞌ jenꞌtyiꞌ tsun yiritydyety mọꞌtyiꞌ ạvaꞌ mọꞌ tseꞌtyiꞌ, ĉaĉaij na aty säñi vojity muꞌ", meꞌ bajaꞌ jéyac tsun. 21Chat qui bishaꞌ mi jítiĉaꞌ tsun miꞌin paj qui tubajte tsun paj qui cạvete mi. 22Tsun qui bajaꞌ jéyac: "Jam raꞌ junꞌ farajjeyaqui jenꞌ muꞌ areꞌĉa säñi jenꞌ muꞌ táredyedyes", jéyac bishaꞌ tsun jiquej. 23Meꞌ tsanꞌ meꞌ mi qui na bamꞌ yenꞌtyiꞌ jívaꞌtiĉaꞌ tsun miꞌin: "Jam tutinte jụijyaꞌ muꞌ, jam raꞌ junꞌ ĉúshudyiĉaꞌ yụ miꞌin", jítiĉaꞌ bajaꞌ tsun miꞌin.

24Aty Canaánĉan venjoban tsun acaꞌyaꞌ tsun, räj jéyaĉan jenꞌ tsun p̂eyacdyeꞌ mi, jítiĉas tsun miꞌin. 25Aty men jin jenꞌ tsun: "Cuvij raꞌ chimuꞌĉan Egiptoĉan miꞌin, cuvij raꞌ yaꞌiyequi damꞌ trivo miꞌin." 26Tsun na jéyaĉan jenꞌ tsun: "Jam raꞌ junꞌ muꞌve jịjcaban tsun, jam jịꞌcateyam uts jäquity vojity tsun, itŝij qui na raꞌ jụijyaꞌ muꞌ, mijam raꞌ junꞌ jiꞌcavibun tsun muꞌĉantyiꞌyaꞌ muntyiꞌ." 27Chat qui muꞌ jenꞌ tsun yi: "Chịj nash miꞌin Raquelvunĉan mọꞌĉan ạvaꞌyi yụ päräꞌ ạvaꞌ yụ, 28muꞌ tashchety aty itŝij, yi yụ areꞌ vajedyedyeij muꞌ, mijam damꞌ quivij cạvebajte yụ. 29Q̂uinꞌ qui namꞌ mạꞌjeꞌ catyitiĉaꞌ miꞌin uts jäquity ạvaꞌ yụ. Vatyquej raꞌ muꞌ chimeꞌ jedyeij muꞌve tári raꞌ yụ, mọꞌdye raꞌ ijan yụ táris, ĉaĉaij na anic ishoꞌ aty yụ", yi jenꞌ jin tsun.

30Cạvevaꞌ aty chịj mi, muꞌ jenꞌ tsun anic fer jemonaqui ĉojtyiꞌĉan muꞌ ạvaꞌ muꞌ nanaty. Taĉan jụijyaꞌ muꞌ nanaty, tyäꞌpäj raꞌ jụijyaꞌ muꞌ shupqueĉanyaꞌ tsun, 31tári raꞌ vatyquej tyeij jenꞌ tsun, mọꞌdye raꞌ jaꞌujati, tsunsiꞌ raꞌ juchaj shupquiꞌ. 32Jéte jenꞌ tsun, "Yụ́dye raꞌ ĉọjcate uts nanaty." Chimeꞌdye jéte yụ: "Jam raꞌ jịꞌcaꞌñeyebadyeye yụ, ĉụiꞌsiꞌ raꞌ jiꞌmeꞌtidyeꞌ yụ, mijam raꞌ junꞌ mọtsiꞌ juchaj yụ mísiꞌyaꞌ vej", jéte yụ jenꞌ tsun. 33Mọꞌdyes yụ fer cọdyeye paj qui yụ́dye mọmoꞌ siti úñedyeꞌĉan nanatydyes, paj jọban acaꞌyaꞌ uts nanaty vojitytumdye muꞌ. 34Jam yụ mạꞌjeꞌ meꞌ ventajquiĉan jenꞌ itŝij vojity yụ. Jam yụ mạꞌjeꞌ meꞌ cạvebite yụ jenꞌsiꞌ táris muꞌ —yi muꞌ Judá jéte José.

Currently Selected:

Génesis 44: CAS

Highlight

Copy