Exodo 7
7
Jenꞌ jutacsi ayoꞌyaꞌ muꞌ Moisés judyeyaꞌ Aarón
1Yi muꞌ Ayoꞌ jajiti muꞌ Moisés:
—Yụ raꞌ yuꞌtim paj qui mi fer buꞌyi ayosyaꞌ vej muꞌ, yojdyemꞌ yụ u, meꞌdye raꞌ mi. Muꞌ Aarón vojity mi, muꞌ raꞌ p̂eyaquity ayoꞌtum mídyes. 2Jụꞌñis chuc yụ soꞌmeyes p̂eyacdyeꞌ, mọꞌdye raꞌ jiꞌjiyete Aarón mi, paj qui muꞌ jéte ayoꞌ p̂eyacdyeꞌ yụ. Muꞌ raꞌ jéte paj qui muꞌ farajjeyacsi muꞌin Israeltyiꞌ vóshiꞌ muꞌ paj qui yacchupte in ọij jac ayos muꞌ. 3Yụ raꞌ jiꞌyäjquepte ĉojtyiꞌ ayoty muꞌ, meꞌ meꞌ qui raꞌ yụ daiꞌ quiꞌ jịꞌcaveyacsi ferdyeꞌ Egiptoĉantyiꞌ in. 4Muꞌ na ayoꞌ jam raꞌ junꞌ chäquinac miꞌin, yụ qui raꞌ jịꞌcaveyacsi ferdyeꞌ yụ, därsiꞌ raꞌ vaꞌtacdyeꞌ soꞌmacsi yụ, yụ raꞌ jiꞌshupcacsi Israeltyiꞌ vóshiꞌ muꞌ, cäts raꞌ ñuruꞌ jịjcaij in. 5Aty raꞌ meꞌsiꞌ jịꞌcaveyacsiyaꞌ ferdyeꞌ yụ, aty jiꞌshupcacsiyaꞌ yụ muꞌin Israeltyiꞌ vóshiꞌ muꞌ, chat raꞌ meꞌ chäyin yụ in muꞌin Egiptoĉantyiꞌ in yụ nash anictyity Ayoꞌ —yi muꞌ Ayoꞌ jajiti Moisés.
6Anicdye meꞌ, muꞌ Moisés judyeyaꞌ Aarón chiquepte in Ayoꞌsiꞌ p̂eyacdyeꞌ muꞌ, muꞌ soꞌmacsis. 7Q̂uenꞌĉan quiꞌtac yómodyeꞌ tyitiꞌ muꞌ Moiséssiꞌ, muꞌsiꞌ na Aarónsiꞌ q̂uenꞌĉan quiꞌtac chibin jiyiꞌ, yoquiꞌdyemꞌ ayoꞌyaꞌ jiꞌcavitiyaꞌ u in.
Aarónsiꞌ mutyudyeꞌ muꞌ
8Ayoꞌ jajiti Moisés Aaróntum:
9—Ferdyeꞌ cudyinac jụijyaꞌ muꞌ ayoꞌ, jéte raꞌ mi muꞌ Aarón paj qui mụijyaꞌ farajjeyaqui mutyudyeꞌ muꞌ ayoꞌsiꞌyaꞌ vej muꞌ, paj nas muñiꞌ muꞌ.
10Anicdye meꞌ ĉọcte muꞌin in, jịꞌcaveyete in yoj jeyacsidyemꞌ Jenꞌ jiquej u. Ayoꞌsiꞌyaꞌ vej muꞌ judyeyaꞌ nọ́taquitysiꞌyaꞌ chimeꞌ muꞌ, muꞌ Aarón mụijyaꞌ muꞌ farajjeyaqui mutyudyeꞌ muꞌ, nas tŝọiꞌ mụijyaꞌ muꞌ. 11Muꞌ ayoꞌ cavin jiꞌvorvaqui cọcojsiꞌ muꞌ judyeyaꞌ chị́jtyiꞌ muntyiꞌ muꞌ. Ĉụiꞌsiꞌyaꞌ ferdyeꞌ muꞌin mọꞌdye muꞌin jịꞌcaveyacsi in, 12yósiꞌdyemꞌ muꞌin u in, meꞌsiꞌdye mụijyaꞌ farajjeyaqui in mutyudyeꞌ muꞌin, meꞌsiꞌdye nas tŝọiꞌ muꞌin. Mọꞌ na Aarónsiꞌ mutyudyemꞌ coñiñinꞌjeyacsiꞌ räj cọcojsis mutyudyeꞌ muꞌin, tasjeyacsebiꞌ. 13Meꞌ tsanꞌ meꞌ muꞌ qui namꞌ ayoꞌ yäcäjyejoij muꞌtyiꞌ ĉojtyiꞌ, jam junꞌ seꞌvacsi, cätsdye yi jiquej muꞌ Jenꞌ.
Chäsh muñiꞌ ojñiꞌ
14Ayoꞌ jajiti Moisés:
—Uts ayoꞌ yäcäjyejoij muꞌtyiꞌ ĉojtyiꞌ, jam muꞌ mạꞌjeꞌ yacchucsi Israeltyiꞌ vóshiꞌ muꞌ. 15Nojno raꞌ mạyedyeꞌ jäꞌmij cojiroyaꞌ jịjcaij mi mutyudyeꞌtum ram, mọꞌ nas muñis jiquej mi, tsävcheꞌ raꞌ bistem. 16Jéte ram muꞌ ayoꞌ: "Muꞌ Jenꞌ Ayoꞌ hebreoty in muꞌ nash jutin yụ paj qui yụ jéye, yi muꞌ: Farajjibut raꞌ muntyiꞌ yụ, paj cäjyaꞌ jịjcaij in timaꞌquin yụ in, yi muꞌ. A tsanꞌ jéye jiquej, mi qui namꞌ jam méquiꞌ chiquepte p̂eyacdyeꞌ muꞌ. 17Mọꞌdyes qui muꞌ Ayoꞌ jin mi: Q̂uinꞌ raꞌ chat chäyitim yụ anictyity Ayoꞌ, cavibutiꞌ ram ferdyeꞌ yụ, yi muꞌ. Mutyudyeꞌyaꞌ yụ raꞌ pacjeꞌ cojiroĉansiꞌ ojñiꞌ, chäsh raꞌ tyeiꞌ ojñiꞌ. 18Säñiꞌ raꞌ mọꞌĉansiꞌ tạbedyeꞌ in, anic raꞌ p̂oquiꞌ ojñiꞌ, mijam raꞌ junꞌ tupuj tyéban Egiptoĉantyiꞌ in", meꞌ raꞌ jéte mi muꞌ ayoꞌ —yi muꞌ Jenꞌ jajiti Moisés.
19Ayoꞌ jajiti muꞌ Moisés:
—Jéme muꞌ Aarón paj qui tapjeyaqui mutyudyeꞌ judyeyaꞌ c̣họcoꞌjeyaqui paiꞌ ojñiꞌĉan, cojiroĉan, jinacĉan, tsiqueꞌĉan, meꞌ paiꞌ buꞌyis ojñiꞌ jacĉansiꞌ paj qui chäsh muñiꞌ. Meꞌ tsanꞌ yụꞌtidyesĉansiꞌ ojñiꞌ judyeyaꞌ puñujĉansiꞌ chimeꞌ, räj raꞌ chäsh muñiꞌ, räj buꞌyiꞌ raꞌ meꞌ Egiptoĉan.
20Anicdye meꞌ muꞌ Moisés judyeyaꞌ Aarón chiquepte muꞌin Jenꞌsiꞌ p̂eyacdyeꞌ muꞌ. Ayoꞌsiꞌyaꞌ vej muꞌ judyeyaꞌ nọ́taquitysiꞌyaꞌ chimeꞌ, muꞌ Aarón c̣họcoꞌjeyaqui mutyudyeꞌ muꞌ, cojiroĉansiꞌ qui pacjeꞌ ojñiꞌ. Chäsh vatyquej jiꞌtyeꞌ. 21Räj vatyquej säñiꞌ cojiroĉansiꞌ tạbedyeꞌ in, anic p̂oquiꞌ vatyquej tyeiꞌ ojñiꞌ. Egiptoĉantyiꞌ muntyiꞌ in aty jam junꞌ tyeij ojñiꞌ in, yojyojdyemꞌ ojñiꞌ o, meꞌ meꞌ yedyej chäshtumsiꞌ ojñiꞌ shupquiꞌ Egiptoĉansiꞌ in.
22Muꞌin na ayoty cọcojsiꞌ in chimeꞌjeꞌdye muꞌin in. Meꞌ tsanꞌ meꞌ, tacaꞌ qui namꞌ yäcäj ĉojtyimꞌ ayoty, mijam méquiꞌ chicacsebi p̂eyacdyeꞌ muꞌin Moiséssiꞌ judyeyaꞌ Aarónsiꞌ, rụijdye yi Jenꞌ jiquej jajitaque. 23Muꞌ qui ayoꞌ acaꞌyaꞌ jịjcaban, mijam méquiꞌ seꞌvacsebi p̂eyacdyeꞌ muꞌin. 24Muꞌin na muntyiꞌ in paiꞌ muꞌin foc̣honjeꞌ jac in tsävcheꞌ in, ojñiꞌ queveꞌ in, ĉaĉaij na aty jam junꞌ damꞌjeꞌ cojiroĉansiꞌ ojñiꞌ in.
Shach ococo shupquiꞌ in
25Aty yävätidyeꞌ mạyedyeꞌ meꞌquiꞌ chäsh buꞌyiꞌ yụꞌtyeꞌ ojñiꞌ muꞌ Ayoꞌ, quivij jajibun muꞌ Moisés.
Currently Selected:
Exodo 7: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
