Exodo 6
6
1Muꞌ Ayoꞌ vorjajiti:
—Q̂uinꞌ raꞌ cạvete mi junꞌjete chuc raꞌ yụ muꞌ ayoꞌ, ĉaĉaij na ferdyeꞌyaꞌ raꞌ mọmoꞌ yụ tupuj jiꞌshupcacsi. Muꞌ raꞌ jam farajjeyacsi mọmoꞌ, muꞌ raꞌ ferdyeꞌyaꞌ jiꞌshupcacsi —yi muꞌ Jenꞌ.
Jenꞌ cuvij jafaijdyi muꞌ Moisés
2Jenꞌ jap̂iyiti muꞌ Moisés jajiti:
—Yụ nash Jehová, 3yụ jiꞌcaviti Abrahamyaꞌ jiquej judyeyaꞌ Isaacyaꞌ judyeyaꞌ Jacobyaꞌ chimeꞌ, jéyacsi yụ, "Yụ nash ferdyeꞌtumtyiꞌ Jenꞌ", jam qui namꞌ anicsis tịj jiꞌjäcaqui yụ, yụ jam jịꞌchiqueyacsi tịj yụ, jam jéte yụ: "Jehová nash tịj yụ." 4Chimeꞌdye yụ yụꞌtyeyacsi p̂eyacdyeꞌ, jéyacsi yụ: "Yụ́dye raꞌ soꞌmeyac ọij jac Canaán", jéyacsi yụ. Meꞌ tsanꞌ jambiꞌ soꞌmac in, aty qui namꞌ muꞌĉan bäꞌyi in, jeñej yocve atsijtyiꞌ in, meꞌ bäꞌyi jiquej in. 5Q̂uinꞌ aty seꞌvacsebi yụ táredyeꞌ muꞌin Israeltyiꞌ vóshiꞌ muꞌ, ĉaĉaij na muꞌin Egiptoĉantyiꞌ in fercheꞌ jiꞌunacsi in. Yụ dyijtuĉan p̂eyacdyeꞌ yụ yụꞌtyeyeyacsis jiquej yụ.
6Mọꞌdyes qui raꞌ yụ juteye mi jéyacsequi ram muꞌin Israeltyiꞌ vóshiꞌ muꞌ, jéyacseva: "Yụ nash Jehová, yụ raꞌ jiꞌc̣honyac úñedyeꞌĉantyiꞌ miꞌin, fer q̂uinꞌ jiꞌuñinac miꞌin muꞌin Egiptoĉantyiꞌ in. Därsiꞌyaꞌ raꞌ ferdyeꞌ yụ jiꞌshupjadyeyac miꞌin, jịꞌcaveyacsi raij ferdyeꞌ muꞌin Egiptoĉantyiꞌ in därsiꞌ raꞌ vaꞌtacdyeꞌ soꞌmacsi yụ. 7Yụ raꞌ yụꞌtyeyac yụty qui raꞌ muntyiꞌ miꞌin, judyeyaꞌ yụ qui raꞌ Jenꞌ miꞌin. Aty raꞌ jiꞌc̣honyacyaꞌ yụ úñedyeꞌĉantyiꞌ miꞌin Egiptoĉan, chat qui raꞌ chịj miꞌin yụ nash anictyity Jenꞌ Ayoꞌ miꞌin. 8Yụ raꞌ cạyac miꞌin jämꞌsiꞌĉan jac, yódyesdyemꞌ soꞌmacsis jiquej u yụ muꞌin vóshiꞌ miꞌin, muꞌ Abraham judyeyaꞌ Isaac, judyeyaꞌ Jacob. Ĉụiꞌsiꞌcheꞌ tịj yụ yụꞌtyeyeyacsiij p̂eyacdyeꞌ jiquej, yụ raꞌ soꞌmacsi jac. Q̂uinꞌ raꞌ yụ soꞌmeyac miꞌin. Yụ nash Jehová", jéyacseva —meꞌ Jenꞌ jajiti Moisés.
9Chat qui muꞌ Moisés chijeyacsebandye muꞌin Israeltyiꞌ vóshiꞌ in mọꞌdye p̂eyacdyeꞌ yódyesdyemꞌ jasoꞌmitis Jenꞌ u. Muꞌin na jam damꞌ seꞌvepte p̂eyacdyeꞌ in ĉaĉaij na anic där yoqui in judyeyaꞌ mọꞌ fersiꞌ carijtacdyeꞌ anic jiꞌnoꞌbacsiꞌ in.
10Ayoꞌ jajiti muꞌ Moisés:
11—Tạij jecte ramꞌ faraón muꞌ ayoꞌ Egiptoĉantyiꞌ paj qui muꞌ farajjeyacsi muꞌin Israeltyiꞌ vóshiꞌ muꞌ paj qui yacchupte in ayos jac muꞌ.
12Moisés vorjete muꞌ Ayoꞌ:
—Jeshaꞌ, muꞌin Israeltyiꞌ vóshiꞌ in jam mạꞌjeꞌ seꞌvin yụ in. ¿Junꞌ qui bu raꞌ meꞌ tupuj chäquin yụ muꞌ faraón yụ na jänꞌjänꞌyi p̂eyaquity?
13Muꞌ Ayoꞌ jutacsi muꞌin Moisés judyeyaꞌ Aarón yi muꞌ:
—Jéyacsebadac muꞌin Israeltyiꞌ vóshiꞌ in judyeyaꞌ muꞌ Egiptoĉantyiꞌ ayoꞌ: "Muꞌ Jehová jutin tsun paj qui jiꞌshupcacseban muꞌin Israeltyiꞌ vóshiꞌ in Egiptoĉan", yi muꞌ.
Aaróntyiꞌ judyeyaꞌ Moiséstyiꞌ vóshiꞌ in
14Uts in tashchety vóshiꞌ in pạrej ñuruꞌtyity in Israeltyiꞌ vóshiꞌ muꞌ: Muꞌin ạvaꞌ Rubéntyiꞌ Israeltyiꞌ tashchety ạvaꞌ muꞌ: Hanoc, Falú, Hezrón judyeyaꞌ Carmi. Muꞌin vóshiꞌ Rubéntyiꞌ muꞌ, muꞌtyiꞌ ñuruꞌtyity in.
15Simeóntyiꞌ ạvaꞌ muꞌ: Jemuel, Jamín, Ohad, Jaquín, Zohar judyeyaꞌ Saúl. Mọꞌ na Saúlsiꞌ tseꞌ muꞌ, Canaánĉan bäꞌyis mọꞌ. Muꞌin vóshiꞌ Simeóntyiꞌ muꞌ, muꞌtyiꞌ ñuruꞌtyity in. 16Levítyiꞌ ạvaꞌ muꞌ: Gersón, Coat judyeyaꞌ Merari. Aty yiriꞌ cien chibin quiꞌtac yävätidyeꞌ yómodyeꞌ tyiti jiquej chat q̂uinꞌdyemꞌ säñi muꞌ Leví.
17Gersóntyiꞌ ạvaꞌ muꞌ: Libni judyeyaꞌ Simei.
18Coattyiꞌ ạvaꞌ muꞌ: Amram, Izhar, Hebrón judyeyaꞌ Uziel. Aty yiriꞌ cien chibin quiꞌtac chibin yómodyeꞌ tyiti jiquej muꞌ Coat chat q̂uinꞌdyemꞌ säñi muꞌ.
19Merarityiꞌ ạvaꞌ muꞌ: Mahli judyeyaꞌ Musi. Muꞌin vóshiꞌ Levítyiꞌ muꞌ, muꞌtyiꞌ ñuruꞌtyity in.
20Amram vämi ĉụiꞌsiꞌcheꞌ yayaꞌ muꞌ Jochebed, päräꞌ ạvaꞌ mọꞌĉan muꞌ: Aarón judyeyaꞌ Moisés. Aty yiriꞌ cien chibin quiꞌtac yävätidyeꞌ yómodyeꞌ tyiti jiquej chat q̂uinꞌdyemꞌ säñi muꞌ Amram.
21Izhartyiꞌ ạvaꞌ muꞌ: Coré, Nefeg judyeyaꞌ Zicri.
22Uzieltyiꞌ ạvaꞌ muꞌ: Misael, Elzafán judyeyaꞌ Sitri.
23Aarón vämi mọꞌcheꞌ Elisabetcheꞌ, Aminadabsiꞌ ạvaꞌ muꞌ judyeyaꞌ Naasónsiꞌ vojiꞌ muꞌ. Aaróntyiꞌ ạvaꞌ mọꞌĉan: Nadab, Abihu, Eleazar judyeyaꞌ Itamar.
24Corétyiꞌ ạvaꞌ muꞌ: Asir, Elcana judyeyaꞌ Abiasaf. Muꞌin vóshiꞌ Corétyiꞌ muꞌ, muꞌtyiꞌ ñuruꞌtyity in.
25Eleazar, Aaróntyiꞌ ạvaꞌ muꞌ, vämi mọꞌcheꞌ Futielsiꞌcheꞌ ạvaꞌ muꞌ. Eleazartyiꞌ ạvaꞌ mọꞌĉan: Finees.
Uts in tashchety vóshiꞌ in muꞌin yoc yoc ñuruꞌ in Levítyiꞌ vóshiꞌ muꞌ.
26Uts in muꞌindye Moisés judyeyaꞌ Aarón jéyacsity muꞌ Ayoꞌ jiquej:
—Jiꞌshupcacseban muꞌin Israeltyiꞌ vóshiꞌ in Egiptoĉantyiꞌ in cäts ñuruꞌtyity jịjcaij in. 27Muꞌindye jéte jiquej in muꞌ Faraón muꞌ Egiptoĉantyiꞌ ayoꞌ junꞌ chuc raꞌ muꞌin jiꞌshupcacsi muꞌin Israeltyiꞌ vóshiꞌ in Egiptoĉantyiꞌ úñity in. Muꞌindye in Moisés judyeyaꞌ Aarón meꞌjetyity jiquej in.
Ayoꞌ jap̂iyiti Moisés judyeyaꞌ Aarón
28Yoquiꞌdyemꞌ muꞌ Ayoꞌ jap̂iyitiyaꞌ Moisés u Egiptoĉan jiquej, 29yi muꞌ Ayoꞌ jajiti:
—Yụ nash Jehová. Jéme muꞌ faraón ayoꞌ Egiptoĉantyiꞌ räj p̂eyacdyeꞌ mọꞌ jéyes yụ.
30Muꞌ qui Moisés vorjeteyaꞌ muꞌ Ayoꞌ yi:
—Yụ nash jänꞌjänꞌyi p̂eyaquity ¿junꞌ a ĉa muꞌ faraón chäquibun p̂eyacdyeꞌ yụ?
Currently Selected:
Exodo 6: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
