Exodo 36
36
Muntyiꞌ in aty jiyiꞌdye jedyeꞌ tuqui in
1Meꞌdyes qui Bezaleel, Aholiab judyeyaꞌ räj muꞌin chị́jtyiꞌ in, tyi ĉụiꞌ jiquej jasoꞌmitity dyijyedyeꞌ Jenꞌyaꞌ carijtacdyedyes muꞌ, muꞌin meꞌjeꞌ raꞌ mọꞌ carijtacdyeꞌ in yoj yidyemꞌ muꞌ Jenꞌ jiquej u. 2Chat Moisés fayacsi Bezaleel, Aholiab judyeyaꞌ räj muꞌin chị́jtyiꞌ carijtaquity in soꞌmactyiꞌ in dyijyedyeꞌ Jenꞌyaꞌ jiquej. Räj muꞌin qui mạꞌjeꞌ meꞌjeꞌ in mọꞌ carijtacdyeꞌ Jenꞌdyes, atsij muꞌin in. 3Muꞌ Moisés soꞌmacsi muꞌin carijtaquity in räj mọꞌin jedyeꞌ tuyetes jiquej in muꞌinyaꞌ Israeltyiꞌ vóshiꞌ in mọꞌdyes Jenꞌsidyes acaꞌ tinates muꞌ. Judyeyaꞌ yejĉoij muꞌin muntyiꞌ in cäts mạyedyeꞌ jịjcaiꞌ dadamꞌ tucsi jedyeꞌ in acadyes. 4Chat qui muꞌin carijtyeꞌtyiꞌ Jenꞌsiꞌ acaꞌ tinates muꞌ yacchuqui ĉụiꞌsiꞌ carijtacdyeꞌ acaꞌyas muꞌin chat qui ĉọcte in muꞌ Moisés. 5Muꞌin jéte in muꞌ Moisés:
—Muꞌin muntyiꞌ in aty jiyiꞌdye jedyeꞌ tuqui in. Aty jiyiꞌdye mọꞌ jemonacsi in mọꞌ qui carijtacdyedyes soꞌmisinꞌsiꞌ tsun muꞌ Ayoꞌ.
6Chat qui muꞌ Moisés juteꞌ p̂eyacdyeꞌ muꞌindyes in räj dyäquedyeꞌyaty in:
—Mijam raꞌ sonꞌ in, mijam raꞌ p̂en in, damꞌdye tuban jedyeꞌ in mọꞌdyes mọꞌ Jenꞌsiꞌ acaꞌ tinates muꞌ. Meꞌdyes muꞌsiꞌ p̂eyacdyeꞌ ñutsjeĉunacsi muntyiꞌ in jam qui yejĉoij tuqui jedyeꞌ in 7ĉaĉaij na muꞌin aty mujuꞌchaꞌ tuqui jedyeꞌ in carijtacdyedyes.
Jämꞌtyeꞌ in Jenꞌsiꞌ acaꞌ
8Muꞌin chị́jtyiꞌ carijtaquity jämꞌtyeꞌ in Jenꞌsiꞌ acaꞌ tinates muꞌ yiriꞌtactum quịꞌsiꞌ in. Muꞌin quịꞌsiꞌ in jämꞌtacsi muꞌin búmaꞌyaꞌ yushñuty, judyeyaꞌ jäijnäty, judyeyaꞌ jeꞌñety faj, judyeyaꞌ chimeꞌ yaꞌijtyiꞌ quịꞌsiꞌ lino. Muꞌin chị́jtyiꞌ carijtaquity in jämꞌtacsi chimeꞌ shásha querubin buꞌyity quịꞌsiꞌcheꞌ in. 9Räj muꞌin yiriꞌtac quịꞌsiꞌ vaj meij quiꞌyaꞌmun tuputucdyeꞌ; yiriꞌtac päräꞌ metro moc̣hadyemꞌ judyeyaꞌ päräꞌ metro därvedyemꞌ. 10Muꞌin cächtacsi ĉanamꞌ quịꞌsiꞌ in paj qui yiritymuntyity shupqui. Chimeꞌ muꞌin yoctyiꞌ ĉanamꞌ quịꞌsiꞌ in cächtacsi paj qui yoctyiꞌmuntyity shupqui. 11Judyeyaꞌ muꞌin dyebacsi yushñutyyaꞌ quịꞌsiꞌ fodoiꞌtacdyeꞌ pis yiritymuntyity quịꞌsiꞌ muꞌ judyeyaꞌ chimeꞌjeyacdye yoctyiꞌ muntyitycheꞌ. 12Muꞌin dyebacsi ĉanamꞌ quiꞌtac fodoiꞌtacdyeꞌ pisve yiritymuntyity quịꞌsiꞌ judyeyaꞌ chiĉanamꞌ quiꞌtacdye pisve muꞌ yoctyiꞌmuntyity quịꞌsiꞌ paj qui muꞌin fodoiꞌtacdyeꞌ pisve yiritymuntyity quịꞌsiꞌ penꞌdyetucsi muꞌin fodoiꞌtacdyeꞌ pisve muꞌ yoctyiꞌmuntyity quịꞌsiꞌ. 13Chimeꞌ jämꞌtacsi muꞌin ĉanamꞌ quiꞌtac vij buꞌyacñis quịꞌsiꞌ oro chat cächtacsi muꞌin päräꞌmuntyity quịꞌsiꞌ in paj qui yirity buꞌyi muꞌ quịꞌsiꞌ.
14Muꞌin jämꞌtacsi yiriꞌtac yirity quịꞌsiꞌ in chivosyaꞌ fin mọꞌ paj qui fajcheꞌ yụꞌtac in Jenꞌsiꞌ acaꞌ tinates muꞌ. 15Räj muꞌin quịꞌsiꞌ chivos fin muꞌ vaj meij quiꞌyaꞌmun tuputucdyeꞌ jämꞌtacsi in. Yirity quịꞌsiꞌ meꞌquiꞌyaꞌ yiriꞌtac chibin metro moc̣hadyemꞌ judyeyaꞌ päräꞌ metro därvedyemꞌ. 16Muꞌin cächtacsi ĉanamꞌ quịꞌsiꞌ in chivos fin muꞌ paj qui yiritymuntyity shupqui muꞌ. Judyeyaꞌ muꞌin cächtacsi muꞌin yoctyiꞌ jäbän quịꞌsiꞌ in chivos fin muꞌ paj qui yoctyiꞌmuntyity shupqui. 17Muꞌin jämꞌtacsi ĉanamꞌ quiꞌtac fodoiꞌtacdyeꞌ quịꞌsiꞌ in pisve yiritymuntyity quịꞌsiꞌ chivos fin muꞌ. Judyeyaꞌ chimeꞌ jämꞌtacsi in ĉanamꞌ quiꞌtac fodoiꞌtacdyeꞌ quịꞌsiꞌ in pisve muꞌ yoctyiꞌmuntyity quịꞌsiꞌ chivos fin muꞌ. 18Muꞌin jämꞌtacsi ĉanamꞌ quiꞌtac vij buꞌyacñis quịꞌsiꞌ bronce. Chat qui cächjeyacsi muꞌin päräꞌmuntyity quịꞌsiꞌ chivos fin muꞌ paj qui yirity buꞌyi shupqui muꞌ quịꞌsiꞌ. 19Muꞌin jämꞌte in yirity p̂urꞌtacdyety chivosyaꞌ shoꞌpaꞌ jäijnäsĉan c̣huctacsiꞌ, paj qui fajcheꞌ yụꞌte in muꞌ quịꞌsiꞌ chivoscheꞌ fin muꞌ. Chimeꞌ muꞌin jämꞌte in yoctyiꞌ p̂urꞌtacdyety shoꞌpaꞌyaꞌ mọꞌin marĉansiꞌyaꞌ jeꞌñes jebaꞌbadyeꞌ in. Chat fajcheꞌ yụꞌte in muꞌ p̂urꞌtacdyety chivoscheꞌ shoꞌpaꞌ mọꞌ.
20Muꞌin jämꞌtacsi tavara in son acacia mọꞌ mọꞌin quich buꞌyi yụꞌtacsis in mọꞌĉan Jenꞌsiꞌĉan acaꞌ tinates muꞌ. 21Cäts yirisisij tavara in moc̣hadyemꞌ vạjpedyeꞌ metro choc judyeyaꞌ därvedyemꞌ jäbän quiꞌtac jäbän centimetro in. 22Räj tavara in yujve in mọꞌyaꞌ päräꞌ yuj mọꞌin. Meꞌ buꞌyi muꞌin jämꞌtacsi räj tavara in yujtum in. 23Muꞌin jämꞌtacsi päräꞌ quiꞌtac tavara in mọꞌdyes jätisve Jenꞌsiꞌ acaꞌ tinates muꞌ. 24Chimeꞌ muꞌin jämꞌtacsi vạjpedyeꞌ quiꞌtac dyäch buꞌyacñis in platayaꞌ. Päräꞌ dyäch buꞌyacñis in yirisdyes tavara, yiris dyäch buꞌyis yirisdyes yuj tavaras. 25Chimeꞌ rocve Jenꞌsiꞌ acaꞌ tinates muꞌ muꞌin jämꞌtacsi päräꞌ quiꞌtac tavara in. 26Judyeyaꞌ vạjpedyeꞌ quiꞌtac dyäch buꞌyacñis plata, päräꞌ ọĉan yiris tavara. 27Muꞌin jämꞌtacsi jäbän tavara in mọꞌdyes damꞌcheꞌ Jenꞌsiꞌ acaꞌ tinates muꞌ, jịjcaijcheꞌ tsun. 28Chimeꞌ jämꞌtacsi päräꞌ tavara in quipdyivedyes in, damꞌcheꞌ Jenꞌsiꞌ acaꞌ tinates muꞌ. 29Mọꞌin tavara in vaj cäts buꞌyiꞌ mụijyaꞌ judyeyaꞌ jimijcheꞌ muꞌyaꞌ yirity coꞌtyity roc buꞌyidyes son paj qui jam yäcänyiꞌ mọꞌ. Mọꞌin pärenꞌ quipdyivedyes tavara vaj cäts jämꞌtacsi in. 30Mọꞌyaꞌ q̂uenꞌĉan tavara in, mọꞌintum yiriꞌtac jäbän dyäch buꞌyacñis in. Päräꞌ dyäch buꞌyacñis yirisdyes tavara.
31Muꞌin jämꞌtacsi roc buꞌyis in son acacia. Ĉanamꞌ yirisvedyes Jenꞌsiꞌ acaꞌ tinates muꞌ, 32judyeyaꞌ ĉanamꞌ yocvedyes Jenꞌsiꞌ acaꞌ tinates muꞌ, judyeyaꞌ ĉanamꞌ damꞌchedyes Jenꞌsiꞌ acaꞌ tinates muꞌ. 33Muꞌin jämꞌtacsi mọꞌin chidyiꞌĉanyas roc buꞌyis in paj qui soquemjeyacsi räj tavara naꞌrus in yóyaꞌdyemꞌ yụꞌtac o in. 34Fajcheꞌ tyeij oro räjcheꞌ mọꞌ tavara in. Chimeꞌ jämꞌtacsi muꞌin coꞌtyity oro judyeyaꞌ yụꞌtacsi tavaracheꞌ in paj qui mọꞌĉan tyeiꞌ roc buꞌyis in. Chimeꞌdye fajcheꞌ tyeij oro roc buꞌyischeꞌ in.
35Muꞌin jämꞌte yirity juñum buꞌyity quịꞌsiꞌ búmaꞌyaꞌ yushñuty judyeyaꞌ jäijnäty judyeyaꞌ jeꞌñety faj judyeyaꞌ yaꞌijtyiꞌyaꞌ quịꞌsiꞌ lino. Muꞌcheꞌ juñum buꞌyitycheꞌ jämꞌtacsi shásha querubin buꞌyity in muꞌinyaꞌ in chịjtyiꞌ p̂anactyiꞌ in. 36Muꞌin jämꞌtacsi vạjpedyeꞌ p̂otsoꞌvi in son acacia judyeyaꞌ fajcheꞌ tyeij oromꞌ mọꞌin. Muꞌin chimeꞌ jämꞌtacsi vij buꞌyacñis oro p̂otsoꞌvidyety in. Judyeyaꞌ muꞌin jämꞌtacsi dyäch buꞌyacñis p̂otsoꞌvidyes plata. 37Sisdyeꞌyaꞌ mọꞌ Jenꞌsiꞌ acaꞌ tinates muꞌ muꞌin jämꞌte in yirity chụiꞌdyety quịꞌsiꞌ. Muꞌin jämꞌte muꞌ quịꞌsiꞌ búmaꞌyaꞌ yushñuty judyeyaꞌ jäijnäty judyeyaꞌ jeꞌñety faj judyeyaꞌ chimeꞌ yaꞌijtyiꞌ quịꞌsiꞌ lino. Muꞌin chịj p̂anaquity in jämꞌte in muꞌ quịꞌsiꞌ. 38Chimeꞌ muꞌin jämꞌtacsi ĉanamꞌ p̂otsoꞌvi in son acacia in. Muꞌintum ĉanamꞌ vij buꞌyacñity oro jämi. Fajcheꞌ tyeij oro p̂otsoꞌvicheꞌ. Muꞌin chimeꞌ jämꞌtacsi ĉanamꞌ dyäch buꞌyacñis p̂otsoꞌvidyes bronce in.
Currently Selected:
Exodo 36: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
