Exodo 31
31
Muꞌin tsimꞌtac in carijtyeꞌ in Jenꞌsiꞌ acaꞌ judyeyaꞌ acaꞌĉandyes jedyeꞌ in
1Chat qui muꞌ Ayoꞌ jajiti Moisés:
2—Yụ aty tsimꞌte muꞌ Bezaleel, Urity ạvaꞌ muꞌ, Hurtyiꞌ vịyaꞌ muꞌ vóshiꞌ Judáty muꞌ, muꞌtyiꞌ ñuruꞌtyity muꞌ. 3Muꞌ tsimꞌte yụ judyeyaꞌ jịꞌtŝoyete Ạꞌedyeꞌ yụ dyijyedyeꞌ soꞌmete yụ paj qui jämꞌ chịj carijbun acaꞌ yụ, chimeꞌ acaꞌĉandyes jedyeꞌ in. 4Paj qui muꞌ tupuj carijte oro judyeyaꞌ plata judyeyaꞌ bronce. Anic raꞌ jiyiꞌ jämꞌsiꞌ raꞌ shupquiꞌ carijtacdyeꞌ muꞌ. 5Chimeꞌ muꞌ aty chịj carijte yaꞌijtyiꞌ mij in; junꞌ chuc tätsacsi in judyeyaꞌ junꞌ chuc yụꞌtacsi orocheꞌ. Judyeyaꞌ muꞌ aty chịj carijtyeꞌ son in judyeyaꞌ jụꞌñis ĉụiꞌ yocsiꞌ carijtacdyeꞌ. 6Dadamꞌ yụ aty yụꞌte muꞌ Aholiab, ạvaꞌ muꞌ Ahisamactyiꞌ vóshiꞌ Dantyiꞌ muꞌ, muꞌtyiꞌ ñuruꞌtyity muꞌ, paj qui nọ́tyete muꞌ Bezaleel. Chimeꞌ yụ aty soꞌmacsi dyijyedyeꞌ muꞌin yoctyiꞌ carijtaquity in paj qui meꞌjeꞌ in räj jedyeꞌ in jéyes yụ jiquej: 7Mọꞌ Jenꞌsiꞌ acaꞌ tinates muꞌ judyeyaꞌ mọꞌ cajón yụꞌtacdyeꞌtumsiꞌ p̂eyacdyeꞌ judyeyaꞌ mọꞌ cajónsiꞌ änꞌtacdyemꞌ judyeyaꞌ räj mọꞌin yocsiꞌ jedyeꞌ in mọꞌĉan Jenꞌsiꞌ acaꞌ tinates muꞌ. 8Mọꞌ mesa judyeyaꞌ räj jedyeꞌ mọꞌsiꞌ judyeyaꞌ mọꞌin mạijyedyeches ramparina in räj jedyeꞌ mọꞌsiꞌ judyeyaꞌ mọꞌ jiꞌcoꞌshayaquis jẹrejres. 9Judyeyaꞌ mọꞌ jiꞌcoꞌshayaquis Jenꞌdyes räj jedyeꞌ mọꞌsiꞌ judyeyaꞌ mọꞌ jäꞌchäs favtidyes judyeyaꞌ yuj mọꞌsimꞌ. 10Chimeꞌ quịꞌsiꞌ in; Aaróndyety judyeyaꞌ muꞌ quịꞌsiꞌ ạvadyety muꞌ. Muꞌ quịꞌsiꞌ yụꞌtac Jenꞌsidyes mọmoꞌ carijtacdyeꞌ in. 11Aseijte Jenꞌdyes judyeyaꞌ mọꞌ jẹrejres Jenꞌsidyes acaꞌ tinates muꞌ. Räj mọꞌin jedyeꞌ jämꞌtac in jemoñeꞌ cäts yoj jeyacdyemꞌ yụ jiquej u.
Mọꞌ mạyedyeꞌ jịꞌjutyitidyes
12Muꞌ Jenꞌ jajiti muꞌ Moisés:
13—Jéyacseva muꞌin Israeltyiꞌ vóshiꞌ in: "Miꞌin raꞌ dyijtutiñeꞌ jịꞌjutyitidyes mạyedyeꞌ. Mọꞌ mạyedyeꞌ raꞌ jiꞌdyijvinac räjĉan miꞌin junꞌ chuc yụ miꞌintyiꞌ Ayoꞌ, yụ́dye pạrej yụꞌtyeyeyactyiꞌ miꞌin Jenꞌdyes.
14Ạ̈räjjetiñeꞌ raꞌ mọꞌ jịꞌjutyitidyes mạyedyeꞌ ĉaĉaij na aty pạrej yụꞌtac miꞌindyes. Tyi chuc äcäjjeꞌtyiꞌ mọꞌ mạyedyeꞌ jemoñeꞌ sänꞌdyeꞌ soꞌmac. Tyi ĉụiꞌ jam ạ̈räjjeꞌtyiꞌ mọꞌ mạyedyeꞌ jemoñeꞌ vaꞌcac miꞌinĉantyiꞌ Israeltyiꞌ vóshiꞌ in. 15Jäbän raꞌ mạyedyeꞌ carijtaqui mi. Mọꞌ yävätidyeꞌyis mạyedyeꞌ jemoñeꞌ jịꞌjutyiti miꞌin mọꞌ raꞌ yụꞌtac mạyedyeꞌ Jenꞌdyes. Tyi ĉụiꞌ carijtaqui jụijyaꞌ mọꞌĉan mạyedyeꞌ jemoñeꞌ sänꞌdyeꞌ soꞌmac. 16Muꞌin Israeltyiꞌ vóshiꞌ in jemoñeꞌ ạ̈räjjeꞌ in mọꞌ jịꞌjutyitidyes mạyedyeꞌ räjĉan. Ọij yụꞌtacdyeꞌ jam raꞌ junꞌ mọtsiꞌ. 17Mọꞌ raꞌ mạyedyeꞌ shupquiꞌ yiris jịꞌĉocdyes Jenꞌdyes judyeyaꞌ muꞌin Israeltyidyes vóshiꞌ in ĉaĉaij na jäbänĉan mạyedyeꞌ muꞌ Jenꞌ jämꞌtacsi jiquej mọꞌ jac judyeyaꞌ mọꞌ mạyedyeꞌ chat qui mọꞌ yävätidyeꞌyis mạyedyeꞌ jịꞌjutyiti muꞌ jiquej, aty jam carijtaqui muꞌ jiquej."
18Aty ijaijyaꞌ muꞌ Jenꞌ p̂eyete muꞌ Moisés mụcuꞌcheꞌ Sinaícheꞌ, muꞌ Jenꞌ soꞌmete päräꞌ mij sánacdyeꞌtumtyiꞌ in. Muꞌin mij sánac in Jenꞌsiꞌyaꞌ c̣hirijri muꞌ.
Currently Selected:
Exodo 31: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
