Exodo 16

Mạyedyeꞌches säcsedyeꞌ maná

1Chat qui sacti in muꞌin Israeltyiꞌ vóshiꞌ in räj, Elim yacchuiꞌ in, cäjyasve qui jac jịjcaij in Sin, tịj mọs. Aty muꞌyaꞌ shupquequi in, chaꞌsheꞌ in mọꞌ yiriꞌtac ĉanamꞌ jiyis mạyedyeꞌ päräꞌyity ịvaj shupquedyeꞌ jiquej muꞌin Egiptoĉan, daiꞌ mạyedyeꞌ miꞌi in. Mọꞌ jac Sin dyeteꞌĉan mọꞌ Elim judyeyaꞌ Sinaí. 2Aty muꞌĉan cäjyasĉan jac in, muꞌin fạraꞌñete in muꞌ Moisés judyeyaꞌ muꞌ Aarón.

3Jéyacsi in:

—Faraj vuꞌ caꞌ muꞌ Ayoꞌ jiꞌsänsinꞌ tsun jiquej muꞌĉan Egiptoĉan. Mọꞌĉan jiquej jam jayej shush tạꞌdyityĉan tsun, tsun säcsi jiquej junꞌ quiꞌ chuc ävꞌyi tsun. Miꞌin na tutiĉaꞌ úyaꞌ cäjyaꞌ miꞌin, mạꞌjeꞌ ijatiĉaꞌ miꞌin dáquisyaꞌ —yi muꞌin in Israeltyiꞌ vóshiꞌ in.

4-5Chat qui muꞌ Ayoꞌ jajiti muꞌ Moisés:

—Jụdyej, yụ raꞌ jịꞌtŝoiꞌ mạyedyeꞌches säcsedyeꞌ miꞌindyes. Räjĉan raꞌ mạyedyeꞌ muntyiꞌ in dyimeꞌ säcsedyeꞌ in, junꞌ quiꞌ chuc tupuj mạyedyedyes muꞌin, paj jam jiꞌshuqueꞌ in. Aty raꞌ mọꞌ chaꞌsheꞌyaꞌ in jäbän mạyedyeꞌ päräꞌ qui raꞌ jäqueꞌ säcsedyeꞌ in, pärädyes raꞌ mạyedyeꞌ mọꞌ, meꞌquiꞌ raꞌ jäqueꞌ in, jämꞌjeꞌ qui raꞌ in. Meꞌ buꞌyiꞌ nash yụ yụꞌtyeyeyacsi ọij p̂eyacdyeꞌ yụ ọij raꞌ jịꞌĉojtacdyeꞌ muꞌindyes in, jedac chäquibun p̂eyacdyeꞌ yụ in, jedac jam.

6Muꞌ Moisés judyeyaꞌ Aarón jéyacsi in Israeltyiꞌ vóshiꞌ muꞌ:

—Q̂uinꞌ raꞌ yómoꞌ chịj miꞌin Ayoꞌdye nash jiꞌshupquinac Egiptoĉan, 7judyeyaꞌ raꞌ nojno pamꞌ cạvebitinte tsäquiꞌyis mạijquedyeꞌ muꞌ, ĉaĉaij na muꞌ Ayoꞌ seꞌvibunac fạraꞌnacdyeꞌ miꞌin. Jeñej aty tsuntuij ĉúti u miꞌin mọꞌ fạraꞌnacdyeꞌ, Ayoꞌ fạraꞌnacdyeꞌ soꞌmetinte.

8Quivij p̂eyaĉan Moisés jéyacseban:

—Yómoꞌ raꞌ muꞌ Ayoꞌ soꞌminac shush säcsedyes miꞌin, judyeyaꞌ raꞌ pamꞌ muꞌ soꞌminac pan anic daiꞌ, mijam raꞌ méquiꞌ jayejyiꞌ jibitidyes miꞌin ĉaĉaij na muꞌ aty seꞌvibunac ñäñitidyeꞌ miꞌin. Jeñej aty tsun mọmoꞌ fạraꞌñitiĉaꞌ u ĉúti miꞌin, Ayoꞌdye nash mọmoꞌ fạraꞌñetinte miꞌin.

9Chat qui yi muꞌ Moisés jéte Aarón:

—Jéyacsi ram räj uts Israeltyiꞌ vóshiꞌ in paj qui vajmuꞌyaij in Ayoꞌsiꞌyaꞌ vej muꞌ, ĉaĉaij na muꞌ seꞌvacsebi fạraꞌnacdyeꞌ muꞌin.

10Tacaꞌ p̂eyacvaꞌjoij muꞌ Aarón, chat qui räj cạvi in, meꞌĉandye jiꞌcavitiꞌ dyicbaꞌbadyeꞌĉan tsäquiꞌyis mạijquedyeꞌ Ayoꞌsiꞌ muꞌ. 11Ayoꞌ jajiti muꞌ Moisés:

12—Yụ nash seꞌvacsebi fạraꞌnacdyeꞌ muntyis muꞌin. Jéyacseva mi: "Yómoꞌ raꞌ jebetiñeꞌ shush miꞌin, pamꞌ na raꞌ pan jebetinte, junꞌ quiꞌ chuc chụ́qui miꞌin. Meꞌ raꞌ chat chäyitiĉaꞌ miꞌin yụ nash anictyity Jenꞌ Ayoꞌ miꞌin", jéyacseva —yi Ayoꞌ jajiti Moisés.

13Anicdye meꞌ mọꞌ mạyedyeꞌ mọꞌ yómoꞌ ayij in daiꞌ jaijtyiꞌ in, därmunsiꞌ in, anic shach tŝọiꞌ dyäquedyeꞌyaꞌ muꞌin. Nojno qui pamꞌ tyes tyeiꞌ sonojnoꞌ. 14Aty chachanjoiꞌyaꞌ, mọꞌdyety jiꞌyajcatiꞌ yiris jedyeꞌ, anic shimsiꞌ, jeꞌñes tsafaꞌ joꞌmes. 15Aty mọꞌ cạveꞌyaꞌ muntyiꞌ in, jam junꞌ chị́yeꞌ in, yi mọmoꞌ jítidyeij in: "¿Jedyeꞌ buty ọij joꞌmeiꞌ?" Muꞌ qui Moisés vorjeyacsi:

—Pan u soꞌminactyiꞌ muꞌ Ayoꞌ. 16Ọij nash säcsedyedyes p̂eyacdyeꞌ yuꞌtyiyinac muꞌ, meꞌ ca raꞌ miꞌin: cäts ca raꞌ chimec chimec jäctiñeꞌ mọꞌ säcsedyeꞌ, junꞌ quiꞌ chuc jemoñeꞌ acaꞌĉantyiꞌ in, päräꞌ raꞌ ritro jịjcaiꞌ yirity muntyiꞌ.

17Anicdye meꞌ, Israeltyiꞌ vóshiꞌ in meꞌ buꞌyiꞌdye jäqueꞌ in, pạrej daiꞌ jäqueꞌ in, pạrej damꞌ jäqueꞌ in. 18Aty tuputuc mọꞌ, cäts meꞌ jịjcaiꞌ, muꞌin daiꞌ jäqueꞌtyiꞌ in jam muꞌin jiꞌshuqueꞌ in, muꞌin na damꞌ jäqueꞌtyiꞌ in, muꞌin jam jayejjotaqui in, räj vaj meꞌ cäts shupquiꞌ muꞌin.

19Chimeꞌdye muꞌ Moisés jéyacsi:

—Jam raꞌ méquiꞌ jiꞌshuctiñeꞌ miꞌin mijam raꞌ nojnodyes jämꞌjetiñeꞌ.

20Meꞌ tsanꞌ meꞌ jéyacsi, pạrej qui namꞌ jam chiquepte p̂eyacdyeꞌ in, jiꞌshuqueꞌ mọmoꞌ in nojnodyes muꞌin. Mọꞌ jiꞌshuques in mótoiꞌyetaqui in anic p̂oquiꞌ shupquiꞌ. Mọꞌdyes qui muꞌ Moisés fạ́coij muꞌintum in.

21Meꞌdye in, räj pamꞌ jäqueꞌ in mọꞌ säcsedyeꞌ, a qui namꞌ areꞌyechuij tsun räj popoijjoiꞌ mọꞌ säcsedyeꞌ. 22Mọꞌ na jäbänyis mạyedyeꞌ päräꞌ quiꞌ jäqueꞌ säcsedyeꞌ in, vạjpedyeꞌ ritro jịjcaiꞌ yirity muntyiꞌ. Muꞌin na tashcheꞌ buꞌyity muntyiꞌ in ĉọcte in muꞌ Moisés, jéte in: "¿Junꞌ dash meꞌ in päräꞌ quiꞌ jäqueꞌ in?" 23Vorjeyacsi muꞌ Moisés:

—Meꞌdye yụꞌtaqui Ayoꞌ p̂eyacdyeꞌ muꞌ, yi muꞌ: "Nojno raꞌ mạyedyeꞌ jịꞌjutyitidyes Ayodyes", mọꞌdyes q̂uinꞌ ọij mạyedyeꞌ jejmitac junꞌ chuc mạꞌjetiñeꞌ miꞌin. Mọꞌ na jiꞌshucdyidyeꞌ jụijyaꞌ miꞌin, jämꞌjetiñeꞌ raꞌ miꞌin nojnodyes.

24Anicdye meꞌ, muꞌin muntyiꞌ in jämꞌjeꞌ in jiꞌshucdyidyeꞌ muꞌin, meꞌ tsanꞌ jiꞌshucdyidyeꞌ muꞌin, jam qui namꞌ mótoiꞌyetaqui in mijam vịsujsuiꞌ nạijjoiꞌ chijam p̂oquiꞌ.

25Jéyacsi Moisés:

—Q̂uinꞌ raꞌ chat jebebajtiñeꞌ jiꞌshucdyidyeꞌ miꞌin, ĉaĉaij na q̂uinꞌ jịꞌjutyitidyes mạyedyeꞌ Ayoꞌsiꞌ muꞌ, aty qui raꞌ jam dạctiñeꞌ mụijyas säcsedyeꞌ. 26Meꞌ raꞌ räj mạyedyeꞌ tupuj jäcac mọꞌ säcsedyeꞌ, yävätidyeꞌyis raꞌ mạyedyeꞌ itŝiꞌ raꞌ, ĉaĉaij na mọꞌ jịꞌjutyitidyes mạyedyeꞌ —jéyacsi Moisés.

27Meꞌ tsanꞌ meꞌ yi muꞌ, yävätidyeꞌyis mạyedyeꞌ pạrej qui namꞌ shupqui jorojyaꞌ in, meꞌ tsanꞌ quevjanꞌ säcsedyeꞌ in, mijam qui namꞌ méquiꞌ dạqueꞌ in. 28Mọꞌdyes muꞌ Ayoꞌ jajiti muꞌ Moisés:

—¿Junꞌsiꞌ bu raꞌ ĉaĉaij seꞌvibutiĉaꞌ yụs p̂eyacdyeꞌ miꞌin? ¿Junꞌsiꞌ bu raꞌ ĉaĉaij farajjetiñeꞌ äcäjyacdyeꞌ yụ́cheꞌ miꞌin? 29¿Jam adac dyijyeban miꞌin, yụ yụꞌtyeyeyac mọꞌ mạyedyeꞌ jịꞌjutyitidyes? Mọꞌdyes mọꞌ jäbänyis mạyedyeꞌ yụ raꞌ soꞌmeyac päräꞌ quiꞌ säcsedyeꞌ, mọꞌ na yävätidyeꞌyis mạyedyeꞌ jemoñeꞌ tacyaꞌ acaꞌyaꞌ miꞌin, jam raꞌ junꞌ shupqui miꞌin —Ayoꞌ jajiti Moisés.

30Anicdye meꞌ, mọꞌ yävätidyeꞌyisyaꞌ mạyedyeꞌ jịꞌjutyiti in, jam yirity carijtaqui in.

31Mọꞌ na mạyedyeꞌches säcsedyeꞌ ĉụiꞌsiꞌĉan p̂eyacdyeꞌ jeꞌ in "maná" jeꞌ in. Anic jaiꞌbas mọꞌ araj jeñej miquis vej cilantro, anic cạvdyis mọꞌ jeñejdyi coromatumtyiꞌ pan, meꞌdyiꞌ mọꞌ säcsedyeꞌ maná.

32Moisés jéyacsi:

—Ayoꞌ yụꞌtyeꞌ p̂eyacdyeꞌ yi muꞌ: "Jäctiñeꞌ raꞌ miꞌin päräꞌ ritro mọꞌ mạyedyeꞌches säcsedyeꞌ maná, mọꞌ raꞌ räjĉandyes jämꞌjetiñeꞌ paj qui muꞌin vóshiꞌ miꞌin cạveꞌ raꞌ in ọij q̂uinꞌ säcsedyeꞌ soꞌmeyacsiꞌ miꞌin úyaꞌ cäjyaꞌ, yoquiꞌdyemꞌ jiꞌshupqueyac jiquej u miꞌin Egiptoĉantyiꞌ jiquej miꞌin", yi muꞌ Ayoꞌ —jéyacsi Moisés.

33Yi muꞌ Moisés jéte muꞌ Aarón:

—Jäqueꞌ ram yiris yụꞌtidyes, bijtyeꞌ raꞌ mi mọꞌĉan päräꞌ ritro maná, chat qui raꞌ yụꞌtyem Ayoꞌsiꞌyaꞌ vej muꞌ. Räjĉan raꞌ meꞌ buꞌyiꞌ paj qui muꞌin vóshiꞌ muꞌin chị́yeꞌ chimeꞌ in yódyesdyemꞌ jebetiñes u cäjyaꞌ.

34Aarón chiquepte Ayoꞌsiꞌ p̂eyacdyeꞌ muꞌ, jasoꞌmitis Moisés jiquej. Mọꞌyaꞌ yụꞌtyeꞌ mọꞌ jämꞌjeyacĉan maná, mọꞌ tashcheꞌ buꞌyiꞌ yụꞌtac mọꞌ yụꞌtaquis yụꞌtacdyeꞌ Jenꞌsiꞌ muꞌ, mọꞌyaꞌ räjĉan jämꞌ yụꞌtac mọꞌ maná.

35Anicdye meꞌ, muꞌin Israeltyiꞌ vóshiꞌ in vạjpedyeꞌ quiꞌtac yómodyeꞌ in, meꞌquiꞌ mọꞌ maná soꞌmac in, mọꞌtyi mọmoꞌ in junꞌ quiꞌ chuc chaꞌsheꞌ in mọꞌ jac Canaán, q̂uinꞌdyemꞌ faraj, aty jam damꞌjebanꞌ in.

Currently Selected:

Exodo 16: CAS

Highlight

Copy