Exodo 15

Jenꞌdyes jimeꞌ Moisés

1Chat qui Moisés räjtumdye Israeltyiꞌ vóshiꞌ in timaꞌquete Ayoꞌ in, jimeyete in ọij jimacdyeꞌ, yiꞌ:

"Yụ raꞌ jimeyete Ayoꞌ ĉaĉaij na därsiꞌyaꞌ ferdyeꞌ muꞌ jiꞌpenacsi väc̣häꞌtyity in,

muꞌ jiꞌp̂utacsi marĉan räj cavayochety in.

2Yụ jimeyete Ayoꞌ,

muꞌ soꞌmintyiꞌ ferdyeꞌ yụ,

muꞌ jiꞌc̣hoñintyiꞌ yụ.

Muꞌ nash yụ́tyiꞌ Jenꞌ,

yụ raꞌ timaꞌquete,

muꞌdye Ayoꞌ jenꞌtyiꞌ yụ,

yụ raꞌ soꞌmete timaꞌcacdyeꞌ.

3Ayoꞌ anic jiꞌpenacsity,

Jehová tịj muꞌ.

4Muꞌ jiꞌp̂utacsi marĉan ayoty väc̣häꞌtyity muꞌ,

räj muꞌin caretochety in,

judyeyaꞌ muꞌin mujuꞌchaty nọ́taquity muꞌ,

räj p̂uti in Mar Jäijnäsĉan, jam damꞌ c̣hoñi in",

meꞌ timaꞌquete Ayoꞌ in.

5Mọꞌ majsiꞌ ojñiꞌ jemonjeyacsiꞌ,

pechi muꞌin jeñej yirity mij.

6Tacvesyaꞌ un, mi Ayoꞌ,

anic dyichsis mọꞌ.

Tacvesyaꞌ un, mi Ayoꞌ,

p̂etaijjeyacsim muꞌin fáquisinꞌtyiꞌ tsun in.

7Mi nash mujuꞌchaꞌ buꞌyity.

Räjĉan ferdyeꞌtumtyiꞌ.

Meꞌdyes jịvaꞌchacsim räj muꞌin sac jaꞌyacsity mi.

Mi jiꞌshupqueyeyacsi fạ́codyeꞌ chat qui mọꞌyaꞌ p̂udaij jiiꞌtacsi mi yojdyemꞌ biruruc u.

8Jụ́tyiĉantyiꞌyaꞌ tyiꞌmu mi dụriꞌ jaꞌyeꞌ mi mọꞌ ojñiꞌ ovemunyiꞌ.

Mọꞌ runꞌquenꞌ buꞌyiꞌ yódyemꞌ tsäv o in judyeyaꞌ mọꞌ majdyeꞌ marĉansiꞌ yäjquiꞌ mọꞌ.

9Yi muꞌ fáquintyiꞌ tsun:

—Yụ raꞌ cäc̣häꞌchucsi.

Yụ raꞌ chaꞌshacseban.

Yụ raꞌ jectyetacseban jedyeꞌ muꞌin.

Där raꞌ maꞌjoij yụ.

Yụ raꞌ tapjeyaqui chutidyedyes coc̣hino yụ,

chat mọꞌyaꞌ jịꞌmotsacsiij —yi muꞌ.

10Mísyaꞌ p̂ujquedyeꞌ jemonjeyacsiꞌ muꞌin marĉan in.

Pechi muꞌin jeñej fiyero majĉan jịjcaiꞌsiꞌ ojñiꞌ.

11¿Jụꞌñity buty jenꞌ buꞌyity in cätstyin mi Ayoꞌ?

¿Jụꞌñity buty jeñej mi?

Mídye meꞌ buꞌyity.

Räjĉan ferdyeꞌtumtyiꞌ.

Pashquedyeꞌtumtyiꞌ irijdyeijtyiꞌ.

Äjyedyeꞌ jämꞌtyety.

12Yapenꞌbuꞌyiꞌ tacves un mi,

chat qui mọꞌ jac coñinꞌjeyacsiꞌ in.

13Mísyaꞌ jam räꞌis mạꞌjitidyes mi.

Jiꞌtashdyi ramꞌ muꞌinyaꞌ jiꞌc̣honacsityyaꞌ mi.

Mísyaꞌ ferdyeꞌ mi raꞌ bächäcsi junꞌ quiꞌ chuc venjoij in mísyaꞌ acaꞌ jam junꞌtacdyes mọꞌ.

14Seꞌvaqui raꞌ jacchety muntyiꞌ in chat qui raꞌ noc̣hoꞌc̣hoij muꞌin in.

Cajotyiti raꞌ muꞌin filisteoĉantyiꞌ in.

15Muꞌin ayoꞌ Edomĉantyiꞌ där raꞌ noiꞌyacñi in.

Muꞌin na ayoꞌ Moabĉantyiꞌ in anic raꞌ ric̣hiꞌc̣hijtyiꞌ in.

Muꞌin Canaánĉantyiꞌ in quiquijnaquity raꞌ in.

16Anic jiquijnacdyeꞌ muꞌindyes in judyeyaꞌ jiyiꞌ tsäquiꞌ raꞌ ĉúti in.

Mísyaꞌ ferdyeꞌ, Ayoꞌ, mọꞌ unĉansim,

tacyaꞌ raꞌ muꞌin mạꞌjeꞌ chutyintyiꞌ tsun in jam raꞌ damꞌ yäcänyi in.

Jam raꞌ damꞌ yạvyi muꞌin yojdyemꞌ yirity mij u,

junꞌ quiꞌ chuc mity muntyiꞌ in jämꞌ jiꞌjiyacsi in,

junꞌ quiꞌ chuc mity muntyiꞌ in yaꞌijtyiꞌ mi Ayoꞌ cajnacsi muꞌin in.

17Mi raꞌ tucsi muꞌin Israeltyiꞌ vóshiꞌ in judyeyaꞌ jiꞌbäꞌyacsi mítyiꞌcheꞌ mụcuꞌ.

Muꞌ mụcuꞌ yóyaꞌdyemꞌ mi bäꞌyi u Ayoꞌ.

Mọꞌ jam junꞌtacdyes bäꞌyedyeꞌ mis Ayoꞌ,

jämꞌtac ĉụiꞌsiꞌyaꞌ un jiquej mi.

18Muꞌ Ayoꞌ raꞌ ayoꞌbuꞌyi räjĉandyes.

Jimacdyeꞌ Marías

19Yoquiꞌdyemꞌ faraónsiꞌ cavayo u in judyeyaꞌ chutidyes careto in judyeyaꞌ caretochety in marĉan siti jiquej in, muꞌ Ayoꞌ jiꞌsumebanꞌ mọꞌ ojñiꞌ räj jemonjeyacsi in. Muꞌin na Israeltyiꞌ vóshiꞌ in miꞌeban marĉan in chañescheꞌ jac. 20Chat qui mọꞌ María mọꞌ jasoꞌmitis p̂eyacdyeꞌ Jenꞌ jiquej mọꞌ, Aarónsiꞌ vojiꞌ muꞌ, tapjeꞌ shejnaquis. Chimeꞌ räj mọꞌin p̂en in tapjeꞌ shejnaquis in cäc̣häꞌchuiꞌyaꞌ in chat mọꞌin roꞌyaquiꞌ in. 21María jimeyeyacsiꞌ:

—Jimeyeja Ayoꞌ ĉaĉaij na därsiꞌyaꞌ ferdyeꞌ muꞌ jiꞌpenacsi väc̣häꞌtyity in,

jiꞌp̂utacsi räj marĉan cavayochety in.

Mọꞌ Ojñiꞌ Bịcuquis

22Sacti muꞌin Israeltyiꞌ vóshiꞌ in yacchuiꞌ in mọꞌ Mar Jäijnäs. Muꞌdye Moisés tashi bächäcsi muꞌ. Chibin mạyedyeꞌ miꞌi muꞌin cäjyasĉan jac in tịj mọꞌ Shur. Jam qui namꞌ damꞌ dạqueꞌ ojñiꞌ in. 23Venjoij muꞌin Marayaꞌ, jam junꞌ tupuj tyeij mọꞌ ojñiꞌ ĉaĉaij na anic bịcuc mọꞌ. Meꞌ meꞌ qui tịj mọꞌ Mara. 24Chat qui muꞌin muntyiꞌ in tiyacchuti ñiñete Moisés in yi in:

—Jedyeꞌ bu raꞌ tyéjaꞌ.

25Moisés cọdyete Ayoꞌ chat qui muꞌ Ayoꞌ jajiꞌcaviyiti yiris son. Muꞌ farajjeꞌ mọꞌ ojñiꞌĉan chat qui mọꞌ ojñiꞌ jämꞌsiꞌ shupquiꞌ.

Tacyaꞌdye jiquej in muꞌ Jenꞌ soꞌmacsi p̂eyacdyeꞌ judyeyaꞌ muꞌsiꞌ yụꞌtacdyeꞌ meꞌ buꞌyiꞌ jịꞌĉojtacsi. 26Yi muꞌ:

—Miꞌin jụijyaꞌ jämꞌ seꞌvibutiĉaꞌ p̂eyacdyeꞌ yụ́siꞌ, muꞌ Jenꞌ Ayoꞌ miꞌintyiꞌ, judyeyaꞌ rụij bäꞌyi miꞌin muꞌsiꞌyaꞌ vej muꞌ judyeyaꞌ jịꞌcätsepte yụꞌtacdyeꞌ muꞌ yụ raꞌ jam junꞌ jịꞌtŝoyeyac mọꞌ japacjodyeꞌ yódyesdyemꞌ jịꞌtŝoyacsis yụ jiquej muꞌin Egiptoĉantyiꞌ in ĉaĉaij na yụ nash muꞌ Ayoꞌ muꞌdye yi jiꞌchäcadyeyactyiꞌ.

27Venjoij muꞌin in Elimyaꞌ yóyaꞌdyemꞌ yiriꞌtac päräꞌ jiyityyaꞌ u in jijmoꞌmoj in judyeyaꞌ yävätidyeꞌ quiꞌtac jeꞌñety manaꞌi in. Muꞌyaꞌ muꞌin dyäqui in c̣hẹiꞌyaꞌ mọꞌ ojñiꞌ.

Currently Selected:

Exodo 15: CAS

Highlight

Copy