Colosasĉantyidyes 2
2
1Yụ raꞌ jịꞌchiqueyeyac miꞌin junꞌ chuc yụ fer dyijtuyac miꞌin, fer úñi yụ cọdacdyeꞌĉan Jenꞌcheꞌ yụ miꞌindyes, judyeyaꞌ muꞌindyes chimeꞌ in Laodiceaĉantyidyes in muꞌin anicjetetydyes Jenꞌ in, judyeyaꞌ muꞌindyes chimeꞌ in jam chäyintyiꞌ yụ in. Räj miꞌinmun dyijtuyac yụ judyeyaꞌ cọdyete Jenꞌ yụ muꞌindyes in. 2Meꞌ yụ yi paj qui jiĉun ĉojtyiꞌĉan muꞌin paj qui vaj meij mạꞌjitidyeij muꞌin in. Yụ mạꞌjeꞌ paj qui soꞌmac in paj qui dyijyedyeꞌtum shupqui in, paj qui tupuj chị́yepte in mọꞌ där jämꞌsiꞌ dyijyedyeꞌ Jenꞌsiꞌ muꞌ, mọꞌ jam chị́yeptes urucyaty muntyiꞌ jiquej in. Dyijyedyeꞌ Jenꞌsiꞌ jiquej muꞌ, mọꞌ yiꞌ junꞌ chuc muꞌ Cristo. 3Muꞌ nash räj meꞌchupte mọꞌ jämꞌsiꞌ dyijyedyeꞌ Jenꞌsiꞌ muꞌ judyeyaꞌ chị́dyeꞌ chimeꞌ muꞌ, anic yaꞌiꞌsiꞌ mọꞌ, muꞌdye Cristo yirity mọꞌ soꞌmisinꞌ tsun. 4Yụ raꞌ jéyac miꞌin, jam raꞌ seꞌvacsebi miꞌin mọꞌ cäjsis jiꞌchäyitidyeꞌ muꞌin seꞌ jaꞌyacsity in, meꞌ raꞌ tsanꞌ jiꞌmaꞌjotacdyes p̂eyacdyeꞌ jiꞌshupqueꞌ in, jam qui na ramꞌ junꞌ jụjjetiñeꞌ miꞌin. 5Meꞌ raꞌ tsanꞌ itŝij yụ miꞌinyaꞌ q̂uinꞌ, yejĉoij qui namꞌ yụ dyijtuyac ĉojtyiꞌĉan yụ. Anic där maꞌjotyebiyac yụ dyijyedyeꞌ miꞌin, yụ chịj ĉaĉaij na miꞌin fer buꞌyi bäꞌyi Jenꞌdyes miꞌin, vaj yiriꞌyaꞌ anicjetinte Cristo miꞌin, mijam p̂ucushyi yocsiꞌtum jedyeꞌ miꞌin.
Jemoñeꞌ mụiꞌsis raꞌ dyijyedyeꞌ cạjaꞌ
6Miꞌin aty jụjjetinte muꞌ Jesucristo, muꞌ aty Ayoꞌ miꞌin, mọꞌdyes qui jemoñeꞌ jịjcatinte miꞌin. 7Fer buꞌjamꞌ Jesucristodyes miꞌin, jeñej buꞌjamꞌ sonsiꞌ ribin mochĉansimꞌ, meꞌ buꞌyi raꞌ cheꞌi miꞌin anicyi Jesucristocheꞌ miꞌin, ĉaĉaij na meꞌ yiꞌ mọꞌ seꞌvetiñes jiꞌchäyitidyeꞌ. Chimeꞌdye raꞌ yejĉoij ĉojtyiꞌĉan miꞌin yoshoropaij jémac Jenꞌ.
8Ĉujcatac miꞌin areꞌĉa seꞌ jaꞌyinac miꞌin jacches dyijyedyeꞌ muntyis muꞌin fibis muꞌin. Mọꞌ vaꞌves jiꞌchäyitidyeꞌ muꞌin mọꞌ vóshiꞌvunsiꞌ jiquej muꞌin, muntyis mọmoꞌ yicdyeꞌ muꞌin, sọyos dyijyedyeꞌ cäc̣häꞌchubiꞌ in, mijam Cristos dyijyedyeꞌ cäc̣häꞌchupte in.
9Cristo taquenꞌ meꞌchupte dyijyedyeꞌ Jenꞌsiꞌ muꞌ aꞌĉan muꞌ, ĉaĉaij na Jenꞌ buꞌyi muꞌ Cristo. 10Miꞌin chimeꞌ taquenꞌ meꞌchuptinte Jenꞌsiꞌ dyijyedyeꞌ muꞌ, mijam yiris jedyeꞌ jayej atsvun miꞌin, ĉaĉaij na Cristoty aty miꞌin. Muꞌ mujuꞌchaꞌ ayoꞌbuꞌyity, räj mujuꞌchaꞌtacsi yoctyiꞌ fer buꞌyity in, judyeyaꞌ mọꞌin fer buꞌyis chimeꞌ in. 11Aty Cristoty miꞌin, muꞌ nash jiꞌc̣honnac miꞌin, jadyic bächänac ĉụiꞌsiꞌ dyijyedyeꞌ aꞌc̣his miꞌin. Mọꞌ jeñej buꞌyi jiꞌseiꞌtyinactyiꞌ Cristo miꞌin, meꞌ buꞌyiꞌ mọꞌ c̣honꞌdyeꞌ miꞌin, jam aꞌdyes jiꞌjäcac mọꞌ seiꞌtacdyeꞌ, ĉaĉaij na aty Cristoty miꞌin. 12Jiꞌchojtidyeꞌ miꞌin, mọꞌ jeñej buꞌyiꞌ aty nạc Cristotum miꞌin, meꞌ buꞌyiꞌ mọꞌ shupquiꞌ. Muꞌtumdye vañinyeban miꞌin anicyedyeꞌyaꞌ miꞌin, anicjebitinte miꞌin Jenꞌsiꞌ ferdyeꞌ muꞌ, mọꞌ vañinjebajtes muꞌ Cristo. 13Miꞌin sänꞌdyeꞌĉan bäꞌyi jiquej miꞌin, ĉaĉaij na juchaj meꞌtyinac jiꞌsännac miꞌin jiquej, mijam méquiꞌ jiquej meꞌchuptinte Jenꞌsiꞌ yụꞌtacdyeꞌ muꞌ, mijam seiꞌtactyiꞌ chimeꞌ miꞌin. Q̂uinꞌ qui namꞌ muꞌ Jenꞌ jịꞌtsaꞌinac miꞌin yiriꞌyaꞌ Cristotum, judyeyaꞌ vayacjibunac räj juchaj miꞌin. 14Sänꞌdyeꞌyaꞌ muꞌ croshcheꞌ jiquej muꞌ Cristo, muꞌ Jenꞌ räj c̣hiconꞌjeꞌ déve tsun juchadyes, mọꞌ jeñej buꞌyiꞌ pactacdyeꞌ croshcheꞌ, meꞌ buꞌyiꞌ mọꞌ dévedyes tsun sánacdyeꞌ, jadyic jiꞌmeꞌsinꞌ yụꞌtacdyeꞌ. 15Sänꞌdyeꞌyaꞌ croshcheꞌ muꞌ räj jiꞌpenacsi sọyoꞌ in, räjtumdye fer buꞌyis jiquej in, chat qui muꞌ jịꞌcaveyacsi yoctyisyaꞌ vej muꞌin mọꞌin peñis in, mọꞌyaꞌ jịꞌtsicayacsi muꞌ Cristo.
Dyijtujaꞌ mạyedyeꞌches jedyeꞌ
16Mọꞌdyes aty raꞌ jam seꞌvacsebi miꞌin mọꞌ vaꞌves p̂eyacdyeꞌ muꞌin jínactyiꞌ in, yi muꞌin: "Jam raꞌ jebetiñeꞌ miꞌin mọꞌ jam jebeiꞌsiꞌ judío in, mijam raꞌ tyeij chimeꞌ miꞌin. Chimeꞌdye ạ̈räjjevac feshta miꞌin, mọꞌ jịꞌjutyitidyes mạyedyeꞌ judyeyaꞌ ịvas feshta chimeꞌ", yi in, jam raꞌ mọꞌ seꞌvacsebi miꞌin. 17Joꞌmes jiꞌchäyitidyeꞌ jam räjĉan buꞌyis, yojdyemꞌ onomꞌsiꞌ o, meꞌ buꞌyiꞌ mọꞌ. Mọꞌ mọmoꞌ jịꞌĉoiꞌ ayij raꞌ mọꞌ anicsis dyijyedyeꞌ Jenꞌsiꞌ muꞌ. Q̂uinꞌ chat aty atsij muꞌ Cristo, muꞌsiꞌ qui jiꞌchäyitidyeꞌ cạpja tsun. 18Chimeꞌdye pạrej muꞌyaꞌ cäjsis jiꞌchäyitidyeꞌ tuiꞌtyiꞌ in, vaꞌbunyedyeꞌtum yi in: "Tsun mujuꞌchaꞌ chịjtyiꞌ ĉaĉaij na muꞌ Jenꞌ jịꞌcavacdyeꞌ soꞌmin tsun judyeyaꞌ anjer chimeꞌ timaꞌcacsi tsun", yi in. Meꞌ tsanꞌ yi in: "Tsun jam méquiꞌ fibiꞌnaqui", yi in, muꞌin qui namꞌ där vaꞌbunyi in, muntyis mọmoꞌ dyijyedyeꞌ cäc̣häꞌchucsebi in. Miꞌin jam raꞌ seꞌvacsebi miꞌin ñinacdyeꞌ muꞌin. 19Muꞌin meꞌtyity in aty jam ayotute Cristo in, muꞌ joꞌnoꞌ buꞌyity tsundyes muꞌ anicjejaty tsun, tsun jeñej buꞌjaꞌ aꞌ muꞌ. Muꞌ tsạꞌchusinꞌ räj tsun, judyeyaꞌ fer buꞌjaꞌ yuꞌsinꞌ tsun paj qui vaj meij dyijtutiĉaꞌ tsun judyeyaꞌ p̂anjaꞌ Jenꞌdyes tsun, ĉaĉaij na muꞌ Jenꞌ meꞌ mạꞌjeꞌ.
20Jeshaꞌ miꞌin aty säñi Cristotum, aty c̣hoñi miꞌin jacchesyaꞌ dyijyedyeꞌ sọyosyaꞌ. ¿Junꞌ qui dash meꞌ tacaꞌ yejĉoij cäc̣häꞌchutiñeꞌ jacches dyijyedyeꞌ? ¿Junꞌ meꞌ u miꞌin yejĉoij cäc̣häꞌchucsebi joꞌmes vaꞌves dyijyedyeꞌ muꞌin? 21Mọꞌ yiꞌ: "Jam raꞌ täjtyem ọij säcsedyeꞌ, mijam raꞌ yocsiꞌ jebeiꞌ mi, mijam raꞌ yocsiꞌ chụiꞌ mi", yi in. 22Fibiꞌ mọmoꞌ meꞌ ạ̈räjjeyacsebi miꞌin jiꞌchäyitidyeꞌ muntyis muꞌin, mọtsis mọmoꞌ jedyeꞌ säcsedyeꞌ p̂eyeꞌ in jiꞌchäyitidyeꞌĉan muꞌin. Ọij jiꞌchäyitidyeꞌ muntyis mọmoꞌ dyijyedyeꞌ meꞌchucsebi in. 23Muꞌin cäc̣häꞌchucsebity in anic jämꞌ ĉọiꞌ muꞌin in, yi in: "Tsun dyijyedyeꞌtumtyiꞌ ĉaĉaij na mọꞌ cäc̣häꞌchuiꞌ tsun." Chimeꞌdye yi in: "Jemoñeꞌ ĉụiꞌ jịꞌñibeꞌcaĉaꞌ aꞌ tsun, judyeyaꞌ jiꞌc̣huꞌc̣huyaĉaꞌ chimeꞌ, cäc̣häꞌchucdyeꞌyaꞌ jiꞌchäyitidyeꞌ tsun", yi in. Meꞌ tsanꞌ meꞌ yi in, mọꞌ qui namꞌ jam junꞌ jiꞌdyäcacsebiꞌ aꞌc̣his aꞌsiꞌ dyijyedyeꞌ muꞌin.
Currently Selected:
Colosasĉantyidyes 2: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
