Colosasĉantyidyes 1
1
Tashches voryedyeꞌ Pablos
1-2Yụ Pablo, yụ nash jutactyiꞌ Jesucristoty muꞌ, muꞌ Jenꞌ meꞌ yuꞌtyin yụ. Yụ nash penꞌdyetun yụ muꞌ vojity tsun Timoteo. Yụ sáñeꞌ ọij miꞌindyesiꞌ vojity tsun, Colosasĉantyiꞌ Jenꞌtyiꞌ ñuruꞌtyity miꞌin, Cristoty atsvun miꞌin, anic rụij cäc̣häꞌchutintety Jenꞌ. Yụ cọdyete Jenꞌ muꞌ Ạvatusinꞌtyiꞌ tsun paj qui muꞌ ñịbeꞌjitidyes soꞌminac miꞌin paj qui chimeꞌ soꞌminac maꞌjodyeꞌ ĉojtyiꞌĉandyes miꞌin.
Pablo cọdaqui Jenꞌcheꞌ Colosasĉantyidyes in
3Räjĉan cọdaquiyaꞌ Jenꞌcheꞌ tsun miꞌindyes, yoshoropaij jéte Jenꞌ tsun, muꞌ Jenꞌ Jesucristoty, Ayoty tsun, 4ĉaĉaij na tŝútyin tsun p̂eyacdyeꞌ junꞌ chuc miꞌin anicjetinte muꞌ Cristo Jesús judyeyaꞌ mạꞌjeyacsi miꞌin räj muꞌin Jenꞌtyiꞌ ñuruꞌtyity in. 5Miꞌin meꞌ q̂uinꞌ ĉaĉaij na tashcheꞌ jiquej seꞌvise miꞌin mọꞌ rụijsis jiꞌchäyitidyeꞌ, mọꞌ nash jämꞌsiꞌ p̂eyacdyeꞌ Jenꞌsiꞌ muꞌ, jiꞌjäqueꞌsiꞌ mọꞌ ñịbeꞌyedyes, mọꞌ raꞌ soꞌminacsiꞌ miꞌin mạyedyeꞌcheꞌ, mọꞌ bisvaꞌtiñes q̂uinꞌ miꞌin, mọꞌ jiꞌbisiyinacsiꞌ Jenꞌ mọꞌcheꞌ. 6Mọꞌ jämꞌsiꞌ p̂eyacdyeꞌ Jenꞌsiꞌ muꞌ yejĉoiꞌ jiꞌtseꞌeꞌ paiꞌ buꞌyiꞌ ọij jac judyeyaꞌ miꞌinyaꞌ chimeꞌ, mọꞌ nọ́tyetacsiꞌ tyi chuc seꞌvety in judyeyaꞌ anicjety in, yojdyemꞌ mọꞌ ñútyinac jiquej u tashcheꞌ seꞌvetiñeꞌyaꞌ jiquej miꞌin. Mọꞌ p̂eyacdyeꞌ p̂eijbite ñịbeꞌjitidyes Jenꞌsiꞌ muꞌ, miꞌin jämꞌ chị́yeptinte mọꞌ p̂eyacdyeꞌ muꞌ, anicsis mọꞌ p̂eyacdyeꞌ. 7Jiquej muꞌ Epafras, mạꞌjeyacdyety tsun muꞌ uñi Jenꞌdyes tsuntum, muꞌ jiꞌchäyinac jiquej Jenꞌsiꞌ p̂eyacdyeꞌ muꞌ, ĉaĉaij na muꞌ jịꞌcätseꞌtyiꞌ Cristodyes, miꞌindyes úñi muꞌ. 8Chimuꞌdye jin tsun jiquej junꞌ chuc Jenꞌsiꞌ Ạꞌedyeꞌ muꞌ yiꞌ paj qui mạꞌjeyacsity bäꞌyi miꞌin.
9Tsun aty chị́quiyaꞌ mọꞌ jiquej, junꞌ chuc meꞌ anicyi miꞌin, chat qui tsun tiyacchuiꞌ cọdyete Jenꞌ miꞌindyes, mijam farajjeꞌ tsun cọdyete Jenꞌ tsun miꞌindyes. Tsun cọdyete Jenꞌ paj qui tupuj chị́yeptinte miꞌin dyijyedyeꞌ muꞌ räj, paj qui anic mujuꞌchaꞌ dyijyedyeꞌtum judyeyaꞌ chị́dyeꞌtum bäꞌyi miꞌin, mọꞌ soꞌminacsiꞌ Jenꞌsiꞌ Ạꞌedyeꞌ muꞌ. 10Chat meꞌdye qui raꞌ rụij bäꞌyi miꞌin, joꞌmes nash muꞌ mạꞌjeꞌ Ayoꞌ tsun, paj qui räjĉan maꞌjotyinac muꞌ, meꞌ raꞌ chat räjĉan jämꞌyedyeꞌtum bäꞌyi miꞌin, paj qui yejĉoij chị́yetinte miꞌin junꞌ buty muꞌ Jenꞌ. 11Chimeꞌdye tsun cọdyete muꞌ mujuꞌchaꞌ ferdyeꞌtumtyiꞌ Jenꞌ, paj qui därsiꞌyaꞌ ferdyeꞌ muꞌ yuꞌtyinac miꞌin paj qui fer buꞌyi miꞌin, paj qui tyumꞌchutidyeꞌtum jiꞌcajñetiñeꞌ miꞌin mọꞌ carijsis jịꞌĉojtiñes miꞌin. 12Maꞌjodyeꞌtum yoshoropaij jémac Jenꞌ, muꞌ aty jämꞌ yuꞌtyinac miꞌin paj qui miꞌinmun tupuj Jenꞌyaꞌ bäꞌyi miꞌin mạijquedyeꞌĉan Jenꞌsiꞌ muꞌ, räjtumdye Jenꞌtyiꞌ ñuruꞌtyity in, muꞌcheꞌ raꞌ räj soꞌminac ñịbeꞌyedyeꞌ muꞌ. 13Muꞌ nash jiꞌc̣honsinꞌ tsun tojmadyeꞌĉantyiꞌyaꞌ ayoꞌ, chat qui yuꞌsinꞌ paj qui tsun ayotuja muꞌ mạꞌjeyacdyety Ạvaꞌ muꞌ. 14Ạvaꞌyaꞌ muꞌ, muꞌ Jenꞌ jiꞌc̣honsinꞌ tsun judyeyaꞌ c̣hiconꞌjityisinꞌ juchaj tsun.
Cristo jämꞌjibusinꞌ yuꞌsinꞌ Jenꞌyaꞌ
15Cristo cạvetety jiquej in, muꞌ jorojĉanjisinꞌ muꞌ jam nạijtyejaty Jenꞌ, ĉaĉaij na Jenꞌ buꞌyi muꞌ Cristo.#1:15 Juan 1:18 Muꞌ nash tashcheꞌ buꞌyity Jenꞌtyiꞌ ạvaꞌ muꞌ, muꞌ jam jämꞌtacdyeꞌ, mọꞌ na jämꞌtacdyeꞌ jam meꞌ in, anic moch in. 16Muꞌ Jenꞌ Cristotum räj jämꞌtacsi jedyeꞌ in, mạyedyeꞌches in judyeyaꞌ jacches in, jorojĉansiꞌ in judyeyaꞌ jam jorojĉansiꞌ in, anjer in judyeyaꞌ sọyoꞌ in, judyeyaꞌ fer buꞌyity in, judyeyaꞌ ayoꞌbuꞌyity in, judyeyaꞌ yụꞌtactyiꞌ chimeꞌ in, meꞌ meꞌ räj jämꞌtacsi muꞌ Jenꞌ Cristotum, chimeꞌdye Cristodyes jämꞌtacsi muꞌ Jenꞌ. 17Jambiꞌdyemꞌ jämꞌtac jedyeꞌ in, tạꞌcaty muꞌ muꞌyaꞌ Cristo, muꞌdye räj yụꞌtacsi jämꞌ buꞌyiꞌ in räj jämꞌtacdyeꞌ muꞌ.#1:17 Juan 1:1-3 18Cristo joꞌnoꞌ buꞌyi muꞌincheꞌ in anicjetetycheꞌ Jenꞌ in, muꞌin na aꞌ buꞌyi in, muꞌ tsạꞌchucsi. Muꞌ tashcheꞌ buꞌyity Jenꞌtyiꞌ Ạvaꞌ muꞌ, muꞌ tashcheꞌ vañinyebantyiꞌ säñity jiquej, mọꞌdyes qui tashcheꞌ buꞌyi ayoꞌbuꞌyi, räjdyes ayoꞌbuꞌyi muꞌ. 19Ĉụiꞌsiꞌyaꞌ dyijyedyeꞌ muꞌ, muꞌ Jenꞌ yi paj qui muꞌ Cristo meꞌchupte räj Jenꞌsiꞌ dyijyedyeꞌ muꞌ judyeyaꞌ ferdyeꞌ muꞌ, muꞌ nash Jenꞌ buꞌyi. 20Muꞌ Jenꞌ dyijyi jayuꞌti muꞌ Cristo, muꞌ yụꞌtacsi paj qui räj jacches jedyeꞌ in judyeyaꞌ mạyedyeꞌches jedyeꞌ in räjtumdye jajbuꞌyety in, paj qui räj jämꞌjibun Jenꞌtum muꞌin in, mọꞌ chäsh muꞌ yụꞌtaquis croshcheꞌ jiquej muꞌ, mọꞌyaꞌ c̣hẹiꞌyaꞌjeyacsi Jenꞌ räj in.
21Jiquej miꞌin anic moch bäꞌyi Jenꞌyaꞌ miꞌin, anic fạ́quetinte Jenꞌ jiquej miꞌin, meꞌ miꞌin aꞌc̣hisyaꞌ dyijyedyeꞌ miꞌin, ac̣hiꞌ bäꞌyi jiquej miꞌin. 22Q̂uinꞌ qui namꞌ muꞌ Jenꞌ yuꞌtyinac aty jämꞌjibun Jenꞌyaꞌ miꞌin sänꞌdyeꞌyaꞌ Cristosyaꞌ muꞌ, mọꞌ jämꞌjibunac miꞌin Jenꞌtum. Q̂uinꞌ aty rụijtyity miꞌin aty qui jam jụꞌñiij miꞌin, meꞌ raꞌ yuꞌtyinac ĉụiꞌsiꞌyaꞌ vej muꞌ. 23Miꞌin qui namꞌ jemoñeꞌ yejĉoij anicyi Jenꞌcheꞌ, fer buꞌjamꞌ, paj qui jam p̂ucushyi miꞌin yocsiꞌtum jedyeꞌ in, mijam raꞌ chimeꞌ farajjebitinte mọꞌ jämꞌsiꞌ p̂eyacdyeꞌ Jenꞌsiꞌ muꞌ. Yejĉojamꞌ mọmoꞌ bisvac mọꞌ soꞌminacsiꞌ raꞌ Jenꞌ, mọꞌ jiꞌjäqueꞌsiꞌ mọꞌ p̂eyacdyeꞌ mọꞌ seꞌvetiñes miꞌin. Ọij p̂eyacdyeꞌ paiꞌ jaccheꞌ seꞌveꞌ in. Jenꞌ yuꞌtyin yụ jiquej paj qui yụ voroꞌtacsi mọꞌ p̂eyacdyeꞌ paiꞌ janaꞌ ĉụiꞌ bäꞌyity in jéyacsi yụ.
Pablo jayuꞌti Jenꞌ paj qui muꞌ nọ́tacsi anicjetety Jenꞌ in
24Meꞌ tsanꞌ ñịbeꞌ cạveꞌ yụ voroꞌtacdyeꞌyaꞌ miꞌindyes Jenꞌsiꞌ p̂eyacdyeꞌ muꞌ, maꞌjoij qui namꞌ bäꞌyi yụ. Meꞌ yụ ñịbedyesyaꞌ jịꞌcätsepte Cristos ñịbedyes muꞌ, yódyemꞌ muꞌ ñịbeꞌ cạvise jiquej u muꞌindyes in anicjetetydyes Jenꞌ in, muꞌin nash Cristoty aꞌ buꞌyity in, meꞌdye yụ chimeꞌ ñịbeꞌ cạveꞌ ĉụiꞌsiꞌ aꞌ yụ muꞌindyes in voroꞌtacdyeꞌyaꞌ muꞌin. 25Muꞌ Jenꞌ yuꞌtyin yụ paj qui yụ úñi anicjetetydyes in. Mọꞌ yụꞌtacdyeꞌ soꞌminsiꞌ yụ paj qui yụ nọ́tyeyac miꞌin, muꞌ mạꞌjeꞌ paj qui yụ räj jịꞌchiqueyacsi p̂eyacdyeꞌ muꞌ. 26Mọꞌ jiꞌchäyitidyeꞌ muꞌ, mọꞌ jam jịꞌchiqueyacsis urucyaꞌ muntyiꞌ jiquej in, paiꞌ buꞌyity in, q̂uinꞌ qui namꞌ muꞌ Jenꞌ jiꞌchäquiyisinꞌ tsun muꞌtyiꞌ ñuruꞌtyity tsun. 27Jenꞌ dyijyi jịꞌchiqueyacsi muꞌtyiꞌ ñuruꞌtyity in ĉụiꞌsiꞌ dyijyedyeꞌ muꞌ, mọꞌ jam chị́yeptes urucyaty muntyiꞌ jiquej in. Mọꞌ dyijyedyeꞌ muꞌ anic jiyiꞌ där jämꞌsiꞌ muꞌ, mạꞌjeꞌ paj qui räj jacchety muntyiꞌ in seꞌveꞌ in p̂eyacdyeꞌ muꞌ, mọꞌ p̂eyes junꞌ chuc muꞌ Cristo jajbuꞌyinac ĉojtyiꞌĉan miꞌin, muꞌ Jenꞌyadyety yuꞌtyinac muꞌ mạijquedyeꞌtumtyiꞌ Jenꞌ, mọꞌ bisvaꞌtiñes miꞌin paj qui muꞌyaꞌ bäꞌyi miꞌin.
28Mọꞌdyes Cristos p̂eyacdyeꞌ muꞌ voroꞌtacsi tsun räj muntyiꞌ in. Muꞌ Jenꞌ soꞌmin tsun räj dyijyedyeꞌ muꞌ anicsis, paj qui dyijyedyeꞌtum carijtaqui tsun. Tsun fạraꞌjeĉunacsebi aꞌc̣his dyijyedyeꞌ muꞌin, judyeyaꞌ jịꞌchiyacsi tsun paj qui rụij bäꞌyi in judyeyaꞌ paj qui fer buꞌyi ĉojtyiꞌĉan muꞌin, meꞌ raꞌ tsun yụꞌtacsi Jenꞌsiꞌyaꞌ vej muꞌ muꞌin Cristoty in. 29Mọꞌdyes fer carijtaqui yụ Jenꞌdyes mọjoꞌchasyaꞌ ferdyeꞌ soꞌminsiꞌ yụ muꞌ Cristo, mọꞌyaꞌ úñi yụ jịꞌchiyacsi yụ Jenꞌsiꞌ p̂eyacdyeꞌ muꞌ.
Currently Selected:
Colosasĉantyidyes 1: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
