Jäqui'ves Timoteodyes 4
4
Yi Pablo: Yejĉova carijtaca Jenꞌdyes mi
1Yụ raꞌ soꞌmeye ọij p̂eyacdyeꞌ Jenꞌsiꞌyaꞌ vej muꞌ judyeyaꞌ Jesucristosyaꞌ chimeꞌ muꞌ, muꞌ raꞌ jịꞌcäts yụꞌtacsity juchadyeꞌyaꞌ räj muntyiꞌ in, säñity in judyeyaꞌ jam säñity in. Meꞌ raꞌ muꞌ atsijbanyaꞌ ayoꞌbuꞌbanyaꞌ. Mọꞌdyes yụ fercheꞌ jéye 2paj qui jam farajjeꞌ mi voroꞌtacsi mi Jenꞌsiꞌ p̂eyacdyeꞌ muꞌ, meꞌ raꞌ tsanꞌ carij buꞌyi mídyes, meꞌ raꞌ tsanꞌ jam, yejĉoij qui na ramꞌ voroꞌtacsi mi. Jịꞌchiyacseva, chimeꞌ voroꞌtacseva, jụj jaꞌyacseva, fạraꞌjeĉunacseva cäjsisyaꞌ dyijyedyeꞌ muꞌin, jiꞌmaꞌyacseva chimeꞌ paj qui Jenꞌdyes bäꞌyi in, tyumꞌchuti ramꞌ voroꞌtacsiyaꞌ. 3Ayijbanꞌ raꞌ tupudyeꞌ, muntyiꞌ raꞌ in aty raꞌ jam mạꞌjeꞌ seꞌvebanꞌ in mọꞌ rụijsis p̂eyacdyeꞌ, muꞌin qui ramꞌ quevacsi in yoc yoc jịꞌchiyacsity in, cäjsis jiꞌchäyitidyeꞌ tuiꞌtyiꞌ in, muꞌin jéyacsity in mọꞌ mạꞌjes seꞌveꞌ in, ĉaĉaij na raꞌ jam mạꞌjeꞌ rụijsis p̂eyacdyeꞌ seꞌveꞌ in. 4Murujrutyebanꞌ qui raꞌ in mọꞌ rụijsis p̂eyacdyeꞌ Jenꞌsiꞌ muꞌ, urucyas qui ramꞌ seꞌvebanꞌ in mọꞌ muntyis dyijyedyeꞌ jiquej in. 5Jam raꞌ mi meꞌ, rụij raꞌ dyijyim. Meꞌ raꞌ tsanꞌ ñịbeꞌ cạviyaꞌ mi, dyichchuti qui na ramꞌ mi. Yejĉova voroꞌyeva mi, ĉaĉaij na mọꞌ carijtacdyeꞌ mi, jịꞌcätsevaꞌ mọꞌ yụꞌtacdyeꞌ soꞌminsiꞌ muꞌ Jenꞌ.
6Aty raꞌ c̣hẹiꞌyaꞌ chaꞌsheꞌ sänꞌdyeꞌ yụ, ujan nash raꞌ yụ in, jeñej jiꞌcoꞌshayacdyes Jenꞌdyes, meꞌ raꞌ shupquiꞌ sänꞌdyeꞌ yụ. 7Jeñej yirity majmaijtyiꞌ muntyiꞌ anic jiꞌferety majmadyeꞌ, meꞌ yụ chimeꞌ Jenꞌdyes jiquej, jam farajjeꞌ yụ, chijämꞌ jịꞌcätseꞌ yụ mọꞌ yụꞌtacdyeꞌ soꞌminsiꞌ yụ muꞌ Jenꞌ. 8Mọꞌdyes aty jäꞌmiiꞌtyiꞌ yiris bijodyeꞌ yụ́dyes, mọꞌ rụij yụꞌtacdyeꞌ yụ. Muꞌ ayoꞌ, muꞌ rụij jịꞌcäts yụꞌtacsity muntyiꞌ, muꞌ raꞌ soꞌmin yụ bijodyeꞌ ayijyaꞌ mọꞌ jadyiquis tupudyeꞌ. Jam raꞌ yụmꞌ yirity soꞌmac bijodyeꞌ, muꞌ raꞌ soꞌmacsi räj muꞌin in tyi chuc fer mạꞌjetety in muꞌin bisvaꞌtety räjĉan in.
Muꞌdyes p̂eyacdyeꞌ Timoteodyes
9Yụꞌtyevaꞌ ferdyeꞌ mi paj qui cavin ĉushdyiꞌ mi. 10Muꞌ na Demas mọjoꞌchaꞌ dyijtuiꞌ jacches jedyeꞌ, farajjitaquin yụ, Tesalónicaĉan qui jịjcaban muꞌ. Muꞌ na Crescente Galaciaves jac muꞌve jịjcaban muꞌ, muꞌ na Tito Dalmaciaves jac jịjcaij muꞌ chimeꞌ. 11Muꞌdyety yirity Lucas penꞌdyetun yụ. Aty raꞌ atsijyaꞌ mi quevimtute ram muꞌ Marcos, tujtume paj muꞌ ñútyin yụ carijtacdyeꞌ yụ. 12A nash jutete yụ muꞌ Tiquico Efesoĉan. 13Chimeꞌdye atsijyaꞌ mi tujtubutiꞌ raꞌ mi fajchety quịꞌsiꞌ yụ chimeꞌ, muꞌ yạjtuquity jiquej yụ Troasĉan, Carposiꞌĉan acaꞌ muꞌ. Chimeꞌdye raꞌ tucsim quirca in, judyeyaꞌ mọꞌin shoꞌpaꞌches in, dadamꞌ raꞌ mọjoꞌchaꞌ mọꞌ tuiꞌ raꞌ mi.
14Muꞌ carijtyety fiyero, Alejandro, anic ñịbeꞌ jiꞌcavin yụ fáquin yụ, Ayoꞌdye raꞌ chịj, muꞌ raꞌ meꞌjete junꞌjin chuc yụ jiquej. 15Areꞌĉa mímun tyejoij ĉaĉaij na muꞌ anic fer fạ́queꞌ ọij p̂eyacdyeꞌ rụijsis mọꞌ voroꞌyejas tsun.
16Tashcheꞌ jiquej jiꞌcavitiyaꞌ yụ ayoꞌyaꞌ in, mijam tyi ñutsjityin yụ in, räj farajjitaquin yụ in. Yụ qui namꞌ cọdyete Jenꞌ paj qui jam dyijtucsebi juchaj muꞌin. 17Muꞌ qui namꞌ Ayoꞌ tsun penꞌdyetun yụ jiꞌmeꞌtacdyeꞌyaꞌ, muꞌ soꞌmin ferdyeꞌ yụ paj qui tupuj yụ voroꞌtacsi Jenꞌsiꞌ p̂eyacdyeꞌ muꞌ muꞌin jam judío in, mọꞌdyes qui yụ räj jéyacsi Jenꞌsiꞌ p̂eyacdyeꞌ muꞌ. Muꞌ qui namꞌ Ayoꞌ tsun jiꞌc̣hoñin yụ paj qui jam ujanve yụ in, muꞌin jeñej buꞌyi tsäquiꞌyity pupujriꞌ in, meꞌ buꞌyi shupquiꞌ muꞌin in. 18Jenꞌdye raꞌ yejĉoij ñutsjityin yụ räj aꞌc̣hisyaꞌ jedyeꞌ, chat qui raꞌ meꞌsiꞌ muꞌdye raꞌ yuꞌtyin yụ muꞌsiꞌĉandyety bäꞌyedyeꞌ mạyedyeꞌcheꞌ yụ yócheꞌdyemꞌ ayoꞌbuꞌyi u. ¡Paj jam mọtsiꞌ timaꞌcacdyemꞌ! Paj meꞌ.
Jadyiquis voryetacdyeꞌ Pablos
19Vorjevaꞌ mọꞌ Priscila judyeyaꞌ muꞌ Aquila judyeyaꞌ muꞌ Onesíforo chimeꞌ, räjtumdyes chätidyeꞌ muꞌ. 20Erasto jiꞌyajcatity Corintoĉan, muꞌ na Trófimo yạjquite yụ Miletoĉan, japacjoij muꞌ. 21Ferjita cavin raꞌ ĉushdyim jambiꞌdyemꞌ ayij tupudyeꞌ tsịvuꞌvudyes. Uts Eubulo vorjin mi judyeyaꞌ uts Pudente, Lino judyeyaꞌ Claudia, räjtumdye muꞌin anicjetety Jenꞌ úyaty in vorjin mi chimeꞌ in.
22Yụ cọdyete muꞌ Jesucristo Ayoꞌ tsun paj qui muꞌdye penꞌdyetun ĉojtyiꞌĉan mi. Chimeꞌdye cọdyeteij paj qui soꞌminac ñịbeꞌjitidyes räj miꞌin.
Currently Selected:
Jäqui'ves Timoteodyes 4: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
