Jäqui'ves Timoteodyes 3
3
Junꞌ chuc raꞌ muntyiꞌ in jadyicve raꞌ tupudyeꞌ
1Jemoñeꞌ jämꞌ chịj mi junꞌ chuc raꞌ muntyiꞌ in bäꞌban aty ayijyaꞌ jadyicves tupudyeꞌ. Meꞌ raꞌ carij bäꞌbajshaꞌ Jenꞌdyes, ĉaĉaij na raꞌ muntyiꞌ in ac̣hiꞌ raꞌ bäꞌban in. 2Muꞌin raꞌ ĉụiꞌ mạꞌjibun in, querec̣ha raꞌ mọmoꞌ maꞌjotyebajte in, judyeyaꞌ raꞌ fibiꞌnaĉan in chimeꞌ raꞌ vaꞌbunnaĉan in. Muꞌin raꞌ jam damꞌ dyijtubajte Jenꞌ in, ñinaquity qui ramꞌ bäꞌyi in, mijam raꞌ chicaĉan jenꞌ muꞌin judyeyaꞌ tseꞌ muꞌin, mijam raꞌ yoshoropaij yi chimeꞌ in. 3Chimeꞌdye raꞌ jam ñịbeꞌ ĉọcsi yoctyiꞌ in, där raꞌ aꞌc̣his jämꞌtaqui in, judyeyaꞌ raꞌ mistacsity in, mijam raꞌ damꞌ ĉujcabun in, chuchucsaty qui ramꞌ in. Anic raꞌ räj fạ́quebanꞌ in jụꞌñis chuc jämꞌsiꞌ dyijyedyeꞌ in. 4Chimeꞌdye raꞌ jiꞌmincaĉan ĉụiꞌtyiꞌ chätidyeꞌ muꞌin, judyeyaꞌ raꞌ ĉụiꞌsiꞌ vaꞌbunyedyeꞌ cạqui in, yedyej qui raꞌ vaꞌbunyedyeꞌtum bäꞌyi in. Mọꞌ qui ramꞌ dyijtuiꞌ in ĉụiꞌ qui ramꞌ mạꞌjiti in, uyaꞌyaꞌ qui raꞌ mạꞌjebajte Jenꞌ in. 5Meꞌ tsanꞌ jeñej buꞌyi qui raꞌ anicjetety Jenꞌ in, meꞌ buꞌyi qui raꞌ yuꞌbun in, jeñej qui itŝiꞌ ferdyeꞌ Jenꞌsiꞌ muꞌ meꞌ ĉọbite in, anic qui raꞌ yocve bäꞌban in.
Meꞌtyity raꞌ in mijam raꞌ junꞌ penꞌdyetucsi mi. 6Meꞌtyity q̂uinꞌ in sitacsebi acaꞌ muntyis muꞌin, vaꞌves jiꞌchäyitidyeꞌ jéyacsi muꞌĉantyiꞌ in. Pạrej seꞌ jaꞌyacsi p̂en in, jam dyijyedyeꞌtumsiꞌ in, ĉụiꞌsiꞌ juchaj mọꞌin cajotaquiꞌ in, mọꞌ mọmoꞌ bächäcsiꞌ in yịjyi aꞌc̣his dyijyedyeꞌ ĉụiꞌsiꞌ mọꞌin. 7Mọꞌin p̂en in, meꞌ tsanꞌ meijquejĉoiꞌ jiꞌchäyitiꞌ tsanꞌ ĉútiꞌ in, judyeyaꞌ yoc yoc jiꞌchäyitidyeꞌ seꞌveꞌ tsanꞌ in, mijam qui namꞌ méquiꞌ chị́yebanꞌ in rụijsis p̂eyacdyeꞌ Jenꞌsiꞌ muꞌ. 8Yojdyemꞌ muꞌin cọcojsiꞌ jiquej u in, Janesvun judyeyaꞌ Jambresvun,#3:8 Exodo 7:11 muꞌin fạ́queptety in p̂eyacdyeꞌ Moiséssiꞌvun jiquej muꞌ, meꞌdye chimeꞌ q̂uinꞌ uts cäj jịꞌchiyacsity in fạ́quepte in rụijsis Jenꞌsiꞌ p̂eyacdyeꞌ muꞌ. Anic vaꞌve dyijyi in, penjan Jenꞌdyes in. 9Jam qui na ramꞌ junꞌ yejĉoij jiꞌtseꞌeꞌ in jiꞌchäyitidyeꞌ muꞌin, ĉaĉaij na raꞌ muntyiꞌ in cạvacsebi itŝiꞌ dyijyedyeꞌ muꞌin, yojdyemꞌ muꞌin muntyiꞌ jiquej u in cạvacsebi in itŝiꞌ dyijyedyeꞌ muꞌinsiꞌ in Janessiꞌ judyeyaꞌ muꞌ Jambressiꞌ jiquej.
Pablos p̂eyacdyeꞌ jayuꞌtyiyitis Timoteo
10Anic chäyibutim jiꞌchäyitidyeꞌ yụ, chimeꞌdye chäyitim junꞌ chuc bäꞌyi yụ, Jenꞌdyes bäꞌyi yụ, judyeyaꞌ mumꞌ dyijtute yụ, mijam farajjeꞌ anicyedyeꞌ yụ, judyeyaꞌ dyich buꞌyi bäꞌyi yụ, judyeyaꞌ mạꞌjeyacsi muntyiꞌ yụ, meꞌ bäꞌyi yụ, mijam méquiꞌ farajjepte yụ Jenꞌsiꞌ dyijyedyeꞌ muꞌ. 11Chimeꞌdye chịj mi junꞌ chuc jiquej ñịbeꞌ jiꞌcavin yụ in muꞌin Antioquíaĉantyiꞌ in judyeyaꞌ muꞌin Iconioĉantyiꞌ in judyeyaꞌ muꞌin Listraĉantyiꞌ chimeꞌ in.#3:11 Úñedyeꞌ 13:50; 14:5; 14:19 Meꞌ tsanꞌ fersiꞌ ñịbedyes jịꞌĉojtyeꞌ yụ muꞌinyaꞌ in, muꞌ qui namꞌ Ayoꞌ tsun räjĉan jiꞌc̣hoñin yụ carijsisyaꞌ. 12Anicdye meꞌ, räj muꞌin mạꞌjeꞌ chiquetety Cristo Jesús in, meꞌtumdye raꞌ ñịbedyes jịꞌĉojtyeꞌ in. 13Meꞌdye q̂uinꞌ meij mọmoꞌ raꞌ jịjcaij ac̣hiꞌ bäꞌyi in, muꞌindye cäjsis raꞌ p̂eyacdyeꞌ jịꞌchiyacsity in, dadamꞌ raꞌ väñätucseban muntyiꞌ in, ĉụiꞌsiꞌ ramꞌ väñädyeꞌ cäc̣häꞌchuiꞌ in.
14Mi qui na ramꞌ jam meꞌ, jam raꞌ damꞌ farajjeꞌ mi ọij jiꞌchäyitidyeꞌ seꞌves jiquej mi, yódyesdyemꞌ anicjeꞌsiꞌ um. Mi nash chị́yacsi anic rụijtyity in muꞌin jiꞌchäyintyiꞌ jiquej in. 15Ịtsucdyemꞌ jiquej mi aty seꞌveꞌ mi sánacdyeꞌ Jenꞌsiꞌ muꞌ, mọꞌ soꞌmin dyijyedyeꞌ paj qui c̣hoñi mi anicyedyeꞌyaꞌ Jesucristocheꞌ mi. 16Ọij sánacdyeꞌ Jenꞌsiꞌ muꞌ räj soꞌmacsi Ạꞌedyeꞌyaꞌ muꞌ, räj mọꞌ jiꞌchäyisinꞌ tsun judyeyaꞌ jịꞌchuiꞌ yuꞌsinꞌ tsun judyeyaꞌ fạraꞌjiĉunꞌsinꞌ cäjsisyaꞌ jedyeꞌ, judyeyaꞌ jísinꞌ junꞌ chuc raꞌ rụij bäꞌjaꞌ tsun. Meꞌ meꞌ jísinꞌ Jenꞌsiꞌ sánacdyeꞌ muꞌ. 17Meꞌ muꞌ yụꞌtactyiꞌ Jenꞌtyiꞌ muꞌ tupuj rụij carijtaqui Jenꞌdyes, meꞌ raꞌ chat mijam raꞌ yiris jedyeꞌ jayej, dyijyedyeꞌtum raꞌ carijtaqui Jenꞌdyes.
Currently Selected:
Jäqui'ves Timoteodyes 3: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
